Imatiwu 24 - IWE ỌNỊNỊ

Ijeesu ka o yi vee kù di irehi Ohomorihi ò wú

¹ Ijeesu ộ jịnẹ hụụnị irehi Ohomorihi vẹ, dị ezirẹma anị ká a vẹ ka ẹnị ẹ̀ sị zụ̀ ọọ, a mẹmẹ dà irehi Ohomorihi nị.

² Dị Ijeesu kà a yị wa ka, “U wee re avaba irehi ẹnẹnị nịnị? Ịzẹyịza m maa kà wụ nị, ẹ yị nyị ịrẹta ikonya ana a vaa navọ tụ́ ịrẹsụ ọsa. Vi e vee wú waa ha saka-saka nị.”

Apọtẹrẹwa ẹzẹtẹ ẹhẹ

³ Ijeesu ộ nọ ịrẹsụ Ataba Orivi, dị ọ na yaayịtẹ ịzọọ nị. Dị ezirẹma anị tangwa ká a vẹ dị ẹ ka, “Kà ẹ yị ụmẹ ọnị ịsa ẹnẹnị vaa sịị mẹ. Sị ẹ vị apọtẹrẹwa ana vaa sị zụ̀ ka waa vaa vaavẹ, ọnịrị ka ẹhẹ raa vaa ta?”

⁴ Dị Ijeesu tụ́ ohi, dị ọ ka, “Si eyi pe ẹngụ awụ nịnị, oo! Asị ụ zẹẹ ka à sị wụ nịnị nyeeyi!

⁵ Aza ẹnyị vaa rị ịrẹha amị, dị ẹ vẹ dị ẹ ka ẹnị ẹ vị Ikirisiti nị, dị ẹnịnị vene aza ọrụrụ-ọrụrụ.

⁶ Ụ vaa wụ́ ekuku ịrẹkụ nịnị ọnịrị ụha ịrẹkụ nịnị, ama asị ụ zẹẹ ka ayị awụ nịnị ọ̀ vazi! Ẹ yị zụ nyị ka ọ yị vavọọ yà, ama ẹzẹtẹ ẹhẹ ọọ̀ yị vẹ.

⁷ Anẹkụra ẹnyị vaa kwẹẹtẹ tù ọsa, dị ẹkụra ohinọyị ẹnyị rẹ kwẹẹtẹ tù ọsa. Ụngwẹ vaa kụ̀, ẹtẹ vee henyi jigi-jigi aha ọrụrụ-ọrụrụ.

⁸ Avaba ẹsẹnị aa sịị zụ̀ ka vị ụyọrị sẹsẹ nyima avọọ nị.

⁹ Ịjọnọọ a vaa za wụ nịnị dị a ka à sị ụya rị wụ nịnị, dị a wụ wụ nịnị. Avaba anẹhẹ vaa nyị ịhyẹrẹ awụ nịnị agụvị amị.

¹⁰ Aza ọrụrụ-ọrụrụ vaa hyẹdụ hụụnị ẹdọwụ ẹnịnị. Ịjọnọọ di eyee sì iruvo ẹngụ, dị ẹ rẹ yaa kụ́ ayị ẹngụ.

¹¹ Ọnịsẹ ireche nịnị vaa vẹ, di e vene aza ọrụrụ-ọrụrụ.

¹² Agụvị ka ịvị vaa banyị ẹnẹmẹhị, aza ọrụrụ-ọrụrụ ẹ yị kụkụ sì ịrẹyị aza a mẹ̀ vọrọ.

¹³ Ama ọza ana àa sị ẹngụ dọ ọ pooro ne tù ẹzẹtẹ, ọnị a vaa dọ ọ há nị.

¹⁴ A vaa kà enube ọyịza ịjọva Ohomorihi ịnị avaba ẹhẹ, agụvị dị ọ̀ vị ivenu yị avaba anẹhẹ; ịjọnọọ ọgọnị, dị ẹzẹtẹ ẹhẹ vẹ.

¹⁵ Agụvị avọọ, u vee re ‘Ịsa Odivi aha ọnịnị ịzị ẹ yị vọrọ’ ọnị Ịdanịyẹrị ọnịsẹ kà ịrẹyị anị. (Ọza ana àa kà iwe ọnọnị, ò re ka ọnị ộ yẹ ịrẹyị ọnọnị!)

¹⁶ Ịjọnọọ aza ana aa yà Ijudiya, è zwe nọ ịrẹsụ ataba!

¹⁷ Ọza ana àa yà ịrẹsụ irehi, asị o chí nọ ini eehi na sị ịsọnyị-ịsọnyị!

¹⁸ Ọza ana àa rẹ yà ịnị aarẹ, asị ọ varẹma nọ ini eehi na sị awuru anị!

¹⁹ Ọ vaa daa divi yị ọnịrẹẹ nịnị ọnịrị aza ana sị ozi rị ụvọ ịnị ụmẹ ọnọọ.

²⁰ Waa mẹ̀ aduwa nịnị ka asị ịrẹyị ẹnẹẹ mẹ ịnị ụmẹ ọgụ, asị ọ rẹ vị ụmẹ ẹkụhị ụhwọtụ!

²¹ Agụvị ka ịhị ọnọọ ụya ene vee chí hi ẹtẹ, ẹ̀ yị vịdị vavọọ nyị ụya da, Óhomorihi mẹ̀ hụrẹ mẹ ẹhẹ pooro ve tù ọyaanị. A mā rẹ vana vavọọ nyị ị́rẹma anị.

²² Ẹ̀ yị vị Ohomorihi nyị hụụnị ẹkụhị ẹnẹẹ, ẹ yị hyakụ nyị ọza ikonya ana aa há. Ama agụvị aza oni Ohomorihi sị nyị, ộ nyị hụụnị ẹkụhị ẹnẹẹ.

²³ Ụmẹ ọnọọ ọza ọ̀ọ kà a wụ nịnị ka: ‘Re, Ikirisiti yọ!’ à vị ka ‘Re ọnị ọ yà ịzọsọọ avọọ nọ!’—asị ụ dọ ọ wụ́!

²⁴ Agụvị ka onireche nịnị ana ka ẹnị vị ikirisiti, ọnịrị ọnịsẹ ireche nịnị vaa kwẹẹtẹ, dị ẹyaa mẹ̀ ụkọrọ ohyozirenu ẹbanyị-ẹbanyị, agụvị ẹ̀ nyẹngụ si vene aza oni Ohomorihi sị nyị, ẹ̀ẹ zụ mẹ̀ ẹ.

²⁵ Re, mee vịdị jintu sị ọọ kà wụ nịnị!

²⁶ Agụvị avọọ, ọza ọ̀ọ kà a wụ nịnị ka: ‘Re, Ikirisiti ọ yà ịnị ụnọmị avọọ nị’, asị ụ nọ ịzọọ nịnị! Ẹ̀ẹ rẹ kà a ka: ‘Ọ yà ini aku ịzọsọọ’, asị ụ dọ ọ wụ́ nịnị!

²⁷ Ẹmị Ozi ọza onigirima vị ana vaa vaavẹ anka ị́nyanya mẹ̀ẹ̄ rị hụrị eyi ọnị ọyịị̄ zịị hụrẹ na ngụ ịzị ọọ̄ zịị naa ngụ ẹtẹ avọọ.

²⁸ Agụvị ka ịzị oku ọ̀ọ yà, ịzọọ ụ́ba nịnịị̄ kụ́ụ gụ nị.”

Ọyị vaavẹ Ozi ọza onigirima

²⁹ “Ịjị ụmẹ ụyọrị ẹnẹnị ọ̀ọ ta kẹnẹ, ọyị vee hozi, ụhwẹ ọ yị kụkụ vaa vwẹtẹ, dị ụzọmị nịnị jị hụụnị ihinẹba, dị ụkata ẹbẹẹba re henyi.

³⁰ Ịjọnọọ, dị a nyị apọtẹrẹwa ẹmị Ozi ọza onigirima ẹ́bẹẹba. Dị avaba anẹhẹ aa jị òrèrè, di e re ka ẹmị Ozi ọza onigirima aa vẹ ini eguhi ẹbẹẹba beri ụkata ọnịrị igirima.

³¹ Dị ọpanyị ọbanyị ọnya sụ́ ịrẹyị, dị mị tụ́ anggẹẹrị amị nịnị ka ẹ̀ nọ avaba ẹhẹ, dị ẹ̀ na kụ́ avaba aza amị gụ hụrẹ avaba aha ịzị ẹhẹ ọnịrị ẹbẹẹba na ta hi.

³² “Agụvị avọọ, sị ọchị ezu zama ịrẹyị ọnọnị re nịnị: Ịjị àa há avọ, di ee nyị avị nị, wâ yẹ nịnị ka ị̀rẹ̀sụ̀ aa vẹ.

³³ Avọọ gẹdẹ-gẹdẹ, wèe re ịsa ẹnẹnị nịnị, yẹ nịnị ka maa vaa vẹ, mâ hyakụ va sị ngụ enoze bẹẹ.

³⁴ Ịzẹyịza m maa kà a wụ nịnị nị, aza ene hi ẹhẹ booro aanị, ẹ yị vaa taa hụụnị ẹhẹ, dị avaba ịsa ẹnẹnị ẹ̀ mẹ.

³⁵ Ihinẹba ọnịrị ẹhẹ vaa ta, ama àa vị ịrẹyị amịị yọ, o yi vee vú.”

Wee zí nịnị!

³⁶ “Ama ẹkụhị ọnọọ ọnịrị ụmẹ ọnọọ gẹdẹ-gẹdẹ ẹ yị nyị ọza ana yẹ. Anggẹẹrị nịnị ene hi ẹbẹẹba ẹ yị hyakụ yẹ, Ozi Ohomorihi ọnị ụvọta ọ yị hyakụ rẹ yẹ bẹẹ, ẹ̀ yị vị Ada amị ọnịnya kẹnẹ.

³⁷ Ịhị ẹmị Ozi ọza onigirima àaa vẹ, vị ọ vaa yà anka ụmẹ Inowa avọọ nị:

³⁸ Dị ọhaara enyi ọnọọ va kụ́ ẹhẹ, aza vị ana aa rị, di eyee hú, dị ẹyaa nyị ọnẹẹ, dị ẹyaa sị ozii gà ọnọrụ. Avọọ ẹ mẹ̀ mẹ pooro ne tù ẹkụhị oni Inowa ngụ ẹpa nị.

³⁹ Ama aza ana vọ ẹ yị yẹ ịsị aa vẹ pooro dị ọhaara enyi ọnọọ vẹ, dị ọ va kụ́ avaba ẹnịnị. Avọọ ọ mẹ̀ rẹ vaa yà, ịhị ẹmị Ozi ọza onigirima àaa vẹ nị.

⁴⁰ Ịhị ọnọọ aza ẹnị ẹẹva vaa yà ịnị aarẹ, dị a sị ọnya, dị a navọ ọsa.

⁴¹ Anyẹnẹẹ ẹẹva vaa yà aha ọnya, di e dudu aa kwọ ịsa, dị a sị ọnya, dị a navọ ọsa.

⁴² Agụvị avọọ wee zí nịnị, agụvị ka wẹ yị yẹ ụmẹ ana Ananyị yị aa sịị vẹ.

⁴³ Dị ụ wa yẹ nịnị ka adarehi ọ̀ọ yẹ ụmẹ oni oyi vaa sị vẹ, vị ọ yaanị ee sere ẹtẹ nị, dị ọ yị yaanị zẹẹ ka oyi ọ̀ chaka ọnị irehi.

⁴⁴ Agụvị avọọ ẹwụ nịnị ọ̀ rẹ vavọọ zị́, agụvị ka Ozi ọza onigirima vị ana vaa vẹ ịnị ụmẹ oni wè yi ro nịnị.

⁴⁵ Ẹnẹ vị ozi ahụ ọnịrẹyịzẹyịza ana yẹ ịrẹyị, ọnị ọga anị vaa sị ezi ahụ ana vọ chire ụvọ ka ọ̀ọ sị ịsọyịrịị yị wa ịnị ụmẹ ana vọrọ?

⁴⁶ Ọga anị ọ̀ọ vẹ di o ve tù ka ọ vavọọ aa mẹ nị, ozi ahụ ọnọọ vaa daa jẹ.

⁴⁷ Ịzẹyịza m maa kà a wụ nịnị nị, ozi ahụ ọnọọ ọ́ga anị vaa kụ́ avaba ogu anịị chire ụvọ nị.

⁴⁸ Ama àa vị ozi ahụ odivi ọnọọ kà a ka: ‘Ọga amị ee kù ọyịvẹ’,

⁴⁹ di o nyima di ee tụ́ ezi ahụ ana vọ, dị aa rị dị ọnịrị ohweche nịnị ee hú eche nị,

⁵⁰ dị ọga ozi ahụ ọnọọ vana vẹ kẹnẹ, ẹkụhị ọnya oni ò yi zí ọ eyi, ọnịrị ịnị ụmẹ ọnị ọ̀ yị yẹ.

⁵¹ Dị ọga anị za a, dị ọ sẹ̀ ẹ rugu-rugu, dị ọ sị ọgụ ọmọzakụyẹ yọ. Ịzọọ di ee nowu, dị aa rị anyị.”