Imatiwu 23 - IWE ỌNỊNỊ

Ijeesu ộ ka ọnọ agụvị ọzwọzọda nịnị

¹ Ịjọnọọ dị Ijeesu aa kà ịrẹyịị yị ọkọnị aza ẹnịrị ezirẹma anị nị.

² Dị ọ ka, “Ọzwọzọda nịnị beri Anihwarisi nịnị vị ana yà udi Imosiisi aa zụ̀ aza ọda.

³ Agụvị avọọ ịsị ẹ̀ẹ ka wa mẹ, sị eyi pe e dị ụ waa mẹ̀ ẹ nịnị! Ama asị u sị eyi sì wa nịnị, agụvị ka ẹ mā mẹ̀ ịsa ẹnẹẹ ka ọza ọ̀ mẹ.

⁴ Ẹnịnị vị eneē kune ẹnya ọrata, di e chema a tụra ọza ịza; ama ẹnị e yi vee sì ka ẹnị ẹ̀ hyakụ sị igege kanyị ọ, dị ẹnị è zịna a.

⁵ Avaba ịsa ẹnịnị vị ẹnẹ ẹẹ̄ mẹ ka aza è re e kẹnẹ. Ampo ana a chẹrẹ ịrẹyị Ohomorihi tụ́, dị a sụ́ ọ za ụvọ ọnịrị ibe, ẹnịnị vị ana banyị irenyi. Avọ awuru ẹnịnị vị ana rẹ gọdọ irenyi.

⁶ Àa nyị ịzị a kụ́ ẹngụ gụ aa rị eche, ọnịrị ini irehi ahẹkẹ Aniju, aha ene hu keekere eē sì ka ẹnị ẹ̀ yaayịtẹ nị.

⁷ Eē sì ka àa kụ́ ẹnị ini ohu. E reē sì ka avaba aza ẹ̀ẹ hị́ ẹnị Ọga.

⁸ Asị ụ rẹ̀ kà a ka àa hị́ wụ nịnị ‘Ananyị yị’! Ọza ịnya kẹnẹ ọ nyị wụ nịnị nị. Avaba awụ nịnị vị ẹyịnyara.

⁹ Asị a rẹ nyị ọza ọnị ụ waa hị́ ‘Ada ayị’ ịnị ẹhẹ ọnọnị nịnị, agụvị ka ọza ịnya kẹnẹ ọ vị Ada awụ nịnị; ọ yà ẹbẹẹba.

¹⁰ Asị ụ rẹ hị́ ọza ọnyọọnyị ‘Ọga’ nịnị! agụvị ka Ikirisiti ọnịnya ọ vị ọga awụ nịnị nị.

¹¹ Ọza ana àa vị ọzọbanyị hu ịnị ẹngụ awụ nịnị, a vọrọ ka ọ̀ vị ozi ahụ awụ nịnị nị.

¹² Ọza ana àa kà ẹngụ anị hịrẹ, vị Ohomorihi aa kà a chí nị, ọza ana àa kà ẹngụ anị chí, vị Ohomorihi aa kà a hịrẹ nị.”

Anihwarisi ọnịrị ọzwọzọda nịnị ẹ sị dà

¹³ “Wa sị dà nịnị, ẹwụ nịnị ọzwọzọda ọnịrị Anihwarisi nịnị. Ẹwụ nịnị ọmọzakụyẹ! Wee gu oze hi aza ka asị ẹ ngụ ịzị Ada ayị ẹbẹẹba yà aa mẹ ịjọva. Ẹwụ nịnị ụvọta ọ yị ngụ eehi, aza ana aa ngụ eehi, wẹ yị zẹẹ wa nịnị.

¹⁴ [Wa sị dà nịnị. Ẹwụ nịnị ọzwọzọda ọnịrị Anihwarisi nịnị. Ẹwụ nịnị ọmọzakụyẹ! Waa sị irikichii dọ osoku nịnị irehi, dị ụ waa mẹ apẹẹ mẹ̀ aduwa ọgọdọ nịnị; agụvị avọọ ẹwụ nịnị ọ vaa rị ụyaa hu nị.]

¹⁵ Wa sị dà nịnị. Ẹwụ nịnị ọzwọzọda ọnịrị Anihwarisi nịnị. Ẹwụ nịnị ọmọzakụyẹ! Ẹ yị nyị ịzị ụ wẹ̀ yị mā nọ ka wa na sị ọza vẹ ịnị ahẹkẹ awụ nịnị. Wàa raà sị ọọ vẹ, dị ụ vara a ozi ini ẹkụra huna ẹngụ awụ nịnị ụvọta.

¹⁶ Wa sị dà nịnị, ẹwụ nịnị ogweyi ana aa zụ̀ ọza oze. Waa kà a ka ọza ọ̀ọ sị irehi Ohomorihi hyeku, ẹ yị nyị ọ mẹ̀ ka. Ama ọza ọ̀ọ sị igooru ana yà ini irehi Ohomorihi hyeku ọ sị ụta rị.

¹⁷ Ẹwụ nịnị ogweyi ana vị ọnụra! Ye re ene hu? Igooru wáá yọ, à vị irehi Ohomorihi ana mẹ ka igooru ọnọọ ọ̀ vị ọnịnị?

¹⁸ Wa rẹ kà a nịnị ka: ‘Ọza ọ̀ọ sị ụta anaa yàā mẹ ịsọvọọ hyeku, ẹ yị nyị ọ mẹ̀ kà. Ama ọza ọ̀ọ sị ịsa ana yà ịrẹsụ ụta hyeku, ọ sị ụta rị.’

¹⁹ Ye re ene hu? Ịsa ana yà ịrẹsụ ụta wáá yọ nị, à vị ụta ana mẹ ka ịsa ọnọọ ọ̀ vị ọnịnị?

²⁰ Agụvị avọọ, ọza ọ̀ọ sị ụta hyeku, ịsa ana yà ịnị anị ọnịrị ụta ịnyẹmba, avaba anị ọ sị hyeku avọọ nị.

²¹ Ọza ọ̀ọ rẹ sị irehi Ohomorihi hyeku, ọza ana yà ini irehi Ohomorihi ọnịrị irehi ịnyẹmba, ọ rẹ sị hyeku avọọ nị.

²² Ọza ana àa sị ẹbẹẹba hyeku, aga ohinọyị Ohomorihi ọ sị hyeku avọọ nị, ọnịrị Ohomorihi ana yà ịrẹsụ aga ọnọọ.

²³ Wa sị dà nịnị. Ẹwụ nịnị ọzwọzọda ọnịrị Anihwarisi nịnị. Ẹwụ nịnị ọmọzakụyẹ! Ụ hyakụ aa tụ́ agẹẹwụ avị ịsẹpẹ eweyi-eweyi irenyi-renyi; ama ịsa obooro ọnị ọda kà, wa raà sị eyi jịnẹẹ nịnị, ẹhụụ ọkarẹyị ana vọrọ ọnịrị ayamva beri ẹdọwụ. Â vọrọ ka waa mẹ ẹsẹnị nịnị, dị asị u hí ayị ana vọ nịnị.

²⁴ Ẹwụ nịnị ọzwọzoze ene gu eyi, ụụ̄ tọ̀ọ́ ẹchịchị eweyi-eweyi hụụnị enyi nịnị di u we ve hú ọọ, ama di u wee hú enyi ọnịrị ịnyaakụmị ọyịvụrụ!

²⁵ Wa sị dà nịnị, ẹwụ ọzwọzọda ọnịrị Anihwarisi nịnị, ẹwụ nịnị ọmọzakụyẹ! Wàa za ịrẹma ako ọnịrị ịchacha, dị ụ nyịna wa nịnị; ama ịsa ene hi ịnịnẹ anị vị ọnị ụ sị ụkata-ụkata ọnịrị ọhọha dọ nịnị.

²⁶ Ẹwụ nịnị Anihwarisi ogweyi, vịdị mẹ ka ịsa ana yà ịnị ako ọ̀ nị nịnị da, ịjọnọọ ẹhẹẹhẹ anị vaa nị.

²⁷ Wa sị dà nịnị, ẹwụ nịnị ọzwọzọda ọnịrị Anihwarisi nịnị. Ẹwụ nịnị ọmọzakụyẹ! Vị ụ sị mẹẹ nịnị anka ikuta enee sisi ọda ọvwọọvụ avọọ nị. Wèe re ẹhẹẹhẹ anị, ô zoza; ama ịnịnẹ vị ẹchụkụ-ẹchụkụ oku ọnịrị ịdọtị-ịdọtị.

²⁸ Avọọ ụ mẹ̀ yà nịnị nị; ọza òo re wu nịnị kẹnẹ, a ka: ‘Kwa! Ộ da nyị ịzẹyịza’, ama ịnịnẹ awụ nịnị, ọmọzakụyẹ ọnịrị ọza odivi ụ vị nịnị nị.

²⁹ Wa sị dà nịnị, ẹwụ nịnị ọzwọzọda ọnịrị Anihwarisi nịnị. Ẹwụ nịnị ọmọzakụyẹ! Waa dà ikuta ọnịsẹ nịnị, dị ụ dà achẹrẹ hi ini ikuta ọnịzẹyịza nịnị,

³⁰ dị ụ ka: ‘Yàa yà ẹhẹ ịnị ụmẹ ada ayị nịnị, yẹ yị yaanị bẹ ụvọ tụ́ ini isu ọnịsẹ nịnị.’

³¹ Ẹwụ nịnị ụvọta ọ raà dọ ivenu ka ozi aza ana wụ ọnịsẹ nịnị ụ vị nịnị nị.

³² Ka tụ ọvịdị nịnị waa yịị mẹ̀ ịsa ana vọ ana ada awụ nịnị nyima anị.

³³ Ẹwụ nịnị ẹwụ ana rẹ vị ezi ibe, wéé ro ka wa zụ jị ọkarẹyị ẹkụra nyee nịnị?

³⁴ Dị ma kà a wụ nịnị, mị vaa tụ́ ọnịsẹẹ hi wu nịnị ọnịrị ọyẹrẹyị nịnị beri ọzwọzịsa nịnị, ụ vaa wụ̀ aza ẹnyị ẹnịnị, ẹnyị vị ọnị ụ vaa kanyịị za ọchị apavahị nịnị, ẹnyị vị oni u vee tụ́ ịjapa ini irehi ahẹkẹ Aniju awụ nịnị, dị ụ waa dị waa hụrẹ aha ẹnyị naa ngụ aha ọsa.

³⁵ Agụvị avọọ ịrẹsụ ẹwụ nịnị anya avaba ọnịrẹyịzẹyịza ana a wụ̀ aa vẹ nị, hụụnị Ebẹrị ọnịzẹyịza ana a wụ̀ na ngụ usu Ịzakaraya, ozi Ibarakaya ọnị ụ wụ ịnị akakana irehi Ohomorihi ọnịrị ụta ịsọvọ nịnị.

³⁶ Ịzẹyịza m maa kà a wụ nịnị nị, avaba ịsa ẹnẹnị aa vẹ ịrẹsụ anụmẹ ọnọnị.”

Ijeesu ộ jị òrèrè Ijerusarẹmị

³⁷ “Ijerusarẹmị! Ijerusarẹmị! Ẹwụ nịnị aa wụ ọnịsẹ nịnị, di u ree ne aza oni Ohomorihi tụ́ hi wu nịnịị ịrẹta nị. Wáá yẹ ụ́pẹ ịrịka yà oni mi sì ka ma sị avaka amị za wụ nịnị kú, anka ụ́ụhwẹ mẹ̀ẹ̄ sị avakaa za ezi anịị kú avọọ, ama dị ụ wẹ yị zẹẹ nịnị.

³⁸ A vaa navọ irehi awụụ yị wụ nịnị, dị ọ tụ́ osusu.

³⁹ Dị ma kà a wụ nịnị ka we mē vene re mi nịnị pooro dị ụ waa kà a ka: ‘Ohomorihi ọ̀ dà tụ́ ịnị ụbanyị yị ọza ana aa vẹ ịnị ịrẹha Ananyị yị!’ ”