Imatiwu 22 - IWE ỌNỊNỊ

Ụhịrẹyị aza anaa hị́ nọ ịnị ịrẹyị ọnẹẹ

¹ Ijeesu ọ rẹ sị ụhịrẹyị kà ịrẹyị yị aza ẹnẹẹ; ọ ka:

² “Oze ana Ada ayị ẹbẹẹba aa zịị mẹ ịjọva, vị ana sị mẹẹ anka ohinọyị ọnya aanị, ana aa nyị ọnẹẹ yị ozi anị, di ee tenyi ẹngụ eche anị.

³ Dị ọ tụ́ ozi ahụ anị ka ẹ̀ na hị́ aza ana a vịdị kà a yị, ka ẹ̀ vẹ ịnị ịrẹyị ọnẹẹ ọnọọ nị. Ama ẹnịnị ê yi, ẹ yị vẹ.

⁴ Dị ọ rẹ tụ́ ezi ahụ anị ọsa nị, ka ẹ̀ na kà a yị aza anaa vịdị kà a yị aanị ka, ‘Ma sị ịsa mẹ, ọ! Ma kụ́ imaaru amị wụ ọnịrị ịsụpa anaa pá ka ọ̀ banyị dị à va wụ ọọ. Ma sị avaba ịsa mẹ ta; vẹ ịnị ịrẹyị ọnẹẹ amị nịnị!’

⁵ Ama aza ẹnẹẹ ê sị eyi ịyẹyẹ re e, ọzọza o si hu aa jịnẹ; aza ẹnyị ệ nọ aarẹ, aza ẹnyị e si hu aa naa sẹ ohu.

⁶ Dị ana vọ za ezi ahụ ẹnẹẹ, dị ẹ sị ụya rị wa, dị ẹ wụ̀ wa nị.

⁷ Ịjị ohinọyị ọnọọ maanị wụ́, ayị ọ sị kụ́ ọọ, dị ọ tụ́ isoja anị nịnị dị ẹ na wụ ọwọza ẹnẹẹ, dị ẹ rị ẹkụra ẹnịnị ịra nị.

⁸ Di ohinọyị ọnọọ kà a yị ezi ahụ anị ka: ‘Ya sị ịsa mẹ, ama aza ọnị mị hị́, ẹ yị hụ ọọ rị ịsa amị ọnọnị.

⁹ Agụvị avọọ nọ ozehinava nịnị; avaba aza oni u wèe re, ụ hị́ wa vẹ nịnị.’

¹⁰ Ịzẹyịza, di ezi ahụ ẹnẹẹ jịnẹ nọ oze, dị ẹ hị́ avaba aza enee re vẹ nị, à hị́ ọza ọyịza, à hị́ ọza odivi. Dị irehi ịzị a yà aa nyị ọnẹẹ aanị vị ohihi yị aza ana aa vaa rị ịsa nị.

¹¹ Ịjị ohinọyị ọnọọ vẹ ka oni ò ve re azọga anị, ô re ka â nyị ọza ịnya ene è yi chire awuru ana a sịị̄ nọ ịnị ịrẹyị ọnẹẹ.

¹² Dị ohinọyị ọnọọ kà a yọ ka: ‘Ọta amị, ụ mẹmẹ va ngụ ịzẹnị, du wè yi chire awuru anaa sịị̄ nọ ịnị ịrẹyị ọnẹẹ?’ Ọza ọnọọ ọ yị zụ tụ̀ ohi.

¹³ Dị ohinọyị ọnọọ kà a yị ezi ahụ anị ka: ‘Sụ́ ọọ ahụ ọnịrị ụvọ nịnị, dị ụ wa sị ọọ ne ne ngụ ịnị ịrahụ ruma-ruma nịnị, ịzị aza yàā nowu, dị ẹyaa rị anyị.’

¹⁴ Ọza ọrụrụ-ọrụrụ a hị́ nị, ama chee a nyị nị.”

Ịrẹyị ẹkẹhị irehi

¹⁵ Anihwarisi nịnị ệ hụụ ịzọọ, dị ẹ na gẹ eyi ka ẹ́nị mẹmẹ va mẹ ka Ijeesu ọ̀ kà ịrẹyị dị ẹnị ẹ̀ za a nị.

¹⁶ Dị ẹ tụ́ ezirẹma ẹnịnị beri aza Ịhẹrọdị nịnị ne tù Ijeesu nị. Dị ẹ ka, “Ọga, yâ yẹ ka ọnịrẹyịzẹyịza ụ vị nị. Ịzẹyịza Ohomorihi kẹnẹ, ụ sịị̄ zụ̀ aza nị. Wẹ yị yẹ ọzọbanyị, agụvị ka we mē re eyi aza.”

¹⁷ Kà ẹ yị dị a re, si u ro: “Áá vọrọ ka yaa tụ́ ẹkẹhị irehi yị ohinọyị Aniroomi, à vị ọ yị vọrọ.”

¹⁸ Ama Ijeesu ộ yẹ ebira odivi ẹnịnị, dị ọ kà a yị wa ka, “Sị ẹ vẹ dị ụ waa zama mịị re nịnị, ẹwụ nịnị ọmọzakụyẹ?

¹⁹ Sị ẹkẹhị ana aā tụ́ụ yị mị, dị a re!” Dị ẹ sị ẹkẹhị enyusẹ ọnyaa yọ nị.

²⁰ Dị ọ họ̀ wa ka, “Eni uhwoto anị ọnịrị ịrẹha anị yà ịnị anị aanị?”

²¹ Dị ẹnịnị kà a yọ ka óohinọyị Aniroomi yọ nị. Dị Ijeesu kà a yị wa ka, “Ẹ̀hẹẹ, sị ịsa ana àa vị óohinọyị Aniroomi yị ohinọyị ọnọọ nịnị; dị ụ wa rẹ sị ịsa ana àa vị ịsa Ohomorihi yị Ohomorihi nịnị!”

²² Ịjị ẹnịnị maanị wụ́, ô hí wa irenu, dị ẹ hụrẹ ịdị anị, dị ẹyaa na nị.

Oku nịnị wáá vanaa haa hụụnị isu?

²³ Ịhị ọnọọ gẹdẹ-gẹdẹ Anisadusi ẹnyị ệ ká Ijeesu vẹ. Ẹnịnị ẹẹ̄ kà a ka oku ẹ yị vaa haa hụụnị isu nị.

²⁴ Dị ẹnịnị ka, “Ọga, Imosiisi ộ kà a ka ọza òo sú, dị ọ̀ yị ma ozi nị, ọyịnyara anị ọ̀ kụ́ ose anị ogu, dị ọ̀ ma ozi yị ẹnẹbẹnị anị ene sú.

²⁵ A va nyị ẹyịnyara ịhịmba ana ra ịzẹnị. Ana vị ọzọkụ ẹnịnị ộ nyị ọnẹẹ; ọ yị ma ozi di o sú, dị ọhụva anị kụ́ ose anị ogu nị.

²⁶ Avọọ ọhụva ọnịrị ọhụta mẹ̀ yà pooro na ngụ ọhụhịmba ẹnịnị nị.

²⁷ Ọdịrẹma anị dị ọnẹẹ ọnọọ oni re sú nị.

²⁸ Ịnị ụmẹ oni oku nịnị vaa sị haa hụụnị isu, ẹnẹ ọnẹẹ ọnọọ kụkụ vaa vị ose anị ịnị ẹnị ẹyịnyara ịhịmba ana vịdị nyị ọọ aanị?”

²⁹ Dị Ijeesu ka, “We si nyeeyi nịnị, agụvị ka wẹ yị yẹ Iwe Ohomorihi, wẹ yị rẹ yẹ ụkata Ohomorihi nịnị.

³⁰ Ịjị aza ẹ̀ẹ sị ha hụụnị isu, ọza ẹ yị kụkụ vaa nyị ọnẹẹ, ọza ọ yị rẹ vaa sị ọnẹẹ gà ọnọrụ. Vị ẹ vaa yà anka anggẹẹrị ẹbẹẹba nịnị mẹ̀ yà avọọ nị.

³¹ Àa vị ka a vaa ha hụụnị isu yọ, aanịka wẹẹ̀ yị kà a ịsị Ohomorihi kà yị wụ nịnị? Ộ kà a ka:

³² ‘Ẹma vị Ohomorihi Abụrahamị nị, dị mị rẹ vị Ohomorihi Ayiziiki nị, dị mị rẹ vị Ohomorihi Ijekọvụ nị.’ Ohomorihi ọ yị vị Ohomorihi aza ene wusu, ama Ohomorihi aza ana yàra.”

³³ Ịjị ọkọnị aza maanị wụ́, ịsa ana aa zụ̀ wa ô hí wa irenu.

Ye re ọda ene hu kere-kere?

³⁴ Ịjị Anihwarisi nịnị wụ́ ka Ijeesu ọ raà sị ịrẹyị za Anisadusi nịnị irenu kú oku, dị ẹnịnị na kụ́ gụ nị.

³⁵ Ọza ịnyara ẹnịnị ana vị ọzwọzọda, ọ na họ̀ Ijeesu use ịrẹyị ka ọnị ọ̀ sị zama a re. Dị ọ ka:

³⁶ “Ọga, ye re ọda ene hu kere-kere ịnị avaba ọda?”

³⁷ Dị Ijeesu tụ́ ọ ohi, dị ọ ka, “Sị avaba ayị awụ sì ịrẹyị Ohomorihi Ananyị yị beri avaba ivehu awụ, ọnịrị avaba ịrẹyọyẹ awụ!

³⁸ Ọda ene hu keekere ịnị ọda yị.

³⁹ Ọhụva vị ene re véné e: Sì ịrẹyị ọnọhụva awụ anka ẹngụ awụ!

⁴⁰ Avaba ọda Imosiisi ọnịrị ịrẹyị ọnịsẹ nịnị vị ana jẹẹ ị́rẹsụ ọda ẹẹva ẹnẹnị.”

Eni Ikirisiti vị ozi anị?

⁴¹ Ánihwarisi nịnị mẹ̀ yị wara gụ, dị Ijeesu họ̀ wa,

⁴² dị ọ ka, “Si u ro ini oze Ikirisiti nịnị; ẹnị ọ vị ozi anị?” Dị ẹnịnị ka, “Ozi Idevidi ọ vị nị.”

⁴³ Dị Ijeesu ka, “Sị ẹ vavẹ dị Ụhwẹ Ọnịnị mẹ ka Idevidi ọ̀ hị́ Ikirisiti ‘Ananyị mị’? Agụvị ka Idevidi ộ kà a ka:

⁴⁴ ‘Ohomorihi ộ kà a yị Ananyị mị ka: Yaayịtẹ éyi ụvọrị amị pooro dị ma sị ọnịvị awụ tụ́ ịzị ụ waa kụ́ ahụụ hi.’

⁴⁵ Idevidi ọ̀ọ hị́ ọọ ‘Ananyị mị’, Íkirisiti mẹmẹ rẹ va mẹ vị ozi Idevidi?”

⁴⁶ Ẹ yị nyị ọza ene zụ tụ́ ọọ ohi ịrẹyị ikonya. Hụrẹ ịhị ọnọọ, ẹ yị nyị ọza ana vana nyayịnẹ họ̀ ọ use ịrẹyị ọnyọọnyị.