Ịmarakayị 1 - IWE ỌNỊNỊ

¹ Â nyị ọnọrụ ọnya aanị ịnị ụmẹ ọnya aanị, ana aa hị́ Ịmarakayị. Aanị Ẹnẹyịmavara mẹ tụ ọ ụtụ hi Anisirẹrị nị.

Ẹnẹyịmavara ô sì ịrẹyị Anisirẹrị

² Ẹnẹyịmavara kà ọnị vị eneē sì ịrẹyị Anisirẹrị nịnị. Dị ẹnịnị họ̀ ọ use ka, “Ọ́ mẹmẹ sì ịrẹyị ẹnịnị kẹ?” Dị Ẹnẹyịmavara va ohi wa ka, “Ẹ́ẹ́ yẹ ka Ijekọvụ ana vị ohiku ẹnịnị vị ọyịnyara Iisọ?” Ama dị ọnị sì ịrẹyị Ijekọvụ nị,

³ dị ọnị nyị ịhyẹrẹ Iisọ nị. Ọnị ọ raà mẹ̀ ka ẹkụra Iisọ ana ya ịrẹsụ ataba ọ tụ́ osusu. Dị ahịka ahaka nịnị kẹnẹ ẹ kụ́ ịzọọ ogu nị.

⁴ Ezi Iisọ ana vị anẹkụra Edomi ọnọọ ẹ̀ẹ kà ẹkụra ẹnịnị o si du, ẹnị aa varẹma tenyi ọ da. Ẹnẹyịmavara Ochẹtẹẹngụ kà a ẹnịnị èe tenyi ọ da, dị ọnị rẹ varẹma wu ọ za ẹtẹ nẹrẹ-nẹrẹ. Dị aza aa hị́ ịzọọ ẹkụra odivi, anẹkụra ọnị Ẹnẹyịmavara aa kụ ayị hi pooro.

⁵ Anisirẹrị nịnị vaa sị eyi ẹnịnị re e, ẹ vaa kà a ka ụkata Ẹnẹyịmavara o chi avaba ẹtẹ ẹngụ.

Ẹnẹyịmavara ộ tụ ohirẹsụ irehi anị ohuvọ

⁶ Ẹnẹyịmavara Ochẹtẹẹngụ ộ kà a yị ohirẹsụ irehi Ohomorihi nịnị ka, ozi vị anaā sịị ụbanyị yị ada anị, di ozi ahụ ọnị rẹ sị ịrẹsụ nẹtẹ yị ọga anị. Ọnị ọ̀ọ vị ada ẹnịnị, dị ọnị vị ọga ẹnịnị nị, sị ẹ vị ụbanyị ada ọnịrị angwahi ọga ẹnị ẹ nyị yị ọnị? Dị ọ rẹ ka ẹ raa si eyi oweyi re ọnị nị. Ama dị ẹ yaa họ̀ ọ use ka, ẹnị mẹmẹ sị eyi oweyi re e nị?

⁷ Dị Ẹnẹyịmavara kà, aanị ẹ mẹmẹ sị eyi oweyi re ọnị nị. Ọ kà a yaa sị ịsọyịrị enyisi vaa mẹ̀ ịsọvọ ịrẹsụ ụta anị. Dị ẹ yaa họ̀ ọ use ka ẹnị mẹmẹ du ụta anị ẹngụ? Dị Ẹnẹyịmavara kà e yee ro ka ẹ yị nyị ịsị aha ịsọvọ anị vị.

⁸ Ẹ̀ẹ vị avọọ, áá vọrọ ka ẹẹ sị ịsụpa ene gu eyi ọnịrị ene che ahụ beri ẹnị ụkụ za va mẹ̀ ịsọvọ yị ọnị? Ẹ́ẹ́ zụ sị ẹngụ ịsa ẹnẹẹ na yị Ịgọvọnọ ẹnịnị? Ẹnẹyịmavara Ochẹtẹẹngụ kà, ẹnịnị éé ro ka ayị Ịgọvọnọ ẹnịnị ọnọọ vee hine tụ ẹnị?

⁹ Ama Ẹnẹyịmavara Ochẹtẹẹngụ ka, ịrẹma ẹnị ẹnịnị ohirẹsụ irehi Ohomorihi maanị aa mẹ, dị ẹyaa yị da ịpẹ baaba ka ọnị ọ vayị ẹnịnị, éé ro ka ọnị ve tu wa ohi?

¹⁰ Dị ọ kà, ayị anị eyi hine tu ịsọvọ ẹnịnị. Aa yẹ a hyakụ kụkụ gu oze hi irehi anị ọnọọ. Dị asị ẹnịnị kụkụ hu ịra tụ ịzọọ agụvị ka ayị anị e yi hine tụ ịnị ịsọvọ kẹnẹ-kẹnẹ ọnị ẹyaa mẹ avọọ.

¹¹ Ọ kà aza vị ana aa hụrẹ avaba ẹhẹ vẹ, dị ẹyaa sị ụbanyị yị ọnị, dị ẹyaa rị eturare ịra yị ọnị, dị ẹyaa sị ịsa ana vọrọ vaa yị ọnị. Ọ kà aza ẹnẹẹ vavọọ aa mẹ agụvị ka ẹ yẹ ụbanyị anị.

¹² Ama ẹnịnị aa sị eyi kẹnẹ-kẹnẹ re ọnị. Ọ kà ẹyaa kà a ka, ẹ yị nyị ịsị ịzị a ya rị ịsa ịnị irehi Ohomorihi vị. Ẹ ya kà a ka ịsa ẹnị aa rị ịzọọ vị ịsa kẹnẹ-kẹnẹ.

¹³ Dị Ẹnẹyịmavara ana vị Ochẹtẹẹngụ kà, aza ẹnẹẹ ka ịsọvọ anị o ku du eni eyi, dị ẹyaa jị ọ agụ nị, dị ẹyaa sị ịsụpa ẹnẹ sị ụkata-ụkata dọ ọza ọnịrị ịsụpa ene che ahụ beri ịsụpa ọnị ẹngụ aa zị va mẹ̀ ịsọvọ yị ọnị nị. Éé ro ka ọnị va dọ ẹngụ ịsọvọ ẹnịnị ọnọọ nị?

¹⁴ Ẹnẹyịmavara kà e yi ve zoza yị ọza ana mẹ ọza rị. Ọza ana nyị ịsụpa araka ozoza ana vọrọ ka ọ sị vaa mẹ̀ ịsọvọ, ama dị ahịka ene divi ọ sị va yị ọnị Ananyị yị nị. Ẹnẹyịmavara Ochẹtẹẹngụ ka ohinọyị ọbanyị ọnị avaba anẹhẹ ee hí angwa anị ọnị vị nị.