Ịmaakị 5 - IWE ỌNỊNỊ

Ijeesu ộ dụ ụhwẹ echu hụụ nị ẹngụ ọza ịnya

¹ Ijeesu ọnịrị ezirẹma anị ẹ va sị ngụ akẹnẹ irehu, ịnị ẹkụra Anigerasa.

² Íjeesu màa jịnẹẹ hụụ nị ẹpaa vẹ, dị ọnọrụ ọnya aanị wụsẹ hụrẹ ọgaanya vẹ nị. Ọnọrụ ọnọọ vị ana nyị ụhwẹ echu.

³ Ọgaanya ọọ̄ zẹẹ yà nị. Ọza ọ yị kụkụ zụ sụ́ ọọ vụrụ-vụrụ, ọ̀ọ daka vị ẹba.

⁴ Ụpọọpọsa a sịị̄ sị ịchẹkẹchẹkẹ sụ́ ọọ, dị a rẹ sị ẹba sụ́ ọọ ahụ bẹẹ nị; ama dị ọ jị ẹba anị, dị ọ gara ịchẹkẹchẹkẹ anị ha rugu-rugu nị. Ẹ yị nyị ọza ana nyẹngụ za a jẹẹ.

⁵ Ịrahụ ọnịrị ọọdụ dị aa ngụ ịrẹsụ ataba ọnịrị ọgaanya zịịzị, dị eē nowu, dị aā sị ịrẹtaa na ẹngụ anị.

⁶ O mè re Ijeesu ẹ́nẹẹnẹ, di o zwe ne tù ọọ, dị ọ và ku ẹtẹ ọ́vịdị anị nị.

⁷ Di o nowu tụ́ ẹba nị, dị ọ ka, “Ijeesu, Ozi Ohomorihi ana ya ẹbẹẹba keekere, sẹ jị gẹ ẹmịrị ẹwụ? Aarịhịnị, mâ sị Ohomorihi dá ịpẹ wụ, asị ụ sị ụya rị mị!”

⁸ Ộ maanị kà, agụvị ka Ijeesu ộ vịdị kà a yọ ka, “jịnẹ hụụnị ẹngụ ọnọrụ ọnọọ, ẹwụ ụhwẹ echu!”

⁹ Dị Ijeesu họ̀ ọ use ka, “Ị́rẹha awụ rị?” Dị ọ ka, “Ịrẹha amị ọ rị ‘Ọkọnị’ nị, agụvị ka yâ rụrụ.”

¹⁰ Dị aa dá ịpẹẹ yị Ijeesu ẹtẹẹtẹrẹ, dị ẹ ka asị ọ dụ ẹnị hụụnị ẹkụra ọnọọ nị.

¹¹ Â nyị ụ̀rá ọrụrụ ẹnyị aanị, ene hi akaha ataba ịzọọ aa rị.

¹² Dị ụhwẹ echu nịnị ẹnẹẹ dá ịpẹ yị Ijeesu ka ọ̀ navọ dị ọ̀ tụ́ ẹnị dị ẹnị ẹ̀ na ngụ ịnị ụra ẹnẹẹ nị.

¹³ Obooboro dị Ijeesu ka: Ooho! nị, dị ụhwẹ echu ẹnẹẹ jịnẹ hụụnị ẹngụ ọnọrụ ọnọọ, dị ẹ na ngụ ịnịnẹ ụra ẹnẹẹ nị. Dị avaba ụra ẹnẹẹ, ẹnị ẹhụụ akawụ, zwe putu-putu, di e ne zina và hi ini irehu, di irehu mụnẹ wa nị.

¹⁴ Aza anaā kụ́ ụra ẹnẹẹ rị ê zwe nọ eehi, dị ẹ na kà a ịnị ẹkụra ọnọọ ọnịrị ịnị aarẹ nị. Dị aza vẹ ka eni è ve re ịsa ana mẹ nị.

¹⁵ Ẹnịnị ê ve tù Ijeesu, di e re ọza ana vịdị nyị ọkọnị ụhwẹ echu aanị ka ộ yaayịtẹ hẹẹ ịzọọ, ộ sị ịta kú ẹngụ, ọ sị ịrẹyọyẹ nyị nị. Dị angwa ee hí avaba ẹnịnị nị.

¹⁶ Aza ene re e, ệ kà a yị aza ana vọ ịsa ana mẹ ọza ana nyị ụhwẹ echu ọnọọ, ọnịrị ịsa ana rẹ mẹ ụra ẹnẹẹ.

¹⁷ Dị ẹ kwẹẹtẹ, dị ẹ yaa dá ịpẹẹ yị Ijeesu ka ọ̀ hụrẹ ẹkụra ẹnịnị nị.

¹⁸ Ịjị Ijeesu aa ngụ ẹpa, dị ọza ana vịdị nyị ụhwẹ echu ọnọọ, aa dá ịpẹ ka ọnị aa saasaa nị.

¹⁹ Ama Ijeesu ô yi, dị ọ kà a yọ ka, “Wa nọ eehi, dị ụ wa na kà a yị aza awụ ịsa ọbanyị ana Ananyị yị sị mẹ yị wụ ọnịrị ọ mẹmẹ nyị ayamva yị wụ!”

²⁰ Dị ọnọrụ ọnọọ sị varẹma aa na, dị ọ na a kà a ngụ avaba ẹkụra Idekaporii zịịzị, ịsa ọbanyị oni Ijeesu mẹ yọ nị. Ô hí avaba aza irenu.

Ozi ọnẹẹ Ịjayịrọọsị ọnịrị ọnẹẹ ana kanyị ịta Ijeesu

²¹ Ijeesu ọ rẹ ngụ ẹpa varẹma nọ akẹnẹ irehu. Dị ọkọnị aza gụ kara a, ọ mẹ̀ yà ụtọ irehu nị.

²² Re, ọza ịnya aanị ịnị ọdọvịdị irehi ahẹkẹ Aniju nịnị ộ vẹ. Ịrẹha anị ọ rị Ịjayịrọọsị nị. O mè re Ijeesu, dị ọ và ku ẹtẹ ọ́vịdị anị nị.

²³ Dị aa dá ịpẹẹ yọ ẹtẹẹtẹrẹ nị ka, “Ozi emi ọnẹẹ aa mẹrị isu. Aarịhịnị, va sị ụvọ tụra a, dị ẹngụ anị ọ̀ nịya ụvị ọ̀ nyẹngụ yàra!”

²⁴ Dị Ijeesu aa dụ ọọ na nị. Dị ọkọnị aza rẹ wara saasa a, dị ẹyaa dọ ọ óze eyi ẹnyị eyi ọsa nị.

²⁵ Â nyị ọnẹẹ ọnya aanị ene ee re ịnẹ ọtọtọnya pooro hụrẹ ịrayị ẹwụrẹva.

²⁶ Ọ sị ụya rị ẹtẹẹtẹrẹ ngụ ịdị ọmahọnọ nịnị zịịzị. O reè du avaba ogu ọnị ọ nyị ha, ọ yị hyakụ dahi, aaka ene ee divii hu avọọ.

²⁷ Ộ vịdị sị ịrẹyị Ijeesu wụ́, dị ọ ngụ ịnị akakana aza, di o zị oze ị́rẹma anị, dị ọ sị ụvọ kanyị ọọ awuru nị.

²⁸ Ộ vịdị kà a ka, “Màa hyakụ yị zụ sị ụvọ kanyị awuru anị kẹnẹ, ẹngụ amị vaa ta.”

²⁹ Obooboro ọnọọ anya o si jị ịnị ẹngụ anị. Ộ yẹ ịnị ẹngụ anị ka a sị ọnị mẹ ụkụ.

³⁰ Dị Ijeesu wụsẹ sị yẹ ka â nyị ụkata ana hụụnị ẹngụ anị nị. Agụvị avọọ dị ọ wụsẹ vara eyi ịnị akakana aza, dị ọ ka, “Ẹnẹ sị ụvọ kanyị awuru amị?”

³¹ Dị ezirẹma anị kà a yọ ka, “Wê re, aza mẹ̀ hana, di u kuku ee họ̀ use ka: Ẹnẹ sị ụvọ kanyị mịị?”

³² Dị Ijeesu aa yịị kana eyi hee ọza ana vavọọ mẹ nị.

³³ Ọnẹẹ ọnọọ ộ yẹ ịsị ẹ mẹ ịnị ẹngụ anị, dị ọ vẹ eyi angwahi-angwahi beri ẹgahị, dị ọ và ku ẹtẹ ọ́vịdị Ijeesu nị. Dị ọ kà avaba ịrẹyị anịị yọ, ọ mẹ̀ yị yà ịzẹyịza nị.

³⁴ Dị Ijeesu kà a yọ ka, “Ozi, ẹdọwụ awụ ọ sị wụ mẹ ụkụ, waa na ịnị ẹngwọọrọ, dị ẹngụ awụ ọ̀ ta!”

³⁵ Íjeesu màa yịị kà ịrẹyị, dị ọnụtụ hụụnị eehi ọdọvịdị irehi Ohomorihi ọnọọ vẹ nị. Dị ẹ kà a yị Ịjayịrọọsị ka, “Ozi ewu ô wusu, sị ẹ vẹ dị ụ kụkụ aa tụ́ Ọga akanya?”

³⁶ Íjeesu mẹ̀ yị wụ́ ịrẹyị ana a kà, dị ọ kà a yị ọdọvịdị irehi Ohomorihi ọnọọ ka, “Asị u hí angwa, sị sị ayị tụra mị kẹnẹ!”

³⁷ Ijeesu ẹ yị zẹẹ ka ọza ọnyọọnyị ọ̀ dụ ọnị na, ẹ̀ yị vị Ipita ọnịrị Ijemiisi ne beri Ịjọọnụ, ọyịnyara Ijemiisi.

³⁸ Ịjị e tù ini eehi ọdọvịdị ọnọọ, ô re, aza mèe nowu, dị ẹyaa jị òrèrè di e ree nowuu tụ́ ẹba nị.

³⁹ Ịjị ọ sị ngụ ini eehi ọnọọ, dị ọ kà a yị wa ka, “Sị ẹ vẹ dị ụ maanị ee nowu nịnị, dị ụ waa jị òrèrè nịnị? Ozi ọnẹẹ ọnọọ o yi sú, ama vị aa sụ ara nị.”

⁴⁰ Dị ẹyaa sị ọọ mẹ enyinyi nị. Dị Ijeesu dụ wa hi ẹhẹ, dị ọ sị ada ozi ọnọọ ọnịrị ọnyị anị, vaka aza ana saasa a vẹ, dị ẹ ngụ ịzị ozi ọnọọ ya nị.

⁴¹ Dị Ijeesu jị ụvọ chire ozi ọnọọ ụvọ, dị ọ kà a yọ ka, “Itarita kumi”, ọnọọ vị ka, “Ozi ọnẹẹ, mị ka wa kwẹẹtẹ!”

⁴² Obooboro, di ozi ọnọọ wụsẹ kwẹẹtẹ, dị aa zị ụsẹ nị. Ozi ịrayị ẹwụrẹva ọ vị nị. Ô hí wa irenu ẹtẹẹtẹrẹ.

⁴³ Dị Ijeesu hú wa ụvọ ka asị ẹ kà a yị ọza ọnyọọnyị nị, dị ọ rẹ ka à sị ịsọyịrị yọ dị ọ̀ rị ọọ nị.