Ịmaakị 4 - IWE ỌNỊNỊ

Ọza ene mi ịsa ọyịna

¹ Íjeesu mẹ̀ yà ụtọ irehu, di o re nyima aa sị ịsaa zụ̀ aza nị. Aza ana wara ne tù ọọ, ẹ sị rụrụ baaba; agụvị avọọ dị ọ ngụ ịnị ẹpa ọnya ana yà ini enyi, dị ọ yaayịtẹ ịnị anị nị. Dị avaba aza ana vọ jẹẹ ụtọ irehu, dị ẹ và eyi kà irehu nị.

² Dị ọ sị ụhịrẹyị, dị aa sịị sị ịsa ọrụrụ-ọrụrụụ zụ̀ wa nị. Ọ màa zụ̀ wa ịsa, dị ọ kà a yị wa ka:

³ “Sị ụtọ pe ẹtẹ nịnị! Re, â nyị ọza ịnya aanị ene ne mi ịsa ọyịna.

⁴ O mèe mi ọọ, dị ẹnyị hụrẹ tụ́ ụtọ oze nị; di inomi nịnị wụsẹ vẹ, dị ẹ tọ̀ọ́ yọọ rị nị.

⁵ Ihu ẹnyị ẹ rẹ hụrẹ tụ́ ịrẹsụ ịda ana nyị ezi chee aanị. Ịjịịjọọ dị ẹ chị nị, dị ẹyaa hụ nị, agụvị ka ezi anị ọyị rụrụ.

⁶ Ịjị ọyị aa há, dị ẹ sị và hí nị, ama agụvị ka e yi re aha ha ẹpa ngụ, di e sú nị.

⁷ Dị ẹnyị rẹ hụrẹ ne ngụ ịnị akakana ikeyi nị. Ịjị ikeyi ẹnẹẹ aa hụ, dị ẹ za wa rị nị, dị ịsa ọyịna ẹnẹẹ ẹ yị nyị ẹtụtụ nị.

⁸ Ihu ẹnyị ẹ rẹ hụrẹ ne ngụ ịnị ẹtẹ ozoza, dị ẹ chị, dị ẹ hụ, dị ẹ nyị ẹtụtụ nị; ẹnyị ệ nyị ẹtụtụ ohurẹẹwụ-ohurẹẹwụ, ẹnyị ẹbẹẹta-ẹbẹẹta, ẹnyị vị ẹchẹhị-ẹchẹhị.”

⁹ Dị Ijeesu ka, “Ọza ana àa nyị ụtọ ọyịsị wụ́ ịrẹyị, ọ̀ sị ụtọ pe ẹtẹ!”

Iruvo ọnị Ijeesu sị ịrẹyị hị́ ọsa

¹⁰ Ịjị ọ sị vị ọnịnya, dị aza anaā dụ ọọ zị ọnịrị ezirẹma anị ẹwụrẹva va họ̀ ọ use ini oze ụhịrẹyị ẹnẹẹ nị.

¹¹ Dị ọ ka, “Ohomorihi ọ raà mẹ ka wa yẹ nịnị ịrẹyị ịjọva Ohomorihi oni iruvo anị ana nyịnẹ. Ama ẹnị ene hi ẹhẹ vị ana aa wụ́ avaba ịrẹyị ẹnẹnị ini oze ụhịrẹyị;

¹² agụvị ẹ̀ẹ daka re ẹtẹ pooro, asị ẹ yẹ ịsị eyee re. Ẹ̀ẹ sị ụtọ pe ẹtẹ pooro, di asị ẹ yẹ ịsị ẹyaa wụ́, agụvị asị e ro ịnẹ varẹma, dị Ohomorihi ọ̀ va na vagu wa ịnị ịvị ẹnịnị.”

Ijeesu ộ mẹ̀ ẹhahi ịrẹyị ọnị ọ sị hị́ ọsa

¹³ Ijeesu ộ họ̀ wa ka, “Aanịka wẹ yị yẹ iruvo ụhịrẹyị ọnọnị nịnị? Ụ mẹmẹ vaa yẹ avaba ụhịrẹyị ana vọ nịnị?

¹⁴ Ọza ene mi ịsa ọyịna aanị vị ene ne mi ịrẹyị Ohomorihi.

¹⁵ Aza ẹnẹnị vị ana yà anka ihu enee mi tụ́ ụtọ oze; aza ẹnẹnị mẹ̀ yị wụ́ ịrẹyị Ohomorihi kẹnẹ, di Echu wụsẹ vẹ, dị ọ sị ịrẹyị enee mi tụ́ ịnị ayị ẹnịnị hụụ ịzọọ nị.

¹⁶ Aza ẹnẹnị vị ana rẹ yà anka ihu ana hụrẹ tụ́ ịnị ẹtẹ ana sị mẹẹ ịda avọọ. Ịjị aza ẹnẹẹ wụ́ ịrẹyị ọnọọ, dị ẹ wụsẹ sị ịrajẹ dọ ọ nị.

¹⁷ Ama agụvị ka ịrẹyị ọnọọ o yi re aha ha ẹpa ngụ ịnị ayị ẹnịnị, ệ sị tụ́ ịnị ayị chee; ịjị ọ da kù dị ẹngụkata ọnịrị ayamịkụ vẹ agụvị ịrẹyị ọnọọ, dị aza ẹnẹẹ wụsẹ sị varẹma nị.

¹⁸ Aza ẹnẹnị vị ana rẹ yà anka ihu ene e mi tụ́ ịnị akakana ikeyi. Ệ wụ́ ịrẹyị ọnọọ,

¹⁹ dị ariro ẹhẹ ọnọnị ọnịrị evene ẹkẹhị ọnịrị ụbanyị ẹhẹ beri oyisì odivi ịsa ana vọ ngụ ịnị ayị ẹnịnị, dị ẹ za ịrẹyị ọnọọ rị nị; agụvị avọọ ẹ yị nyị ẹtụtụ.

²⁰ Aza ẹnẹnị vị ana rẹ yà anka ihu ene e mi tụ́ ịnị ẹtẹ ozoza. Ệ wụ́ ịrẹyị ọnọọ, dị ẹ dọ ọ, dị ẹyaa nyị ẹtụtụ nị. Ẹnyị ệ nyị ẹtụtụ ohurẹẹwụ, ẹnyị ẹbẹẹta-ẹbẹẹta, ẹnyị ẹchẹhị-ẹchẹhị.”

Ijeesu ộ sị ịrakotupa hị́ ọsa ịrẹyị Ohomorihi

²¹ Dị Ijeesu rẹ ka, “Vị ọza wéé hu ozotupa, dị ọ sị ụnọkọ kú ọọ nị, à vị ka dị ọ̀ sị ọọ tụ́ uruvo ịbẹẹdị nị? Ẹ yị vị ịzị ẹ nẹba aā sị ọọ gẹẹ?

²² Agụvị ka ẹ yị nyị ịsa ana tẹ ẹnẹ ẹ̀ yị vaa tụ́ ẹhẹ; ẹ yị nyị ịsa ẹ tẹ ini ewere, ẹnẹ ẹ̀ yị vaa tụ́ ẹhẹ chapaa.

²³ Ọza ana àa nyị ụtọ ọyịsị wụ́ ịrẹyị, ọ̀ sị ụtọ pe ẹtẹ!”

²⁴ Dị ọ kà a yị wa ka, “Sị ụtọ pe ịrẹyị ọnị ụ waa wụ́ nịnị o! Ịsị ụ wàa sị mọ ịsa yị ọza, a rẹ vaa sị mọ ọ yị wụ nị; dị a ká tụ ọ wụ hu avọọ.

²⁵ Agụvị ka ọza ana àa nyị ịsa, vị Ohomorihi vaa dàa tụ́ ọọ yọ nị. Ọza ẹnẹ ẹ̀ yị nyị, oyichee ọnọ ọ̀ọ hyakụ nyị, dị a dọ ọ hụrẹ ẹ ụvọ.”

Ụhịrẹyị akụ mẹmẹ mẹ

²⁶ Ijeesu ka, “Aanị Óhomorihi mẹmẹ aa mẹ ịjọva nị. Vị ọ sị mẹẹ anka ọnọrụ ọnya ana sị akụ, dị ọ na tụ́ ọọ nị.

²⁷ Ọza ọnọọ ọ̀ọ rẹ sụ̀, dị ọ rẹ ha eyinị-eyinị, pooro dị akụ ọnọọ chị dị ọ hụ; ama ọ yị yẹ ọ mẹmẹ mẹ.

²⁸ Ẹtẹ, ọnị ụvọta, ọ mẹ ka ọ̀ chị nị. Ịjị ọ sị chị, dị ọ hụ, di o ve hi ịrẹsụ nị. Ịrẹma ọnọọ, dị ọ va mẹ nị.

²⁹ Ịjị akụ ọnọọ ọ̀ọ sị vị́, dị ọza ọnọọ wụsẹ sị ụhwọ anị, dị aa mẹ̀ ẹ nị, agụvị ka ụmẹ anaa sịị̄ mẹ̀ ẹ, o si tù.”

Ụhịrẹyị ihu oweyi ọnya

³⁰ Ijeesu ka, “Si i ve sii juwe ịzị Ohomorihi yà aa mẹ ịjọva kẹ? Ye re ụhịrẹyị oni i ve sii mẹ apojuwe anị?

³¹ Vị ọ sị mẹẹ anka ihu oweyi ọnya aanị nị, ene weyi hu keekere ịnị ẹhẹ nị. Eē chire e tụ́ ịnị ẹtẹ.

³² Èe si oo chire, dị ọ chị, dị ọ hụ, dị ọ vara ọchị ana banyị hu keekere ịnị avaba ọchị ịsẹpẹ. Ọọ̄ nyị avọ ọbanyị, di inomi nịnị vẹ, dị ẹ mẹ ịrẹngwẹ hi ini ihuhu anị.”

³³ Ijeesu ộ rẹ sị ụhịrẹyị ọrụrụ-ọrụrụ kà ịrẹyị Ohomorihi yị wa. Ọpa ẹ mẹ̀ zụ wụ́ kẹnẹ, ọ kà ịrẹyị yị wa nị.

³⁴ Ẹ yị nyị ịsị ọ kà yị wa, ẹnẹ ẹ̀ yị vị ini oze ụhịrẹyị. Ama ịjị ọ sị vị ọnịrị ezirẹma anị anava, dị ọ tangwa kà iruvo avaba anị zụ̀ ezirẹma anị nị.

Ijeesu ộ za ahị jẹẹ

³⁵ Ụmẹ oruva ịhị ọnọọ, di Ijeesu ka ezirẹma anị ẹ̀ vẹ dị ẹnị ẹ̀ nọ akẹnẹ irehu nị.

³⁶ Ịjị ẹ sị hụrị ịdị aza ẹnẹẹ, dị ẹ sị Ijeesu ọ mẹ̀ yị yà ngụ ịnị ẹpa, dị ẹyaa na nị. A rẹ nyị ẹpa ọsa ana aa dụ ọọ na.

³⁷ Di opomi ọbanyị ọnyara aa tụ́ nị, di enyi aa dàa hi ịnị ẹpa nị. Ẹpa ọnọọ ee vee hí.

³⁸ Ijeesu yà ịnị ẹpa ọnọ, ộ sị ịsa pe ịrẹsụ aa sụ̀ ara. Dị ẹ na ha a nị, dị ẹ ka, “Nda, eni ee vee sú ọ! Wẹ yị tẹsịị?”

³⁹ Di Ijeesu kwẹẹtẹ nị, dị ọ tụ́ ahị ọnọọ Ohuvọ nị. Dị ọ kà a yị enyi ka: ọ mẹ hẹẹ! Dị ahị jẹẹ keri, dị ẹtẹ tịtẹ sii nị.

⁴⁰ Di Ijeesu kà a yị wa ka: Sị ẹ vẹ di eyee hí angwa nị? Ọ kà ẹnịnị ẹ ẹ̀ yị va sị ayị tụra ọnịị?

⁴¹ Angwa ô hí wa ẹtẹẹtẹrẹ, dị ẹyaa kà a yị ẹngụ ka: Ẹngụ ọza ịsị ẹ vị ọnọnị ana ahị ọnịrị irehu raa wụ́ụ chire bẹẹ aanị?