Ịmaakị 3 - IWE ỌNỊNỊ

Ijeesu ộ mẹ̀ osuvọ ọnya ụkụ

¹ Ẹkụhị ọnya Ijeesu ọ rẹ ngụ ini irehi ahẹkẹ Aniju. Â nyị ọza ịnya aanị ana yà ịzọọ ene sú ụvọ.

² Aza ẹnyị ệ sị eyi pe Ijeesu gegege ka ahịka ọ vaa mẹ osuvọ ọnọọ ụkụ anị ịnị ẹkụhị ụhwọtụ, agụvị dị ẹ̀ nyẹngụ re ịrẹyị ẹnẹ ẹ vaa sị za Ijeesu.

³ Dị Ijeesu kà a yị osuvọ ọnọọ ka, “Vẹ ọvịdị ịzẹnị!”

⁴ Ịjị ọ vẹ dị Ijeesu kà a yị aza ẹnẹẹ ka, “Áá vọrọ ka à mẹ ọyịza ịnị ẹkụhị ụhwọtụ, à vị odivi? Áá rẹ vọrọ ka à dọ ọza tụ́, à vị a vọrọ ka à wụ̀ ọza nị?” Dị ẹnịnị kú irenu, dị è yi tụ́ ohi nị.

⁵ Dị Ijeesu kana eyi sì wa nị, ayị aa kụ́ ọọ, agụvị ka ayị aza ẹnẹẹ ẹ sị katẹngụ baaba. Dị ọ kà a yị osuvọ ọnọọ ka, “Tana ụvọ awụ!” Dị osuvọ ọnọọ tana ụvọ anị, dị ụvọ anị ta nị.

⁶ Dị Anihwarisi nịnị jịnẹ tụ́ ẹhẹ nị, dị ẹ wụsẹ nọ ịda ogu Ịhẹrọdị nịnị, dị ẹ naa gẹ eyi Ijeesu ka ẹ́nị mẹmẹ vaa mẹ, dị ẹnị ẹ̀ wụ ọ nị.

Ijeesu ọnịrị ọkọnị aza ene hi ụtọ irehu

⁷ Ijeesu ọnịrị ezirẹma anị ệ hụụ ịzọọ, dị ẹ nọ ụtọ irehu nị. Dị ọkọnị aza wara hụrẹ ẹtẹ Igariri ọnịrị Ijudiya saasa wa na nị.

⁸ Aza ẹ rẹ hụrẹ Ijerusarẹmị ọnịrị Idumiya vẹ, ẹ rẹ hụrẹ akẹnẹ Okuha Ịjọdanị vẹ, dị ẹ rẹ hụrẹ ọgụrị ẹkụra Ịtaya ọnịrị Ịsịdọnị vẹ bẹẹ nị. Avaba aza ẹnẹnị ệ ká Ijeesu vẹ, agụvị ka ệ vịdị wụ́ ịsa ọnọọ mẹ.

⁹ Aza ẹ sị rụrụ baaba; agụvị avọọ dị Ijeesu kà a yị ezirẹma anị ka è tenyi ẹpa ọnya tịtẹ yọ nị, agụvị asị aza tụ́ ọọ ụvọ nị.

¹⁰ Ijeesu ọ raà mẹ aza ọrụrụ-ọrụrụ ụkụ; agụvị avọọ dị avaba ọnịkụ nịnị kụkụ aa haraa kú ọ nị, agụvị dị ẹ̀ zụ sị ụvọ kanyị ọ.

¹¹ Ịjị aza ana nyị ụhwẹ echu nịnị re e kẹnẹ, dị ẹ hyẹdụ nya ẹtẹ ọ́ vịdị anị, di e nowu zẹtẹ, dị ẹ ka, “Ẹwa vị Ozi Ohomorihi nọ!”

¹² Dị Ijeesu hú wa ụvọ ẹtẹẹtẹrẹ ka asị ẹ zẹẹ ka aza ẹ̀ yẹ ọza ọnọ ọnị vị nị.

Ijeesu ộ nyị ezirẹma anị

¹³ Dị Ijeesu hịrẹ nọ ịrẹsụ ataba ọnya aanị, dị ọ hị́ aza ẹnyị aanị oni o sì nị; dị ẹnịnị ve tù ọ nị.

¹⁴ Dị ọ nyị ẹnị ẹwụrẹva ọnọọ hị́ odeyi ka ẹ̀ yà pe ọnị, dị ọnị ọ̀ tụ́ wa nọ ẹhẹ na kà ịrẹyị Ohomorihi yị aza,

¹⁵ dị ẹ̀ nyị ọda ẹnẹẹ vaa sị mẹ aza ụkụ, dị ẹ̀ rẹẹ dụ ụhwẹ echu nịnị hụụnị ẹngụ aza.

¹⁶ Ịrẹha ẹnị ẹwụrẹva ẹnẹẹ yị: Ịsayịmọnị oni Ijeesu rẹ yị Ipita,

¹⁷ Ijemiisi, ozi Izebedi, ọnịrị Ịjọọnụ ọyịnyara Ijemiisi, ẹnị Ijeesu rẹ hị́ “Iboyanagisi” (iruvo ọsọnị ọ vị “ezi apaana ihinẹba”),

¹⁸ Andụrụ, Ihwiripi, Ibatoromiwu, Imatiwu, Ịtọmọsị, Ijemiisi ozi Arịhwịyọsị, Ịtadịyọsị, Ịsayịmọnị Anikenaani,

¹⁹ ọnịrị Ijudasi Isikarịyọtị, ọza ana vana sị Ijeesu chire ọnịvị anị ụvọ.

Ijeesu ọnịrị Echu

²⁰ Ijeesu ọnịrị ezirẹma anị ệ nọ ini eehi ọnya, dị ọkọnị aza rẹ sị wara gụ tawụ-tawụ, ana ahịka Ijeesu ọnịrị ezirẹma anị e yi nyị eyi rị ịsa nị.

²¹ Ịjị aza anị Ijeesu maanị wụ́, dị ẹ na ka ẹnị ẹ̀ na sị ọọ hụụ ịzọọ nị, agụvị ka vị aza kà a ka vi ee che uvu nị.

²² Ọzwọzọda nịnị ê chí hụrẹ Ijerusarẹmị vẹ, dị ẹ ka Ijeesu ộ nyị ụhwẹ echu ana aā hị́ “Ịbẹẹrịzẹbụ”, dị ẹ rẹ ka ụkata ọga ụhwẹ echu nịnị aa sịị dụ ụhwẹ echuu jịnẹẹ hụụnị ẹngụ aza nị.

²³ Dị Ijeesu va hị́ wa nị, dị aa sị ụhịrẹyịị kà ịrẹyịị yị wa nị. Dị ọ ka, “Échu mẹmẹ zụ dụ echu jịnẹ?”

²⁴ Ẹkụra ẹ̀ẹ gà hi dị ẹ và eyi kà ẹngụ nị, ẹkụra ọnọọ ọ yị zụ kwẹẹtẹ.

²⁵ Àa rẹ nyị irehi ana gà hi dị ẹ và eyi kà ẹngụ nị, irehi ọnọọ ọ yị zụ kwẹẹtẹ.

²⁶ Echu ọ̀ọ rẹ kwẹẹtẹ tù ẹngụ anị, di ee beri ẹngụ anị zyaazị nị, dị ọ sị gà hi ẹẹva nị, ọ yị zụ kwẹẹtẹ, vi ee vu ẹtẹ nị.

²⁷ “Ọza ẹ yị rẹ nyẹngụ ngụ ini eehi adarehi ana nyị ụkata ẹtẹẹtẹrẹ, dị ọ̀ na kụ́ ọọ ẹnya; ẹ yị vị o vịdị sì oze dị ọ̀ za adarehi ọnọọ, dị ọ̀ sụ́ ọọ, ịjọnọọ ọgọnị di ò ve re oze kụ́ ọọ ẹnya irehi.

²⁸ “Ịzẹyịza, mị kà wụ nị, Ohomorihi vaa vagu ọza ịnị avaba ịvị ọnịrị ụhụ ọnị ọ̀ọ kụ̀ Ohomorihi, ọ̀ọ daka divi pooro;

²⁹ ama ọza ana àa kụ̀ Ụhwẹ Ọnịnị ụhụ, ọ yị va nyị ẹvagu ịnị anị, ộ rị ịvị pooro zịna-zịna.”

³⁰ Ijeesu ộ maanị kà, agụvị ka ẹnịnị ka ộ nyị ụhwẹ echu.

Ọnyị Ijeesu ọnịrị ẹyịnyara anị

³¹ Ẹkụhị ọnya ọnyị Ijeesu ọnịrị ẹyịnyara anị ệ vẹ, dị ẹ jẹẹ ẹhẹ, dị ẹ tụ́ ka à na hị́ ọọ vẹ nị.

³² Aza ọrụrụ-ọrụrụ vị ana yaayịtẹ kara Ijeesu, dị ẹnịnị kà a yọ ka, “Re, ọnyị awụ ọnịrị ẹyịnyara awụ hi ẹhẹ, eyee sì wu.”

³³ Dị Ijeesu ka, “Ẹnẹ vị ọnyị amị ọnịrị ẹyịnyara amị?”

³⁴ Dị Ijeesu re aza ana yaayịtẹ kara a, dị ọ ka, “Re, ọnyị amị ọnịrị ẹyịnyara amị ẹ vị ẹnẹnị nị.

³⁵ Ọza tụra ọza ana àa mẹ̀ ịsa oni Ohomorihi sì, ẹnị ẹ vị ẹyịnyara amị ọnịrị onyeyiza amị beri ọnyị amị nị.”