Ịmaakị 15 - IWE ỌNỊNỊ

 za Ijeesu ne tù Ipayireti ana vị ịgọvọnọ

¹ Ịnị ẹnẹnẹ viri-viri, ohirẹsụ ẹbanyị irehi Ohomorihi beri ọdọvịdị nịnị ẹnịrị ọzwọzọda nịnị ne beri avaba ọmọkarẹyị nịnị ê gẹ eyi, dị ẹ sụ́ Ijeesu orupa, dị ẹ vàa tụ́ ọvịdị, dị ẹ sị ọọ ne chire Ipayireti ụvọ nị.

² Dị Ipayireti họ̀ Ijeesu use ka, “Ẹ wáá vị ohinọyị Aniju nịnị nị?” Di o tụ́ ohi, dị ọ ka, “Ụ mẹ̀ yị kà a, avọọ yọ nị.”

³ Ohirẹsụ ẹbanyị irehi Ohomorihi ệ kụ́ ịrẹka ọrụrụ-ọrụrụ za Ijeesu; ama o yi tụ́ ohi.

⁴ Dị Ipayireti rẹ họ̀ ọ ka, “We yi tụ́ ohii? Wê re avaba ịrẹyị awụ ana a sị tụ́ ịrẹka aanị.”

⁵ Ama Ijeesu oyi tụ́ ohi vụrụ-vụrụ; agụvị avọọ di o si hí Ipayireti irenu nị.

Ệ jị ịvị isu yị Ijeesu

⁶ Eche ọ̀ọ maanị si tù, Ipayireti ụụ̄ hụrẹ anịnẹngwa ọnya ụvọ yị wa, ọza tụra ọza ẹnẹ ẹnịnị èe sì.

⁷ Â nyị ọza ịnya aanị ana aā hị́ Ibaraba. Â kụ́ ọnịrị aza ẹnyị aanị hi ịnị ẹngwa. Ẹnịnị vị ana wụ̀ ọza, ẹ́nịrị ịjọva màa zyaazị.

⁸ Dị ọkọnị aza vẹ, dị ẹ ka Ipayireti ọ̀ mẹ ịsị ọọ̄ vịdịị mẹ yị ẹnị nị.

⁹ Dị Ipayireti ka, “Wéé sì ka ma hụrẹ Ohinọyị Aniju nịnị ụvọ wụ nịnị?”

¹⁰ Ộ yẹ ka agụvị ayamịkụ ohirẹsụ ẹbanyị irehi Ohomorihi sị sị Ijeesu chire ọnị ụvọ nị.

¹¹ Dị ohirẹsụ ẹbanyị irehi Ohomorihi tụ́ aza ịrẹyị ka ẹ̀ kà a ka Ipayireti ọ̀ vana hụrẹ Ibaraba ụvọ yị ẹnị.

¹² Dị Ipayireti rẹ kà a yị wa ka, “U mè sì ka ma mẹ ọza ọnị ụ wa hị́ Ohinọyị Aniju nịnị aanị?”

¹³ Di e nowu zẹtẹ, dị ẹ ka, “Kanyị ọọ za apavahị!”

¹⁴ Dị Ipayireti rẹ ka, “Sị ẹ vẹ? Sị ẹ vị ịsa odivi ọnị ọ mẹ̀?” Di e re nowu hu avọọ, dị ẹ ka, “Kanyị ọọ za apavahị!”

¹⁵ Ama Ipayireti ô sì ka ọnị ọ̀ mẹ̀ ịsa ene zè aza ẹnẹẹ eyi; agụvị avọọ dị ọ hụrẹ Ibaraba ụvọ yị wa nị; Dị ọ ka è tụ́ Ijeesu ịjapa, dị à sị ọọ, dị à na kanyị ọọ za apavahị.

Isoja nịnị ệ sị Ijeesu mẹ enyinyi

¹⁶ Isoja nịnị ệ sị Ijeesu nọ ịnị ọba irehi Ipayireti. Dị ẹ hị́ isoja nịnị ana vọ gụ nị.

¹⁷ Ẹnịnị ệ sị awuru ohinọyị ovivi ọnya chire Ijeesu. Dị ẹ mẹ ọkẹkẹrẹkụ ikeyi-ikeyi, di e si kú ọọ ịrẹsụ nị.

¹⁸ Di e nyima, dị ẹyaa kụ́ ọọ, dị ẹ ka, “Taarụ, Ohinọyị Aniju nịnị.”

¹⁹ Dị ẹyaa và okutẹẹ hi ọ ịrẹsụ nị. Dị ẹyaa jị atẹẹ kú ọọ nị, dị aza ẹnyị ree ku ẹtẹ (anka èe rere) aa hẹkẹ ẹ avọọ nị.

²⁰ Ịjị ẹ raà sị ọọ mẹ enyinyi, dị ẹ ngwa a awuru ovivi ọnọọ, dị ẹ sị awuru anị ụvọta chire e nị. Dị ẹ sị ọọ jịnẹ ka ẹnị ẹ̀ na kanyị ọọ za apavahị nị.

 kanyị Ijeesu za apavahị

²¹ Ẹ mẹ̀ sị ọọ aa na, ê re ọza ịnya aanị ana aa parahu, ọ mẹ̀ hụrẹ aarẹ aa vẹ. Aā hị́ ọọ Ịsayịmọnị Anisayireni; ọnị ọ vị ada Arẹkịsanda ọnịrị Iruhwọọsị nị. Dị ẹ sị ụkata za a ka ọ̀ va za apavahị Ijeesu nị.

²² Ệ sị Ijeesu nọ ịzị aā hị́ Ịgọrịgọta (oni iruvo anị vị “aha akokoro ịrẹsụ”).

²³ Â sị eche ana a sị avị ọnyịrẹyị và hura yọ ka ò hú ọọ. Ama Ijeesu ọ yị dọ ọ.

²⁴ Dị ẹ za a, dị ẹ kanyị ọọ za apavahị nị. Dị ẹyaa gà ịta anịị hi ẹngụ ụvọ, dị ẹ jị osisii ka ẹnị ẹ̀ yẹ ana vọrọ ka ò tụ́ ọzọza nị.

²⁵ Ụmẹ agogo ịhịịna ẹnẹnẹ ẹ sị kanyị ọọ za apavahị nị.

²⁶ Ệ chẹrẹ ịsa ẹnẹ ẹ ka ộ mẹ̀ tụ́ ịrẹsụ apavahị ka, “Ohinọyị Aniju nịnị.”

²⁷ Ệ rẹ kanyị oyi ẹẹva za apavahị; ọnyara yà eyi ụvọrị anị, dị ọsa rẹ yà eyi ụvọha anị nị.

²⁸ [Iwe Ohomorihi ọ sị sẹ, ana kà a ka: “Â za a ịrịka vaka aza ana jịnẹ ọda.”]

²⁹ Dị aza ẹnyị ana aa parahu aa kụ̀ Ijeesu ụhụ nị; di eyee mi ịrẹsụ, dị ẹ ka, “Ịhịịn, ewu ene vee wú irehi Ohomorihi, di u re tenyi ọọ dà ịhyẹgwẹta anị.

³⁰ Dọ ẹngụ awụ tụ́, di u we chí hụrẹ ịrẹsụ apavahị vẹ!”

³¹ Avọọ ohirẹsụ ẹbanyị irehi Ohomorihi ne beri ọzwọzọda nịnị mẹ̀ raa sị ọọ mẹ enyinyi nị. Dị ẹ yaa kà a yị ẹngụ ka, “Ọọ̄ dọ aza ẹnẹsa há, ama ọ yị zụ dọ ẹngụ anị há.

³² Ikirisiti ana vị Ohinọyị Anisirẹrị nịnị ò chí hụrẹ ịrẹsụ apavahị vẹ booro aanị, di yee re e, dị yaa dọ ọ wụ́!” Dị ẹnị ana a rẹ kanyị za apavahị, ẹnị raa mẹ̀ ẹ isiya nị.

Íjeesu meme sú

³³ Ịnị ụmẹ agogo ẹwụrẹva, avaba ẹtẹ ọnọọ saka-saka ọ sị vara ịrahụ, pooro na ngụ ụmẹ agogo ẹẹta.

³⁴ Ịnị ụmẹ agogo ẹẹta, dị Ijeesu nowu tụ́ ẹba, dị ọ ka, “Ohomorihi amị, Ohomorihi amị, sị ẹ vẹ dị ụ sị ayị hụụnị ịrẹyị amị?”

³⁵ Aza ẹnyị ana jẹẹ ịzọọ, dị ẹ wụ́, ệ kà a ka vị aa hị́ Erija nị.

³⁶ Dị ọza ịnya wuse zwe na sị awẹ, dị ọ jị ọọ ngụ ini eche ọsụrẹyị, dị ọ sị tụ́ ịrẹsụ ọchị, dị ọ tana ẹ yị Ijeesu ka ò hú ọọ nị. Dị ọ ka, “Naavọ nịnị ye re e, àa vị Erija ee vee chí ọọ hi ẹtẹ nị!”

³⁷ Ijeesu ộ nowu tụ́ ẹba, dị ọ hụrẹ ụhwẹ anị ụvọ nị.

³⁸ Dị achị ọratụpọ anaa sị che irehi Ohomorihi, há hi ẹẹva hụrẹ ẹbẹẹba na ngụ ụvẹtẹ waara nị.

³⁹ Ọga ana sị eyi pe isoja ẹchẹhị nịnị ana jẹẹ và eyi ká Ijeesu ô re e, o meme nowu, dị ọ hụrẹ ụhwẹ ụvọ; dị ọ ka, “Ịzẹyịza, ọnọrụ ọnọnị vị Ozi Ohomorihi!”

⁴⁰ A rẹ nyị anẹẹ ẹnyị aanị ana jẹẹ ẹ́nẹẹnẹ, di eyee re ẹtẹ nị. Imeri Anịmagịdara ọnịrị Ịsarọmị yà ịnị ẹnịnị; Imeri ọnyị Ijemiisi oweyi ọnịrị Ijosẹsị ọnị rẹ yà ịzọọ bẹẹ.

⁴¹ Ijeesu mẹ̀ vịdị yà Igariri, ẹnịnị ệ dụ ọọ zịịzị, dị ẹ rẹ sị ịsa mẹ ọgụvọ yọ bẹẹ nị. Anẹẹ ọrụrụ-ọrụrụ ana saasa a vẹ Ijerusarẹmị ẹnị rẹ yà ịzọọ bẹẹ.

A mẹmẹ sị oku Ijeesu tụ́ ịnị ụsị ịnị ịrẹta

⁴² Oruva o si tù; ịhị ọnọọ ọ vị ẹkụhị enee siī tenyi ẹngụ nị, ọnọọ vị ka eyinẹhẹ anị ọ vị ẹkụhị ụhwọtụ nị.

⁴³ Ọza ịnya ana aā hị́ Ijosẹẹhụ Anarịmatịya ộ vẹ ịzọọ. Ọzọbanyị ọ vị ịnị ọmọkarẹyị nịnị nị; ọnị nyẹmba vị ene ee zí ụmẹ ịjọva Ohomorihi. Dị ọ sị ọtụtụrụma ne tù Ipayireti, di o họ̀ use oku Ijeesu nị.

⁴⁴ Ô hí Ipayireti irenu ka Ijeesu ọ jịnẹ wusu. Dị Ipayireti tụ́ na hị́ ọga isoja nịnị ọnọọ, dị họ̀ ọ ka Ijeesu óó wusu nị.

⁴⁵ Ịjị ọga isoja nịnị ọnọọ sị ọọ kà a yọ ka Ijeesu ô wusu, dị ọ ka Ijosẹẹhụ ò na sị oku anị nị.

⁴⁶ Dị Ijosẹẹhụ na hị́ ịta ọvụ, di o chí oku Ijeesu hụrẹ ịrẹsụ apavahị, dị ọ sị ịta ọnọọ chire e ikuma nị. Dị ọ sị ọọ na tụ́ ịnị ụsị ana a vịdị sị chị tụ́ ịnị ịrẹta nị. Di o zina ịrẹta ọnya gù ụsị ọnọọ irenu nị.

⁴⁷ Imeri Anịmagịdara ọnịrị Imeri ọnyị Ijosẹsị ê re ịzị a sị oku Ijeesu tụ́.