Ịmaakị 13 - IWE ỌNỊNỊ

Apọtẹrẹwa ẹzẹtẹ ẹhẹ

¹ Íjeesu màa jịnẹ hụụnị irehi Ohomorihi vẹ, dị ozirẹma anị ọnya ka, “Nda, aa! Wee re ịrẹta ẹnẹnị ọnịrị irehi ozoza ẹnẹnị!”

² Dị Ijeesu tụ́ ohi ka, “Wee re irehi ẹbanyị ẹnẹnị? Ẹ yị nyị ịrẹta ikonya ana a vaa navọ tụ́ ịrẹsụ ọsa. Vị e vee wú wa ha saka-saka nị.”

³ Ijeesu ộ nọ ịrẹsụ Ataba Orivi, dị ọ yaayịtẹ, dị ọ và eyi ká irehi Ohomorihi nị. Dị Ipita ọnịrị Ijemiisi ne beri Ịjọọnụ ọnịrị Andụrụ tangwa họ̀ ọ use, dị ẹ ka:

⁴ “Kà ẹ yị ụmẹ ọnị ịsa ẹnẹnị vaa sị mẹ. Sị ẹ vị apọtẹrẹwa ana vaa sị zụ̀ ka ịsa ẹnẹnị aa vaa mẹ?”

⁵ Dị Ijeesu nyima nị, dị ọ ka, “Sị eyi pe ẹngụ awụ nịnị, oo! Asị ụ zẹẹ ka è vene wu nịnị!

⁶ Aza ẹnyị vaa rị ịrẹha amị, dị ẹ vẹ dị ẹ ka ẹnị ẹ vị Ọdọzaha nị, dị ẹ sị aza ọrụrụ-ọrụrụ vene.

⁷ Ịjị ụ wàa wụ́ ekuku ịrẹkụ nịnị ọnịrị ụha ịrẹkụ, asị ụ zẹẹ ka ayị awụ nịnị ọ̀ vazi. Ẹ yị zụ nyị ka ọyị vavọọ yà; ama ẹzẹtẹ ẹhẹ ọọ̀ yị vẹ.

⁸ Anẹkụra ẹnyị vaa kwẹẹtẹ tù ọsa, dị ẹkụra ohinọyị ẹnyị rẹ kwẹẹtẹ tù ọsa. Ẹtẹ vee henyi jigi-jigi aha ọrụrụ-ọrụrụ, ụngwẹ vaa kụ̀. Avaba ẹsẹnị aa sịị zụ̀ ka vị ụyọrị sẹsẹ nyima avọọ nị.

⁹ Sị eyi pe ẹngụ awụ nịnị! A vaa za wụ nịnị nọ ini ikootu, di e re tụ́ wu nịnị ini irehi ahẹkẹ Aniju nịnị. A rẹ vaa za wụ nịnị naa jẹẹ ọvịdị ohirẹsụ ọnịrị ohinọyị nịnị agụvị amị, agụvị dị ụ wa dọ ivenu amị yị wa nịnị.

¹⁰ Â nyị ka à kà enube ọyịza yị avaba anẹhẹ dị ọdịrẹma ẹhẹ ọ̀ vavẹ.

¹¹ Ịjị àa za wụ nịnị nọ ini ikootu, asị u ro ịrẹyị ọnị ụ vaa kà tịtẹ nịnị! Ịjị ụmẹ òo si tù gẹdẹ-gẹdẹ, ịsị Ohomorihi ọ̀ọ sị tụ́ wụ nịnị irenu, ụ kà a nịnị; agụvị ka ẹ yị vị ẹwụ nịnị ụvọta aa kà ịrẹyị, Ụhwẹ Ọnịnịị yọ nị.

¹² Ẹyịnyara ẹnyị vee sì iruvo ọsa, dị a wụ ọọ. Ada vee sì iruvo ozi anị. Di ezi kwẹẹtẹ tù aza ana ma wa, dị ẹ wụ̀ wa.

¹³ Dị avaba aza aa nyị ịhyẹrẹ awụ nịnị kẹnẹ agụvị amị. Ama, ọza ana àa zụ sị ẹngụ dọ ọ pooro ne tù ọdịrẹma, ọnị a vaa dọ ọ há nị.

¹⁴ U vee re ‘Ịsa Odivi eneē chire ọza angwa’ (ọnị Ịdanịyẹrị ọnịsẹ kà ịrẹyị anị) ka ọ yà ịzị ẹ̀ yị vọrọ ka ọ̀ yà. (Ọza ana aa kà iwe ọnọnị, ò re ka ọnị ộ yẹ ịrẹyị ọnọnị!) Ịjọnọọ aza ana àa yà Ijudiya è zwe nọ ịrẹsụ ataba.

¹⁵ Ọza ana àa yà ịrẹsụ irehi, asị o chí nọ ini eehi na sị ịsọnyị-ịsọnyị!

¹⁶ Ọza ana àa rẹ yà ịnị aarẹ, asị ọ varẹma nọ ini eehi na sị awuru anị!

¹⁷ Ọ vaa daa divi yị ọnịrẹẹ nịnị ọnịrị aza ana sị ozi rị ụvọ ịhị ọnọọ.

¹⁸ Waa mẹ̀ aduwa nịnị, ka asị ịrẹyị ẹnẹẹ mẹ ịnị ụmẹ ọgụ,

¹⁹ agụvị ka ịhị ọnọọ, ụya ene vee chí hi ẹtẹ, ẹ̀ yị vịdị vavọọ nyị ụya da, Óhomorihi mẹ̀ hụrẹ mẹ ẹhẹ pooro ve tù ọyaanị; a mā rẹ vana vavọọ nyị ị́rẹma anị.

²⁰ Ẹ̀ yị vị Ananyị yị nyị hụụnị ẹkụhị ẹnẹẹ, ẹ yị hyakụ nyị ọza ikonya ana aa há. Ama agụvị aza ọnọọ sị nyị, ộ nyị hụụnị ẹkụhị ẹnẹẹ.

²¹ Ụmẹ ọnọọ, ọza ọ̀ọ ka a wụ nịnị ka: ‘Re, Ikirisiti yọ’ à vị ka: ‘Re, ọnị ọ yà ịzọsọọ avọọ nọ’, asị ụ dọ ọ wụ́,

²² agụvị ka onireche nịnị ana ka ẹnị vị Ikirisiti, ọnịrị ọnịsẹ ireche nịnị vaa kwẹẹtẹ, dị ẹyaa mẹ̀ ụkọrọ ohyozirenu ẹbanyị-ẹbanyị, agụvị di è si vene aza. Ẹ hyakụ vaa sịị vụrị ka eni è vene aza oni Ohomorihi sị nyị bẹẹ.

²³ Ama sị eyi pe ẹngụ awụ nịnị, oo, agụvị ka mê vịdị juntu sị ọọ kà a wụ nịnị!

²⁴ Ama ịjị ụmẹ ụya ẹnẹnị ọ̀ọ ta, ọyị vee hozi, ụhwẹ ọ yị kụkụ vaa vwẹtẹ,

²⁵ dị ụzọmị nịnị jị hụụnị ihinẹba, dị ụkata ẹbẹẹba re henyi.

²⁶ Di e vene re ka ẹmị Ozi ọza onigirima aa vẹ ini eguhi beri ụkata ọnịrị igirima.

²⁷ Dị mị tụ́ anggẹẹrị nịnị ka ẹ̀ nọ avaba ẹhẹ, dị ẹ̀ na kụ́ avaba aza amị ọnị mị nyị gụ hụrẹ avaba aha ịzị ẹhẹ ọnịrị ẹbẹẹba na ta hi.

²⁸ Agụvị avọọ, sị ọchị ezu zama ịrẹyị ọnọnị re nịnị; Ịjị àa ha avọ, di ee nyị avị nị, wâ yẹ nịnị ka ị̀rẹ̀sụ̀ aa vẹ.

²⁹ Avọọ gẹdẹ-gẹdẹ wèe re ka ịsa ẹnẹnị aa mẹ nịnị, yẹ nịnị ka maa vaa vẹ, mâ hyakụ va sị ngụ enoze bẹẹ.

³⁰ Ịzẹyịza m maa kà a wụ nịnị nị, aza ene hi ẹhẹ booro aanị, ẹ yị vaa taa hụụnị ẹhẹ dị avaba ịsa ẹnẹnị ẹ̀ mẹ.

³¹ Ihinẹba ọnịrị ẹhẹ vaa ta, ama àa vị ịrẹyị amịị yọ, o yi vee vú.”

Ẹ yị nyị ọza ana yẹ ẹkụhị ọnịrị ụmẹ ọ́yị vẹ Ijeesu

³² “Ama ẹkụhị ọnọọ ọnịrị ụmẹ ọnọọ gẹdẹ-gẹdẹ, ẹ yị nyị ọza ana yẹ. Anggẹẹrị nịnị ene hi ẹbẹẹba ẹ yị hyakụ yẹ. Ozi Ohomorihi ọnị ụvọta ọ yị hyakụ rẹ yẹ bẹẹ, ẹ̀ yị vị Ada amị ọnịnya kẹnẹ.

³³ Sị eyi pe ẹtẹ nịnị, di u wee zí nịnị, agụvị ka wẹ yị yẹ ịjị ụmẹ ọnọọ vee tù nịnị.

³⁴ Vị ọ sị mẹẹ anka ọza ana aa hụrẹ eehi, dị ọ sị irehi anị chire ezi ahụ anị ụvọ, dị ọ ka è sị eyi pee nị. Dị ọ sị ụkọrọ yị ọzọza, dị ọ rẹ ka oserẹtẹ òo sere ẹtẹ nị.

³⁵ Agụvị avọọ sị eyi pe ẹtẹ nịnị, oo, agụvị ka wẹ yị yẹ ụmẹ ana adarehi aa sịị vẹ nịnị. Ọ zụ vẹ ụmẹ oruva, ọ rẹ zụ vẹ agẹvịrahụ, àa vị ụkọkọrọ ọ̀ọ maanị nowu kẹnẹ, ọ rẹ zụ vị ẹnẹnẹ viri-viri.

³⁶ Asị ahịka ụ waa sụ ara nịnị, dị ọ vana vẹ asigiri nị.

³⁷ Ịsị mị kà wụ nịnị aanị, mị rẹ kà yị avaba aza nị: Sị eyi pe ẹtẹ nịnị, oo!”