Ịmaakị 12 - IWE ỌNỊNỊ

Ụhịrẹyị aza edivi ana a dà ẹtẹ yị

¹ Dị Ijeesu nyima aa sị ụhịrẹyịị kà ịrẹyịị yị wa nị; dị ọ ka, “Â nyị ọza ịnya aanị ana dà ụbazị, dị ọ hị́ ọchị ana aā hị́ ịvayịnị tụ́ ịnị anị nị. Dị ọ rẹ họ̀ kara a nị. Ộ jị ụkọ ịzị a vaa yàa kwọrọ ẹtụtụ ọchị ẹnẹẹ, dị ọ re hi ụta oserẹtẹ tụ́ ọọ nị. Ộ sị ụbazị ọnọọ rere aza ẹnyị aanị ka ọnị ọ̀ọ dọ wa ọtụrọsarẹsụ anị. Di o si hu aa hụrẹ eehi nị.

² Ịjị ụmẹ anị si tù, dị ọ tụ́ ozi ahụ anị ọnya ne tù aza ẹnẹẹ ọnọọ dà ẹtẹ yị, ka ọ̀ na dọ ẹtụtụ ana vị áanị va yị ọnị nị.

³ Dị aza ẹnẹẹ za ozi ahụ ọnọọ, di e tụ́ ọọ, dị ẹ dụ ọọ avosusu na jịnẹ nị.

⁴ Dị ọza ana nyị ụbazị ọnọọ rẹ tụ́ ozi ahụ anị ọsa na nị. Di e hú ọọ ọsẹ ịnị ịrẹsụ, dị ẹ ha ịrẹsụ, dị ẹ mẹ̀ ụhị nyị ọọ nị.

⁵ Dị ọ rẹ tụ́ ọza ẹnẹsa na nị; dị aza ẹnẹẹ kụkụ za a, dị ẹ wụ ọọ nị. Avọọ ẹ mẹ̀ yị mẹ, ịsa edivi hi aza ọrụrụ-ọrụrụ nị: Ê tụ́ aza ẹnyị, dị ẹ wụ̀ aza ẹnyị nị.

⁶ Ọza ana nyị ụbazị ọnọnị ộ nyị ozi ọnya chọchọchọ̀ ọnọrụ oni o sì ịrẹyị anị ẹtẹẹtẹrẹ. Ọnị ọ tụ́ na ọdịrẹma nị, dị ọ ka: ‘Ẹ vaa nyị ịrẹsụ ọkahii yị ozi emi.’

⁷ Dị aza ẹnẹẹ ana a dà ẹtẹ yị, kụkụ gẹ eyi nị, dị ẹ ka: ‘Ozi ọnọnị ọ vaa kụ́ ogu ada anị nị; à vẹ ya wụ ọọ nịnị, di ogu anị ọ̀ kụkụ vị áayị!’

⁸ Dị ẹ za a, dị ẹ wụ ọọ nị; dị ẹ sị ọọ ne ngụ ịrẹma ụbazị nị.

⁹ Si u ro ka ọza ana nyị ụbazị ọnọọ vaa mẹ? Vị aa vẹ, dị ọ va wụ̀ aza ẹnẹẹ nị; dị ọ sị ụbazị ọnọọ yị aza ẹnẹsa.

¹⁰ Aanịka wẹ yị kà Iwe Ohomorihi ana kà a ka: ‘Ịrẹta ọnọ ọtụrarehi nịnị yi tịtẹ, ọnị ọ vana vị ọọnyị ịnị ịrẹta anaa sịị̄ dà irehi nị.

¹¹ Ananyị yị ọ maanị mẹ nị; ô hí yi irenu!’ ”

¹² Ọdọvịdị Aniju nịnị ê sì oze ka ẹnị ẹ̀ za a, ama angwa aza ee hí wa. Ệ yẹ ka eni ee che ụhịrẹyị ọnọọ yị nị. Dị ẹnịnị na a vọ, di e si hu aa na nị.

Ịrẹyị ẹkẹhị irehi

¹³ Â tụ́ Anihwarisi nịnị ẹnyị ọnịrị aza Ịhẹrọdị nịnị nọ ịdị Ijeesu ka ẹ̀ na sị ịrẹyị za a.

¹⁴ Dị ẹ vẹ nị, dị ẹ kà a yọ ka, “Nda, yâ yẹ ka ọnịrẹyịzẹyịza ụ vị nị. Wẹ yị yẹ ọzọbanyị, agụvị ka we mē re eyi aza. Ama ịzẹyịza oze Ohomorihi kẹnẹ, ụ sịị̄ zụ̀ aza nị. Ọ́ọ́ vọrọ ka yaa tụ́ ẹkẹhị irehi yị ohinọyị Aniroomi, à vị ọ yị vọrọ?

¹⁵ Yáá tụ́ ọọ, à vị asị ị rẹ̀ tụ́ ọọ?” Ama Ijeesu ộ yẹ ka ọbọ ẹyaa mẹ nị. Dị ọ kà a yị wa ka, “Sị ẹ vẹ dị ụ waa zama mịị re nịnị? Sị ẹkẹhị enyusẹ ọnyaa mị di a re di me re e!”

¹⁶ Dị ẹ sị ẹkẹhị ọnyaa yọ nị. Dị ọ ka, “Ẹnị uhwoto anị ọnịrị ịrẹha anị yà ịnị anị aanị?” Dị ẹ ka óohinọnyị Aniroomi yọ nị.

¹⁷ Dị Ijeesu kà a yị wa ka, “Ẹ̀hẹẹ, sị ịsa ana àa vị óohinọyị Aniroomi, yị ohinọyị ọnọọ nịnị; dị ụ wa rẹ sị ịsa ana àa vị ịsa Ohomorihi, yị Ohomorihi nịnị!” Ịrẹyị Ijeesu o si hí wa irenu.

Oku nịnị waa vanaa haa hụụnị isu?

¹⁸ Aza ẹnyị aanị ana aā hị́ Anisadusi nịnị, ệ ká Ijeesu vẹ. Ẹnịnị ẹẹ̄ kà a ka oku ẹ yị vaa haa hụụnị isu nị. Ệ họ̀ Ijeesu use ka:

¹⁹ “Nda, Imosiisi ộ chẹrẹẹ tịtẹ yị ka, ọza òo sú, dị ọ navọ ose anị tịtẹ nị, dị ọ̀ yị ma ozi nị, ọyịnyara anị ọ̀ kụ́ ọnẹẹ ọnọọ ogu, dị ọ̀ ma ozi yị ẹnẹbẹnị anị ene sú.

²⁰ A va nyị ẹyịnyara ịhịmba. Ị́ịpaapa ộ nyị ọnẹẹ, ọnọrụ ọnọọ ô wusu, ọ yị ma ozi.

²¹ Ọhụva anị ọ rẹ kụ́ ọnẹẹ ọnọọ ogu, ọ yị ma ozi yọ, di oni re sú. Avọọ ọ́nọhụta ọnị mẹ̀ rẹ yà nị.

²² Avaba ẹnị ịhịmba ệ nyị ọọ, ọ yị ma ozi yị wa, di e sú. Ọdịrẹma anị dị ọnẹẹ ọnọọ oni re sú nị.

²³ Ịnị ụmẹ oni oku nịnị vaa sị haa hụụnị isu, ẹ̀ẹ vaa haa hụụnị isu, ẹnẹ ọnẹẹ ọnọọ kụkụ vaa vị ose anị agụvị ka ẹnị ịhịmba ẹ vịdị nyị ọọ nị.”

²⁴ Dị Ijeesu ka, “Wáá yẹ ka we si nyeeyi nịnị? Agụvị ka wẹ yị yẹ Iwe Ohomorihi, wẹ yị rẹ yẹ ụkata Ohomorihi nịnị.

²⁵ Ịjị aza ẹ̀ẹ sị ha hụụnị isu, ẹ yị kụkụ vaa nyị ọnẹẹ, ọza ọ yị rẹ va sị ọnẹẹ yị ọva anị. Vị ẹ vaa sị mẹẹ anka anggẹẹrị ẹ́bẹẹba nịnị mẹ̀ yà avọọ nị.

²⁶ Àa vị ka áá vaa ha oku nịnị hụụnị isu yọ, aanị ka wẹẹ̀ yị kà iwe Imosiisi nịnị da, Óhomorihi mẹ̀ kà a yị Imosiisi ịzị ọchị yà aa rị ịra ka: ‘Ẹma vị Ohomorihi Abụrahamị nị, dị mị rẹ vị Ohomorihi Ayiziiki nị, dị mị rẹ vị Ohomorihi Ijekọvụ nị.’

²⁷ Ohomorihi ọ yị vị Ohomorihi aza ana ta, ama Ohomorihi aza ana yàra. Wee re ka we si nyeeyi nịnị ẹtẹẹtẹrẹ aanị.”

Ye re ọda ene hu keekere

²⁸ Ọza ịnya ịnị ọzwọzọda nịnị yà ịzọọ. Ộ wụ́ ịrẹyị ẹnẹ ẹyaa kụ́; o re re, Íjeesu mẹmẹ tụ́ wa ohi ẹtẹẹtẹrẹ. Agụvị avọọ dị ọ ká Ijeesu vẹ, dị ọ họ̀ ọ ka, “Ye re ọda ene hu keekere ịnị avaba ọda?”

²⁹ Dị Ijeesu tụ́ ọọ ohi ka, “Ọda ene hu yị: ‘Sị ụtọ pe ẹtẹ oo, ẹwụ nịnị Anisirẹrị! Ananyị yị ọ vị Ohomorihi ayị nị. Ọnịnya ọ vị Ohomorihi nị.

³⁰ Sị avaba ayị awụ sì ịrẹyị Ohomorihi Ananyị yị, beri avaba ivehu awụ ọnịrị avaba ịrẹyọyẹ awụ ne beri avaba ụkata awụ!’

³¹ Ọhụva yị: ‘Sị ịrẹyị ọnọhụva awụ anka ẹngụ awụ!’ Ẹ yị nyị ọda ọsa ene huna ẹsẹnị.”

³² Dị ọzwọzọda ọnọọ ka, “Nda, avọọ yịị yọ! Ịzẹyịza, Ohomorihi vị ọnya. Ẹ yị nyị Ohomorihi ọsa, ẹ̀ yị vị ọnịnya.

³³ A rẹ vọrọ ka ọza ọ̀ sị avaba ayị anị sì ịrẹyị anị, beri avaba ịrẹyọyẹ anị ọnịrị avaba ụkata anị, di ò re sì ịrẹyị ọnọhụva anị anka ẹngụ anị. Ọda ẹẹva ẹnẹnị e huna avaba ịsọvọ ana aā rị ịra ọnịrị ịsọvọ ana vọ bemi-bemi nị.”

³⁴ Íjeesu mè re ka ộ sị ịrẹyọyẹ tụ́ ohi, dị ọ kà a yọ ka, “We yi noze rịrị ịzị Ohomorihi yà aa mẹ ịjọva.” Ịrẹma ọsọnị, ẹ yị nyị ọza ana vana nyayịnẹ họ̀ ọ use ịrẹyị ọnyọọnyị.

Ẹnị Ikirisiti vị ozi anị?

³⁵ Íjeesu màa zụ̀ aza ịsa ini irehi Ohomorihi, dị ọ ka, “Sị ẹ vẹ dị ọzwọzọda nịnị kà a ka Ikirisiti vị ozi Idevidi?

³⁶ Idevidi ọnị nyẹmba ộ sị ụkata Ụhwẹ Ọnịnị kà a ka: ‘Ohomorihi ộ kà a yị Ananyị mị ka: Yaayịtẹ éyi ụvọrị amị pooro dị ma sị ọnịvị awụ tụ́ ịzị ụ waa kụ́ ahụụ hi!’

³⁷ Idevidi ọnị ụvọta ộ hị́ ọọ Ananyị mị. Íkirisiti mẹmẹ rẹ va mẹ vị ozi anị?” Ọkọnị aza ee sì ka ẹnị ẹ̀ wụ́ ịrẹyị anị.

Ijeesu ộ kà ọ̀nọ̀ agụvị ọzwọzọda nịnị

³⁸ Íjeesu màa zụ̀ wa ịsa, dị ọ ka, “Sị eyi pe ẹngụ awụ nịnị ịnị ụvọ ọzwọzọda nịnị. Eē sì ka eni èe chire awuru ọgọdọọ zịịzị, dị aza ẹ̀ẹ kụ́ ẹnị ini ohu.

³⁹ E reē sì ka ẹnị ẹ̀ẹ yaayịtẹ aha ene hu keekere ini irehi Ohomorihi ọnịrị ịzị aa kụ́ gụ aa rị eche.

⁴⁰ Ẹnị ẹẹ̄ sị irikichii dọ osoku nịnị irehi nị; ama dị ẹyaa mẹ apẹẹ mẹ̀ aduwa ọgọdọ. Ẹnị ẹ vaa rị ụya hu nị.”

Ẹyịza oni osoku ọnya sị yị Ohomorihi

⁴¹ Ijeesu ộ yaayịtẹ ini irehi Ohomorihi, ộ và eyi ká ịzị aā sị ẹkẹhịị tụ́. Di ee re, aza mẹmẹ aa sị ẹkẹhịị tụ́ ịzọọ nị. Opisa ọrụrụ-ọrụrụ ệ sị ẹkẹhị ọbanyịị tụ́ ịzọọ.

⁴² Osoku onosiye ọnya aanị ộ vẹ, dị ọ sị anini ẹẹva tụ́ ịzọọ nị. Anini ẹẹva vị eepeni.

⁴³ Dị Ijeesu hị́ ezirẹma anị, dị ọ ka, “Ịzẹyịza m maa kà a wụ nịnị nị, osoku onosiye ọnọnị ọ mẹ huna avaba aza ana vọ nị;

⁴⁴ agụvị ka avaba aza ana vọ ệ nyị ẹkẹhị, dị ẹ sị hụụnị anị va tụ́ ịzọọ nị. Ama àa vị ọnẹẹ ọnọnịị yọ, ọ mẹ̀ yị vị onosiye, avaba ịsa ọnị ọ nyị, ọ sị tụ́ ịzọọ avọọ nị, avaba ịsa ana vọrọ ka ọ̀ yaanị sị hị́ ịsa rị.”