Ịmaakị 10 - IWE ỌNỊNỊ

Ịrẹyị ọnẹẹ ọyịnyị

¹ Ijeesu ộ hụụ ịzọọ, dị ọ na ngụ ẹkụra Ijudiya, dị ọ jịnẹ nọ akẹnẹ Okuha Ịjọdanị nị. Dị ọkọnị aza rẹ wara ká a vẹ nị. Anka ọ mẹ̀ yị mẹ, dị ọ raa zụ̀ wa ịsa nị.

² Dị Anihwarisi ẹnyị ká a vẹ ka ẹnị ẹ̀ sị ịrẹyị ve be e nị. Dị ẹ họ̀ ọ use ka, “Ọ́ọ́ vọrọ ka ọnọrụ ò yi ose anị?”

³ Di o tụ́ ohi, dị ọ ka, “Sị Imosiisi mẹ ọda anị yị wụ nịnị?”

⁴ Dị ẹ ka, “Imosiisi ộ zẹẹ ka à mẹ iwe ivenu enee si yi ọọ, di è yi ọọ.”

⁵ Dị Ijeesu ka, “Agụvị ayọkatẹngụ awụ nịnị Ímosiisi vavọọ sị kà a nị.

⁶ Hụrẹ ụmọrụmọ Óhomorihi mẹ̀ hụrẹ mẹ ẹhẹ, ọ mẹ ọnọrụ ọnịrị ọnẹẹ nị.

⁷ Ụvị avọọ dị ọnọrụ hụụ ịda ada anị ọnịrị ọnyị anị, dị ọnịrị ose anị vabẹ.

⁸ Dị ẹnị ẹyịva kụkụ sị vara ẹngụ ọnya. Ẹ yị kụkụ vị ẹẹva ẹ vị, ama ẹngụ ọnya.

⁹ Agụvị avọọ ịsị Ohomorihi sị vabẹ, asị a kụkụ ha a hi!”

¹⁰ Ịjị ẹ rẹ varẹma sị ngụ ini eehi, dị ezirẹma anị re tenyi ọọ họ̀ use ini oze ịrẹyị ọnọọ nị. Dị Ijeesu kà a yị wa ka:

¹¹ “Ọza ene èe yi ose anị, dị ọ na nyị ọsa nị, ộ sẹ̀ ịrẹka.

¹² Ọnẹẹ ene èe re yi ọva anị, dị ọ na va ọsa nị, ọnị ọ rẹ sẹ̀ ịrẹka.”

Ijeesu ộ mẹ̀ aduwa yị ezi eweyi

¹³ Aza (ẹnyị aanị) ệ kụ́ ezi eweyi ká Ijeesu vẹ ka ọ̀ sị ụvọ tụra wa. Dị ezirẹma anị aa tụ́ aza ẹnẹẹ ohuvọ nị.

¹⁴ Íjeesu mè re wa, ayị ọ sị kụ́ ọọ. Dị ọ ka, “Navọ ezi eweyi nịnị ẹ̀ vẹ ịda amị! Asị ụ dọ wa oro, agụvị ka ẹngụ ẹnẹnị ẹ nyị ịzị Ohomorihi yà aa mẹ ịjọva nị.

¹⁵ Ịzẹyịza, m maa kà a wụ nịnị nị, ọza tụra ọza ẹnẹ ẹ̀ yị dọ ịjọva Ohomorihi anka ózi oweyi mẹ̀ẹ̄ dọ, ọ yị zụ ngụ ịzọọ.”

¹⁶ Dị Ijeesu sị wa rị ụvọ, dị ọ sị ụvọ tụra wa, dị ọ mẹ̀ aduwa yị wa ọnya-ọnya nị.

Ọza ịnya ene sì ịrẹyị ẹkẹhị hu Ohomorihi

¹⁷ Íjeesu màa vaa na, dị ọnọrụ ọnya aanị zwe echi ve tù ọọ nị. Dị ọ jị idinku ku ẹtẹ ọ́vịdị anị, dị ọ ka, “Nda ọyịza, sị a vọrọ ka ma mẹ, dị ma nyẹngụ yàra pooro zịna-zịna ị́dị Ohomorihi?”

¹⁸ Ijeesu ộ kà a yọ ka, “Sị ẹ vẹ dị ụ waa hị́ mị Nda ọyịza? Ẹ yị nyị ọza ọyịza ikonya vụrụ-vụrụ, ẹ̀ yị vị Ohomorihi ọnịnya kẹnẹ.

¹⁹ Wâ yẹ ọda oni Ohomorihi mẹ ka: Asị ụ wụ̀ ọza; Asị ụ sẹ̀ ịrẹka; Asị ụ yi oyi; Asị u dọ ivenu ireche; Asị ụ mẹ ọza rị. Sị ụbanyị yị ada awụ ọnịrị ọnyị awụ.”

²⁰ Dị ọnọrụ ọnọọ ka, “Nda, mmẹ hụrẹ vị ozweyi, mị hụrẹ sị ụvọ za avaba ọda ẹnẹnị geri-geri nọ!”

²¹ Ijeesu ô re ọnọrụ ọnọọ pooro, ô sì ịrẹyị anị, dị ọ kà a yọ ka, “Ọ sị vọ ịsa ọnya chọchọchọ ana a vọrọ ka wa mẹ: Na, ná avaba ogu ọnị ụ nyị, dị ụ wa sị ẹkẹhị anị mẹ ọpịsarị nịnị ẹyịza, dị ụ wa nyẹngụ nyị ogu tụ́ ịdị Ohomorihi, dị ụ wa vẹ, dị ụ wa vaa dụ mịị zịịzị!”

²² Ịjị ọ maanị wụ́, o si eyi vara ịhị, dị ọ sị ayị oyidu aa na, agụvị ka opisa ọbanyị ọ vị nị.

²³ Dị Ijeesu kana eyi sì ezirẹma anị, dị ọ kà a yị wa ka, “Ọ vaa daa tụ́ akanyaa yị ọnyẹkẹhị nịnị kẹnẹ, dị ẹ̀ zụ ngụ ịzị Ohomorihi yà aa mẹ ịjọva.”

²⁴ Ịrẹyị ọnọnị ộ za ezirẹma anị ẹngụ. Dị Ijeesu rẹ kà a yị wa ka, “Ẹwụ nịnị ezi emi, ộ tụ́ akanya yị aza (ana sị ayị tụra ogu ẹnịnị), dị ẹ̀ zụ ngụ ịzị Ohomorihi yà aa mẹ ịjọva.

²⁵ Ộ tụ́ akanya yị opisa ka ọ̀ ngụ ịzị Ohomorihi yà aa mẹ ịjọva, huna ọ mẹ̀ tụ́ akanya ka ịnyaakụmị ọ̀ ngụ ini uhwohwo ọrịhị na para hu.”

²⁶ Ịrẹyị ọnọọ ô hí wa irenu ẹnẹmẹhị, dị ẹyaa kà a yị ẹngụ ka, “Ho! Àa vavọọ yọ, ẹnẹ vaa há aanị?”

²⁷ Ijeesu ô re wa, dị ọ kà, “Ọza ọ rẹ ẹ̀ yị zụ mẹ̀ ẹ nị, ama Ohomorihi ọ zụ mẹ̀ ẹ, agụvị ka ẹ yị nyị ịsị Ohomorihi ọ̀ yị zụ mẹ.”

²⁸ Dị Ipita ka, “Re, avaba ịsa ẹ́ yị navọ tịtẹ, dị yaa dụ wụ zị nọ.”

²⁹ Dị Ijeesu ka, “Ịzẹyịza, m maa kà a wụ nị, ọza ọ̀ọ navọ irehi anị, àa vị ẹyịnyara anị ọnọrụ, àa vị anẹẹ, ọ̀ọ navọ ọnyị anị, àa vị ada anị, ọ̀ọ navọ ezi anị, àa vị aarẹ tịtẹ agụvị amị ọnịrị agụvị enube ọyịza,

³⁰ Ohomorihi rẹ vaa sị ịsa ene huna avọọ oze ẹchẹhị-ẹchẹhị sí ọọ atọ ịnị ẹhẹ ọnọnị, ẹhụụ irehi ọnịrị ẹyịnyara ọnọrụ ọnịrị anẹẹ, beri ọnyị ọnịrị ezi ọnịrị aarẹ, na vaka ụyọrị; ịnị ẹhẹ ana aa vẹ, Ohomorihi vaa mẹ ka ọ̀ yàra pooro zịna-zịna.

³¹ Aza ọrụrụ-ọrụrụ ana vị ọdọvịdị booro aanị, ẹ vaa vị ọdịrẹma; dị aza ana vị ọdịrẹma, na vị ọdọvịdị.”

Ijeesu ộ nọ Ijerusarẹmị ọdịrẹma

³² Ẹnịnị ệ hịrẹ nọ Ijerusarẹmị, dị Ijeesu tụ́ ọvịdị ẹnịnị nị. Ô hí ezirẹma anị irenu, angwa ô hí wa. Angwa o re hí aza ẹnị ẹnịrịị zị aa na. Dị Ijeesu hị́ ezirẹma anị ẹwụrẹva, dị ọ raa kà a yị wa ịsa ana vaa mẹ̀ ọnị nị.

³³ Ọ kà, “Re! Yaa hịrẹẹ nọ Ijerusarẹmị. A vaa sị ẹmị Ozi ọza onigirimaa chire ohirẹsụ ẹbanyị irehi Ohomorihi ụvọ, ọnịrị ọzwọzọda nịnị. Ẹ vaa mẹ̀ ọkarẹyị isuu mị, dị ẹ sị mị chire aza ẹnẹ ẹ̀ yị vị aniju nịnị ụvọ.

³⁴ Aza ẹnẹẹ vaa sị mịị mẹ̀ isiya, dị ẹ jị atẹ kú mi, di e re tụ́ mi ịjapa, dị ẹ wụ̀ mị. Ama ịhyẹgwẹta anị mị vaa ha hụụnị isu.”

Ijemisi ọnịrị Ịjọọnụ ê họ̀ use udi yị ẹngụ ẹnịnị

³⁵ Dị Ijemiisi ọnịrị Ịjọọnụ, ezi Isebede, ve tù Ijeesu, dị ẹ ka, “Nda, yee sì ka wa mẹ̀ ịsa ọnị yàa dá ịpẹ anịị yị.”

³⁶ Dị ọ ka, “Si u wee sì ka ma mẹ yị wụ nịnị?”

³⁷ Dị ẹ ka, “Navọ, ịnị ụmẹ igirima awụ, ya yaayịtẹ gụrị ẹwụ, ọza ịnya ayị éyi ụvọrị, ọsa éyi ụvọha!”

³⁸ Dị Ijeesu kà a yị wa ka, “Wẹ yị yẹ ịsị u wee họ̀ use anị nịnị. Wáá va zụụ sị akoo hú ụyọrị oni mi vee hú nịnị? Ọyịhwọzenyi anaa vaa mẹẹ mị, wáá vaa dọ ka a mẹ̀ ẹ wụ nịnị?”

³⁹ Dị ẹ kà a yọ ka, “Ya zụ mẹ̀ ẹ.” Dị Ijeesu ka, “Ịzẹyịza yọ, ụ vaa sị ako hú ụyọrị oni mi vee hú nịnị. Ọyịhwọzenyi anaa vaa mẹẹ mị, a rẹ vaa mẹẹ wụ nịnị.

⁴⁰ Ama ẹmị ẹ yị nyị ọda ọyịkà a wụ nịnị ka aza ẹnyị ọ̀ yaayịtẹ éyi ụvọrị amị, dị ọsa ọ̀ yaayịtẹ éyi ụvọha amị. Ohomorihi ọ vaa sịị yị aza ọnọọ sị ọọ tenyi tịtẹ yị nị.”

⁴¹ Ịjị ezirẹma ẹẹwụ ana vọ maanị wụ́, dị ẹyaa kụ́ ayị hi Ijemiisi ọnịrị Ịjọọnụ nị.

⁴² Dị Ijeesu hị́ wa pe ẹngụ, dị ọ kà a yị wa ka, “Wâ yẹ ka ohinọyị anẹhẹ ene eyi yẹ vị anaā mẹ ehunaa yị aza, dị azẹbanyị ẹnịnị aa mẹ ẹchakaa yị wa.

⁴³ Ama ẹ yị vọrọ ka áawụ nịnị ọ̀ vavọọ yà. Ọza ene èe sì ka ọnị ọ̀ nyị ụbanyị ịnị awụ nịnị, â vọrọ ka ọ̀ọ hẹkẹ wụ nịnị.

⁴⁴ Ọza ene èe sì ka ọnị ọ̀ vị ọdọvịdị, â vọrọ ka ọ̀ vị ozi ahụ avaba aza;

⁴⁵ agụvị ka emi Ozi ọza onigirima ẹ yị vẹ ka à mẹ ozi ahụ yị mị, ama ka ma mẹ ozi ahụ yị aza, dị ma rẹ sị ụhwẹ amị hị́ aza ọrụrụ-ọrụrụ varẹma.”

Ijeesu ộ há Ibatimeyọsị eyi anị

⁴⁶ Ẹnịnị e ve tù ẹkụra Ijeriko. Ọ́nịrị ezirẹma anị mẹ̀ hụrẹ Ijeriko, ọkọnị aza ệ saasa wa. Ogweyi ọnya aanị ana aā hị́ Ibatimeyọsị, ozi Itimeyọsị, ộ yaayịtẹ ụtọ oze, aa pà ịsaa rị.

⁴⁷ Ịjị ọ wụ́ ka Ijeesu Anịnazarẹtị yọ nị, di ee nowu nị, dị ọ ka, “Ijeesu! Ẹwụ ozi Idevidi, vayị amị!”

⁴⁸ Dị aza nowu kú ọọ ka ò kú irenu anị nị. Di o re nowu hu avọọ, dị ọ ka, “Ozi Idevidi, vayị amị de!”

⁴⁹ Dị Ijeesu jẹẹ nị, dị ọ ka à hị́ ọọ vẹ nị. Ệ hị́ ogweyi ọnọọ, dị ẹ ka, “Và ayị nẹtẹ, kwẹẹtẹ, ka aa hị́ wụ!”

⁵⁰ Dị ọ wụsẹ ngwa awuru anị ne ta, di o ji kwẹẹtẹ, di o ne tù Ijeesu nị.

⁵¹ Dị Ijeesu ka, “Si u wee sì ka ma mẹ yị wụ?” Di ogweyi ọnọọ ka, “Ọga amị, mị ka mee re ẹtẹ nọ.”

⁵² Dị Ijeesu ka, “Waa na, ụkụ awụ ộ ta, agụvị ka wâ sị ayị tụra mị.” Obooboro ọnọọ di ee re ẹtẹ nị. Dị aa dụ Ijeesu na óze nị.