Ijowẹrị 3 - IWE ỌNỊNỊ

Ẹnẹyịmavara vaa sị ụya rị Anẹkụra ana vọ

¹ Ẹnẹyịmavara kà ọnị vaa mẹ̀ ka ọ varẹma zee yi Anijuda ọnịrị Anijerusarẹmị nịnị.

² Ọnị vaa kụ́ avaba anẹkụra nịnị gụ́ ịnozi Ijehosahwati ịzị ọnị vaa họ̀ oponu. Ọnị vaa sị ụya rị wa agụvị ịsị ẹ mẹ̀ aza anị. Ệ dụ aza anị Anisirẹrị ne hi ẹkụra ọsa, dị ẹ ga ẹtẹ ẹnịnị hị́ ẹngụ ụvọ nị.

³ Dị ẹ sị ịsa sì ẹnịnị mẹmẹ vaa ga aza ẹnẹ za hị́ ẹngụ ụvọ nị. Dị ẹ ná ezi anọrụ ẹnịnị ọrịhị, dị ẹ sị ẹkẹhị anị ne si ụta ara yị ọsẹrẹka nị. Avọọ ẹ mẹ rẹ ná ezi anyẹnẹẹ ẹnịnị, dị ẹ sị ẹkẹhị anị hu eche nị.

⁴ Dị Ẹnẹyịmavara họ̀ Anitaya ọnịrị Anisidoni ne beri Anihwirisiti ka sị ẹ vẹ dị ẹ vavọọ aa mẹ̀ ebira hi ọnị? Vị ẹnịnị wéé vi ene si ọnị atọ nị? Àa vị avọọ yị ọọ nị, ọnị vaa vee sị wa atọ obobooro ọnọọ.

⁵ Ẹnịnị ẹ raa kụ́ ẹkẹhị ọnịrị ogu Ẹnẹyịmavara na tụ́ ịnị irehi ori ẹnịnị.

⁶ Ẹnịnị ẹ raa ná Anịjuda ọnịrị Anijerusarẹmị yị Anigiriki nịnị, dị aa kụ wa hụrẹ ẹtẹ ẹnịnị nọ aha ẹnẹẹnẹ nị.

⁷ Ama Ẹnẹyịmavara kà ọnị vaa kụ́ ọ hi Anisirẹrị ayị ka ẹ vaa vẹ eehi ẹnịnị, dị ọnị mẹ anẹkụra ẹnẹẹ ịsị ẹ mẹ̀ aza anị.

⁸ Dị ọ ka ọnị vaa kụ́ ezi ẹnịnị anọrụ ọnịrị anẹẹ chire Anijuda ụvọ ka ẹ ná wa yị Anisabiya ana ra ụnọngụ-ụnọngụ.

⁹ Ẹ nọ̀ọ yị anẹkụra ọzọza; Di e tenyi ẹngụ ịrẹkụ. Ẹ hị́ ọkụrẹkụ nịnị, dị avaba isoja ẹnịnị ẹ gụ aha ọnya dị ẹ kwẹẹtẹ nọ ịrẹkụ.

¹⁰ Ẹ kụ ẹdụ ẹnịnị di e si tụ́ ụ̀hwọ̀, dị ẹ kụ́ ụkari ẹnịnị tụ́ ọha ọyị kú ịrẹkụ. Ọkụmị nịnị vana hyakụ tenyi ẹngụ ọyị nọ ịrẹkụ.

¹¹ Ụsẹ ọ hụ ụ nịnị ịra avaba anẹkụra! Avaba ẹwụ nịnị ọ va gụ inozi. Ẹnẹyịmavara, kụ́ ọkụrẹkụ awụ chi vẹ va gẹ tu wa.

¹² Avaba anẹkụra e tenyi ẹngụ, dị ẹ na gẹ inozi Ijehosahwati ịzị Ẹnẹyịmavara vaa yaatẹ ịrẹsụ ode anị, dị aa mẹ̀ ọkarẹyị yị avaba anẹkụra nịnị.

¹³ Ẹnịnị vị ana nyayịnẹ divi yị ẹngụ ẹnịnị; Sẹ́ wa va hi ẹtẹ anka akụ ịnị ụmẹ ịsa ọyịna ịnị aarẹ avọọ. Kwọrọ wa anka aā mẹ̀ kwọrọ igirepi ịnị ụkọ avọọ! Pịrị ọ dị eche anị oo si, dị ụkọ o hi kaa vaa ha.

¹⁴ Ọkọnị aza ẹ̀ẹ na sị gụ hi inozi ọkarẹyị ọnọọ Ịzọọ ọnọọ, ụmẹ ọnị Ẹnẹyịmavara vaa mẹ̀ ọkarẹyị aa gụrị ẹtẹ nị.

¹⁵ Ọyị ọnịrị ụhwẹ vee hozi, dị ụzọmị nịnị ẹ yị kụkụ za ẹtẹ.

Ohomorihi vaa mẹ̀ ka o ze yị aza anị

¹⁶ Ẹnẹyịmavara vee nowu hụrẹ Ịzayọnị, dị ọ ka irutu hụrẹ Ijerusarẹmị, dị ẹbẹẹba ọnịrị ẹtẹ ee ziizi. Ama ọnị vaa dọ aza anị ha, dị ọnị vị ụkata ẹnịnị.

¹⁷ Isirẹrị vaa yẹ ka ọnị Ẹnẹyịmavara ọ vi Ohomorihi ẹnịnị nị. Ọnị ọ ra Ịzayọnị ataba ọnịnị anị nị. Ijerusarẹmị vaa vị ẹkụra ọtụrenyi, enyisi ọ vị ka isoja anẹkụra ọsa nịnị ẹ rị ọ nị.

¹⁸ Ịnị ụmẹ ọnọọ ụbazị ịvayịnị ene hi ịrẹsụ ataba vaa mẹ̀ ẹtẹẹtẹrẹ, dị eche ịvayịnị gwẹẹtẹ hi ẹtẹ. Ịsụpa nịnị vee re avị rị ịrẹsụ ataba, dị ịrẹva ẹnịnị nyị enyi hyọkọ-hyọkọ. Avaba okuha ene hi Ijuda vaa ha irenu, di enyi ee sii hụụnị ịnị irehi Ohomorihi na ngụ inozi Ákesiya.

¹⁹ Ẹkụra Ijipiti ọnịrị Edomi vaa tụ́ osusu, dị ẹ jị eburu agụvị ka ẹnịnị ệ kụ ịrẹkụ tu Anijuda, dị ẹ wụ̀ aza va ha kẹnẹ-kẹnẹ nị.

²⁰ Ama ẹkụra Ijuda ọnịrị Ijerusarẹmị vene vee hi yi aza pooro hụrẹ ụnanka ọnyị na ngụ ọsa.

²¹ Ẹnẹyịmavara kà ọnị ya ịrẹsụ ataba Ịzayọnị, ọnị vaa họ̀ oponu ịrẹyị aza anị ana a wụ̀ kẹnẹ-kẹnẹ. Ọnị vaa dọ ịrẹvụ ẹnịnị vụ.