Ijowẹrị 2 - IWE ỌNỊNỊ

Akụvarịva ọnịrị Isoja ọnịvị Anisirẹrị

¹ Ẹnẹyịmavara kà e hú ọpanyị, di e na owu tụ ẹhẹ ịrẹsụ Ịzayọnị ana vị ataba anị, dị avaba aza ene hi Ijuda e hí angwa! Ẹkụhị ọnị Ẹnẹyịmavara vaa sị mẹ̀ ọkarẹyị aa gụrị ẹtẹ.

² Ịhị ọnọọ vee hozi ruma-ruma, dị eguhi oji piri-piri chaka ku ẹtẹ. Dị ọkọnị akụvarịva gara hi ịrẹsụ avaba ataba mọọmọọmọ. Ọza ẹ yị vịdị re ịnahọ̀yị ọnọnị da, dị ọza ẹ yị mẹ vene re irima anị paa ịnị ẹhẹ nị.

³ Dị akụvarịva ẹnẹẹ rị avaba avị anka ịra mẹẹ̄ rị avị avọọ nị. Ọvịdị ẹnịnị e zoza anka ụbazị Edẹnị ama dị ịrẹma ẹnịnị tịtẹ huye-huye ẹ̀ mẹẹ wara avị rị za eteesu. Ẹ yị nyị ịsa ana vọ ẹtẹ tịtẹ ọnị ẹnịnị ẹ yi rị.

⁴ Ẹ́nịnị sị mẹẹ anka umaata avọọ nị; di e yee zwe echi kitipa-kitipa anka umaata ịrẹkụ avọọ nị.

⁵ Ẹ mẹ̀ẹ chaka kú ịrẹsụ ataba, dị ẹtẹ aa sụ́ ịrẹyị anka ịkẹẹkẹ umaata ịrẹkụ; dị ẹ yaa sụ́ wụrụgụdụ ọrịra àaa rị avọọ nị. Dị ẹ tara jẹẹ anka ọkụrẹkụ ene tenyi ẹngụ aa nọ ịrẹkụ avọọ nị.

⁶ Dị ẹgahị ngụ ọzọza ẹngụ e mee re wa, dị ẹngụ ẹnịnị hi azọnọ nị.

⁷ Dị Akụvarịva ẹnẹẹ e du ịsa ha anka ọkụrẹkụ avọọ nị; dị ẹ yaa hịrẹ ọvọ anka ọkụrẹkụ avọọ nị. Dị ẹ va tụra ẹngụ aa na dịyọọ nị. Ẹ yị nyị ana ha hụrẹ oze ẹnẹ ẹ va ịrẹsụ ka.

⁸ Ọza ẹnyị ẹ yị dọ ọsa oro. Ẹ yị nyị ẹnya ịrẹkụ ana a kụ tú wa ana zụ za wa jẹẹ.

⁹ Dị e zwe duu na ngụ ẹkụra dị ẹ yaa zị ụsẹ ịrẹsụ ọvọ; dị ẹ yaa hịrẹ ịrẹsụ irehi, dị ẹ yaa ngụ ozokete anka oyi avọọ nị.

¹⁰ Dị ẹtẹ ọnịrị ẹbẹẹba ee ziizi; dị ọyị ọnịrị ụhwẹ ẹ yị re oze sị ẹtẹ hweyi, dị ụzọmị nịnị ẹ yị kụkụ zẹtẹ nị.

¹¹ Dị Ẹnẹyịmavara ha iduma dọ ka ịrẹyị yi ọkụrẹkụ anị, dị ẹnịnị wụ́ chire e nị. Ẹkụhị ọnị Ẹnẹyịmavara vaa mẹ̀ ọkarẹyị vaa nyị ẹngụ anị. Ẹnẹ vaa ha?

Ẹnẹyịmavara kà aza ẹ́ vara ayị

¹² Ẹnẹyịmavara kà booro aanị, ẹ sị ayị ọnya ro ịnẹ hụụnị ebira odivi ẹnịnị, dị ẹ va ka ọnị vẹ. Ẹnịnị ẹ va ẹngụ hi, dị ẹẹ jị òrèrè, asị ẹẹ rị ịsa.

¹³ Ẹnịnị ẹ̀ sị ịzẹyịza zị ẹngụ, ọnị ọ mẹ huu ka e na achị ẹnịnị hi ẹngụ ka ẹnị aa ba arụwẹ nị. Ẹnẹyịmavara kà ẹ varẹma vẹ ịda anị ana vị Ohomorihi ẹnịnị. Ọnịị̄ vayị ọza ẹtẹẹtẹrẹ, dị ọnịị̄ ngwayịi ọza nị. Ọnịị̄ sị ẹngụ dọ ịrẹyị, dị ọnịị̄ sị ụvọ za oto anị nị; dị ọnịị̄ vagu ọza ana aa mẹ̀ ebira odivi, dị ọnị ẹ yi sị ụya rị ọ.

¹⁴ Èe ro ịnẹ, ẹyịyara ọnị ana vị Ohomorihi ẹnịnịị vaa va ahụ vẹ ịrẹma, dị ọnị mẹ̀ ka o zee yị wa, dị akụ ọnịrị eche o zoza, dị ẹ zụ sị akụ ọnịrị eche va mẹ̀ ịsọvọ yị ọnị.

¹⁵ Hú ọpanyị ịrẹsụ ataba Ịzayọnị; dị ẹ sị hị́ aza gụ, dị asị ọzọza rị ịsa agụvị ka ayị ẹnịnị o yi hine.

¹⁶ Kụ aza gụ Mẹ̀ wa dị ẹ vị ọza ọnịnị; Hị́ azọkụ ọnịrị ezweyi ne beri ezịnụvọ, ọnịrị ẹvarose ọwọọwa anaa jẹrị ẹngụ. Ọzọza ọ va gụ ịnị irehi Ohomorihi.

¹⁷ Ohirẹsụ irehi Ohomorihi nịnị ana vi ezi ahụ anị, ẹ jẹẹ ịnị akakana ụta ịsọvọ ọnịrị oze irehi Ohomorihi, dị ẹẹ jị òrèrè, dị ẹẹ mẹ̀ aduwa: Dị ẹ da ịpẹ ka Ẹnẹyịmavara ọ vayị aza anị. Asị ọ zẹ ka anẹkụra ọsa nịnị ẹ sị eyi wụ̀ wa, dị ẹẹ nyi wa unyi, di e yee họ̀ use ka ịzị Ohomorihi ẹnịnị ya.

¹⁸ Ịjọnọọ Ẹnẹyịmavara vaa sị zụ ka ọnị ọ tẹsị ẹkụra anị; dị ọ vayị aza anị.

¹⁹ Dị ọ tu wa ohi ka ọnị vaa mẹ ka ịsa ịnị aarẹ ẹnịnị o zoza, dị ẹ nyị akụ ọnịrị eche ọwọọwa ne beri angwẹ ana hụ́ wa, dị ọ vọ ẹtẹ hi ẹtẹ. Agụvị avọọ Anẹkụra ana vọ ẹ yị kụkụ vaa sị wa ẹtẹ.

²⁰ Dị Ẹnẹyịmavara kà, ọnị vaa dụ akụvarịva ana hụrị eyi ẹbẹẹba vẹ. Ẹnyị ẹnịnị vị ọnị ọnị vaa dụ nee hí ụnọmị osusu. Ẹnị ene hi ọvịdị ịrẹkụ vị ọnị ọnị va dụ nee hị́ Irehu Anọ, dị ọ kụ́ ẹnị ene hi akakaha na va hi Òkū Imeditareniya. Di oku ẹnịnị vụ, dị agụ anị gara hi ẹtẹ. Ẹnẹyịmavara kà ọnị vee vu wa ẹtẹ agụvị ịsị ẹ mẹ̀ aza anị.

²¹ Avị, asị ụ hí angwa nịnị, ama waa jẹ dị ayị awụ oo hine. Agụvị ka Ẹnẹyịmavara aa mẹ ịvọpa ọnọọ nị.

²² Asị uye ịnị avị nịnị hụrẹ ayịnẹ agụvị ka avị vaa jẹẹ hụtụ-hụtụ. Ọchị nịnị vaa tụ ẹtụtụ ẹnịnị. Ọchị ihwigi ọnịrị ịvayịnị vaa tụ́ hyọvọ-hyọvọ.

²³ Aza ene hi Ịzayọnị ẹẹ jẹ ịrajẹ, Waa mẹrị sadaa ka ọnị Ẹnẹyịmavara Ohomorihi awụ nịnị vaa zụ́ orihi ịjịjọọ yị wụ nịnị. Dị ọnị zù orihi ịpaapa ọnịrị ọ́dịrẹma a mẹ vọrọ anka ọ mẹẹ̄ vịdịị zụ́.

²⁴ Akụ vaa gụ́ nyaanya ịzị e yee tụ́ ọ, dị ụkọ ẹnịnị ee hi kà a ha yị angwẹ ọnịrị eche ịvayịnị.

²⁵ Ẹnẹyịmavara kà ọnị vaa va ịsa ana mẹ wa ihi ịnị ụmẹ ọnị akụvarịva sị rị ịsa ịnị aarẹ ẹnịnị ịrẹma yị wa.

²⁶ Ụ vaa nyị ịsọyịrị gwẹtẹ, dị ụ rị, dị ịnẹ ha awụ nịnị. Dị ụ waa ga Ohomorihi agụvị ịvọpa ọnị ọ mẹ̀ yị wụ. Ọza ẹ yị kụkụ vaa sị eyi wụ̀ ẹwụnị aza anị.

²⁷ Ọ kà Isirẹrị vaa yẹ ka ọnị jẹẹ wa ịrẹma. Ọnị ọ vị Ẹnẹyịmavara ana vị Ohomorihi ẹnịnị nị. Ẹ yị nyị ịsa ọsa. Ọza ẹ yị kụkụ vaa sị eyi wụ̀ ẹwụnị aza anị.

Ẹkụhị Ẹnẹyịmavara

²⁸ Ịnị ụmẹ ọdịrẹma, Ẹnẹyịmavara kà ọnị vaa sị Ụhwẹ anị yị avaba aza: dị ezi anọrụ ọnịrị ezi anẹẹ awụ nịnị aa ka ịsẹ; dị azọkụ awụ nịnị aa ra ụra, dị ezwọọmụha awụ nịnị ee re ẹtẹ.

²⁹ Ịnị ụmẹ ọnọọ ọnị vaa sị ụhwẹ anị yị ezi ahụ anị anọrụ ọnịrị anẹẹ.

³⁰ Ẹnẹyịmavara kà ọnị vaa mẹ̀ ịsa ene vee hị́ ọza irenu tụ́ ẹbẹẹba ọnịrị ịrẹsụ ẹtẹ. Ọza vee re anya ọnịrị ịra ne beri areyi ana aa da dụụmẹ.

³¹ Dị ọyị vene hozi, dị ụhwẹ ee vi anka anya tụ́ ẹbẹẹba. Ịvọpa ẹnẹnị aa sị zụ̀ ka ẹkụhị ọbanyị ọnị Ẹnẹyịmavara vee si du ayị hi aza anị aa gụrị ẹtẹ

³² Ịnị ụmẹ ọnọọ, Ẹnẹyịmavara vaa dọ ọza tụra ọza ana aa hị́ ọ há. Anka Ẹnẹyịmavara mẹẹ kà a, Aza ana ya ịnị ataba Ịzayọnị ọnịrị Ijerusarẹmị vaa ha. Ịnị ẹngụ aza ẹnẹẹ Ẹnẹyịmavara wo oto ka aza ọnị ọnị hị́ vaa ya nị.