Ijosuwa 9 - IWE ỌNỊNỊ

Anigibiyọnị nịnị ê vene ọdọvịdị Anisirẹrị nịnị

¹ Ịnị ụmẹ ọnọọ avaba ohinọyị anẹkụra nịnị ene hi ịrẹsụ ataba ọnịrị iruvo ataba akẹnẹ irehu Ijodani nịnị ệ wụ́ ọ Ijosuwa mẹmẹ aa nyị ehuna. Ẹkụra ẹnẹẹ ẹ vị Anihiti, Anamọrị, Anikenaani, Aniperi, Anihivi ọnịrị Anijebusi.

² Dị ẹnịnị gẹ eyi vabẹ ka ẹnị a kụ ịrẹkụ ne tu Ijosuwa ọnịrị Anisirẹrị nịnị nị.

³ Ịjị Anigibiyọnị wụ́ ịsa ọnị Ijosuwa mẹ̀ Anijeriko ọnịrị Aneyayị nịnị,

⁴ dị ẹ gẹ eyi ka ẹnị ee ne vene Ijosuwa, dị ẹ kụ ịsọyịrị ọnịrị eche hi ini ụtụmpaha ene si bo tụra ịkẹrịkẹtẹ aa na nị.

⁵ Dị ẹ kụ ẹnya ene si bo ọnịrị adava ana kụ na ana gẹ tụ ahụ nị. Dị ẹ kụ ịbụrẹẹdị ana sị wụ̀, dị ẹ raà chị uru.

⁶ Dị ẹnịnị ne tu Ijosuwa ọnịrị anọrụ Anisirẹrị ịzị ẹ kụ udi Igirigari, dị ẹ ka aha onoze ẹnị hụrẹ vẹ nị. Ẹnịnị e si ka ẹnịrị wa ẹ hị́ eku yị ẹngụ.

⁷ Ama dị anọrụ Anisirẹrị họ̀ wa ka sị ẹ vẹ dị ẹnịrị wa aa hị́ eku yị ẹngụ? Ẹyịyara ẹnịnị ẹ ra gụrị ẹtẹ.

⁸ Dị ẹnịnị kà yị Ijosuwa ka ezi ahụ anị ẹnị vị nị. Dị Ijosuwa họ̀ wa use ka ịzị ẹ hụrẹ vẹ? Anị ịzị ẹ vị?

⁹ Dị ẹnịnị maanị pa ịta yị Ijosuwa nị: Ẹ kà aha onoze ẹnị hụrẹ vẹ nị. Ẹnị ệ wụ́ ịrẹyị Ẹnẹyịmavara ana vị Ohomorihi Anisirẹrị nịnị. Ẹ kà ẹnị ệ wụ́ avaba ịsa ọnị Ẹnẹyịmavara mẹ̀ Anijipiti nịnị,

¹⁰ ọnịrị ohinọyị Anamọrị ẹẹva ana ya akẹnẹ Ijodani eyi ịzị ọyịị̄ hụrẹ vẹ. Avọọ ọ mẹ rẹ mẹ̀ Isihoni ohinọyị Ịhẹsịbọnị ọnịrị Ọgị ohinọyị Ịbasanị ana ra Asịtarọtị.

¹¹ Ẹ ka ọdọvịdị ẹnịnị ẹnịrị anẹkụra ẹnịnị ẹ ka ẹnị ẹ sị ịsọyịrị ọyị zị ụsẹ ve tu wu nịnị. Ẹnịnị ka ẹnị ẹ sị ẹngụ ẹnịnị tụ́ ahụ Anisirẹrị nịnị, dị ẹnịrị wa ẹ̀ hị́ eku yị ẹngụ.

¹² Ẹ kà é re ịbụrẹẹdị ọnị ẹnị za aanị. Ịrịịra ẹ vị ịjị ẹnị kwẹẹtẹ hụrẹ eehi ka ẹnị ée ve tù wa nị. Ama booro aanị, ịbụrẹẹdị ẹnẹẹ ẹ sị wụ̀, dị ẹ chị uru nị.

¹³ Ọwọọwa ampo ụtụmpaha eche ẹnịnị vị ịjị ẹnị va eche hi wa nị. Ama booro aanị, ụtụmpaha ẹnẹẹ ẹ kụ́ tu. Ịta ẹnịnị ọnịrị adava ệ kụ́ bo tụ́ ịrẹsụ ụsẹ ọgọdọ.

¹⁴ Anọrụ Anisirẹrị nịnị ệ dọ wa ịsọyịrị ama ẹnịnị ẹ yị họ̀ use hụụnị ụvọ Ẹnẹyịmavara.

¹⁵ Dị Ijosuwa hị́ eku beri Anigibiyọnị ka ẹnị vaa beri wa za ọta dị ẹnị navọ wa ka ẹ ra. Ọdọvịdị Anisirẹrị wo oto ka ẹnị vaa sị́ ụvọ za eku ọnị ẹnịrị wa hị́ yị ẹngụ nị.

¹⁶ Ịhyẹgwẹta ọnị ẹ maanị hị́ eku yị ẹngụ, Anisirẹrị wụ́ ka aza ẹnẹẹ vị ana ra gụrị ẹtẹ.

¹⁷ Ịzẹyịza, Anisirẹrị nịnị mẹ̀ kwẹẹtẹ hụrị ịzị ệ kụ́ udi tụ́ ịhyẹgwẹta dị ẹ ngụ ẹkụra ẹbanyị-ẹbanyị ọnị aza ẹnẹẹ ra nị. Ẹkụra ẹnẹẹ ẹ vị Igibiyọnị, Chehwira, Ịbẹẹrọtị ọnịrị Ikiriyati-Ijeyarimi.

¹⁸ Ama Anisirẹrị nịnị ẹ yị nyayịnẹ wụ̀ wa agụvị ka ọdọvịdị ẹnịnị ệ vịdị raà sị Ẹnẹyịmavara, Ohomorihi Anisirẹrị hị́ eku, dị ẹ wo oto tụra a ịrẹsụ nị. Avaba Anisirẹrị nịnị ẹ́ rị uhuuhu ịsị ọdọvịdị ẹnịnị mẹ̀.

¹⁹ Dị ọdọvịdị ẹnịnị tụ́ wa ohi ka ẹnị ệ vịdị raà sị Ẹnẹyịmavara Ohomorihi Anisirẹrị hị́ eku ka ẹnị ẹ yị vaa kanyị wa.

²⁰ Ọdọvịdị Anisirẹrị ka ẹnị ẹẹ bẹdọ navọ ẹ yara agụvị eku ọnị ẹnị hị́. Ẹnị ẹ̀ẹ wụ̀ wa, Ohomorihi aa sị ụya anị rị ẹnị nị.

²¹ A navọ wa ẹ ra ama ẹnịnị ẹ vaa si ọkụ, dị ẹ yaa dà enyi yị ẹnị nị. Ọsọnị ọ vị ajuwe ọnị ọdọvịdị ẹnịnị sị yị wa nị.

²² Ijosuwa ộ mẹ̀ ọda ka a kụ́ wa vẹ ọvịdị anị, dị ọ họ̀ wa use ka sị ẹ vẹ di e vene ẹnị? Ẹnịnị ệ kà a ka aha onoze ẹnị hụrẹ vẹ ịrẹma ọnị ẹ ra gụrị ẹnị.

²³ Agụvị ka ẹnịnị ê vene Anisirẹrị nịnị, Ohomorihi ộ raà jị ịvị yị wa. Ọrịhị Anisirẹrị nịnị ẹ vaa vị pooro, dị ẹ yaa sì ọkụ, dị ẹ yaa da enyi tụ ịnị irehi Ohomorihi anị nị.

²⁴ Dị ẹ tụ Ijosuwa ohi ka agụvị ka â kà a yị ezi ahụ anị ka Ẹnẹyịmavara Ohomorihi anị ộ raà mẹ ọda yị Imosiisi ka ọ sị avaba ẹtẹ, dị ọ wụ̀ avaba aza ana ra ịnị ẹtẹ ọnọọ. Agụvị angwahi ụhwẹ ẹnịnị, ẹ vavọọ mẹ̀ ẹ nị.

²⁵ Ẹ ka booro aanị ẹnị ya ịnị ụvọ Ijosuwa. Ịsa tụra ịsa ọnị o ro kẹnẹ ka ọ vọrọ ọ mẹ ka ẹnị vẹ.

²⁶ Agụvị avọọ dị Ijosuwa dọ wa ha hụụnị ụvọ Anisirẹrị, dị ọ ka asị a wụ̀ wa nị.

²⁷ Hụrẹ ịhị ọnọọ Ijosuwa mẹ wa aza ene si ọkụ, ana da enyi yị Anisirẹrị ọnịrị ụta Ẹnẹyịmavara ịzị ọ nyị ka aa hẹkẹ ọnị.