Ijosuwa 7 - IWE ỌNỊNỊ

Ekaanị ộ rị ụya ịvị anị

¹ Ẹnẹyịmavara ộ vịdị kà a ka avaba ogu Anijeriko vị ene ve du ha bemi-bemi. Â nyị ọnọrụ ọnya aanị, ọnị ịrẹha anị rị Ekaanị ana vị ozi Ikami. Aazị Izabidi ọ vị nị, dị ọ vị ẹmazị Ịzẹra hụụnị obooro Ijuda nị. Dị Ekaanị na sị hụụnị ịsa ana za ido anị yị wa nị. Agụvị avọọ dị Ẹnẹyịmavara du ayị ẹtẹẹtẹrẹ hị́ Anisirẹrị nịnị nị.

² Ịrẹma ọnị Anisirẹrị ra rị Ijeriko, Â nyị ẹkụra ọnya aanị ana hị́ Eyayị ana gụrị Ịbẹtẹrị Aveni, ana ya eyi ịzị ọyị zị hụrẹ vẹ. Ijosuwa ô tu anọrụ ẹnyị ka ẹ were-were re ẹkụra ọnọọ va ka yị ọnị nị, ịzẹyịza, dị aza ẹnẹẹ na ịzọọ nị.

³ Ịjị anọrụ ẹnẹẹ varẹma vẹ tu Ijosuwa dị ẹ ka ẹkụra ẹ yị nyị ọ ya. Ẹ yị nyị ka avaba isoja ẹ na gẹ wa ịrẹkụ. Dị ẹ ka Ijosuwa ọ tụ́ ẹhụ aza ẹnị akawụ avị akawụrakahị na pe wa zyaazị nị. Aza chee kẹnẹ anẹkụra ọnọọ vị nị.

⁴ Ịzẹyịza, dị Ijosuwa tụ́ aza ẹnị Akawụrakahị nọ Ayị̀ nị. Dị ẹnịnị zwe vavẹ eehi nị.

⁵ Anẹkụra ọnọọ ẹ wụ̀ aza ohurẹẹwụ tụra ịhịnọnyị dị ẹ dụ Anisirẹrị hụrẹ oze ovwoovu ẹkụra chi otutu va ngụ ịzị aā chata ịrẹta nị. Dị ayị sẹ hi wa ịnẹ angwa me hi wa nị.

⁶ Ịjị Ijosuwa wu enube ọnọọ, dị ọ ha awuru anị hi ẹngụ, dị ọ ne ẹngụ anị nya ẹtẹ ọvịdị apoti oto pooro na ngụ oruva anị nị. Dị ọdọvịdị Anisirẹrị ẹnịnị ẹnị ra zị ẹngụ beri ọ, dị ẹ kụ́ edudu ku ịrẹsụ ẹnịnị nị.

⁷ Dị Ijosuwa họ̀ Ananyị yị Ẹnẹyịmavara kà sị ẹ vẹ dị ọ kụ ẹnị hụrẹ akẹnẹ irehu Ijodani va ngụ ịzọọ? Sị ẹ vẹ dị ọ navọ ka Anamọrị nịnị ẹẹ wụ ẹnị va ha? Ọ yaanị zoza ka ẹnị e hi akẹnẹ irehu ịzị ẹnẹ vịdị ya.

⁸ Dị ọ ka ịsị ọnị zụ ka ịrẹma ọnị ọnịvị ẹnịnị sị ẹnị huna, dị ẹ yaa dụ ẹnị echi.

⁹ Ịjị Anikenaani nịnị ọnịrị anẹkụra ana vọ ẹẹ wụ́ ịsị e tu ẹnị, dị ẹ vẹ ẹnị ịrẹkụ dị ẹ wụ́ ẹnị va ha. Ẹnẹyịmavara mẹẹ vaa mẹ̀ ụhị ọnọọ?

¹⁰ Dị Ẹnẹyịmavara họ̀ Ijosuwa ka o me re dị ọ̀ maanị ne ẹngụ nya ẹtẹ, Dị ọ ka ọ kwẹẹtẹ nị.

¹¹ Dị ọ ka Anisirẹrị ẹ sị ịvị mẹ. Ẹnịnị ẹ ra va jịnẹ ọda ọnị ọnị mẹ yị wa. Ẹnịnị ẹ ra sị ịsa enyisi na tụ́ ịnị eehi ẹnịnị. Ẹnịnị ê yi oyi dị ê cheeche vakaa nị.

¹² Dị Ẹnẹyịmavara kà Anisirẹrị ẹ yị vaa zụ jẹẹ zi ọnịvị ẹnịnị. Aa vaa dụ wa eche nị. Ẹnị nyẹmba vị ana vọrọ ka aa wụ́ Ohomorihi ọ sị va ịrẹma ẹnịnị. E vị yi ẹ sị ịsa enyisi hụụnị ẹngụ ẹnịnị tụ ẹhẹ.

¹³ Dị ọ ka Ijosuwa ò ka yị Anisirẹrị ka ọnịrị wa a gẹ eyinẹhẹ anị. Ẹnịnị ẹ kwẹẹtẹ dị ẹ za ido ana vọrọ ka ẹ za. Â nyị ogu ana vọrọ ka e du ha ịnị ẹngụ ẹnịnị. Ọ kà ẹnịnị ẹ yị ku o kwooze, ẹnịnị e yị ku ọ ẹnịnị e vaa nyị ẹbẹẹba ọnịvị ẹnịnị.

¹⁴ Dị ọ ka ẹnẹnẹ eyinẹhẹ anị, ọzọza ọ vaa gụ́ aha ịragụ. Dị ọ ka ẹnịnị ịrẹsụ-ịrẹsụ ene hi ịzọọ ẹ ve ọvịdị anị.

¹⁵ Ọza tụra ọza ana aa sị hụụnị ịsa ana jị ido anị ka asị a sị vị ana rị ịra beri ogu ọnọọ ọnịrị avaba anovwoovu anị. Àa vavọọ a mẹ agụvị ka ẹngụ ọza ọnọọ vị ana mẹ̀ ụhị Anisirẹrị nịnị, dị ọ va jịnẹ ịsị a ka tịtẹ.

¹⁶ Ẹnẹnẹ eyinẹhẹ anị, dị Ijosuwa kụ avaba Anisirẹrị nịnị hi ẹhẹ ịrẹsụ-ịrẹsụ, dị ahịka ịrẹsụ Ijuda ụvọ za nị.

¹⁷ Dị a kụ ịrẹsụ Ijuda vị ọvịdị Ijosuwa abara-abara nị, dị ahịka abara Ịzẹra ụvọ ku nị. Dị a kụ abara Ịzẹra tụ ẹhẹ ovwoovu-ovwoovu, dị ahịka ovwoovu Izabidi â za ka ộ kụ ẹnya ọnọọ nị.

¹⁸ Dị Ijosuwa sị anovwoovu Izabidi ozi Ịzẹra tụ ẹhẹ ikonyi-ikonya, dị ahịka Eekanị ana vị ozi Ikami ana vị aazị Izabidi eku za nị.

¹⁹ Dị Ijosuwa kà a, “Ozi emi, ka ịzẹyịza ịzẹnị ọvịdị Ẹnẹyịmavara ana vị Ohomorihi Anisirẹrị nịnị. Ka irenu awụ kà a mị booro anị ịsị ụ mẹ̀. Asị ụ da a gu.”

²⁰ Dị Eekani tụ Ijosuwa ohi, dị ọ ka, ịzẹyịza ọnị ọ raà rị ịvị Ẹnẹyịmavara ana vị Ohomorihi Anisirẹrị nị. Aanị ọnị mẹmẹ mẹ̀ ẹ nị.

²¹ Ọnị ô re achị Anibabironi ene zoza, dị ọnị sị ọ, beri isiriva ana raata ikirogirami ẹẹva vaka ọchị igooru ọnị ụraata anị vị achẹva ikirogirami. Ô ze ọnị eyi ẹtẹẹtẹrẹ, dị ọnị kụ́ wa nị. Ẹnya ẹnẹẹ ya ịnị eteesu ịzị ọnị ba ẹtẹ, dị ọnị kụ̀ wà hi.

²² Agụvị avọọ, Ijosuwa tụ́ anọrụ ẹnyị ene zwe echi na ngụ ịnị ajẹngụ anị ịzị ộ kụ́ ogu ẹnẹẹ beri isiriva ana ya iruvo ẹnya.

²³ Dị ẹnịnị kụ́ ẹnya ẹnẹẹ tụ́ ẹhẹ hụụnị ajẹngụ anị va yị Ijosuwa ọnịrị avaba Anisirẹrị nịnị, dị a kụ́ wa hi ọvịdị Ẹnẹyịmavara.

²⁴ Ijosuwa ọnịrị Anisirẹrị ana vọ za Eekani ozi Ịzẹra, dị ẹ kụ́ isiriva, achị, ọchị igooru beri ezi Eekani anọrụ ọnịrị anẹẹ, imaaru, ịkẹrịkẹtẹ, atẹmẹ ọnịrị ajẹngụ beri avaba ịsa ana vị anị na tụ́ inozi Akọ.

²⁵ Dị Ijosuwa ộ họ̀ ọ use, ka sị ẹ vẹ dị ọ kụ́ ẹngụkata ve tu ẹnị? Agụvị avọọ Ẹnẹyịmavara vaa kụ́ ẹngụkata tu wu booro aanị. Dị avaba aza sị ịrẹta-ịrẹta wụ̀ Eekani. Dị ẹ rẹẹ vavọọ wụ̀ avaba anovwoovu anị ọnịrị avaba ịsa ọnị ọ nyị.

²⁶ Dị e gu ịrẹta ẹnẹ ẹ sị wụ̀ wa ku wa ịrẹsụ, dị ọ nẹba ẹtẹẹtẹrẹ nị ịrẹta ẹnẹẹ hi hi ịzọọ booro ve tu ajịnị. Agụvị avọọ aa hị́ ịzọọ inozi akanya.