Ijosuwa 23 - IWE ỌNỊNỊ

Ịrẹyị ọdịrẹma ọnị Ijosuwa kà yị Anisirẹrị

¹ Ẹnẹyịmavara ọ̀ navọ Anisirẹrị nịnị ka ẹ ra ịnị ẹngwọọrọ ịnị ụmẹ ọgọdọ. Ịjọnọọ, Ijosuwa o si bo ẹtẹẹtẹrẹ.

² Dị Ijosuwa hị́ avaba Anisirẹrị gụ beri azọkụ ọnịrị ohirẹsụ nịnị ne beri ọdọvịdị nịnị ọnịrị ọgọọga nịnị ana vọ. Dị ọ kà yị wa ka, ọnị o si bo.

³ Ọ kà ẹnịnị è re Ẹnẹyịmavara Ohomorihi ẹnịnị mẹmẹ kú ịrẹkụ yị wa, dị ẹ nyị ẹbẹẹba avaba ọnịvị ẹnịnị.

⁴ Dị ọnị raà ga ẹtẹ anẹkụra ene wusu ọnịrị ana yara yị ịrẹsụ-ịrẹsụ Anisirẹrị nịnị hụrị Okuha Ịjọdanị na ngụ Òkū Imeditareniya.

⁵ Ẹnẹyịmavara Ohomorihi awụ vaa dụ wa jịnẹ hụrẹ oze awụ nịnị. Ọ vaa tụ́ wa ụvọ jịnẹ eyi awụ nịnị, dị ụ dọ ẹtẹ ẹnịnị anka Ẹnẹyịmavara Ohomorihi awụ nịnị mẹ wo oto anị yị wụ nịnị.

⁶ Agụvị avọọ, re ka waa jẹẹ geri-geri, dị ụ wa si saasa avaba ịsa ana a chẹrẹ tụ́ ịnị iwe ọda Imosiisi. Waa mẹ avaba ịsa ana a chẹrẹ tụ́ ọ. Asị ụ há hụụnị anị zị eyi ụvọrị a vị eyi ụvọha.

⁷ Asị ẹwụrị aza ẹnẹnị ana vọ beri ẹwụ nịnị rị vabẹ. Asị ụ kà ịrẹyị ịrẹha ori ẹnịnị, a vị dị ụ wa sị̀ hị́ eku, a vị ka wa hẹkẹ ẹ, dị ụ wa tana tụra ẹtẹ yị wa.

⁸ Asị ka ọnọọ, waa mẹ ịzẹyịza ka Ẹnẹyịmavara na anka ụ mẹ vịdị aa yị mẹ̀ pooro va ngụ ajịnị.

⁹ Ẹnẹyịmavara ộ raà dụ anẹkụra nịnị ana banyị, dị ẹ nyị ụkata ụ maa ngụ ẹtẹ ẹnịnị na. Ẹ yị nyị ana hụ ọ gẹ ịrẹkụ tu wu nịnị.

¹⁰ Ọza ịnya awụ nịnị ọ zụ dụ anọrụ akahị ẹnịnị hi avị agụvị ka Ẹnẹyịmavara Ohomorihi awụ nịnị aa vụ ịrẹvụ yị wụ nịnị anka ọ mẹ kà a nị.

¹¹ Agụvị avọọ sị eyi pe ẹtẹ, di u wee sì ịrẹyị Ẹnẹyịmavara Ohomorihi awụ nịnị.

¹² Wàa mẹ̀ akamawụ, dị ụ va ụvọ beri anẹkụra nịnị ana vọ tụ́ ịnị akakana awụ nịnị, dị ẹwụrị wa nyị ẹngụ vahi nị.

¹³ Yẹ ka Ẹnẹyịmavara, Ohomorihi awụ nịnị ẹ yị kụkụ vaa dụ wa jịnẹ hụụnị ẹkụra ẹnịnị yị wụ nịnị ụ maa ngụ tù wa aanị. Asị ka ọnọọ, ẹnịnị vee divi yị wụ nịnị anka ịrẹpa a vị ẹtẹ ana a chị zi ọza avọọ nị. Ịsa ọnị ẹ vaa mẹ wụ nịnị vaa zị wụ anka èe rere tu ọza ịjapa, a vị igegenechi òo ka ngụ ọza eyi avọọ nị.

¹⁴ Ijosuwa kà booro aanị ẹkụhị anị ọ sị gụ ka oni o su. Ọza ịnya-ọza ịnya ịnị ẹnịnị ẹẹ yẹ ịnị ayị ọnịrị ụhwẹ anị ka Ẹnẹyịmavara Ohomorihi ẹnịnị ọ raà sị ịsa ozoza ọnị o wo oto anị yị ẹnị. Avaba ịsa ọnị o wo oto anị vị ọnị ọ mẹ̀. Ẹ yị nyị ikonya ana jị ha.

¹⁵ Anka ọ mẹ mẹ̀ avaba ịsa ọnị o wo oto anị, avọọ ọ mẹ rẹ vaa mẹ̀ ịsa ọnị ọ sị chire wa angwa nị.

¹⁶ Wẹ̀ẹ sị ụvọ za oto ọnị ộ mẹ̀ ọda anị yị wụ nịnị ka wa sị ụvọ za, dị ụ na hẹkẹ ori nịnị, ayị vaa kụ́ ọ, dị ọ sị ụya anị rị wụ nịnị. Ẹ yị jẹẹ, dị avaba awụ nịnị o vu ẹtẹ, dị ẹ yị nyị ọza ana vọ tụ́ ịnị ẹtẹ ozoza ọnị ọ raà sị yị wụ nịnị.