Ijosuwa 20 - IWE ỌNỊNỊ

Ẹkụra ana a nyị ka ẹ vị aha ọyịtẹ̀

¹ Â nyị ụmẹ ọnya aanị ọnị Ẹnẹyịmavara tụ Ijosuwa hi Anisirẹrị nịnị.

² Dị ọ ka ẹ nyị ẹkụra ẹnyị dị ẹ vị aha ọyịtẹ̀ anka ọnị mẹ vịdị ka yị Imosiisi ịjị ọ ya ẹhẹ.

³ Aa nyị ọza ene nyeeyi wụ́ ọsa dị ò zwe na tẹ̀ ịnị ọnyara ịnị ẹkụra ẹnẹẹ. Dị ọ vavọọ tẹ ịzọọ agụvị asị anda ọza ọnị ọ wụ aanị va wụ́ chẹrẹ ẹ.

⁴ Ọ̀ọ vavọọ na ngụ ịzọọ kẹnẹ, dị ọ ne tu ọdọvịdị ene oze ovwoovu ẹkụra. Dị ọ ka yị wa ịsa ana mẹ. Ẹnịnị va sị oze yọ ka ọ ngụ ẹkụra dị ọ ra ịzọọ pe ẹnị.

⁵ Anda ọza ene sụ ẹ na ịzọọ ka ẹnị e ne si atọ, ọdọvịdị ẹnẹẹ ẹ yị vaa zẹ agụvị ka ọyị yẹ mẹ.

⁶ Ọza ana wụ́ ọza aanị vaa ra ịzọọ dị aa kụ́ ahụ ịrẹyị ọnọọ dị aa yẹ ọ̀ọ rị ịvị avị ọ rị ịvị. Dị ọ ra ịzọọ pooro dị ohirẹsụ irehi Ohomorihi ọbanyị ana mẹ̀ ọkarẹyị ịrẹyị ọnọọ o su. Ọ vavẹ ịrẹma anị, ọ kụkụ zụ aa na eehi anị.

⁷ Dị Anisirẹrị nịnị nyị ẹkụra ẹẹta ene hi akẹnẹ irehu Ijodani eyi ịzị ọyị zị ngụ ẹtẹ ka ẹ vị aha ọyịtẹ̀ nị. Ẹkụra ẹnẹẹ ẹ vị Ịkẹdẹsị ịnị ẹtẹ Igariri ịrẹsụ ataba Inahwitari, ọnịrị Ịsẹkẹmị ataba Ehwireemi, ne beri Ikirati-Ariba ịnị ịrẹsụ ataba Ijuda, Ikirati-Arịba aa hị́ Ihebirọnị booro aanị nị.

⁸ Avọọ ẹ mẹ rẹ nyị ẹkụra ẹẹta ọsa akẹnẹ enyi ẹyị ọsa ịzị ọyị zị hụrẹ vẹ. Ẹkụra ẹnẹẹ ẹ vị Ibezeri ịnị inozi ẹtẹ Irubẹnị, ọnịrị Ịramọtị-Igiriyadi ịnị ẹtẹ Igadi, ne beri Igoranị-Ịbasanị ịnị ẹtẹ Ịmanasẹ.

⁹ Avaba ẹkụra ẹnẹnị aa nyị ka ọ vị aha ọyịtẹ̀ yị Anisirẹrị ana nyeeyi wụ̀ ọza. Avọọ ọ rẹ vị yị ọzọga ana ra ịnị akakana Anisirẹrị nị. Aha ẹnẹnị ẹ va dọ aza tụ dị aa kụ́ ahụ ịrẹyị nị.