Ijosuwa 14 - IWE ỌNỊNỊ

A mẹmẹ ga ẹtẹ Ikanaani yị Anisirẹrị

¹ Ịnị ụmẹ ọnọọ, avaba ẹtẹ Ikanaani ọnị Anisirẹrị nịnị dọ wa vị ogu ẹnịnị. Dị Eriyaza, ohirẹsụ irehi Ohomorihi, ọnịrị Ijosuwa ozi Inuni ne beri ohi-ohi ịrẹsụ Anisirẹrị ga ẹtẹ ọnọọ yị Anisirẹrị nịnị nị.

² Ẹtẹ ọnọọ vị ana a ga yị ẹnị ịrẹsụ ịhịịna rị ẹjịjị ana vọ anka Imosiisi mẹ vịdị ka tịtẹ.

³ Imosiisi ô vịdị raa sị ẹtẹ yị ịrẹsụ ẹẹva rị ẹjịjị akẹnẹ dị ẹ va jịnẹ irehu Ijodani, Ama ẹ yị nyị ẹtẹ ọnị ọ sị yị ezi Ireevi.

⁴ Ezi Ijosẹẹhụ ana vị ịrẹsụ ẹẹva, Ịmanasẹ ọnịrị Ehwireemi ẹ sị aha yị ezi Ireevi ọnịrị Ụsụpa ne beri ogu ẹnịnị.

⁵ Avọọ Anisirẹrị nịnị mẹ ga ẹtẹ ọnọọ hi ẹngụ ụvọ anka Ẹnẹyịmavara mẹ ka yị Imosiisi nị.

 sị Ihebirọnị yị Ịkarẹbị

⁶ Â nyị ụmẹ ọnya aanị, ịnị ụmẹ ọnọọ Anisirẹrị vị ana yị kụ́ udi tụ́ Igirigari. Dị Ịkarẹbị ana vị ozi Ijehwụnẹ ana hụụnị abara Ikenazi kụ́ aza ọrụrụ hụrẹ ịrẹsụ Ijuda ve tù Ijosuwa nị. Dị ọ ka Ijosuwa óó tamayị ịrẹyị anị ọnị Ẹnẹyịmavara kà yị Imosiisi ana vị ọza Ohomorihi Ịkẹdẹsị Ibaneya.

⁷ Dị Ịkarẹbị ka ọnị vị ịrayị ẹbẹẹva ịnị ụmẹ ọnị Imosiisi sị tụ ọnị hụrẹ Ịkẹdẹsị Ibaneya ne re ẹtẹ Ikanaani. Avaba enube ọnị ọ sị vavẹ va ka yọ vị ana sẹ.

⁸ Aza ana vọ ịnị ẹnị ana na vị ana va tụ́ Anisirẹrị angwahi. Ama ọnị vị ana sị avaba ayị tụra Ẹnẹyịmavara ana vị Ohomorihi.

⁹ Ịhị ọnọọ Imosiisi hị́ eku ka, ẹtẹ ọnị ọnị kụ́ ahụ hi aanị vị vaa vị ezi ọnịrị ezi ị́rẹma-ịrẹma anị agụvị ka ọnị ọ saasa Ẹnẹyịmavara Ohomorihi.

¹⁰ Dị ọ ka, Ijosuwa èe re Ẹnẹyịmavara me sere ọnị va ngụ ụmẹ ọnọọ. Ịrayị ẹbẹẹva tụra ẹẹhị ana parahu ọnị ẹnị hụrẹ aa ngụ ụnọmị zịịzị avọọ yị. Ọnị vị ịrayị ẹbẹẹna tụra ẹẹhị booro aanị. Ẹnẹyịmavara vị ana mẹ ịrẹyị ọnị ọ ka.

¹¹ Ịkarẹbị ka, ọnị vị ana yị nyị ụkata jẹẹ anka ọnị mẹ ya ịhị ọnọọ. Ọnị ọ zụ zụ nọ ịrẹkụ booro aanị.

¹² Dị ọ ka Ijosuwa ọ sị ẹtẹ ịrẹsụ ataba ọnị Ẹnẹyịmavara kà ọ vị anị yị ọnị, Ẹnẹyịmavara vaa gụ ọnị ụvọ dị ọ dọ aza ene hi ịzọọ ẹtẹ anka o me wo oto yị ọnị. Dị ọ ka aa vị eyi Ijosuwa aza ana vọ e juwe ajịmasị ana ra hi ịnị ẹkụra ẹbanyị-ẹbanyị ana jị ọvọ kara.

¹³ Dị Ijosuwa mẹ̀ aduwa ka Ẹnẹyịmavara ọ gụ Ịkarẹbị ụvọ, dị ọ sị Ihebirọnị yị ọnịrị ezi anị.

¹⁴ Ịkarẹbị ọnịrị ezi ịrẹma ẹ nyị Ihebirọnị agụvị ka ọ mẹ ịzẹyịza ka Ẹnẹyịmavara ana vị Ohomorihi Anisirẹrị.

¹⁵ Ihebirọnị vị ana a vịdị hị́ ẹkụra Ariba agụvị ka Arịba ọ vịdị hụ huu keekere ịnị ẹnị Ajịmasị ẹnẹ hị́ ịzọọ. Dị ẹtẹ vịdị nyị ẹngwọọrọ nị.