Ijosuwa 13 - IWE ỌNỊNỊ

Ẹtẹ ana vọ ọnị Anisirẹrị ẹ yị rị

¹ Ịnị ụmẹ ọnọọ, Ijosuwa ô si bo, dị Ẹnẹyịmavara kà yị ọ ka ô sị vịra ama ẹtẹ ọ vọ dẹngụ ọnị ẹnị ẹ yị dọ:

² avaba ẹtẹ Anihwirisiti ọnịrị ẹtẹ Anigesuri,

³ hụrị irehu Isihoni ana ya eyi ịzị ọyịị̄ zịị vẹ ịnị ẹtẹ Ijipiti na ngụ eyi ẹbẹẹba ịnị ẹtẹ Ekironi ana a kà a ọnị vị ẹtẹ Anikenaani. Anihwirisiti nini ẹ nyị ohinọyị ẹẹhị ana ya Igaza, Asidodi, Asikeroni, Igati, ọnịrị Ekironi ne beri Awimi.

⁴ Avọọ a mẹrị nyị avaba ẹtẹ Anikenaani ọnịrị ẹtẹ Imera ana vị ẹtẹ Anisidoni na ngụ Ahwẹkị ana ya ẹhwị ẹtẹ Anamọrị;

⁵ ẹtẹ Anigebari; avaba ẹtẹ Ịrẹbanọnị na ngụ eyi ịzị ọyịị̄ zịị vẹ hụrẹ Ịbaarị-Igadi ana ya eyi ụvẹtẹ ataba Ihamọnị na ngụ oze Ihamati.

⁶ Ẹnẹyịmavara kà a ọnị vaa dụ avaba Anisidoni ene hi ịnị ẹkụra ana ya ịrẹsụ ataba ịnị akakana Ịrẹbanọnị na ngụ Imisehwoti Imayimi eyi Anisirẹrị nịnị. Ọ kà Ijosuwa o re ka ọnị ọ ga ẹtẹ ọnọọ yị Anisirẹrị nịnị anka ọnị mẹ ka yọ.

⁷ Ọ ga ẹtẹ ọnọọ yị ẹnị ịrẹsụ ịhịịna beri achẹva ịrẹsụ Ịmanasẹ dị ọ vị ẹnịnị booro aanị.

A mẹmẹ ga ẹtẹ ana ya eyi ịzị ọyịị̄ hụrẹ akẹnẹ Ijodani

⁸ Ịrẹsụ Irubẹnị ọnịrị Igadi beri achẹva Ịmanasẹ ệ vịdị raà dọ ẹtẹ hụụnị ụvọ Imosiisi ozi ahụ Ẹnẹyịmavara akẹnẹ Ijodani.

⁹ Ẹtẹ ọnọọ ộ kwẹẹtẹ hụrẹ Aroyeri, ẹgẹ osusu Arinọnị ọnịrị ẹkụra ana ya ịzọọ beri avaba ịrẹsụha hụrị Imedeba na ngụ Idiboni.

¹⁰ Ẹtẹ ọnọọ ộ na na ngụ ẹhwị ẹtẹ Amọnị, dị ọ za avaba ẹkụra ẹbanyị-ẹbanyị ọnị Isihoni ohinọyị Anamọrị vịdị aa mẹ̀ ịjọva tụra ịrẹsụ hụrẹ Ịhẹsịbọnị.

¹¹ Ẹtẹ ọnọọ ộ za Igiriyadi ẹtẹ Anigesuri ọnịrị Animaaka, avaba ataba Ihamọnị beri avaba Ịbasanị huuu na ngụ Isareka.

¹² Avọọ ẹ mẹ yịị dọ ẹtẹ na ngụ ẹtẹ Ịbasanị ịzị Ọgị vị ohinọyị anị ọnị Asịtarọtị ọnịrị Edireyi. Ọnị ịnya kẹnẹ ọ ha ịnị Irehwayimi. Ẹtẹ ẹnẹnị Imosiisi huna anẹkụra ẹnẹẹ, dị ọ sị ụkata-ụkata dụ wa hụrẹ ẹkụra ẹnịnị.

¹³ Ama Anisirẹrị nịnị ẹ yị dụ Anigesuri nịnị ọnịrị Animaaka nịnị hụụnị ẹtẹ ẹnịnị. Ẹnịnị vị ana ra chire Anisirẹrị ịnẹ pooro ve tu ajịnị.

¹⁴ Imosiisi ộ yị sị ẹtẹ yị Anireevi nịnị anka Ẹnẹyịmavara mẹ̀ kà yọ. Ịsa ịsọvọ ana aā rị ịra ana aā sị va yị Ẹnẹyịmavara ọ vị ogu ẹnịnị.

Ẹtẹ Irubẹnị

¹⁵ Imosiisi ộ sị ẹtẹ yị abara-abara ene hi ịnị ịrẹsụ Irubẹnị.

¹⁶ Ẹtẹ ẹnịnị vị ene nyima hụrị, Aroyeri ana ya ụtọ Irehu Amọnị ọnịrị ẹkụra ana ya ịnị akakana inozi ọnịrị avaba ẹtẹ inozi ịrẹsụ ataba Imedeba,

¹⁷ beri Ịhẹsịbọnị, ọnịrị avaba ẹkụra ene hi ịrẹsụ ataba anị. Ẹkụra ẹnẹẹ ẹ vị Idiboni, Ibamoti-Ịbaarị beri Ịbẹtị-Ịbaarị-Imeyoni,

¹⁸ ọnịrị Ijahazi, Ikedemoti ọnịrị Imehwaati

¹⁹ Ikiriyatayimi, Isibimati, ọnịrị Ịzẹrẹtị-Isahari ịrẹsụ otutu inozi.

²⁰ Ịbẹtịpori, ọvahuchi ataba Ipisiga ọnịrị Ịbẹtị-Ijesimoni,

²¹ avaba ẹkụra ẹbanyị-ẹbanyị ene hi ịrẹsụ ataba ọnịrị ẹtẹ Isihoni ana vị ohinọyị Anamọrị ana ya Ịhẹsịbọnị. Imosiisi ộ huna ọnịrị ọdọvịdị Animidiya nịnị. Evi, Irekemi, Izuri, Ihuri ọnịrị Ireba. Avaba ẹnịnị ệ mẹ̀ ịjọva ẹtẹ ọnọọ beri Isihoni ohinọyị.

²² Ịbaraamị ana vị ozi Ịbẹyọ ana vị ọhẹva vị ọnị Anisirẹrị nịnị wụ̀ beri aza ana vọ.

²³ Okuha Ịjọdanị ọ vị ẹhwị ẹtẹ Irubẹnị. Avaba ẹkụra ẹbanyị-ẹbanyị ọnịrị eweyi-eweyi ene hi ẹtẹ ọnọọ ẹ vị ogu yi Anirubẹnị nịnị nị.

Ẹtẹ ana sị yị Anigadi nịnị.

²⁴ Imosiisi ộ sị aha ịnị ẹtẹ ọnọọ yị Anigadi nịnị ka ọ vị ẹnịnị.

²⁵ Ẹtẹ ẹnịnị ộ za Ijazeri ọnịrị avaba ẹkụra ẹbanyị-ẹbanyị Igiriyadi, achẹva ẹtẹ Amọnị huu na ngụ Aroyeri ana ya eyi ịzị ọyịị̄ kwẹẹtẹ hụrẹ Ịraba.

²⁶ Avọọ ẹtẹ ẹnịnị ộ kwẹẹtẹ hụrẹ Ịhẹsịbọnị na ngụ Iramati Imizipe ọnịrị Ibetonimi; hụrẹ Imahanayimi na ngụ ẹhwị ẹtẹ Iro-Idebari.

²⁷ Inozi Ijodani, ẹtẹ ọ za, Ịbẹtị-Iharami, Ịbẹtịnimira, Isukoti, Isihọnị, ọnịrị avaba ẹtẹ Isihoni ohinọyị Ịhẹsịbọnị.

²⁸ Avaba ẹkụra ẹbanyị-ẹbanyị ọnịrị eweyi-eweyi ẹnẹnị a sị yị abara-abara ịrẹsụ Igadi nị.

Ẹtẹ ọnị Imosiisi sị yị achẹva Ịmanasẹ

²⁹ Imosiisi ộ sị ịnị ẹtẹ ọnọọ yị abara-abara eni hi ịnị achẹva ịrẹsụ ka ọ vị ẹnẹnị.

³⁰ Ẹtẹ ẹnịnị ọ na ngụ Imahanayimi beri avaba ẹtẹ Ịbasanị ọnị Ọgị vị ohinọyị anị. Avọọ ọ mẹ̀ za ẹkụra Ịjarị eweyi-eweyi ẹbẹẹta ịnị ẹtẹ Ịbasanị nị.

³¹ Ẹtẹ ọnọọ ọ za achẹva Igiriyadi beri Asịtarọtị ọnịrị Edireyi ana vị ohyẹtẹ ẹkụra Ọgị ohinọyị Ịbasanị. Avaba ẹtẹ ẹnẹnị vị ana a sị yị achẹva evere Imakiri ozi Ịmanasẹ.

³² Avọọ Imosiisi mẹ ga ẹtẹ eyi ịzị ọyịị̄ kwẹẹtẹ hụrẹ Ijeriko ọnịrị Ijodani ịnị ụmẹ ọnị ọ ya inozi Imowabi nị.

³³ Ama Imosiisi e yị ga ẹtẹ tu ezi Ireevi. Ộ kà a yị wa ka ogu ẹnịnị ọ vị ịsa ịsọvọ ana aā sị vẹ ịnị irehi Ẹnẹyịmavara Ohomorihi Anisirẹrị nị.