Ijoovu 9 - IWE ỌNỊNỊ

Ijoovu kà

¹ Ijoovu ka:

² avaba ịrẹyị ọnị Ibiridadi kà vị ịzẹyịza. Ẹ yị nyị ọzarẹyịrẹsụ ana zụ rị ịhị ọvịdị Ohomorihi.

³ Ẹnẹ zụ beri ọ nyị ahankata kẹ? Ọ̀ọ họ̀ use ịrẹyị ụpẹ akahị, ẹnẹ yẹ ohi sị yọ?

⁴ Ohomorihi ọ yẹ ịrẹyị dị ọ rẹ nyị ụkata ẹnẹmẹhị nị.

⁵ Ọ̀ọ kụ ayị, ẹ yị nyị ka ọ ka dị ọ tụ́ ataba ụvọ hi ẹtẹ.

⁶ Ohomorihi ọ̀ ziizi ẹtẹ jigijigi angwa vene hi ataba nịnị.

⁷ Ọnị ọ nyị ụkata ana zụ za ọyị ka asị ọ ha dị asị ụzọmị zẹtẹ ịrahụ nị.

⁸ Nyị ọza ana gụ ọ ụvọ gana ihinẹba ku. Ọnị ọọ̄ za oku ana jị ayị dị aa da ẹgangguu jẹẹ nị.

⁹ Ohomorihi ộ mẹ̀ ụzọmị ọzọza tụ aha anị nị. Aa nyị ụzọmị ọbanyị, ụhwaazị, ọsụgụrẹngụ ụzọmị nyụụwụ ọnịrị ụzọmị ene hi eyi ụvẹtẹ

¹⁰ Ọza ọ yị zụ yẹ ịsa ẹbanyị-ẹbanyị ọnị ọ mẹ̀. Ọọ mẹ ịvọpa pooro kẹnẹ nị.

¹¹ Ọ zụ para ọnị huu dị ọnị ẹyị yẹ vụrụ.

¹² Ohomorihi ọ̀ọ sị ịsị e zee eyi, ẹnẹ zụ za? Ẹnẹ zụ họ̀ ọ use ka sị ẹ vẹ?

¹³ Àa kụ ayị ọ mā va. Ọnịvị anị ana kụ tu ọ venee vú ẹtẹ.

¹⁴ Ijoovu ka ọnị ọ yị yẹ ẹngụ ohi ọnị ọnị vaa sị yị Ohomorihi.

¹⁵ Ọnị ọ daka rị ịhị, ọnị vana yịị da ịpẹ yị ọ ka ọ vayị anị.

¹⁶ Ohomorihi ọ daka kà a ka ọnị ọ kụ irenu anị, ọ yị vaa dọ ịsị ọnị ọọ ka.

¹⁷ Ijoovu ka Ohomorihi jị ayị ee wure ọnị kẹnẹ-kẹnẹ aanị nị.

¹⁸ Aa sị ụya rị ọnị ka asị ẹngụ hi ahị.

¹⁹ A vị ịnị ụkata yọ nị, ọnị ẹ yị hi ọ ụhwẹ. Ọnị ọ sị ọ nọ ọvịdị ọkarẹyị, ẹnẹ hụ ọ hị́ ọ họ̀ use ịrẹyị.

²⁰ Ijoovu ka ọnị ọ daka rị ịhị, ịrẹyị irenu anị vị ana jị ịvị yị ọnị.

²¹ Ịzị ẹhẹ o du ọnị eyi tu aanị, ẹ yị nyị ịzị ịhị ọyị rị kanyị ọnị.

²² Ịngọ ọnyọọnya ọ sị ọza ana rị ịhị ọnịrị ọza ana rị ịvị nị. Ohomorihi vene vu avaba ẹnịnị ẹtẹ.

²³ Ịrẹyị òo tu ọnịrẹyịzẹyịza di o su asigiri Ohomorihi vana sị ọ mẹ enyinyi.

²⁴ Ohomorihi ọ́ raa sị ẹhẹ chire aza edivi ụvọ, dị o gu ọmọkarẹyị nịnị eyi ka asị ẹ mẹ ịzẹyịza nị. Ẹ̀ yị vị Ohomorihi ọ vavọọ mẹ̀ ẹ, ẹnị ọ vị ọsa.

²⁵ Ijoovu ka ẹhẹ anị ee zwe viri-viri huna ọza ene zwe echi kẹnẹẹ. Dị ọ vavọọ zwe tụ ịnị osusu.

²⁶ Ọ kà, vị ẹhẹ anị ee zwè anka ẹpa ene zwè echi sasasa ịrẹsụ enyi avọọ nị. Ọ sị me anka obono o rere ve che usu hụrẹ ẹtẹ avọọ nị.

²⁷ Ọnị ọ̀ daka ka a ka ọnị ẹ yị kụkụ kụ ịrẹka agụvị ịsị ene tu ọnị, ọnị aa hụụnị ayodu, dị ọnị oo nyinyi nị.

²⁸ Ijoovu ka angwa ụya ọnị ọnị aa rị ee hị́ oni. Ọnị ọ yẹ ka Ohomorihi ẹ yị yaa jị ịhị yị ọnị.

²⁹ Agụvị avọọ sị ẹ vẹ dị ọnị aa kụ ka ẹngụ ụhwẹ ịrẹma ọnị ọ vaa yịị jị ịvị yị ọnị.

³⁰ Ẹ yị nyị ụkwọ ana nyẹngụ sị nyịna ịvị anị kwooze.

³¹ Ohomorihi vene ne ọnị tụ ịnị ụsị ana nyị ịdọtị, dị achị anị ụvọta hyakụ aa nyị ịhyẹrẹ anị.

³² Ohomorihi ọ yị vị ọza anka ọnị, dị ọnị o tụ ọ ohi ịrẹyị anị.

³³ Ama ẹ yị nyị ọza ana va mẹ̀ ọkarẹyị ịrẹyị ọnịrị Ohomorihi.

³⁴ Ọ kà Ohomorihi za ụya ọnị aa rị jẹẹ, dị asị ọnị rẹ kụkụ hị́ angwa.

³⁵ Ijoovu ka ọnị e hí angwa, ọnị aa kụ irenu anị nị Ọ kà ọnị ọ ye ayị anị ka ọnị ẹ yị rị ịvị.