Ijoovu 7 - IWE ỌNỊNỊ

Ijoovu aa yịị kà ịrẹyị naa

¹ Ẹhẹ ọnị ọza vẹ ịnị anị vị ẹhẹ akanya. Ịrẹvụrẹkụ yọ pooro nị. Ọ sị mẹẹ anka ọza anaa dọ ụkọrọ avọọ nị.

² Ọ sị mẹẹ anka ọnụkọrọ ene zi ụmẹ ana na tụ́ ụhwọ́, a vị ụmẹ ana a dọ ẹkẹhị anị avọọ nị.

³ Ohomorihi ọ raa mẹ ẹhẹ anị osusu ụhwẹ ẹnyị na ngụ ọsa, dị avaba ịrahụ anị vị ayodu kẹnẹ nị.

⁴ Ọnị ọ na sụ ịrahụ dị eyi ọ yị hụra nị. Dị ahịka ọnị vara suku pooro dị eyi ọ vaa nị nị.

⁵ Avaba ẹngụ anị vị ịtahụtahụ, di e yee tu chava kẹnẹ nị.

⁶ Ẹhẹ anị ọ sị da ẹjịjị tụ ịnị osusu kẹnẹ. Ẹhẹ anị vene e zwe echi anka ụsẹ mẹẹ̄ hụrẹ upechi ịra ịnị achị avọọ.

⁷ Ijoovu ka Ohomorihi ọ tamayị a ka ẹhẹ anị sị mẹẹ anka ụhwẹ ụpọnya ọnị ọza tụ́ avọọ nị. Ẹ yị vaa nyị ọza ọnị ọnị re vụrụ-vụrụ.

⁸ Eyi ene re ọnị booro aanị, o yi me vee ne re ọnị ịjị ọnị o wusu.

⁹ Ahị mẹẹ̄ kụ eguhi ne hu avọọ, avọọ ẹhẹ aza ene su mẹ ta dị ayị ẹnịnị hi nị.

¹⁰ Ẹnịnị ẹ́ ma vana và vẹ eehi ẹnịnị, anda ẹnịnị é mè vene re wa.

¹¹ Agụvị avọọ, mẹ yị vaa sị irenu amii kú oku. Maa kà ịrẹyị agụvị ka ayị amị o si du. Maa kụ́ irenu amị agụvị ka ayị aa kụ mị.

¹² M máá vị uye odivi ana yà ini òkū nị? Sị ẹ vẹ dị ụ nyị aza ka ee sere mi?

¹³ Mê rò o ka màa hụtụ ayị amị vaa nẹtẹ, ọnịrị ka màa sụ ara ẹngụ amị vaa rọ̀,

¹⁴ Ama wâ mẹ ka ma ra ụ́ra dị angwa oo hí mi wâ mẹ ka ẹtẹ oni mi re ò chire mị angwa.

¹⁵ Dị mị kụkụ ka, àa vana sị ụvọ hi mi ọbẹ di mi su nị, ộ dà mi hí huni ka ma maanị rị ụya nị.

¹⁶ Ẹhẹ amị aa nyị mị ịhyẹrẹ, àa yẹ me vene su. Navọ mị hẹẹ ka ẹhẹ amị aa tupe aanị.

¹⁷ Sị aza rẹyịrẹsụ vana vị, dị ịrẹyị ẹnịnị maanị jị wụ areyi, dị ụ sị ayị tụ ịnị ịrẹyị ẹnịnị?

¹⁸ Ẹnẹnẹ-ẹnẹnẹ vị ọnị ụụ̄ kana eyi ẹnịnị, dị ụụ̄ zama waa re ịnị avaba ụmẹ nị.

¹⁹ Wẹ yi daba sị eyi hụrẹ mị ẹngụ chee? Wẹ yị navọ mị hẹẹ ma daba jị atẹ mụnẹẹ?

²⁰ Màa mẹ ịvị, m máá sị zama wụ nị, ẹwụ ana kụ eyi pe aza? Sị ẹ vẹ di u wee bè mi? Sị ẹ vẹ dị mị sị vara ẹnya ọrata yị wụ?

²¹ Sị ẹ vẹ dị ụ wẹ yị vagu ịvị ọnị mẹ yị mị, dị ụ wa sị ebira ọhịmị amị kwooze? Ẹ yị nyị aa jẹẹ aanị dị a sị mị ne chire ẹtẹ; u kuku vee sì mị, ịjị ọnọọ mi si hu.