Ijoovu 40 - IWE ỌNỊNỊ

Ijoovu ô tụ́ Ohomorihi ohi ọnị ọ họ̀ ọ use

¹ Ẹnẹyịmavara ộ tụ Ijoovu ohi, dị ọ ka:

² vị́ Ijoovu wáá hị́ Ochẹtẹẹngụ ịrẹkụ tu ẹngụ anị, di e si ohuvọ ana a tụ ọnị nị? Ọ̀ọ ka ọnị ee pe Ohomorihi nyị ahankata o tụ ohi kẹ?

³ Dị Ijoovu tụ ohi, dị ọ ka,

⁴ ọnị ẹ́ yị vavọọ ya enee tụ ọ ohi ịrẹyị. Ọnị ọ raa sị ụvọ za irenu anị.

⁵ Ijoovu ka ọnị ọvịdị ra ka jịnẹ ẹngụ anị. Ọnị ẹ yị nyayịnẹ ka hụụnị avọọ.

⁶ Dị Ẹnẹyịmavara varẹma tụ ọ ohi hụụnị opomi ana a tụ nị.

Ẹnẹyịmavara

⁷ Dị ọ kà Ijoovu ọ̀ kwẹẹtẹ jẹẹ anka ọnọrụ, dị ọ tụ ohi ịrẹyị ọnị ọnị vaa họ̀ ọ use anị.

⁸ Ijoovu wáá vị ana kụ ịzẹyịza anị ha nị? Ọ́ọ́ vị anaa jị ịvị yị ọnị dị ọ sị ịhị rị nị?

⁹ Ẹnẹyịmavara ộ họ̀ Ijoovu ka ọ́ọ́ nyị ụkata anka ọnị? Ọ́ọ́ nyẹngụ sị ọngwẹ anị ha apaana ihinẹba anka ọnị?

¹⁰ Ijoovu ọ̀ọ vavọọ sị ya ọ kwẹẹtẹ dị ọ̀ sị ụbanyị ọnịrị ịzị ọ hụụ tu zụ kẹ.

¹¹ Ọ kà Ijoovu ọ kana eyi di o re aza ana sị ẹngụ ẹnịnị tụ ẹba, ọ kụ ayị hi wa dị ọ ka wa chi deere.

¹² O re wa dị ọ ka wa chi. O vu aza ọhịmị ẹtẹ aha tụra aha ene ee hi kẹ.

¹³ Ijoovu o nye wa dị ọ za wa tụ ineku agụvị asị ẹ zụ vaa vẹ ẹhẹ.

¹⁴ Ẹnẹyịmavara kà Ijoovu ọ̀ọ vavọọ zụ mẹ̀ ẹ, ọnị vaa ga a, dị ọnị dọ yọ ka ọ raa nyị ẹbẹẹba.

¹⁵ Ohomorihi ka Ijoovu o re ọdọba ịnị enyi ọnị ọnị tụ́ anka ọnị mẹ rẹ tụ́ ọ. Uye ọnọọ vị anaā rị avị anka imaaru avọọ.

¹⁶ Ụkata anị vi ana ya ịnị usi anị ọnịrị ọzị ịnị ịrẹka anị.

¹⁷ Omu anị vị ana jẹẹ gaa anka ọchị ana aā hị́ Isida avọọ. Dị ọzị ini usi anị para za ẹngụ biri-biri nị.

¹⁸ Ẹchụkụ anị sị mẹ anka enyusẹ anaā ibironzi avọọ nị. Ahụ anị vị ana sị mẹ anka ọvọrịvọ enyusẹ avọọ nị.

¹⁹ Ọnị ọ vị ọọnyị ịnị uye ọnị Ohomorihi tụ nị. Ọnị ana mẹ̀ ẹ kẹnẹ o huna a nị.

²⁰ Avị ana a rị vene hi ịrẹsụ ataba ịzị uye ịnị avị nịnị yaā mẹ aahẹ.

²¹ Uruvo igegenechi ọọ̄ hụtẹtẹ tụ nị. Ịnị ịkẹ oō tẹ̀ tụ ịnị apasị nị.

²² Igegenechi ọnịrị okuha ọ vị aha uhuhu anị nị.

²³ Irehu ọ̀ọ daka aa ha vụụvụ, ọ yị hí angwa. Okuha Ịjọdanị ọ̀ọ daka a da vuuvu ku ọ irenu, e yi zizi.

²⁴ Ẹnẹ nyayịnẹ za ọdọba inenyi ee re e? Ẹnẹ zụ va ịrẹpa zi ọ dị ọ̀ za a aahị?