Ijoovu 39 - IWE ỌNỊNỊ

Ẹnẹyịmavara aa yịị tụ́ Ijoovu ohi ịrẹyị

¹ Ẹnẹyịmavara ộ họ̀ Ijoovu ka ọ́ọ́ yẹ ụmẹ ọnị ẹvụ ene hi ịrẹsụ ataba sịị ma ozi? Óó re epeni maa ma ozi da?

² Ọ́ọ́ yẹ ụmẹ ya ẹnịnị zyẹẹ vị? Óó yẹ ụmẹ ana vọrọ ka ẹ sị ma ozi?

³ Ọ kà Ijoovu ọ́ọ́ yẹ ụmẹ ọnị uye ẹnẹnị sii ku ẹtẹ dị e va ozi hi ẹtẹ?

⁴ Ezi uye nịnị ẹ̀e sị katẹngụ, dị ẹ hụ́ ịnị ọyịchapaa, dị ẹ para ọnyị ẹnịnị huu. Ọnyị ẹnịnị é me vene re wa.

⁵ Ẹnẹ hụrẹ ịkẹrịkẹtẹ ịnị avị ụvọ? Ẹnẹ ngwara wa ka ẹẹ ngụ ọ zịịzị?

⁶ Ẹnẹyịmavara kà ọnị ọ navọ wa tụ́ ịnị ụnọmị ịzị ẹ̀ yị nyị avị ka ẹnịnị ẹ̀ ra ịzọọ nị

⁷ Uye ịnị avị nịnị vi eneē ve zwe, ẹ̀ẹ wụ̀ ọza ịrẹyị. Ẹnịnị é yị sị ịrẹyị owu ọza ana kụ́ ịsụpa rị.

⁸ Ịnị ataba ẹẹ̄ ngụ ọ zịịzị na rị nị. Ịzọọ ẹnịnịị sì avị ohwoohu ẹnẹ ẹ yaa rị nị.

⁹ Ẹya ọ́ọ́ dọ ka a sị ọnị kụ ịrịkụ, a vi ka a za a tụ́ ịnị ịga kẹ?

¹⁰ Ijoovu ọ́ọ́ zụ tụ́ ẹya ọkẹkẹrẹ ka ọ huru ẹtẹ yị ọnị kẹ? Ọ́ọ́ zụ za a jị ịrụkụ kẹ?

¹¹ Ọ́ọ́ zụ sị eyi tụra a ka ọ mẹ̀ ụkọrọ yị ọnị agụvị ka ọ nyị ụkata

¹² Di ọ rẹ ka, Ijoovu ọ́ọ́ zụ sị eyi tụra ẹya ka ọ kụ ịsa ịnị aarẹ hụụ ịzị ee tụ́ ayị ve echi yị ọnị kẹ?

¹³ Igongo vị eneē wù èe hú avaka, ama avaka anị ẹ yị nyị asịsẹ?

¹⁴ Ịnị eteesu ọọ̄ tụ́ ajẹ hi, dị ahịka ezi o ku ọ yọ nị

¹⁵ Igongo ẹ yị ro ka ọza ọ̀ zụ sị ahụ chaka ajẹ anị, a vi ka uye ọ zụ sị ẹtụpa pịrị wa.

¹⁶ Ezi anị vị ọnị ọọ chamayịị yị. Ẹ̀ẹ daka su, ẹ́ yị nyị ịzị ọ gẹẹ.

¹⁷ Ẹnẹyịmavara kà ọnị ọ rẹẹ sị ịrẹyọyẹ yọ, dị ọ vavọọ aa mẹ̀ ụra nị.

¹⁸ Ama ee zwe echi, umaata ọnịrị ọza ana tụra vana tana eyi re e.

¹⁹ Ẹnẹyịmavara ọ̀ rẹ họ̀ Ijoovu ka, ọnị ọ́ọ́ sị ụkata yị umaata nị, a vị ọnị ọ̀ mẹ ẹyị ana vaku ọ ọrọkọ nị

²⁰ Ọnị ọ́ọ́ mẹ̀ umaata ka oō ji anka akụvarịva avọọ nị?

²¹ Ẹnịnị e che ẹtụpa rị ẹtẹ, dị ẹ yaa jẹẹ ka ẹnị ẹ nyị ụkata. Di e yee né àaa nọ ịrẹkụ.

²² Ẹ yị nyị ịsị ee hí angwa anị. Ọza ẹ́ yi zụ si ụhwọ dụ wa varẹma.

²³ Ọpa aza ana tụra wa vi ana sụrẹyị ịnị ahaba anị, dị ọha ẹnịnị aa za nyoonyo ọyị ọọ va tụra wa

²⁴ Ẹngụ vị anaā hụ umaata ẹnẹẹ ka ẹnị e zwe echi dọ ọvịdị. Ẹnịnị ẹ yị kụkụ jẹẹ yị ee hu ọpanyị ịrẹkụ.

²⁵ Ụpẹrịka ọnị ọpanyị ọọ sụrẹyị, di e nowu. Ẹnịnị ẹ̀ wụ agụ ịrẹkụ di ẹ hyakụ vaa gụrị eyi ịrẹkụ. Ẹẹ wụ́ ịrẹyị ọnị ọga ịrẹkụ nịnị aa ka.

²⁶ Ẹnẹyịmavara kà, Ijoovu ọ́ọ́ zụ́ ukokoro a mẹ vọrọ ka ọ hira nị? Ọnị ọ́ọ́ zụ ò a mẹ vọrọ ka ọ gana avaka zị eyi ụvẹtẹ nị?

²⁷ Ọkasịmẹ wee zi ka Ijoovu ọ̀ ka yị ọnị ka ọnị mẹ ịrẹngwẹ anị tụ́ ịrẹsụ ataba nị?

²⁸ Ọkasịmẹ vị anaā da irehi anị, tu ịrẹsụ ataba ana nẹba huu. Dị ọ sị ọkọnị anị hụyọgọ sere ẹngụ anị.

²⁹ Ịzọọ aa ya re ịsị ẹ gụrị ẹtẹ ọnịrị anaa noze ana za mẹ ụngwẹ

³⁰ Ezi anị vene hu oku uye ọnị ọ kụ́ kara wa.