Ijoovu 38 - IWE ỌNỊNỊ

Ẹnẹyịmavara ô tụ Ijoovu ohi ịrẹyị Ẹnẹyịmavara

¹ Ẹnẹyịmavara ộ ka ịrẹyị Ijoovu hụụnị opomi

² Ọ kà sị ẹ vị dị Ijoovu aa nyị ahankata kẹnẹ-kẹnẹ tị ịnị ịsị ọnị ọ yị yẹ.

³ Dị ọ ka Ijoovu ọ kwẹẹtẹ ịzịzọọ, dị ọ tụ ọnị ohi ịrẹyị ọnị ọnị aa vaa họ̀ use aanị.

⁴ Ijoovu wáá ya ịzọọ ụmẹ ọnị ọnị aa sị tụ ẹhẹ?

⁵ Ẹnẹ ẹ ka a mẹ vọrọ ka ẹhẹ ọ gana? Ẹnẹ ẹ tana ịsa ana a sị mọ́ ọ?

⁶ Sị ẹ za ọtụ ana a sị ka ẹhẹ jẹẹ? Ẹnẹ ẹ sị ịrẹta kẹ ẹhẹ?

⁷ Yere ụmẹ ọnị ụhwẹ azị ọnịrị anggẹẹrị nịnị sị jị ahẹ?

⁸ Ene e sị oze chire oku ka asị ọ kụ ọhaara hụrẹ ụmẹ ana a sị mẹ̀ ẹ?

⁹ Ẹnẹyịmavara kà ọnị ọ̀ sị eguhi ojooji piri para enyi oku tụ ẹbẹẹba nị.

¹⁰ Ọnị ọ tẹ ẹhị yị oku dị ọ sị ọchị chire oze anị ịrẹma anị nị.

¹¹ Dị ộ ka yị oku ịzị ẹ vị ẹhị ọnị ọ zụ tu jẹẹ nị. Ẹhụ ẹhị ọnọọ ẹganggu zị tu jẹẹ nị.

¹² Dị Ẹnẹyịmavara họ̀ Ijoovu ka ọnị ọ́ọ́ mẹ ọda yị ọyị ka ọ ha dị ọ wụ nị?

¹³ Áá nyị ụmẹ ọnị ọ sị mẹ ka ẹtohweyi ẹnẹnẹ ọ zẹtẹ ịrẹsụ avaba ẹtẹ, dị ọ dụ aza edivi hụrẹ ịzị ẹ̀ tẹ tụ?

¹⁴ Etohweyi vị anaā mẹ ka ataba nịnị ọnịrị upoporo nịnị ẹ hụrẹ tụ ẹhẹ chengede anka ọgọọgọ awuru anaa jị mẹ̀ tụ ẹhẹ avọọ, a vị achẹrẹ ụmọpa anaa za tere ịrẹsụ ịsa avọọ.

¹⁵ Etohweyi ọ sị zẹtẹ baaba yị aza edivi agụvị ka aa za wa ka asị e re oze mẹ ezigi.

¹⁶ Ẹnẹyịmavara kà Ijoovu ọ́ọ́ zị ụsẹ ini eteesu ana ya iruvo oku da?

¹⁷ Óó re oze ịda aneku ịzị aza ene su hi daa?

¹⁸ Ọ́ọ́ yẹ ẹtẹ mẹmẹ gana? Ijoovu o tụ ohi ọ̀ọ ka ọnị ọ̀ yẹ.

¹⁹ Ọ kà Ijoovu ọ́ọ́ yẹ ịzị ẹtohweyi hụrẹ vẹ? Ọ́ọ́ yẹ ịzị etohozi ra?

²⁰ Ọ́ọ́ zụ sị wa nọ eehi ẹnịnị?

²¹ Ẹnẹyịmavara kà indee, ọnị ọ yẹ ka Ijoovu ọ zụ mẹ̀ ẹ agụvị ka a sị ọ ma dị ọnị vaa tụ ẹhẹ.

²² Ọ kà Ijoovu ọ́ọ́ nọ ịzị a kụ ata orihi ọnịrị eguhi eneē chire hi nee re wa da?

²³ Ohomorihi ka ọnị kụ wa hi ịzọọ ee zi ẹkụhị ịrẹyị. Ọnị a sị waa zi ịhị ịrazị vaa vẹ ọnịrị ẹkụhị ịrẹkụ nị.

²⁴ Ọ kà Ijoovu wáá ka ọnị ọ yẹ ịzị etohweyiī zẹtẹẹ hụrẹ nị, a vị ịzị ahị anaā tụ hụrẹ eyi ịzị ọyịị̄ zịị hụrẹ vẹ.

²⁵ Ẹnẹ ka ọnị ọ tụ́ oze yị orihi a vị apaana ihinẹba ka ẹẹ vaa tụra?

²⁶ Ẹnẹ mẹ ka orihi ọọ̄ zụ hi ịzị aza ẹyị ra,

²⁷ dị ọ rẹ mẹ ka ẹtẹ ọyịwụ ọ varẹma nyị avị?

²⁸ Ẹnẹ vị ada orihi a vị eguhi?

²⁹ Ẹnẹ vị ọnyị ata orihi

³⁰ ana za anka ịrẹta avọọ, dị ọ rẹ za enyi ini òkū sụ?

³¹ Ijoovu ọ́ọ́ zụ to ụzọmị nịnị hi aha ọzọza?

³² Ọ́ọ́ zụ ụzọmị nịnị ụmẹ ana vọrọ ka ọzọza ọ sịị̄ tụ ẹhẹ, a vị dị ọ zụ ụzọmị ene hi eyi oze ẹbẹẹba ẹnịrị ezi anị oze?

³³ Ọ́ọ́ yẹ ọda ana a sị sere ihinẹba? Ọ́ọ́ zụ mẹ ka ọda ẹnẹẹ ẹ mẹ̀ ụkọrọ ịrẹsụ ẹtẹ?

³⁴ Ọ́ọ́ zụ mẹ ọda ka eguhi ọ zụ̀ orihi?

³⁵ Ọ́ọ́ zụ mẹ ọda dị ịnyanya ọ rị?

³⁶ Ẹnẹ sị ịrẹyọyẹ tụ ọza ayị dị ọ yẹ ịsa anaa na?

³⁷ Ẹnẹ nyị ịrẹyọyẹ ana zụ sị za eguhi ịrịka, a vị dị ọ ka a ịrẹsụ hi dị enyi ọọ va hi ẹtẹ?

³⁸ Ọ̀ vavọọ zụ̀ dị enyi anị tọ edudu ẹtẹ ọyịwụ ụvụ.

³⁹ Ẹnẹyịmavara kà Ijoovu ọ wáá zụ ube yị idu nịnị ụngwẹ aa kụ̀ wa nị?

⁴⁰ Ọnị ọ wáá za uye nee tu wa ini irehi ẹnịnị nị?

⁴¹ Ọnị ọ wáá sị ịsọyịrị yị ezi ọrụ ene na owu ụngwẹ nị?