Ijoovu 37 - IWE ỌNỊNỊ

Erihu aa yịị kà ịrẹyị

¹ Ịrẹyị ọnọnị ộ rẹ mẹ ka ayị amị oo jị bii-bii; ayị amị ọ sị tụ̀ bẹẹ.

² Avaba awụ nịnị ò batọ ọngwẹ Ohomorihi nịnị, wụ́ ịrẹyị irenu anị mẹ̀ sị mẹẹ anka apaana ihinẹba avọọ.

³ Ộ rị ịnyanya ini eguhi hụrẹ eyi ẹnyị na ngụ eyi ọsa; avọọ ọ mẹ̀ rị hụrẹ aha ẹnyị na ngụ ọsa ịrẹsụ ẹtẹ nị.

⁴ Dị ọngwẹ Ohomorihi va sụ́ bụrụgụdụ, dị a wụ ọ ịrẹyị nị. Ọngwẹ anị ộ sụ́ ịrẹyị anka apaana ihinẹba avọọ ịnyanya maa rị, dị mẹ̀ wụ ọngwẹ anị ịrẹyị nị.

⁵ Óhomorihi mẹ̀ kà ịrẹyị, ịvọpa ệ mẹ. Ịsa ana mẹ ê hí ọza irenu; yẹ yị hyakụ yẹ iruvo anị.

⁶ Ộ kà a ka ata orihi ẹẹ sụụ hi ẹtẹ, di orihi ọọ zụ̀ hara-hara, di oo sì vụụ-vụụ.

⁷ Ộ za ụkọrọ ayị jẹẹ; ộ sị zụ̀ avaba aza ọnị ọ tụ ka, ọnị ộ maanị zụ mẹ.

⁸ Dị uye edivi ene hi ịnị avị zwe na tẹ̀ aha ọyịsụ ẹnịnị nị.

⁹ Opomi ộ tụ hụrẹ eyi-ụvẹtẹ, dị ahị ohunẹnẹ ana mẹ ka ahị ọọ za ọza hyo-hyo-hyo tụ hụrẹ eyi ẹbẹẹba vẹ nị.

¹⁰ Ohomorihi mẹ tụ ụhwẹ, ộ mẹ̀ ka enyi ẹ̀ za avụsụ. Ệ za avụsụ anka ịrẹta avọọ.

¹¹ Ộ mẹ ka eguhi ọ̀ vị enyeenyi, dị ịnyanya aa rị vee-vee hụụnị eguhi nị.

¹² Ẹ yaa zịịzị Óhomorihi mè sì ọ, dị ẹ yaa mẹ ịsị Ohomorihi ka ẹẹ mẹ avaba ẹhẹ nị.

¹³ Ohomorihiī zụ̀ orihi agụvị eteesu ò re enyi hú. Ọ́ rẹ zụ zụ̀ ọ ọ̀yịsị sị ụya rị yị, à vị ọ̀yịsị zụ yị ka oni ô sì ịrẹyị ayị.

¹⁴ Ijoovu, batọ dị ụ wa wụ ọsọnị; jẹẹ di u we ro ịrẹyị ụkọrọ ịtọmatapa oni Ohomorihi mẹ.

¹⁵ Wáá yẹ Ohomorihi mẹmẹ mẹ ọda, dị ịnyanya aa rịị hụụnị eguhi?

¹⁶ Wáá yẹ eguhi mẹmẹ aa da hụrẹ aha ẹnyị naa ngụ ọsa ẹbẹẹba? Ụkọrọ ịtọmatapa oni Ohomorihi mẹ ọ vị ọnọọ nị. Ohomorihi oni ịrẹyọyẹ anị gụ pooro.

¹⁷ Eyiye, ịjị ahị ịrịịra ọ̀ọ tụ hụrẹ eyi ụvẹtẹ, dị ẹngụ awụ ta ngụra tụ ịnịnẹ ẹnya oni u ku hi ẹngụ.

¹⁸ Wáá nyẹngụ tana eguhi ẹbẹẹba, anka Ohomorihi mẹ̀ mẹ, dị ụ wa mẹ̀ ẹ katẹngụ anka enyusẹ?

¹⁹ Zụ̀ yị ịsa a vọrọ ka ya kà yị Ohomorihi kẹ Ayị ayị vị osusu, ye yi re ịrẹyị kà.

²⁰ Mẹ yị vaa kà a ka mee pe Ohomorihi kụ́ ịrẹka, M méé sì ka ọ̀ wụ̀ mị nị?

²¹ Booro aanị, ọyị yà ẹbẹẹba aa za ẹtẹ ẹtẹẹtẹrẹ. Ọ màa za ẹtẹ, ọza ẹ yị zụ ha eyi tụra a re. Ahị ọ raà kụ eguhi kwooze hụrẹ ẹbẹẹba.

²² Â nyị ịsị aa za ẹtẹ anka igooru avọọ hụrẹ eyi ẹbẹẹba; I mè re igirima Ohomorihi, angwa ô hí yi.

²³ Ochẹtẹẹngụ ộ nyị ụkata ẹnẹmẹhị ana ahịka yẹ yị hyakụ zụ ka pe e. Oze ana vọrọ ọnịrị ịzẹyịza ọ sịị mẹ ebiraa hi yi nị.

²⁴ Agụvị avọọ avaba ọzaā hị́ angwa anị nị. Aza enee vene ẹngụ ẹnịnị ka vị ẹnị yẹ ịrẹyị nị, vị oni Ohomorihi sị eyi ịyẹyẹ re.