Ijoovu 34 - IWE ỌNỊNỊ

Erihu aa yịị Kà ịrẹyị anị naa

¹ Erihu kà,

² Ẹwụnị ene rò ka waa nyị ịrẹyọyẹ batọ, ẹwụnị oneyohweyi sị̀ ụtọ pe ịrẹyị amị.

³ Ro ịrẹyị ọnị mi kà aanị anka a mẹẹ̄ zama uhine ịsa re avọọ.

⁴ Ọ sị vọ tụ́ ịnị ụvọ ayị ka ya kà ịsị ẹ vị ịzẹyịza.

⁵ Ijoovu kà ọnị ẹ yị rị ịvị ka Ohomorihi yi kẹnẹ dị ẹ yị hụrẹ ọnị ụvọ nị.

⁶ Ọ kà a ẹ yị nyị ịsị ọnị mẹ̀ dị aa hị́ ọnị onireche. A raà tọ̀ ọnị ụnava divi-divi ama ọnị ẹ yị rị ịvị.

⁷ Wáá maanị re ọza anka Ijoovu ọnọnị da? Ẹ yị sị ụbanyị yị Ohomorihi vụrụ-vụrụ.

⁸ Oo sì ịrẹyị ogu aza edivi nịnị, dị aa saasa wa zịị nị.

⁹ Ọ kà a yị nyị ọgụ ịsị ọ vị yị ọza ka ọ saasa oze Ohomorihi.

¹⁰ Wụ́ ịrẹyị amị ẹwụ nịnị ọyẹrẹyị, ọchọnọyịrẹsụ Ohomorihi Ochẹtẹẹngụ ọ yị mā mẹ ọhịmị.

¹¹ Ịsa ọnị ọzọza mẹ̀, o vee si si ọ atọ nị.

¹² Ịzẹyịza Ohomorihi ẹ yị mā mẹ rị ịrẹyị ọhịmị. Ochẹtẹẹngụ ọ yị mā mẹ̀ ọkarẹyị ọ mẹ vọrọ tụra.

¹³ Ẹnẹ ka ọnị ọ sị ụkata yị Ohomorihi nị? Ẹnẹ kà ọnị ọ sị Ohomorihi ka ọ̀ sị eyi pe ẹhẹ nị?

¹⁴ Ohomorihi ọ̀ọ dọ ụhwẹ anị varẹma, avaba ayị vị ene su, dị ẹ varẹma nọ ịnị eteesu.

¹⁵ Avaba aza ana yara vee ene su, dị o vara ezi ini eteesu.

¹⁶ Booro aanị, wàa yẹ ịrẹyị si ụtọ pe ẹtẹ.

¹⁷ Ụ wáá jị ịvị yị Ohomorihi ana vị ọnịrẹyịzẹyịza nị? U wéé rò ka ọ nyị ịhyẹrẹ ịzẹyịza nị?

¹⁸ Ohomorihi oō jị ịvị yị ohinọyị ọnịrị ọdọvịdị nịnị ana a mẹ̀ ebira odivi nị.

¹⁹ Ọ yị jẹẹ pe ọdọvịdị nịnị, a vị dị ọ̀ re opisa huu onosiye agụvị ka ọnị ọ tụ̀ avaba ẹnịnị vẹ ẹhẹ nị.

²⁰ Aza ẹnyị vene su asigiri ịrahụ, Ohomorihi ô vu wa ẹtẹ dị ẹ ta hi ẹtẹ. Ẹngwọọrọ-ẹngwọọrọ ọ sị wụ̀ ọnụkata ẹnịnị nị.

²¹ Ẹnẹyịmavara e re avaba ahụ ọnị yee hu.

²² Ẹ yị nyị ịrahụ me hozi, ana nyẹngụ sị ọnịvị tẹ̀ yị Ohomorihi.

²³ Ẹ yị nyị ka ọ jị ụmẹ ọnị i ee si ne tù ọ dị ọ mẹ̀ ọkarẹyị yị yị.

²⁴ Ẹ yị nyị ka Ohomorihi o si iruvo, dị ọ jị ọdọvịdị nịnị, dị ọ kụ́ aza hi udi ẹnịnị.

²⁵ Agụvị ka ọ yẹ ịsị ẹ yaa mẹ̀. Ọnị aa hụrẹ wa hi ẹtẹ, di o vu wa ẹtẹ ịrahụ.

²⁶ Agụvị ebira odivi ẹnịnị, Ohomorihi vaa sị ụya rị wa eyi avaba aza ka ee re e nị.

²⁷ Ẹnịnị é yi ka ẹnị ẹ yị saasa a, dị ẹ si eyi wụ̀ avaba ọda anị nị.

²⁸ Ẹnịnị ệ sị ụkata-ụkata za onosiye ka ẹ nowu na za Ohomorihi, dị ọ wụ́ owu ẹnịnị nị.

²⁹ Ohomorihi ọ̀ọ ka ẹ yị nyị ịsị ọnị a mẹ̀ vụrụ-vụrụ. Ẹnẹ hwọ jị ịvị yọ? Ọ̀ọ ka ọnị aa sị̀ eyi tẹ̀, ẹ yị nyị ịsị ị zụ mẹ

³⁰ Ẹ yị nyị ịsị anẹkụra nịnị zụ mẹ̀, dị ẹ zụ za aza ọhịmị ana chamayị yị wa jẹẹ ka asị ẹ mẹ̀ ịjọva tụra wa ịrẹsụ.

³¹ Ijoovu, wáá ra dọ irenu ịvị awụ yị Ohomorihi, di u we wo oto ka wẹ yị vana mẹ̀ ịvị.

³² Wáá ra họ̀ Ohomorihi ka ọ sị zụ́ wụ ịzị ụ ya ee nyeeyi? Wáá sị dọ ka wa hụụnị ebira odivi.

³³ Ịrẹma ọnị wẹ yị dọ beri Ohomorihi, wéé zụ zị ọ ka ọ mẹ̀ ịsị wee sì yị wụ. Ẹwụ ụvọta ọ nyị ịsị wa mẹ̀, Erihu kà ọnị ẹ yị zụ́ mẹ̀ yọ.

³⁴ Ọza anaā yẹ ịrẹyị vaa dọ: Ọyẹrẹyị ana wụ́ mị ịrẹyị vaa kà a ka

³⁵ Ijoovu vị ana aa kà eyogu, ẹ yị nyị ịrẹyị ana nyị ịrẹyọyẹ.

³⁶ Wee rò avaba ịsa ọnị Ijoovu kà, u vee re ka aa kà ịrẹyị anka ọza ọhịmị avọọ nị.

³⁷ Akamawụ vị ọnị ọ sị beri ịvị anị. Eyi ayị ọ yaa du Ohomorihi.