Ijoovu 33 - IWE ỌNỊNỊ

Erihu ộ tụ́ Ijoovu ohuvọ Erihu

¹ Erihu kà a Ijoovu o si ụtọ pe ẹtẹ dị ọ wụ ịsị ọnị vaa ka yọ.

² Ọ kà ọnị o tenyi ẹngụ ka ọnị à ka ịsị ẹ́ ya ọnị ayị.

³ Ayị ọnyara ọnị aa sị ka avaba ịrẹyị anị nị. Ịzẹyịza ọnị vaa ka nị.

⁴ Ohomorihi ọ nyị ụkata ọnị ọ sị mẹ̀ ọnị nị. Ọnị ọ sị ụhwẹ yị ọnị nị.

⁵ Erihu ka Ijoovu o tenyi ẹngụ anị dị ọ tụ́ ohi ịrẹyị anị ọ̀ọ nyị ohi.

⁶ Ọ kà ọnịrị Ijoovu vị ọnyọọnya ọvịdị Ohomorihi. Ụvụ a sị mẹ̀ ẹnị nị.

⁷ Asị Ijoovu oo hí angwa anị. Ọnị ẹ yị vaa mẹ̀ ẹvayaa yọ.

⁸ Ọ kà ọnị ộ wụ Ijoovu maa ka a ka

⁹ Ọnị ọ yị rị ịvị. Ẹ yị nyị ebira odivi ọnị ọnị mẹ̀. Ayị anị ọ nị.

¹⁰ Ama Ohomorihi ee sì oze ọnị ọ́ va zịị va eyi ịrazị ka ọnị. Dị ọ mẹ̀ ọnị ọnịvị anị nị.

¹¹ Ộ kụ́ ịchẹkẹchẹkẹ hi ọnị ahụ dị ọ sị eyi pe oze ọnị ọnị aa zị nị.

¹² Erihu ka Ijoovu o si eyi nye, agụvị ka Ohomorihi ẹ yị vị ẹyị ọzarẹyịrẹsụ

¹³ Sị ẹ vẹ dị a kụ̀ụ hịrẹ Ohomorihi dị ọ ka e yi be ọnị atọ?

¹⁴ Ohomorihi aa ka ịrẹyị ịnị oze irenyi-irenyi ama ẹyị ẹ rẹẹ batọ nị.

¹⁵ Ịrahụ vị ana ka ịrẹyị ịnị ụra ọnịrị ịnị etore irenyi-irenyi.

¹⁶ Ọ̀ọ mẹ̀ ka ẹ wụ́ ịrẹyị anị, dị ọ̀ ka wa ọnọ ene chire wa angwa nị.

¹⁷ Ohomorihi vị anaa vavọọ ka a agụvị e ro ịnẹ hụụnị ebira odivi ẹnịnị, dị asị ẹ rẹ sị ẹngụ tụ ẹba.

¹⁸ Ohomorihi e yi si ka ẹnịnị e vú ẹtẹ, dị ọ dọ wa ha hụrẹ ụvọ isu nị.

¹⁹ Ọ zụ sị ụkụ sị ụya rị wa tụ ịrẹsụ ode, dị ẹngụ vavọọ aa zị wa na ngụ ịnị ẹchụkụ.

²⁰ Dị ịsọyịrị ọ yị zee wa eyi, dị ịsa ene sì ịrẹyị anị hu kụkụ ee gu wa ahẹrẹ.

²¹ Dị ẹ kwọrọ na za agịga, dị ẹchụkụ ẹnịnị hi ẹhẹ gaaga.

²² Ịjọnọọ ẹ yaa gụrị ụsị ẹnịnị na, ẹnịrị ịda aneku ẹ yị kụkụ noze rịrị ẹngụ.

²³ Ama àa nyị ọnya ịnị ẹnị anggẹẹrị akahị ana va dọ ụyụvọ anị, dị ọ̀ kà a ka ọ yị rị ịvị,

²⁴ Ohomorihi vaa vayị ẹngụ ọza ọnọọ, dị ọ kà asị a wụ agụvị ka ọnọ ó re ọza anaa dọ ụyụvọ anị.

²⁵ Dị ọchẹngụ anị vavẹ eehi anka ozwọọmụha avọọ; dị ọ nyị ụkata anka ọmụha avọọ.

²⁶ Ọ̀ọ mẹ̀ aduwa, dị Ohomorihi wụ́ aduwa anị. Dị ọ sị ayị ohine dọ ọ varẹma, dị ọ sị ọ varẹma nọ udi anị.

²⁷ Avọọ dị aa kà yị aza ka ọnị ọ mẹ̀ ịvị, dị ọnị mẹ̀ ịsị ẹ vọrọ, ama Ohomorihi ọ yị si ọnị atọ.

²⁸ Ohomorihi ọ̀ raa dọ ọnị ha ka asị ọnị su ka ọnị ọ yịị yara ọnị dị ọnị o re ẹtẹ.

²⁹ Ịzẹyịza Ohomorihi ọ maanịị mẹ avaba ịsa ọnọnịị, hi ọza, di o re tenyi ọ mẹ nị.

³⁰ Dị ọ sị dọ ọza hụrẹ isu ụvọ, dị ọ mẹ ka ayị anị oo hine ka ọnị yara.

³¹ Ijoovu batọ wa wụ́ ịrẹyị ọnị maa ka. Sị irenu awụ ku oku, wa jẹẹ ma kà ịrẹyị.

³² Ama wàa nyị ịrẹyị ọyịkà, kà a, dị ma wụ, ịrẹyị awụ ọ̀ọ vọrọ, mị vaa dọ ooho, dị ayị amị hine bẹẹ.

³³ Ẹ̀ yị vị avọọ, sị irenu awụ ku oku, dị we batọ ịrẹyị amị. Mị vaa zụ wụ ịrẹyọyẹ.