Ijoovu 3 - IWE ỌNỊNỊ

Ijoovu ộ rị angụ hi Ẹnẹyịmavara

¹ Ịrẹma ẹkụhị ịhịmba ẹnẹẹ Ijoovu ha irenu dị ọ tụ ozirenu hi ẹkụhị ana sị ma a nị.

Ijoovu

² Ọ kà,

³ Asị o zoza yị ịrahụ ọnị ọnyị anị sị dọ ịrẹẹ anị ọnịrị ẹkụhị anaa sị ma ọnị.

⁴ Ẹkụhị ọnọọ ọ vara etohozi. Asị Ohomorihi za a ịrịka vaka ẹkụhị ana vọ. Etohozi ọ za a rị.

⁵ Etohozi ruma-ruma ọnịrị eguhi o vu ọ hi ẹngụ. Ịhị ọnọọ o chire ọza angwa.

⁶ A sị ịrahụ ọnọọ hụụnị ụmẹ ene hi ịnị ịrayị. Asị a vana za ịrịka beri ẹkụhị ene hi ịnị ụhwẹ ịnị ịrayị.

⁷ Ịrahụ ọnọọ o tụ osusu. Asị a nyị ọza ene re ayohine ịhị ọnọọ.

⁸ Ọmahọ̀nọ nịnị ẹ sị ọchị ịsẹ tụ ozirenu hi ẹkụhị ọnọọ.

⁹ Asị ụhwẹ àzị̀ umeyọnị ịrahụ ọnọọ za ẹtẹ. Asị o tụra eyi ẹtohweyi eyi,

¹⁰ agụvị ka e yi ụvọ gu ọnyị anị ịhị ozi ka asị a ma ọnị va tụ ịnị ẹhẹ akanya.

¹¹ Aa yẹ ọnị ọ yaanị su tu ọnyị anị ịnẹ, a vị á mẹ ma ọnị kẹnẹ.

¹² Sị ẹ vẹ dị ọnyị anị zẹ ka ọnị ọ yara da? Sị ẹ vẹ dị ọ hyakụ ka ọnị ịrẹva kẹ?

¹³ Ọnị ọ̀ọ yaanị su a mẹ ma ọnị kẹnẹ, ọ yaanị sị rọ ọnị ẹngụ booro aanị. Ọnị yaanị aa tụ́ ụhwọ́ ini eku aanị.

¹⁴ Ọnị yaanị ne ree tu ohinọyị nịnị, ọnịrị anajuwe ẹkụra nịnị ẹnị irehi ẹnịnị sị vara eburu aanị.

¹⁵ Aza ana vịdị vi opisa ene gu igooru ọnịrị isiriva gwaa-gwaa hi ini eehi ẹnịnị.

¹⁶ Ijoovu ka sị ẹ vẹ dị ọza e yi ne ọnị anka ozi ene su tụ ọnyị anị, ene è yi re ẹhẹ vụrụ-vụrụ avọọ?

¹⁷ Usu ọ vị ẹhị ebira odivi aza edivi nị. Usu ọ rẹ ụhwọtụ yị aza ọnị ọ sị ngwẹngụ nị.

¹⁸ Anịnẹngwa ene su ẹẹ nyị ẹngwọọrọ, ẹnịnị ẹ yị kụkụ wụ́ owu ọga anịnẹngwa.

¹⁹ Usu anaā sịị opisa ọnị ọọ̄ sị ọnụzọngwa nị. Usu ọọ̄ dọ ọrịhị ha hụụnị ụvọ ọga anị nị.

²⁰ Ijoovu ka sị ẹ vẹ dị Ohomorihi navọ ọnị tụ ịnị ẹhẹ ụyụya dị ẹ yị dọ ọnị ụhwẹ?

²¹ Ọnị o si usu hụụnị ọza ene e si ẹkẹhị ọnị e yi re.

²² Ẹ yị nyị ịsị nẹngụ hine ọnị ayị hụụnị ka ọnị o su.

²³ Sị ẹ vẹ dị Ohomorihi navọ ọnị tụ ẹhẹ ẹnẹ ẹ yị nyị ịrẹma, dị ahịka ayodu kẹnẹ ọnị ee re nị.

²⁴ Ijoovu ka ọnịrị orere ọ vị pooro nị, ọnị ẹ yị zụ rị ịsa.

²⁵ Ịsa ọnị ee hí angwa anị ọ ngụ tu ọnị aanị nị.

²⁶ Ọnị ẹ yị nyị ẹngwọọrọ, ọnị ẹ yị nyị ayọnẹtẹ. Ọnịrị akanya-akanya pooro kẹnẹ yọ nị.