Ijoovu 29 - IWE ỌNỊNỊ

Ịrẹyị ọdịrẹma ọnị Ijoovu kà Ijoovu kà

¹ Dị Ijoovu rẹ nyima aa ka ịrẹyị, dị ọ ka;

² Aa yẹ Ohomorihi ọ va ọnị na udi anị ịyẹẹyẹ ịnị ọnị ọ sị tẹsị anị.

³ Ohomorihi vana ya pe ọnị ịjọnọọ dị ọ vị ẹtohweyi ọnị ọnị a sị zị ụsẹ ịnị ịrahụ nị.

⁴ Ịjọnọọ vị ọnị ọnị jẹẹ, dị ọnịrị Ohomorihi zee, dị ọ vị aha yị irehi anị.

⁵ Ụmẹ ọnọọ Ohomorihi Ochẹtẹẹngụ jẹẹ ọnị ịrẹma, dị avaba anị ezi ya ịzọọ nị.

⁶ Dị ịrẹva imaaru ọnịrị ẹvụ anị aa va hyọrọ-hyọrọ, dị ọchị orivi anị ene hi ini ataba aa mẹ ẹtẹẹrẹ nị.

⁷ Azọkụ ẹkụra ẹ̀ẹ dị ọnị rẹ ya aha anị ịnị akakana ẹnịnị.

⁸ Dị ezwọọmụha sị oze tịtẹ ọnị àa vẹ, dị azọkụ kwẹẹtẹ sị ụbanyị yị ọnị.

⁹ Dị ọdọvịdị ẹkụra nịnị za ịrẹyị ẹnịnị jẹẹ.

¹⁰ Dị aza ọkọọka sị irenu ku oku ee zi ọnị.

¹¹ Ọza tụra ọza ene re ọnị a vị dị ọ wụ́ ịrẹyị anị vị anaa ka ọyịza anị.

¹² Ọnị ọ gụ onosiye nịnị ene na owu va za ọnị. Avọọ ọnị mẹ rẹ mẹ ọgụvọ yị ezi-oku nịnị ẹnẹ ẹ yị nyị ọnọgụvọ nị.

¹³ Ọgụvọ ọnị ọnị mẹ̀ ọ mẹ ka aza ana yaanị vu ẹ̀ ga ọnị, dị ayị osoku nini è hine.

¹⁴ Ebira ọyịza vị ọnị ọnị sị mẹ achị ku ẹngụ, dị ọnị sị ịzẹyịza mẹ awuru ọnịrị ubobo anị nị.

¹⁵ Ijoovu ka ọnị vị eyi yị ogweyi, dị ọnị rẹ vị ahụ yị oswahụ nị.

¹⁶ Ọnị ọ vị ada yị aza ẹnẹẹ yị nyị, dị ọnị aa dọ ịrẹvụ ọzọga vụ nị.

¹⁷ Ọnị aa tụ aza edivi ọkụmị agụvị dị ẹ hụrẹ aza ana ngụ wa ụvọ.

¹⁸ Ọnị o ro ka ọnị vaa ra ẹhẹ anị gọdọ, dị o su ini eehi awụ nị.

¹⁹ Ọnị sị mẹẹ anka ọchị ọnị ẹpa anị ee re enyi hu, di eguhi ee chire ku ávọ́ anị avọọ nị.

²⁰ Aza vị anaa sị ụbanyị yị ọnị pooro, dị ụkata anị aa hịrẹ ụna eyinị-eyinị.

²¹ Aza vị anaā jẹẹ dị ẹ wụ́ ịrẹyị anị, di e ku irenu ka ẹnị ẹ wụ ajuwe anị.

²² Nyị ọza ana kụkụ aa ha irenu ọ́ sị ịrẹyị ka. Ịrẹyị anị vị anaa ngụ wa ẹngụ anka ẹtẹ ọyịwụ mee hu eguhi ene chire avọọ.

²³ E yee zi ọ anka ọza ee zi orihi eyi avọọ nị; E hi ụvọ ee zi ịrẹyị anị anka ọza ene zi orihi ị̀rẹ̀sụ̀ eyi avọọ nị

²⁴ O nyinyi hi wa kẹnẹ dị ayị ẹnịnị nẹtẹ. Eyi anị ọ nẹtẹ tu wa dị ẹ nyị ọtụtụrụma jẹẹ.

²⁵ Ọnị a ka yị wa ịsị a vọrọ ka ẹ mẹ, dị ọ vị ohinọyị tụra ịrẹsụ nị. Ọnị vị ohi avaba ọkụrẹkụ anị nị. Ọnị aa sị ayị aza ana va ẹngụ hi nẹtẹ nị.