Ijoovu 28 - IWE ỌNỊNỊ

Ahẹ ana a sị ga ịrẹyọyẹ

¹ Igooru ọnịrị isiriva vị anaā ba hụụnị ẹtẹ dị a vaa sị ịra nyịna a;

² avọọ a mẹ rẹ mẹ enyusẹ ọnịrị ịkọpa nị.

³ Anụkọrọ anaā ba enyusẹ ẹnẹnị vị ana aā sị ịrakotupa ngụ ịnịnẹ ịnị etohozi ruma-ruma nee si wa.

⁴ Dị ẹ chị ụsị ọgọdọ tụ uruvo ẹtẹ ene noze hi ịzị aza ẹ yị ra hi. Dị ẹ vị ẹnị ịnya gẹ ịnị obo aa mẹ̀ ụkọrọ ịzọọ.

⁵ Uruvo ẹtẹ anaā kụ ịrụkụ ịsọyịrị tụ́ a ka ịra tụ́ anaa sị chaka ịrẹta enyusẹ ẹnẹnị nị.

⁶ Ịnị ịrẹta ẹnẹnị a nyị ịsahwaya, di edudu anị nyị igooru,

⁷ nyị ukokoro ana yẹ oze uruvo ẹtẹ ọnọọ. Ẹ yị nyị ụba ene hira nọ ịzọọ da.

⁸ Nyị uye ịnị avị a vị idu ana zị oze ọnọọ re da.

⁹ Dị aza ana ba enyusẹ ẹnẹẹ chị ịrẹta ana katẹngụ hu. Dị ẹ chị ataba na ngụ ụvẹtẹ-ụvẹtẹ uruvo anị.

¹⁰ Dị ẹ tụ́ oze irenyi-irenyi hi ini akakana ịrẹta, di eyi ẹnịnị e re ogu akàaka.

¹¹ Dị ẹ ba ịrẹta ne re iruku ogu ana tẹ ịzọọ, dị ẹ kụ wa tụ́ ẹhẹ.

¹² Ama ịzị a zụ re ịrẹyọyẹ hụrẹ kẹ? Ịzị ị zụ kọsẹ dị ị yaa yẹ?

¹³ Ẹ́ yị nyị ọza ana yẹ ịrẹyọyẹ mẹmẹ nyị ụbanyị. Ẹ́ yị vị ịsa enee zụ re hụụnị ụvọ ẹyị ọza ọ vị.

¹⁴ Ọza ẹ yị zụ re e hụụ ịzị ẹ nyịnẹ ini òkū.

¹⁵ Ọza ẹ yị nẹngụ sị igooru a vị isiriva hị́ ọ.

¹⁶ Igooru ozoza ọnịrị ọmọ, a vị ịsahwaya ẹ́ yị da ọgụ gụrị uyi ọnị ịrẹyọyẹ nyị.

¹⁷ Ịrẹyọyẹ ọ nyị ụbanyị huna igooru ọnịrị ịrẹta ẹkẹhị-ẹkẹhị ana vọ nị.

¹⁸ Ịrẹyọyẹ ọ nyị uyi hụụnị ịrẹta ẹkẹhị-ẹkẹhị ana aā hị́ ikora, ijasipa ọnyọọnyị nị.

¹⁹ Ọza ẹ yị zụ sị igooru ene zoza hu ọnịrị ẹkẹhị Anetiyopiya mọ̄ ụbanyị ịrẹyọyẹ re.

²⁰ Ijoovu ka, ịzị ịrẹyọyẹ hụrẹ ẹ vẹ? Ịzị a zụ ya kọsẹ anị dị à yẹ ẹ?

²¹ Ohomorihi sị ọ tẹ̀ ka asị ọza ọnịrị inomi re e nị.

²² Iswọọza ọnịrị ịsị e du ịsa ka ẹnị ệ wụ ọ akaaka ịzị ẹ zụ ya re ịrẹyọyẹ.

²³ Ohomorihi kẹnẹ ọ yẹ ịzị ọza zụ re e nị.

²⁴ Ka ọnị ee re avaba ịsavịsavị ene hi ịrẹsụ ẹtẹ ọnịrị uruvo ihinẹba nị.

²⁵ Ohomorihi ọ sị ẹhụ ụkata ahị yọ, dị ọ mẹ ẹhụ ụrụrụ enyi yọ nị.

²⁶ Ọnị mẹ a mẹ vọrọ ka orihi ọọ zụ ọnịrị oze ọnị ịnyanya a sị rị nị.

²⁷ Ịjị ọ maanị sị wa mẹ, di o re e, dị ọ ka a, dị ọ sị ọ hi ẹtẹ, dị ọ zama re e nị.

²⁸ Dị Ohomorihi ka yị ọza ka: ịzẹyịza, ọza ọ̀ nyị angwahi anị ọ vị ịrẹyọyẹ nị. Ọza ana va hụụnị ebira odivi ọ yẹ ịsa aa mẹ nị.