Ijoovu 24 - IWE ỌNỊNỊ

Ijoovu aa yịị kà ịrẹyị naa

¹ Ijoovu ka sị ẹ vẹ dị Ohomorihi Ochẹtẹẹngụ ẹ yị sị ụmẹ tịtẹ ana a sị mẹ̀ ọkarẹyị, agụvị aza anaa hẹkẹ ẹ è zụ re e ka ọnịzẹyịza ọ́ vị nị?

² Aza aa vara ịrẹta anaa sị tẹ ẹhị ẹtẹ udi agụvị dị ẹtẹ ẹnịnị ọ banyị. E yee yi atẹmẹ avaka ẹnịnị.

³ Ẹ yaa dọ ezi-oku ịkẹrịkẹtẹ ọnịrị ụnọ osoku nịnị za ụta ẹnị ẹ̀ rị wa.

⁴ Ẹ yaa mẹ ẹvaya yị onosiye nịnị, dị ẹ dụ wa na tẹ̀.

⁵ Dị onosiye ẹnịrị ezi ẹnịnị e si ịsọyịrị anka ịkẹrịkẹtẹ ene si ịsọyịrị ịnị ụnọmị ịzị ẹtẹ wụ avọọ.

⁶ Ệ nọ ịnị aarẹ ọzẹnẹsa na kụ ịsa gụ, dị ẹ nọ idi aza edivi na tọ ịzaha nị.

⁷ Ka ẹnịnị ẹ yị nyị achị dị ẹ sụ ịnị ahị ahwaahụ ịrahụ.

⁸ Dị orihi ana zụ ịrẹsụ ataba horo wa ẹngụ dị ahịka ụtẹha e zwe na tẹ̀ tụ nị.

⁹ Aza edivi a za ezi-oku ọrịhị, dị ẹ kụ ezi onosiye nịnị si ụta ẹnị ẹ rị.

¹⁰ Dị a sị ụkata-ụkata za wa ka ẹ mẹ̀ ụkọrọ ahwaahụ, dị ụngwẹ aa kụ wa ịnị aarẹ.

¹¹ Di e hi ịnị ụkọ aa mẹ angwẹ orivi ọnịrị eche ịvayịnị ama dị onyi aa kụ wa nị.

¹² Aza ana tọ ụnava hi ini ẹkụra ee na owu ka à gụ ẹnị ụvọ, dị aza enee su a jị òrèrè nị, ama Ohomorihi o yi tụ wa ohi.

¹³ Aa nyị aza ẹnyị anaa mẹ akamawụ, hi ẹtohweyi, Ẹnịnị ẹ yị yẹ oze anị, ẹnịnị ẹ yị saasa a.

¹⁴ Ẹtẹ ọ sị hozi, dị ẹ yaa wụ onosiye ọnịrị ọnụzọngwa dị ẹ yi oyi.

¹⁵ Ọsẹrẹka vene zi ka ẹtẹ o hozi, dị ọ sị ịsa ku eyi anị ka asị e re ọnị.

¹⁶ Ịrahụ dị oyi nịnị aa chaka irehi ne yi oyi, ama dị ẹ tẹ ọọdụ.

¹⁷ Ịrahụ o zee wa eyi huu ọọdụ agụvị ka ẹnịrị angwa ịrahụ vị ọta.

¹⁸ Ohomorihi vene vee hì aza ọhịmị kwooze anka ahụhụ ịrẹsụ enyi avọọ. Aarẹ ọnịrị ụbazị vị ọnị ozirenu vaa za di ẹ zụ mẹ̀ ịsa.

¹⁹ Ẹtọngụra mee tura enyi hụụ ẹtẹ, avọọ uswọọza mẹ va kụ aza ọhịmị nị.

²⁰ Dị ayị ẹnịnị hii, dị ụkata ẹnịnị taa, dị ụpẹngụ ẹnịnị ee hine idegu ọyịrị.

²¹ Avọọ e me ve re nị agụvị ka ẹnịnị ẹ yị vayị yị osoku ọnịrị ọbọrị nịnị.

²² Ohomorihi vaa sị ụkata anị vu wa ẹtẹ, èe ro ka ẹnị aa mẹ ẹtẹẹrẹ.

²³ Ohomorihi ọ zụ sere wa ama ọ nyayịnẹ sị eyi pe wa ụmẹ tụra ụmẹ nị.

²⁴ Ụmẹ chee o zee yị aza edivi, dị ẹ su anka avị ohwoohu ana wara avọọ nị.

²⁵ Ẹnẹ zụ kụ hi ireche ka ẹ yị vavọọ ẹhẹ aza edivi mẹẹ̄ ya?