Ijoovu 20 - IWE ỌNỊNỊ

Ụpọhụva ọnị Izohwa pe Ijoovu kà ịrẹyị Izohwa aa kà ịrẹyị

¹ Izohwa ana vi Aninaama ka,

² Ayị anị o si du. Ọnị ẹ yị zụ za ka ọnị ẹ sị ohi yị Ijoovu.

³ Ọ kà, ụhụ kẹnẹ Ijoovu aa kụ nị. Ama ọnị ọ yẹ ohi ọnị ọnị vaa sị yọ.

⁴ Izohwa ka, aanịka Ijoovu ọ yị yẹ ka hụrẹ ụmọrụmọ,

⁵ Ịrajẹ aza edivi ọ mā nọ oruva. Ayohine ẹnịnị vị ụmẹ chee aanị.

⁶ Ọ hyakụ na ka ihinẹba dị ọ sị ịrẹsụ ka eguhi nị,

⁷ Vị ahị vaa kụ ọ anka edudu avọọ nị. Dị aza ana vịdị yẹ wa kụkụ aa họ̀ ka ịzị e hi.

⁸ Ẹhẹ ọza edivi vị anaa ta anka ọza o rere ra ụra avọọ. Dị ọ sụ ahị anka ẹtẹ ọnị ọza re ịrahụ avọọ.

⁹ Eyi ene vịdị re wa, é me vene re wa.

¹⁰ Ezi ẹnịnị vee si ụta ịsị ọnị ada ẹnịnị dọ onosiye nịnị.

¹¹ Ịzẹyịza, aza edivi vị ene vee su ịjị ẹhẹ ẹnịnị ọ ta jẹ, dị a sị wa vọnọ-vọnọ ne chire ẹtẹ, dị ọ vara edudu.

¹² Ebira odivi vị eneē hine wa anka isuga mee hine ịnị irenu ọza avọọ.

¹³ Vị ẹ́ sịị̄ tụ irenu dị ẹ tangwa aa hịhị ọ nị.

¹⁴ Ịjị o tu wa ịnẹ, dị ọ nyị ịrẹyị anka ẹchịpa.

¹⁵ Aza Odivi vị ana va hẹrẹ ogu ọza ene e yi.

¹⁶ Ịsa aza edivi rị sị mẹẹ anka ọza o hu ẹchịpa avọọ nị. Ẹchịpa ọnọọ a wụ̀ wa anka ẹwụ ana hị́ ibe o rere mẹ ọza avọọ nị.

¹⁷ Ẹnịnị e yi vee hú enyi ọyịza ọnị Ohomorihi da yị wa.

¹⁸ Ẹnịnị ẹ yị vaa rị ọgụ ụkọrọ ẹnẹ ka ẹhị mi tụra ịrẹsụ,

¹⁹ agụvị ka ẹ mẹ onosiye nịnị rị, dị ẹ dọ wa irehi mẹ ẹnịnị nị.

²⁰ Avaba ịsa ẹẹ họ́họ̀ha anị nị.

²¹ Ẹnịnị ẹ mā rị ịsa vọ ẹtẹ. Agụvị avọọ avaba ogu ọnị ẹ̀ẹ nyị vị ana ta hi wa ụvọ.

²² Obono tu dị ẹ̀ nyị ịsa, ayodu ọ ka wa vẹ.

²³ Navọ wa ẹ rị ịsa o me zee wa eyi, dị Ohomorihi ọ va sị ọyịkụ-ọyịkụ pa ịva yị wa.

²⁴ Ẹnịnị èee zwe ka asị ọpa che ẹnị dị ọha sụ wa.

²⁵ Dị ọ ka iruvu na jịnẹ ịrẹma, dị ayị kụkụ aa hụrẹ wa ịnẹ.

²⁶ Avaba ogu ẹnẹ kụ tẹ du ha. Dị Ohomorihi ọnị ụvọta anị rị ogu ẹnẹẹ ọnịrị aza anị ịra va ha.

²⁷ Ihinẹba vaa kụ uruvo ẹnịnị hi ẹhẹ, di ẹtẹ dọ ivenu ebira odivi ẹnịnị.

²⁸ Avaba ogu ẹnịnị vana vaa vú ẹtẹ ịjị Ohomorihi aa kụ ayị hi wa.

²⁹ Ịsị Ohomorihi ka ọnị vaa mẹ aza edivi yị.