Ijoovu 15 - IWE ỌNỊNỊ

Ụpọhụva ọnị Erihwazi pe Ijoovu kà ịrẹyị Erihwazi

¹ Erihwazi ana vị Anitema ộ varẹma sị ohi yị Ijoovu.

² Ộ ka ọza ana yẹ ịrẹyị ọ̀ mā ka kẹnẹ-kẹnẹ.

³ Nyị ọza ana yẹ ịrẹyị ana kụ́ ẹngụ ịrẹka anị ọnọnị, dị ọọ nyị ahankata tụ ịnị osusu.

⁴ Ộ ka ịrẹka ọnị Ijoovu aa kụ́ ọọ hụụ mẹ ka asị ọza hí angwa Ohomorihi, dị o vee ro ịrẹyị anị.

⁵ Ịrẹyị irenu anị aa sị ebira odivi anị zụ. Vị a sẹ̀ ịrẹkarenu da ọbọ dọ ẹngụ anị tụ kẹnẹ nị.

⁶ Ẹ yị kụkụ nyị ka ọnị ọ jị ịvị yọ. Irenu anị ọ raa jị ịvị yọ da.

⁷ Erihwazi ka Ijoovu ọ́ọ́ vị ọnịpaapa ọnị Ohomorihi tụ́ nị? Aanị ka eyi anị Ohomorihi mẹ ataba nị?

⁸ Ọ́ọ́ wụ Ohomorihi mẹmẹ mẹ̀ eto ẹhẹ nị, a vị o ro ka ọnịnya kẹnẹ ọ yẹ ịrẹyị nị?

⁹ Ẹ yị nyị ịsa ọ yẹ ọnị ẹnị ana vọ ẹ yị yẹ.

¹⁰ Azọkụ ene nyị ẹwa ana vịra huu ada Ijoovu ẹ kọ ẹnị ịrẹyọyẹ nị.

¹¹ Ịrẹyị Ohomorihi ẹ́ẹ́ hụụ ọ sị ayị anị nẹtẹẹ, aa hyakụ vị ọnị ị sị ụmẹnụmẹnẹ ka yọ aanị?

¹² Sị ẹ vẹ dị ọ maanị vaa kụ ayị dị eyi anị aa jị ịra?

¹³ Ọ kà Ijoovu aa kụ ayị hi Ohomorihi dị ọ raa ka chire e nị.

¹⁴ Ẹnẹ ka ọnị ọ nị ọvịdị Ohomorihi? Ẹnẹ ka ọnị aa mẹ̀ ịsa ana vọrọ?

¹⁵ Ohomorihi ẹ yị hyakụ sị ayị tụra anggẹẹrị nịnị. Ẹnịnị ẹ yị nị eyi anị.

¹⁶ Ẹnẹ va vị ẹyị ọza ana sị vụ dị ị sị du ha. Ẹyị anaa mẹ̀ ebira odivi pooro anka ọza mee hú enyi avọọ.

¹⁷ Ọ kà Ijoovu o batọ dị ọnị ọ ka yọ ịsa ọnị ọnị yẹ.

¹⁸ Ịrẹyọyẹ ọnọnị vị ana hụụnị ụvọ ohiku ịrẹma-ịrẹma vẹ.

¹⁹ Ịnị ụmẹ ohiku ẹnẹẹ, ẹ́ yị nyị azọga ana ra vahụra wa ịnị ẹtẹ ẹnịnị.

²⁰ Ohomorihi vị anaa vaa sị ụya rị aza ọhịmị ịnị avaba ẹhẹ ẹnịnị.

²¹ Ịrẹyị odivi ana vaa kụ́ ayịhụrịnẹ tu wa ẹ vaa wụ̀ pooro nị. Anako vana vaa ngụ tu wa ịnị ụmẹ ọnị ẹngụ ẹnịnị ọ ka ọnị o hi ahị.

²² Ẹnịnị ẹ yị vaa ha hụụnị ụya. Aza vị anaa sị ụhwọ rị ụvọ e zi ka ẹnị ẹ sị wụ̀ wa.

²³ É vee si ịsọyịrị ngụ avaba aha zịịzị pooro di ịrahụ za wa nị.

²⁴ Anka ohinọyị ana nyị ụkata anaa va nọ ịrẹkụ, avọọ ẹngụkata odivi me vee tù wa nị.

²⁵ Ọ vavọọ vee tu wa agụvị ka ẹnịnị ệ kà chire Ohomorihi Ochẹtẹẹngụ.

²⁶ Ệ kụ ẹnya ịrẹkụ ẹnịnị rị ụvọ, dị e zwe echeechi aa nọ ịrẹkụ anị nị.

²⁷ Ẹnịnị ẹ̀ẹ daka banyị dị ẹ nyị ogu nị,

²⁸ ẹkụra ẹnịnị vị ọnịvị ẹnịnị vee du, dị jị irehi ẹnịnị eburu.

²⁹ Avaba ogu ẹnẹ nyị vana vaa ta, dị ẹ tụ avosusu.

³⁰ Ẹnịnị vene vee su. Ẹ vaa sị mẹ anka ọchị ọnị ịra rị avaba avọ anị avọọ nị.

³¹ Èe ro ka a nyị ịsa ẹnị vị, ẹ vaa hyẹdụ nị. Ụtẹ aa za ịrẹsụ nị.

³² Ẹ vaa sị mẹẹ anka avọ́ ọchị ana wụ dị ụmẹ anị vee tu avọọ nị.

³³ Dị avaba ẹtụtụ anị wọrọ va ha anka ẹbazị ọchị ịvayịnị mẹẹ banyị hi ẹtẹ avọọ. Ọ rẹ sị mẹẹ anka ọchị orivi ana wọrọ ododo anị ha avọọ nị.

³⁴ Ịzẹyịza, ịpa aza edivi vị ene vee vú ẹtẹ, dị ịra rị irehi ẹnị ẹ sị ẹkẹhị amẹrị da.

³⁵ Ka aro vị odivi, di ahịka odivi kẹnẹ ẹ ya mẹ nị. Ayị ẹnịnị vene hi yị evene.