Ijoovu 14 - IWE ỌNỊNỊ

Ijoovu aa yịị kà ịrẹyị naa

¹ Ẹhẹ ọnị ọza vẹ ẹ yị nyị ọ ya, dị ọ rẹ vị ọnịrị akanya-akanya kẹnẹ nị.

² Ẹhẹ ẹyị ọza sị mẹ anka ododo ene e yi me ku di o su avọọ nị. Ọ ya viiri anka ụ̀mọ̀mọ́ ọza avọọ nị.

³ Ẹngụ ọza ọnọnị ọ́ọ́ rụra hị́ ịrẹyị anị ịrẹyị, dị Ohomorihi ọ hyakụ hị́ vẹ ịnị ọkarẹyị?

⁴ Ẹnẹ zụ sị ịsa ana nị hụụnị ẹvụvụ? Ẹ yị nyị.

⁵ Avaba ẹkụhị ẹhẹ ọza vị ọnị Ohomorihi mẹ eto anị tịtẹ. Ọ yẹ ụhwẹ anị ya. Ịhị ẹkụhị ọọ gụ ẹ yị nyị ka ọ vara.

⁶ Avọọ Ohomorihi ọ navọ aza dị ẹ̀ hine ayị ịnị ụkọrọ ọnị ẹ ya ka ẹhị mi pooro kẹnẹ.

⁷ A zụ tụra ugugu ọchị ana ma eyi. Ẹyịyara ọ zụ varẹma vaa hara kwẹẹtẹ.

⁸ Ẹpa anị ọ̀ọ daka bo, dị ugugu anị su nị,

⁹ enyi o tu ọ ẹngụ aa ha anka avị ohwoohu avọọ nị.

¹⁰ Ama ọza òọ su, anị ọ ta hụụnị ẹhẹ. Ịzị aza ene su vana daka hi?

¹¹ Usu ọ̀ọ sị ọza ọ mā ha kwẹẹtẹ anka enyi ini irehu ana wụ dị ẹ yị kụkụ sì avọọ nị.

¹² Avọọ ọza ene su ọ yị mẹ vaa ha kwẹẹtẹ pooro dị ẹhẹ kara ụpa nị. Ọ yị ma vana ha hụụnị ara anị.

¹³ Ijoovu ka aa yẹ Ohomorihi ọ sị ọnị na tẹ̀ ịdaneku, ịjị ayị anị ọ sị nẹtẹ, dị ọ vaa tamayị anị.

¹⁴ Aza òo su ọ́ọ́ vaa ịrẹma vẹ ịnị ẹhẹ? Aa vị avọọ yọ nị, ọnị aa jẹẹ zi ụmẹ ozoza ọnị akanya vaa sị ta.

¹⁵ Ịjọnọọ Ohomorihi vaa hị́ ọnị dị ọnị tụ ọ ohi. Ụmẹ ọnọọ ayị anị vee hine tu ọnị ọnị sị ụvọta anị mẹ.

¹⁶ Dị ọ sị eyi hụụnị ịvị ọnị ọnị mẹ̀, dị ọ sị eyi pe avaba ahụ ọnị ọnị ee hụ.

¹⁷ Ohomorihi rẹ vaa jị eyi vee hụụnị ịnị avaba ebira odivi ọnị ọnị mẹ. Dị ọ nyịna wa kwooze saka-saka.

¹⁸ Ama ịnị ẹhẹ, ataba nịnị vee zina, dị ịda zina hụrẹ udi ẹnịnị,

¹⁹ dị enyi chị ịdị, dị orihi ọbanyị nyịna ezi na va ha. Dị Ohomorihi du avaba ịsa ọnị ẹyị ọza tụra eyi.

²⁰ Ka Ohomorihi o huuna ẹyị ọza, dị ọ vara ọza eyi dị ọ sị ọ nọ iroo dị anị ta saka-saka.

²¹ Ọza ọnị anị ta ọ́ mā yẹ ịsị enee tu ezi anị, ọ̀ọ vị ụga a vị ụhị.

²² Ọyịnẹngụ ọzọza aa chị ọ rị ene ree du ọ ayị nị.