Ijoovu 13 - IWE ỌNỊNỊ

Ijoovu aa yịị kà ịrẹyị naa

¹ Ijoovu ka ọnị ộ vịdị sị ọ re avaba ịsị ọta anị nịnị aa kà aanị. Ọnị ộ raa wụ ọ, dị ọnị rẹ yẹẹ nị.

² Ọnị ộ yẹ avaba ịsị ẹnịnị yẹ. Ẹ́ yị nyị ịsị ẹ sị huna ọnị.

³ Ama Ohomorihi Ochẹtẹẹngụ ọnị ee si ka ọnị ọ̀ kà ịrẹyị ẹngụ anị zụ nị.

⁴ Àa vị ẹwụ nịnị yọ, ireche oni wee che nini, ẹ́ yị zẹẹ ka á yẹ ka ẹ̀ yị nyị ịsị u yẹ nịnị. Vị́ ụ sị mẹẹ nịnị anka ọmahọnọ ẹnẹ ẹ̀ yị zụ mẹ ọza ụkụ avọọ nị.

⁵ Aa yẹ asị ẹnịnị kà ịrẹyị vụrụ-vụrụ. Aza yaanị da ro ka ẹ yẹ ịrẹyị.

⁶ Ijoovu ka, ẹ̀ sị ụtọ pe ẹtẹ dị ọnị ọ̀ kụ irenu anị zụ wa.

⁷ Sị ẹ vị dị ẹ ya hụ agụvị Ohomorihi mẹ̀ apẹ, dị yee cheeche aanị?

⁸ Vị ẹnịnị wáá nyị Ohomorihii iyi nị? Vị ẹ́ẹ́ zụ dọ irenu anịị kụ yọ nị?

⁹ Ohomorihi ọ̀ọ zama wa re ẹtẹẹtẹrẹ, óó vee rẹ́ ka ịsị ẹ yaa mẹ oo zoza? Éé ro ka ẹnị ẹ zụ vene e anka e mee vene aza kẹnẹ avọọ nị?

¹⁰ Ẹ̀ẹ daka were-were mẹ irikiti Ohomorihi vaa tụ́ wa ohuvọ.

¹¹ Aa vọrọ ka ee hí angwa Ohomorihi agụvị ụkata anị ọnịrị ịzị ọ ụbanyị ne tù.

¹² Ijoovu ka ụhịrẹyị ọnị eyee che vị ana sị mẹẹ anka atịtọ ẹnẹ ẹ̀ yị nyị ịsị ọ wụra mẹ avọọ. Ahankata osusu kẹnẹ ẹyaa nyị nị.

¹³ Ijoovu ka ẹnịnị ẹ sị irenu nini kwoku vị ọnị ọ̀ kà ịrẹyị, dị ịsị ẹẹ ka ọnị aa mẹ, ọ̀ kụkụ mẹ̀ ọnị.

¹⁴ Ọnị oo tenyi ẹngụ ka ịsị ẹẹ ka ọnị aa mẹ, ọ̀ mẹ.

¹⁵ Ohomorihi ọ̀ọ daka aa wụ ọnị, ẹ́ yị nyị ịsị ọsa ọnị ọnị aa tụra eyi, ẹ̀ vị ọnị. Agụvị avọọ ọnị aa kụ irenu anị eyi anị aanị nị.

¹⁶ Ijoovu ka ayọvị anị ọnọnị ọ́ zụ mẹ ka Ohomorihi ọ dọ ọnị ha, agụvị ka ẹ́ yị nyị ọza ọhịmị ana zụ jẹẹ ọvịdị Ohomorihi.

¹⁷ Ọ kà a si ụtọ pe ẹtẹ ẹtẹẹrẹ dị wa wụ́ ịrẹyị ọnị ọnị aa kà.

¹⁸ Ọnị oo tenyi ẹngụ ka ọnị aa kụ irenu, agụvị ka ọnị ộ yẹ ka ọnị ẹ́ yị rị ịvị.

¹⁹ Ọ kà, Ohomorihi ọ̀ọ zụ ka ịsị ẹ vị ịvị anị nị, vị ọnị aa sị ụvọọ ku irenu anị, dị ọnị ò sú nị.

²⁰ Ijoovu ka ọnị aa họ̀ Ohomorihi use ịsa ẹẹva, ọ̀ navọ ọ̀ mẹ yị ọnị; ọ̀ọ mẹẹ yị ọnị, ọnị ẹ́ yị kụkụ vaa tẹ̀ẹ yị ọ.

²¹ Ọ kà Ohomorihi ọ̀ navọ ò kwooze yị ọnị, dị asị ọ́ rẹ́ chire ọnị angwa.

²² Ịjọnọọ, ọ̀ọ hị́ ọnị, ọnị vee tụ́ ohi, àvị ọ̀ jẹẹ ọnị ọ̀ kà ịrẹyị, dị ò tu oni ohi.

²³ Ebira odivi ya ọnị mẹ? Ohomorihi ọ̀ sị zụ ọnị ịvị ọnị ọnị mẹ de.

²⁴ Sị ẹ vẹ dị Ohomorihi sị ọnị za ọnịvị anị, dị ộ kụkụ varẹma ka ọnị?

²⁵ Ọ kà vị ọnị sị mẹẹ avị ana ahị aa sii zị avọọ nị. Vị Ohomorihi wáá rẹ kụkụ ee vee chire ọnị angwa nị?

²⁶ Avaba ịsa ọnị Ohomorihi chẹrẹ ka ọnị ộ mẹ̀ vị ịrẹyị odivi-odivi. Ịsa ọnị ọnị mẹ ịjị ọnị vị ozweyi vị oni Ohomorihi jị ịvị anị yị ọnị.

²⁷ Ohomorihi ộ kụ́ ịchẹkẹchẹkẹ hi ọnị ahụ, dị ọ sị eyi pe avaba ahụ ọnị ee hu nị. Ịzị ọnị sị ahụ hị́ vị ọnị ọ́ hyakụ aa zama a re.

²⁸ Avọọ ẹhẹ anị ee duu ha anka ịsị ẹ sị vụ̀ avọọ nị. Ọnị ọ kụkụ sị mẹẹ anka awuru ọnị ikere sị rị avọọ nị.