Ijoovu 10 - IWE ỌNỊNỊ

Ijoovu aa yịị ka ịrẹyị naa

¹ Ijoovu kà ẹhẹ o si du ọnị eyi. Ọnị ẹ yị nẹngụ sị irenu anị kwooku. Ọnị aa ka a ịsị e du ọnị ayị.

² Ọ kà asị Ohomorihi jị ịvị yị ọnị kẹnẹ. Sị ẹ vị ebira odivi ọnị ọnị daka mẹ̀ kẹ?

³ Sị ẹ vị ayohine anị ka oo du ọza ọnị ọ sị ụvọta anị mè? Ayị anị wéé vi ene hine ka aza edivi aa ka tụ ọvịdị nị?

⁴ Ọnịrị ọza wéé vi ene kụkụ ee re ẹtẹ ọnyọọnya nị?

⁵ Ẹnẹyịmavara, ẹhẹ awụ wéé weyi anka ọzarẹyịrẹsụ nị?

⁶ Sị ẹ va kụ eyiha tu ọ di ee si ka oni o re ọnị mẹmẹ vaa mẹ̀ ebira odivi booro aanị?

⁷ Ọ yẹ ka ọnị ọ rị ịvị dị ẹ yị nyị ọza ana zụ dọ ọnị ha hụrẹ ụvọ nị.

⁸ Óó rẹ vaa sị ụvọ anị du ọza ọnị ọ mẹ nịị?

⁹ Ijoovu ka Ẹnẹyịmavara ọ tamayị ka èzi ọ sị mẹ ọza nị. Asị ọ sị ọnị varẹma na tụ ịnị èzi ọnọọ.

¹⁰ Ẹnẹyịmavara ô swe ịrẹẹ anị ịnị ịhị ozi ọnyị anị anka a mẹẹ sị angwẹ hụụnị ịrẹva ụnọ avọọ nị.

¹¹ Ọnị ọ sị swụ ọzị ọnịrị ẹchụkụ vabẹ, dị ọ rẹ sị ụpa ku uye ọza ịrẹsụ nị.

¹² Ẹnẹyịmavara ọ sị ụhwẹ yị mị nị. Ọnị aa mẹ ayamva yị mị, di e sere mị nị.

¹³ Avaba ịsa ọnị ọ vaa mẹ vị ọnị ọ sị tẹ yị ọnị ka asị mị yẹ.

¹⁴ Ọnị ọ̀ọ mẹ̀ ebira odivi dị ọ za ọnị dị ọ sị ụya anị rị ọnị.

¹⁵ Ijoovu ka ọnị ọ̀ọ rị ịvị ọnị ẹ yị ha. Ọnị ọ̀ọ rẹ va rị ịhị ọnị ẹ yị re aha sị eyi anị tẹ. Ụhị aa nyị ọnị agụvị akanya ene tu ọnị.

¹⁶ Àa nyị ịsị mị mẹ ana ka ọnị ọ sị tụ ẹba, dị Ẹnẹyịmavara e be mị ka ọnị ọ pịva yị mị anka idu avọọ.

¹⁷ Ẹ yị nyị ụmẹ ọnị Ẹnẹyịmavara e yi me re odivi anị ka. Ọ nyayịnẹ aa sị ọyịkụ-ọyịkụ sị ụya rị ọnị nị.

¹⁸ Sị ẹ vị dị ọ zẹ kà a ọnya anị ọ ma ọnị daa? Ọnị ọ vana mẹ ọnya anị ịhị ọ gụ huni.

¹⁹ Aa yanị ra sị ọnị ne ne dị ọnị e yi re ayodu ẹhẹ ọnọnị.

²⁰ Ụmẹ ọnị ọnị aa ra ẹhẹ aa chee aanị. A navọ ọnị dị ọnị ọ hụụnị ẹhẹ dị ẹngụ anị o hi ahị.

²¹ Dị ọnị ọ vaa nọ ịzị ọza ẹ yị mā vavẹ, aha etohozi ruma-ruma.

²² Ịzọọ o hozi huu agẹvịrahụ, dị ọ vị aha ẹvazi nị.