Ịjọọnụ 9 - IWE ỌNỊNỊ

Ijeesu ộ há eyi ọnọrụ ọnya ana a ma ogweyi

¹ Íjeesu màa na óze, ô re ọza ịnya aanị ana a ma ogweyi.

² Dị ezirẹma anị họ̀ ọ ka, “Ọga, ẹnẹ vị ana mẹ ịvị, ana mẹ ka à ma ọnọrụ ọnọnị ogweyi? Ọnị ụvọta wáá yọ nị, à vị aza ana ma a?”

³ Dị Ijeesu tụ́ wa ohi, dị ọ ka, “Ẹ yị vị agụvị ka ọnọrụ ọnọnị ộ mẹ̀ ịvị, ẹ yị rẹ vị agụvị ka aza ana ma a, ộ mẹ̀ ịvị. Ama Ohomorihi ee sì ka à sị ụkọrọ anị zụ̀ aza ịnị ẹngụ ọnọrụ ọnọnị.

⁴ Â nyị ka ya mẹ̀ ụkọrọ Ọza ana tụ́ mị vẹ ẹhẹ dị ọyị ọ̀ va ta. Ọyị vaa ta, ịjọnọọ ọza ọ yị kụkụ va zụụ mẹ̀ ụkọrọ.

⁵ M mẹ̀ yị yà ịnị ẹhẹ aanị, ẹma vị ẹtohweyi yị anẹhẹ nị.”

⁶ Ịjị ọ vavọọ sị ịrẹyị kà, dị ọ jị atẹ hi ẹtẹ, dị ọ sị tọ̀ ụvụ, dị ọ kụ́ ọọ sisi ogweyi ọnọọ eyi nị.

⁷ Dị Ijeesu kà a yọ ka, “Na, dị ụ wa na nyịna eyi awụ ini adagu Ịsayịrọmị.” (Iruvo “Ịsayịrọmị” ọ vị “â tụ́ ọọ”.) Ịzẹyịza, dị ọnọrụ ọnọọ na, dị ọ na nyịna eyi anị, di o kuku ee re ẹtẹẹ vẹ nị.

⁸ Ịjị anokokooro ogweyi ọnọọ beri aza eneē vidii re e ka ọọ̄ pà ịsaa rị re e, dị ẹ ka, “Aanịka ẹ yị vị ọza anaā vịdịị yaayịtẹ dị aa pà ịsaa rị avọọ yị?”

⁹ Dị aza ẹnyị ka ọnịị yọ, dị ọsa ka vi o véné e nị. Dị ọza ọnọọ ụvọta ka, “Ẹmịị yọ nọ!”

¹⁰ Dị ẹ va họ̀ ọ ka, “Éyi awụ mẹmẹ va há?”

¹¹ Di o tụ́ ohi, dị ọ ka, “Ọnọrụ ọnya aanị ana aā hị́ Ijeesu, ọ tọ̀ ụvụ, di o si sisi mi eyi nị. Dị ọ kà a mị ka ma na nyịna eyi amị ini adagu Ịsayịrọmị nị. Ịzẹyịza, dị mị na nyịna eyi amị kẹnẹ, di mi kuku ee re ẹtẹ nị.”

¹² Dị ẹnịnị họ̀ ọ use ka, “Ịzị ọza ọnọọ yà aanị?” Dị ọnọrụ ọnọọ ka, “Mẹ yị yẹ, ọ.”

Anihwarisi nịnị ê sì iruvo ịrẹyị ọnọọ

¹³ Dị aza ẹnẹẹ sị ọnọrụ ọnọọ ene vịdị gu eyi aanị ne tù Anihwarisi nịnị nị.

¹⁴ Ẹkụhị ụhwọtụ Íjeesu vavọọ sị tọ̀ ụvụ, dị ọ ha eyi nị.

¹⁵ Dị Anihwarisi nịnị ẹnị rẹ họ̀ ọ ka, o meme kuku vee re ẹtẹ nị. Dị ọ rẹ kà a yị wa ka, “Ộ sị ụvụ sisi mi eyi, dị mị na nyịna a, di mi kuku ee re ẹtẹ nị.”

¹⁶ Dị Anihwarisi ẹnyị ka, “Ọza ana vavọọ mẹ, ọ yị vị ọza Ohomorihi, agụvị ka o yi sị eyi pe ẹkụhị ụhwọtụ.” Dị aza ẹnyị ẹnịnị rẹ ka, “Wéé ro ka ọza ana vị ọnịvị ộ vavọọ zụ mẹ̀ ụkọrọ apọtẹrẹwa nịnị?” Ẹnịnị ẹ kụ́ gà hi.

¹⁷ Dị ẹnịnị rẹ va họ̀ ọza ene vịdị gu eyi aanị ka, “Ọza ana há wụ eyi aanị, sị ụ zụ kà ini oze anị?” Dị ọnọrụ ọnọọ ka ọnịsẹ ọ vị nị.

¹⁸ Ama Aniju nịnị e yi sì ka ẹnị ẹ̀ dọ wụ́ ka ọnọrụ ọnọọ ô vịdị gu eyi da, di o vee re ẹtẹ booro aanị. Agụvị avọọ dị ẹ hị́ aza ana ma ọza ana a há eyi aanị,

¹⁹ dị ẹ họ̀ wa ka, “Ozi ewu nịnị ọnị ụ kà a ka wâ ma ogweyi nịnị wáá yị? Ọ mẹ̀ zị ọọ, di o vee re ẹtẹ booro aanị?”

²⁰ Dị aza ana ma ọnọrụ ọnọọ tụ́ wa ohi ka, “Ịzẹyịza ozi eyi yị, ogweyi ị vịdị ma a nị.

²¹ Ama ọ mẹ̀ zị ọọ, di o vee re ẹtẹ booro aanị, yẹ yị yẹ. Yẹ yị rẹ yẹ ọza ana há a eyi. Ọnị ụvọta ọ sị vịra, na họ̀ ọ use nịnị! Ọ vaa kà irenu anị.”

²² Aza ana ma ọnọrụ ọnọọ, ệ vavọọ kà, agụvị ka eyee hí angwa Aniju nịnị. Aniju nịnị ệ vịdị sị eyi gẹ ka àa nyị ọza ana dọ ka Ijeesu ọ vị Ikirisiti ọnọọ nị, à dụ ọọ jịnẹ hụụnị irehi Ohomorihi.

²³ Agụvị avọọ aza ana ma a kà a ka, “Ọ sị vịra, na họ̀ ọ use nịnị!” nị.

²⁴ Dị Aniju nịnị re tenyi ọza ene vịdị gu eyi aanị hị́ nị. Dị ẹ kà a yọ ka, “Ẹwà kà ịrẹyị ịzẹyịza Ohomorihi; ẹyị â yẹ ka ọnọrụ ọnọọ vị ọnịvị.”

²⁵ Dị ọza ene vịdị gu eyi aanị, tụ́ ohi, dị ọ ka, “À vị ọnịvị ọ vị nị oo, à vị ọ yị vị ọnịvị oo, ẹmị ẹ yị yẹ. Ịsa ọnya kẹnẹ mị yẹ nị, mâ yẹ ka mê vịdị gu eyi, ama mee re ẹtẹ booro aanị.”

²⁶ Dị ẹ rẹ họ̀ ọ ka, “Sị ọ mẹ wụ? Ọ mẹmẹ há wụ eyi?”

²⁷ Dị ọnọrụ tụ́ ohi, dị ọ ka, “Mâ vịdị rẹ sị ọọ kà a wụ nịnị, wẹ yị zẹẹ ka wa wụ́ nịnị. Sị ẹ vẹ di u ree sì ka me tenyi ọọ kà a wụ nịnị? Vi u wee sì ka ẹwụ nịnị ọ̀ rẹ vị ezirẹma anị nị?”

²⁸ Dị ẹyaa kụ̀ ọọ ụhụ nị, dị ẹ ka, “Ẹwụ nya kẹnẹ ọ vị ozirẹma anị, ẹ yị vị ezirẹma Imosiisi.

²⁹ Imosiisi kẹnẹ ị yẹ ka Ohomorihi ộ kà ịrẹyịị yị nị; àa vị ọta amị ọnọọ yọ, yẹ yị yẹ ịzọọ hụrẹ vẹ.”

³⁰ Dị ọnọrụ ọnọọ kà a yị wa ka, “Ho! Ịrẹyị ọnị ụ waa kà nịnị aanị, o si hí mi eyi. Ụ ka wẹ yị yẹ ịzọọ hụrẹ vẹ nịnị, ama ọnị ọ há ẹmị eyi nị.

³¹ Yâ yẹ ka Ohomorihi ọ mā sị ụtọ pe ịrẹyị ọnịvị. Ọza ana àa hẹkẹ Ohomorihi, dị ọ raa mẹ̀ ịsa oni Ohomorihi sì nị, ọnị Óhomorihiī sị ụtọọ pe nị.

³² A mẹ̀ hụrẹ mẹ ẹhẹ, ọza ọọ̀ yị wụ́ da ka â nyị ọza ana há eyi ọza ana a ma ogweyi.

³³ Ẹ̀ yị vị ọza Ohomorihi ọ́nọrụ ọnọọ vị, ẹ yị nyị ịsị ọ yaanị zụ mẹ.”

³⁴ Dị ẹnịnị tụ́ ọọ ohi, dị ẹ ka, “Ẹwụ ana a ma, da a rẹ sị enyi ịvị kà, ee sì ka wa zụ̀ yị ịsa nịị? Dị ẹ dụ ọọ kwooze nị.”

Aza ene gu eyi tụ́ ịnị ịsa Ohomorihi

³⁵ Ijeesu ộ wụ́ ka ẹ sị ọnọrụ ọnọọ dụ kwooze. Ịjị o re e, ộ họ̀ ọ use ka, “Wáá sị ayị tụra Ozi Ohomorihi?”

³⁶ Dị ọnọrụ ọnọọ tụ́ ohi, dị ọ ka, “Ọga, aarịhịnị ẹnẹ ọ vị, dị ma zụ sị ayị tụra a?”

³⁷ Dị Ijeesu kà a yọ ka, “Wê vịdị si oo re da; ọnị ọ raa kà ịrẹyịị wụ aanị nị.”

³⁸ Dị ọnọrụ ọnọọ ka, “Ananyị yị, mâ sị ayị tụra wụ”, dị ọ tana tụra ẹtẹ ọ́vịdị Ijeesu nị.

³⁹ Dị Ijeesu ka, “Mâ vẹ ẹhẹ ọnọnị ka ma va mẹ̀ ọkarẹyị, dị ogweyi nịnị èe re ẹtẹ, dị aza ana ka eni ee re ẹtẹ è gu eyi.”

⁴⁰ Anihwarisi ẹnyị ene hi ịzọọ ệ wụ́, Íjeesu mẹ̀ vavọọ kà. Dị ẹ họ̀ ọ use ka, “Aanịka ogweyi ẹ́yị rẹ vị bẹẹ nị?”

⁴¹ Dị Ijeesu tụ́ wa ohi, dị ọ ka, “Wàa yaanị vị ogweyi nịnị, wẹ yị yaanị rị ịvị nịnị; ama ụ ka wee re ẹtẹ nịnị, agụvị avọọ ịvị awụ nịnị yị yà wụ nịnị ịrẹsụ.”