Ịjọọnụ 5 - IWE ỌNỊNỊ

Ijeesu ộ mẹ̀ ọza ịnya ụkụ ụtọ adagu ọnya

¹ Ẹkụhị ọnya, ụmẹ eche ọnya aanị ana Aniju nịnịị̄ rị, o si tù. Ijeesu ộ hịrẹ nọ Ijerusarẹmị.

² Â nyị adagu ọnya aanị, ana gụrị Oze Atẹmẹ Íjerusarẹmị. Aā hị́ adagu ọnọọ Ịbẹtịsata ịnị ẹkụra Anihiburu nịnị. Ajẹngụ ẹẹhị e hi ịzọọ nị.

³ Ịnị ajẹngụ ẹnẹẹ, ọnịkụ ọrụrụ-ọrụrụ vị anaā gwẹtẹ ịzọọ: Ogweyi, oswahụ ọnịrị oswẹngụ nịnị. [Eyee zí ka à va vara enyi ọnọọ.

⁴ Â nyị anggẹẹrị ọnya aanị eneē chíi nọ ini enyi ọnọọ ịnị ụmẹ ẹnyị, dị ọ na vara a. Ọ̀ọ vavọọ sị ọọ vara, ọza tụra ọza ana àa vịdị ngụ ini enyi ọnọọ, ịsa tụra ịsa ana àa zị ọọ vị ana aa ta.]

⁵ Â nyị ọnọrụ ọnya aanị ịzọọ, ọnị ụkụ hụrẹ za hụrẹ ịrayị ohurẹẹwụ tụra ịhịnta.

⁶ Ijeesu ô re e ka ọ hụtụ ịzọọ, ọ rẹ yẹ ka o si kù ẹnẹ ẹngụ hụrẹ aa zị ọọ. Dị Ijeesu kà a yọ ka, “Wéé sì ka ẹngụ awụ ọ̀ ta?”

⁷ Dị ọnịkụ ọnọọ tụ́ ọ ọ ohi, dị ọ ka, “Ọga, mẹ yị nyị ọza ana a vọrọ ka ọ̀ sị mị na ngụ ini enyi ọnọnị, àa sị ọọ vara. Màaa vụrị ka ma na, dị ọza ẹnẹsa wụsẹ sị dọ ọvịdị amị na ngụ ọ.”

⁸ Dị Ijeesu kà a yọ ka, “Kwẹẹtẹ, sị odooro awụ, dị ụ waa zị ụsẹ!”

⁹ Obooboro ọnọọ, dị ẹngụ ọnọrụ ọnọọ ta, dị ọ sị odooro anị, dị aa zị ụsẹ nị. Ịhị ọnọọ gẹdẹ-gẹdẹ ọ vị ẹkụhị ụhwọtụ nị.

¹⁰ Dị Aniju nịnị kà a yị ọza ana a mẹ ụkụ aanị ka, “Ajịnị vị ẹkụhị ụhwọtụ, ọ! Ẹ yị vọrọ ka waa za odooro zị ajịnị.”

¹¹ Dị ọnọrụ ọnọọ tụ́ wa ohi, dị ọ ka, “Ọza ana mẹ mị ụkụ, ọ kà a mị ka ma sị odooro amị, dị maa zị ụsẹ nị.”

¹² Dị ẹnịnị va họ̀ ọ ka, “Ẹnẹ ọnọọ vị, ana kà a yị wụ ka wa sị odooro awụ, dị ụ waa zị ụsẹ?”

¹³ Ama ọza ana a mẹ ụkụ aanị, ọ yị yẹ ọza ana mẹ̀ ọnị ụkụ, agụvị ka Ijeesu ộ tangwa sị hụụ ịzọọ, agụvị ka aza ẹ sị rụrụ baaba.

¹⁴ Ộ kù chee, dị Ijeesu re ọnọrụ ọnọọ ini irehi Ohomorihi nị. Dị Ijeesu kà a yọ ka, “Wee re, a sị wụ mẹ ụkụ; ama asị ụ rẹ̀ kụkụ mẹ ịvị, ka ẹ̀ yị vị avọọ, ịsa ene divi hu ọsọnị ve tù wu!”

¹⁵ Dị ọnọrụ ọnọọ hụụ ịzọọ, dị ọ na kà a yị Aniju nịnị ka Ijeesu ọ mẹ̀ ọnị ụkụ nị.

¹⁶ Agụvị avọọ, dị Aniju nịnị ee be Ijeesu, di eyee sì ka ẹnị ẹ̀ wụ ọọ nị; agụvị ka ộ vavọọ mẹ ịnị ẹkụhị ụhwọtụ.

¹⁷ Dị Ijeesu kà a yị wa ka, “Ada amị aà yịị mẹ̀ ụkọrọ va ngụ ọyaanị, agụvị avọọ ẹmị raa yịị mẹ̀ ụkọrọ nị.”

¹⁸ Agụvị avọọ dị Aniju ẹnẹẹ ee sì oze hu avọọ ka ẹnị ẹ̀ wụ ọọ nị, agụvị ka ẹ yị vị ọ jịnẹ ọda ẹkụhị ụhwọtụ kẹnẹ, ọ rẹ ka Ohomorihi ọ vị Ada anị nị, ọnọọ vị ka aa sị ẹngụ anịị pe Ohomorihi mẹ ọpa.

Ọda oni Ozi Ohomorihi nyị

¹⁹ Dị Ijeesu va kà a yị wa ka, “Ịzẹyịza m maa kà a wụ nịnị nị, ẹ yị nyị ịsị ẹmị Ozi Ohomorihi zụ dà mẹ yị ẹngụ amị, ẹ̀ yị vị ịsị mèe re ka Ada amị aa mẹ; agụvị ka ịsa tụra ịsa ana Ada amị àaa mẹ, ọnị émi Ozi anị raa mẹ nị.

²⁰ Ada amị ô sì ịrẹyị ẹmị Ozi anị, dị aa sị avaba ịsa ọnị ọnị ụvọta aa mẹẹ zụ̀ mị nị. Ọ hyakụ vaa sị ụkọrọ ana banyị hu aanị zụ̀ mị, agụvị di ò zụ hí wu nịnị irenu.

²¹ Anka Áda amị mẹ̀ẹ̄ ha oku hụụnị isu, dị ọ mẹ ka ẹ̀ yàra, avọọ gẹdẹ-gẹdẹ ẹ́mị Ozi anị ọnị mẹ̀ rẹẹ̄ mẹ ka aza oni mèe sì, ẹ̀ yàra nị.

²² Ada amị ọnị ụvọta ọ mā mẹ̀ ọkarẹyị yị aza. Ọ raà sị ọkarẹyị chire ẹmị Ozi anị ụvọ ka maa mẹ̀ ẹ,

²³ agụvị avaba aza ẹ̀ zụ sị ụbanyị yị ẹmị Ozi anị, anka ẹ mẹ̀ẹ̄ sị ụbanyị yị Ada amị. Ọza ẹnẹ ẹ̀ yị sị ụbanyị yị ẹmị Ozi anị, ọ yị rẹ sị ụbanyị yị Ada amị, ana tụ́ mị vẹ ẹhẹ.

²⁴ “Ịzẹyịza m maa kà a wụ nịnị nị, ọza ana àa wụ́ ịrẹyị amị, dị ọ sị ayị tụra ọza ana tụ́ mị vẹ ẹhẹ nị, ọ vaa yàra ị́dị Ohomorihi pooro zịna-zịna. Ọ yị kụkụ vaa rị ịvị, ama ọ sị ha hụụnị isu, ọ kụkụ vaa yàra ị́dị Ohomorihi pooro zịna-zịna.

²⁵ Ịzẹyịza m maa kà a wụ nịnị nị, ụmẹ aa vẹ, ộ hyakụ si tù booro aanị, ana ahịka oku nịnị vaa wụ́ ọngwẹ ẹmị Ozi Ohomorihi. Aza ana àa wụ́, ẹ vaa yàra.

²⁶ Ada amị ọnị ụvọta ọ zụ mẹ ka avaba aza ẹ̀ yàra nị. Avọọ ọ mẹ̀ rẹ mẹ ka Ozi anị ọnị ọ̀ rẹ zụ mẹ ka avaba aza ẹ̀ yàra nị.

²⁷ Ọ rẹ raà sị ọda yị Ozi anị ka ọ̀ọ mẹ̀ ọkarẹyị, agụvị ka ọnị ọ vị Ozi ọza onigirima nị.

²⁸ Asị ọnọnị hí wu nịnị irenu, oo! Ụmẹ aa vẹ ana avaba oku nịnị vaa wụ́ ọngwẹ anị.

²⁹ Dị ẹnịnị jịnẹ hụụnị ikuta ẹnịnị vẹ ẹhẹ. Aza ana àa mẹ ọyịza, dị ẹ ha hụụnị isu, dị ẹ kụkụ yàra. Ama aza ana àa mẹ odivi, ẹnị rẹ vaa haa hụụnị isu, dị aa mẹ̀ ọkarẹyị isu yị wa.”

Ẹnẹ dọ ivenu ịrẹyị Ijeesu?

³⁰ Ijeesu ọ rẹ kà a ka, “Ẹ yị nyị ịsị mị nyẹngụ dà mẹ yị ẹngụ amị. Óhomorihi ọ̀ọ mẹ̀ ka ma mẹ̀ ọkarẹyị, m maa mẹ̀ ẹ nị. Agụvị avọọ ịzẹyịza m maa sịị mẹ̀ ọkarẹyị amị nị, agụvị ka ẹ yị vị ịsa ene zé mi eyi kẹnẹ m mee sì, ama ịsa ene zé Ada amị ana tụ́ mị vẹ ẹhẹ eyi m mee sì nị.

³¹ Àa vị ẹmị ụvọta aa dọ ivenu ịrẹyị ẹngụ amị nị, aza ẹ zụ kà a ka ivenu amị vị ireche.

³² Ama a va nyị ọza ẹnẹsa ana aa dọ ivenuu tụ́ ịnị ịrẹyị amị; mâ yẹ ka ivenu ana aa dọ ọ tụ́ ịnị ịrẹyị amị vị ịzẹyịza.

³³ Wâ tụ́ ụtụ ne tù Ịjọọnụ nịnị. Ịjọọnụ ộ dọ ivenu ịzẹyịza.

³⁴ Ẹ yị vị ka vị ẹmị vị ene ee sì ivenu aza nị; ọsọnị vị ọnị maa kà kẹnẹ, agụvị dị ụ wa nyẹngụ há nịnị.

³⁵ Ịjọọnụ vị ana sị mẹẹ anka ozotupa ana aa zẹtẹ chanyị-chanyị. Ịnị ụmẹ chee, wâ vịdị nyị inohine tụ́ ini ẹtohweyi anị nịnị.

³⁶ Â hyakụ nyị ivenu ọsa ini oze amị ene huna ivenu Ịjọọnụ ẹtẹẹtẹrẹ. Ụkọrọ ẹbanyị ana Ada amị sị mị ka ma mẹ, ọnị mị raa mẹ, ệ sị zụ̀ ka Ada amị ọ tụ́ mị vẹ ẹhẹ nị.

³⁷ “Ada amị ụvọta ana tụ́ mị vẹ ẹhẹ ọnị ọ rẹ dọ ivenu tụ́ ịnị ịrẹyị amị. Wẹẹ̀ yị wụ́ ọngwẹ anị nịnị da, weè yi re re e nịnị, ọ mẹmẹ yà.

³⁸ Ịrẹyị anị ọ yị rẹ yà ịnị ayị awụ nịnị, agụvị ka wẹ yị dọ ọza ọnị ọ tụ́ vẹ ẹhẹ wụ́ nịnị.

³⁹ Waa kà Iwe Ohomorihi nịnị ẹtẹẹtẹrẹ, agụvị ka wâ dọ nịnị ka ịnị anị, ụ nyẹngụ re ịsị ẹ zụ sị wụ nịnị yàra pooro zịna-zịna nị. Iwe Ohomorihi ọnọọ gẹdẹ-gẹdẹ vị ana aa kà ịrẹyị amị.

⁴⁰ Ama wẹ yị zẹẹ ka wa vẹ ịdị amị nịnị, dị ma mẹ ka wa yàra nịnị pooro zịna-zịna.

⁴¹ “Mẹ yị dụ ka aza ẹ̀ẹ ga mị.

⁴² Mâ yẹ wụ nịnị, mâ yẹ ka we yi sì ịrẹyị Ohomorihi ịnị ayị awụ nịnị.

⁴³ Mâ vẹ ẹhẹ ịnị ịrẹha Ada amị, ama wẹ yị dọ mị nịnị; ama ọza ẹnẹsa ọ̀ọ vẹ ẹhẹ ịnị ịrẹha ẹngụ anị, vị ụ waa dọ ọ nịnị nị.

⁴⁴ Ụụ̄ dụ ka waa ga ẹngụ nịnị, ama wa mā dụ ka Ohomorihi ana ahịka ọnị kẹnẹ ọ vị Ohomorihi nị, ọ̀ ga wụ nịnị. Ini oze avọọ, wéé ro ka wa zụ dọ Ohomorihi wụ́ nịnị?

⁴⁵ Asị u ne ro o nịnị ka ẹma va naa sị ịrẹyị awụ nịnịị tụ́ Ada amị ịrẹka nị. Â nyị ọza ana va naa sị ịrẹyị awụ tụ́ ọọ ịrẹka. Ọza ọnọọ ọ vị Imosiisi ọnị ụ sị eyi tụra nịnị nị.

⁴⁶ Wàa yaanị dọ Imosiisi wụ́ nịnị, ụ yaanị rẹ dọ mị wụ́ nịnị, agụvị ka Imosiisi vị ana vịdị chẹrẹ ịsa tịtẹ ini oze amị.

⁴⁷ Ama ụ wẹ̀ yị mẹ̀ dọ ịsa ọnị ọ chẹrẹ tịtẹ wụ́ nịnị, ụ mẹmẹ rẹ zụ dọ ịrẹyị amị wụ́ nịnị?”