Ịjọọnụ 12 - IWE ỌNỊNỊ

Imeri ộ sị ụbanyị yị Ijeesu

¹ Ọ mẹ̀ sị vọ ẹkụhị ịhịnọnyị dị à rị Eche Ọyịparahu, dị Ijeesu rẹ vẹ Ịbẹtanị nị. Ịzọọ Ị́rasarụsị oni Ijeesu ha hụụnị isu ra nị.

² Â mẹ ịsọyịrị ẹtẹẹtẹrẹ yị Ijeesu ịzọọ; dị Ịmata ộ sị ịsa yị wa nị. Ịrasarụsị yà ịnị ọza ẹnẹ ẹnịrị Ijeesu rị ịsa.

³ Dị Imeri sị eturare obooro ijonggo ọbanyị ọnya ana katarihi, dị aa ka a hi Ijeesu ahụ, dị aa sị ẹyị anịị nyee yọ nị. Dị irehi ọnọọ kụkụ vị agụ-agụ eturare ozoza ọnọọ nị.

⁴ Â nyị ozirẹma Ijeesu ọnya aanị, aā hị́ ọọ Ijudasi Isikarịyọtị. Ozi Ịsayịmọnị ọ vị nị. Ọnị ọ rẹ vaa sị Ijeesu chire ọnịvị anị ụvọ nị. Dị ọ ka:

⁵ “Ho! Sị ẹ vẹ dị ọza ọ̀ọ mā ná eturare ọnọnị ẹhụụ achuchu ẹẹta avọọ, dị à sị yị onosiye nịnị?”

⁶ Ọsọnị vị ọnị Ijudasi kà kẹnẹ, ẹ yị vị ka vị a nyị ịzị ịrẹyị onosiye nịnị gẹ ẹ nị. Ịjị ahịka Ijudasi vị oyi, ọnị ọ sị eyi pe ẹkẹhị ẹnịnị nị, di ee yi ịnị anị nị.

⁷ Dị Ijeesu ka, “Naavọ hẹẹ nịnị, vị ọ sị eturare ọnọnị tịtẹ ka ọnị ọ̀ sị sisi mi ẹngụ, di ò ve tù ẹkụhị ene ee sii ne mi nị.

⁸ Onosiye vị oni u wee re nịnị eyinị-eyinị; ama ẹmị ẹ yị vaa yàa pe wu nịnị pooro.”

 gẹ eyi ka à wụ Ịrasarụsị

⁹ Aniju ọrụrụ-ọrụrụ ẹ sị yẹ ka Ijeesu yà ịzọọ. Dị ẹnịnị nọ ịzọọ nị, ẹ yị vị agụvị Ijeesu kẹnẹ, ama e re yee sì ka eni è re Ịrasarụsị oni Ijeesu ha hụụnị isu.

¹⁰ Dị ohirẹsụ ẹbanyị irehi Ohomorihi gẹ eyi ka a rẹ wụ Ịrasarụsị bẹẹ nị.

¹¹ Agụvị ịrẹyị Ịrasarụsị, Aniju ọrụrụ-ọrụrụ aa hụụ ịdị ẹnịnị, ẹ yaa sị ayịị tụra Ijeesu.

Aza ệ sị ụbanyị yị Ijeesu, ọ màa vaa ngụ Ijerusarẹmị

¹² Eyinẹhẹ anị, ọkọnị aza ana va rị eche, ệ wụ́ ka Ijeesu aa vẹ Ijerusarẹmị.

¹³ Dị ẹ na jị adambara, dị ẹ kụ́ ọ rị ụvọ aa naa gẹrị ọọ nị. Di eyee nowu ka, “Ihosana! Ohomorihi ọ̀ dà tụ́ ịnị ụbanyị yị ọza ana aa vẹ ịnị ịrẹha Ananyị yị, ana vị Ohinọyị Anisirẹrị.”

¹⁴ Ijeesu ô re ozi ịkẹrịkẹtẹ ọnya, dị ọ tụra a nị, anka Íwe Ohomorihi mẹ̀ vịdị kà a ka:

¹⁵ “Asị u hí angwa, ẹwụ ozi ọnẹẹ Anịzayọnị! Wee re, Ohinọyị awụ aa vẹ, ộ tụra ozi ịkẹrịkẹtẹ.”

¹⁶ Ezirẹma Ijeesu ẹ yị vịdị yẹ iruvo ịrẹyị ẹnẹẹ. Ịjị a va raà sị igirima Ijeesu zụ̀ aza, dị ẹ va tamayị ọgọnị ka â vịdị vavọọ chẹrẹ ịsa ini oze Ijeesu nị; dị ẹ rẹ sị yẹ ka ọnị ẹnị vavọọ mẹẹ yọ nị.

¹⁷ Aza ana yà pe Ijeesu, ọ mẹ̀ hị́ Ịrasarụsị jịnẹ hụụnị ikuta dị ọ ha a hụụnị isu, ệ kà a zụ̀ aza ana vọ.

¹⁸ Agụvị avọọ, dị aza ẹnẹẹ ẹnị rẹ vẹ va gẹrị Ijeesu nị, agụvị ka ệ wụ́ ka Ijeesu ộ mẹ̀ ụkọrọ apọtẹrẹwa ọnọnị.

¹⁹ Dị Anihwarisi nịnị ka, “Ẹ yị nyị ịsị ụ zụ mẹ nịnị vụrụ-vụrụ, o. Wee re, avaba ẹhẹ ọ sị saasa a!”

Anigiriki ẹnyị e ve sì Ijeesu

²⁰ Â nyị Anigiriki ẹnyị ịnị aza ana vẹ ka ẹnị ẹ̀ va mẹ ahẹkẹ ini eche ọnọọ.

²¹ Dị ẹnịnị ka Ihwiripi ana hụrẹ Ịbẹtịseda ẹkụra Igariri vẹ, dị ẹ kà a yọ ka, “Ọga, yee sì ka ye re Ijeesu.”

²² Di Ihwiripi vẹ, dị ọ va kà a yị Andụrụ nị. Dị Andụrụ ọnịrị Ihwiripi zị na kà a yị Ijeesu nị.

²³ Dị Ijeesu ka, “Ụmẹ o si tù ana a vọrọ ka à sị sị igirima yị ẹmị Ozi ọza onigirima.

²⁴ Ịzẹyịza m maa kà a wụ nị, ẹ̀ yị vị a sị ihu akụ ikonya chire ẹtẹ, dị ọ vụ̀, dị ọ chị, ọnịnya aa yịị vị nị. Ama ọ̀ọ sị vụ̀, dị ọ sị chị nị, dị ọ vaa nyị ihu ọrụrụ.

²⁵ Ọza ene èe sì ịrẹyị ụhwẹ anị, vi ee vú ọọ nị; ama ọza ene èe hí ayị ụhwẹ anị ịnị ẹhẹ ọnọnị, ọnị ụ́hwẹ anị vaa yàra nị, dị ọ yàra ịdị Ohomorihi pooro zịna-zịna.

²⁶ Ọza ana àaa hẹkẹ mị, ọ̀ rẹẹ dụ mị ịrẹma! Ịzị màa yà, ịzọọ aza ana aa hẹkẹ mị ọnị rẹ vaa yà nị. Ọza ana àaa hẹkẹ mị, ọnị Áda amị vaa sị ụbanyị yị nị.”

Ijeesu ộ kà ịrẹyị isu anị

²⁷ Dị Ijeesu rẹ ka, “Ayị amị o si du booro aanị. Sị mị vaa kà? M máá vaa kà a ka Ada amị ọ̀ sị ịrẹyị ọnọnị hụrẹ mị ịrẹsụ nị? Ama agụvị avọọ mị sị vẹ ẹhẹ nị.

²⁸ Ọga, sị igirima yị ẹngụ awụ!” Dị ọngwẹ ọnya kà ịrẹyị hụrẹ ẹbẹẹba vẹ nị, dị ọ ka, “Ma raà sị igirima yị ẹngụ amị da, mị rẹ vaa sị igirimaa yị ẹngụ amị.”

²⁹ Aza ana jẹẹ ịzọọ ệ wụ́ ọngwẹ ọnọọ, dị ẹ ka, “Ihinẹba aa kà iritu.” Dị ẹnyị ka, “Anggẹẹrị aa kà ịrẹyịị yọ nị.”

³⁰ Dị Ijeesu tụ́ ohi, dị ọ ka, “Ẹ yị vị agụvị amị ọ́ngwẹ ọnọọ kà ịrẹyị, agụvị awụ nịnịị yọ nị.

³¹ O si tù ụmẹ booro aanị ka à mẹ̀ ọkarẹyị yị anẹhẹ. Booro aanị a vaa dụ ohinọyị ẹhẹ ọnọnịị jịnẹẹ kwooze nị.

³² Ẹmị ọnọnị, àa raà sị mị tụ́ ẹba, mi vee tura avaba azaa pe ẹngụ.”

³³ Ịrẹyị ọnọọ ọnị ọ kà vị ene ee sii juwe ẹngụ isu oni o vee sú.

³⁴ Dị ọkọnị aza ẹnẹẹ tụ́ ohi, dị ẹ ka, “Yâ wụ́ ka ọda ayị ộ kà a ka vị Ikirisiti vaa yà ịzọọ pooro zịna-zịna nọ! Sị ẹ vavẹ dị ẹwụ ka a vaa sị Ozi ọza onigirimaa tụ́ ẹba? Ẹnẹ va vị Ozi ọza onigirima ọnọọ?”

³⁵ Dị Ijeesu tụ́ ohi, dị ọ ka, “Etohweyi vaa yà ịnị akakana awụ nịnị yị ụmẹ chee. Waa zị ụsẹ nịnị ịnị ụmẹ ene ẹtohweyi sị yà ịdị awụ nịnị, ka ẹ̀ yị vị avọọ, ịrahụ va za wụ nịnị. Wâ yẹ ka ọza ana aa zị ụsẹ ịnị ịrahụ, ọ yị yẹ ịzị aa nọ.

³⁶ Etohweyi mẹ̀ yị yà ịdị awụ nịnị aanị, dọ ẹtohweyi ọnọọ wụ́ nịnị, agụvị dị ụ wa zụ vị ezi ẹtohweyi nịnị!” Ịjị Ijeesu vavọọ sị kà kẹnẹ, di o si hu, dị ọ sị ẹngụ anị tẹ yị wa nị.

Aniju nịnị ẹ yị yị dọ wụ́

³⁷ Ijeesu ộ mị mẹ̀ ụkọrọ apọtẹrẹwa ọrụrụ-ọrụrụ éyi aza, ama ẹnịnị ẹ yị sị ayị tụra a.

³⁸ Ọ vavọọ yà, agụvị ịrẹyị ana Ayịsaya ọnịsẹ kà ịyẹẹyẹ ọ̀ nyẹngụ sẹ. Ayịsaya ộ kà a ka, “Ananyị yị, aza ẹ yị dọ enube ọnị yaa kà, ọ. Ẹ yị nyị ọza ana yẹ ụkata Ananyị yị.”

³⁹ Ẹnịnị ẹ yị zụ dọ wụ́; Ayịsaya ọ́ hyakụ vịdị kà a ka:

⁴⁰ “Ohomorihi ọ sị wa gu eyi, ọ rẹ raà mẹ ka ayị ẹnịnị ọ̀ katẹngụ, agụvị asị eyi ẹnịnị re ẹtẹ, dị asị ẹnịnị zụ hụra yẹ ịrẹyị, dị asị ẹ rẹ và ká a vẹ, dị ọ̀ va mẹ wa ụkụ.”

⁴¹ Ayịsaya ộ vịdị kà ịrẹyị ẹnẹẹ, agụvị ka ô re igirima Ananyị yị, dị aa kà ịrẹyị ini oze anị nị.

⁴² Ama â hyakụ nyị ọdọvịdị Aniju nịnị ọrụrụ-ọrụrụ ana rẹ sị ayị tụra Ijeesu. Ama ẹnịnị ẹ yị sị tụra eyi agụvị Anihwarisi nịnị. Eyee hí angwa ka a va dụ ẹnị hụụnị irehi Ohomorihi Aniju nịnị.

⁴³ Ẹnịnị ê sì ka aza ẹ̀ẹ kà ọdaa yị ẹnị huna e mè sì ka Ohomorihi ọ̀ kà ọda yị ẹnị.

Ịrẹyị oni Ijeesu kà, ọ vaa mẹ̀ ọkarẹyị aza nị.

⁴⁴ Dị Ijeesu nowu tụ́ ẹba, dị ọ ka, “Ọza ana àa sị ayị tụra mị, ẹ yị vị ẹmị ụvọta ọ sị ayị tụra, ama Ọza ana tụ́ mị vẹ ẹhẹ, ọ sị ayị tụra nị.

⁴⁵ Ọza ene èe re mi, ọ sị Ọza ana tụ́ mị vẹ ẹhẹ re bẹẹ.

⁴⁶ Mâ vẹ ịnị ẹhẹ anka ẹtohweyi, agụvị ọza ana àa sị ayị tụra mị, asị ọ kụkụ yị yà ịnị ịrahụ.

⁴⁷ Ọza ana àa wụ́ ịrẹyị amị, dị ọ̀ yị sị ayị tụra mị nị, ẹ yị vị ẹma vaa mẹ̀ ọkarẹyị yọ, agụvị ka mẹ yị vẹ ẹhẹ ka ma va mẹ̀ ọkarẹyị yị anẹhẹ; mị vẹ ka ma va dọ wa há nị.

⁴⁸ Ọza ene èe yi mi tịtẹ, dị ọ̀ yị dọ ịrẹyị amị nị, â nyị ịsị ẹ vaa mẹ̀ ọkarẹyị yọ. Ịrẹyị ọnị mị sị kà, ọnị gẹdẹ-gẹdẹ ọ vaa mẹ̀ ọkarẹyị yọ ịnị ẹkụhị ọdịrẹma nị.

⁴⁹ Mẹ yị dà ịrẹyị ẹngụ amị kà, Ada amị ana tụ́ mị vẹ ẹhẹ aa kà a mị ịsa a vọrọ ka ma kà nị.

⁵⁰ Mâ yẹ ka ịrẹyị anị vị anaā mẹ ka ọza ọ̀ yàra pooro zịna-zịna. Agụvị avọọ, ịsa tụra ịsa ọnị màa kà, ịsị Ada amị rẹ sị mị ka ma kà ọ vị ọnọọ nị.”