Ịjọọnụ 11 - IWE ỌNỊNỊ

Ịrasarụsị ô sú

¹ Â nyị ọnọrụ ọnya aanị ana aā hị́ Ịrasarụsị, ẹnẹ ẹngụ aa zị. Ẹkụra Ịbẹtanị ọ ra nị. Ịzọọ ọ vị ẹkụra Imeri ọnịrị onyeyiza anị Ịmata nị.

² Imeri ọnọọ ọ vịdị va sị eturare sisi Ananyị yị, dị aa sị ẹyị aanịị nyee yọ ahụ nị. Ẹnẹbẹnị anị ẹ́ngụ aa zị aanị nị.

³ Dị ẹyịnyara Ịrasarụsị anẹẹ tụ́ na kà a yị Ijeesu ka, “Ẹngụ aa zị ọta awụ ọnị ụ maanị sì ịrẹyị anị, o.”

⁴ Íjeesu mẹ̀ vavọọ wụ́, dị ọ ka, “Ẹ yị vị ẹngụ isu aa zị Ịrasarụsị aanị. Ẹngụ ọnọnị vị ana vaa mẹ ka aza è re igirima Ohomorihi. Aza rẹ vaa hụ agụvị avọọ sị igirimaa yị Ozi Ohomorihi.”

⁵ Ijeesu ô sì ịrẹyị Ịmata ọnịrị ọyịnyara anị ne beri Ịrasarụsị.

⁶ Íjeesu mẹ̀ wụ́ ka ẹngụ aa zị Ịrasarụsị, dị ọ yị yà ịzọọ yà mẹ ẹkụhị ẹẹva tụ́ ọọ nị.

⁷ Ịrẹma ọnọọ, di Ijeesu kà yị ezirẹma anị ka ẹ̀ vẹ, dị ẹnị ẹ̀ rẹ nọ Ijudiya nị.

⁸ Dị ezirẹma anị ka, “Ọga, wáá kụkụ yẹ ka Aniju nịnị vị ene ee sì ka eni è ne wu ịrẹta ịzọọ ịhị ọnọọ? Ụ kụkụ raa nọ ịzọọ?”

⁹ Dị Ijeesu ka, “Agogo ana yà ịnị ụmẹ dị ọyị ọ̀ ta, vị ẹwụrẹva. Agụvị avọọ, ọza ana àa zị ụsẹ ụmẹ ọọdụ, ọ yị vaa tụ́ ahụ, agụvị ka ee re ẹtẹ.

¹⁰ Ama aza ana àa zị ụsẹ ịrahụ, vị aa tụ́ ahụ nị, agụvị ka ẹnịnị ẹ yị nyị ịra.”

¹¹ Ịjị Ijeesu vavọọ sị kà, dị ọ rẹ kà a yị wa ka, “Ịrasarụsị ọta ayị aa sụ ara. Ama maa na, dị ma na ha a ara.”

¹² Dị ezirẹma anị ka, “Ananyị yị, àa vị aa sụ ara nị, ẹngụ anị vaa nịya.”

¹³ Ịsị Ijeesu sị ịrẹyị ọnọọ kà, ọ vị ka Ịrasarụsị ô wusu nị, ama dị ezirẹma anị ene ro o ka ara obooro íjeesu aa kà nị.

¹⁴ Dị Ijeesu kụkụ kà a yị wa chapaa ka, “Ịrasarụsị ô wusu nị.

¹⁵ Maa jẹ agụvị awụ nịnị ka mẹ yị yà ịzọọ, agụvị dị ụ wa zụ sị ayị tụra mị nịnị. Ama vẹ ye ne tù ọọ nịnị!”

¹⁶ Dị Ịtọmọsị ana aā hị́ Ejima kà a yị ezirẹma ana vọ ka, “Vẹ ya saasa a na, dị ẹyị rị ọọ ò ne sú nịnị!”

Ijeesu ọọ̄ mẹ̀ ka ọza ọ̀ ha hụụnị isu nị.

¹⁷ Ịjị Ijeesu naa vẹ, o ve tù ka ọ sị mẹ ẹkụhị ẹẹna ene e ne oku Ịrasarụsị.

¹⁸ Ịbẹtanị ộ gụrị Ijerusarẹmị, ẹhụụ ịmẹẹrị ẹẹva avọọ ọ vị nị.

¹⁹ Aniju ọrụrụ-ọrụrụ ệ vẹ ịdị Ịmata ọnịrị Imeri ka ẹnị ẹ̀ na sị ayị ẹnịnị nẹtẹ agụvị ẹnẹbẹnị ẹnịnị ene sú.

²⁰ Ímata mẹ̀ yị wụ́ kẹnẹ ka Ijeesu aa vẹ, dị ọ na gẹrị ọọ nị, di Imeri ọnị yà ini eehi nị.

²¹ Dị Ịmata kà a yị Ijeesu ka, “Ananyị yị wàa yaanị yà ịzẹnị, ẹnẹbẹnị amị ọ yị yaanị sú, ọ!

²² Ama mâ yẹ ka booro aanị, ịsị ụ wàa dá ịpẹ ka Ohomorihi ọ̀ mẹ wụ kẹnẹ, ọ raa mẹẹ wụ nị.”

²³ Dị Ijeesu kà a yọ ka, “Ẹnẹbẹnị awụ vaa haa hụụnị isu.”

²⁴ Dị Ịmata ka, “Mâ yẹ de, ka ọ vaa haa hụụnị isu ịnị ẹkụhị ọdịrẹma ana avaba aza vaa haa hụụnị isu.”

²⁵ Dị Ijeesu kà a yọ ka, “Ẹmị ọnọnị ọọ̄ ha ọzaa hụụnị isu, dị mị rẹ mẹ ka ọza ọ̀ yàra nị. Ọza ana àa sị ayị tụra mị, ọ̀ọ daka sú, ọ vị vaa yàra pooro zịna-zịna.

²⁶ Ọza ana àa vavọọ yàra, o mē vene kuku sú paa, agụvị ka ọ raà sị ayị tụra mị. Wáá dọ ịrẹyị ọnọnị wụ́?”

²⁷ Di Ịmata ka, “Hịịn, Ananyị yị, mâ dọ wụ́ ka ẹwa vị Ikirisiti ọnọọ ana vị Ozi Ohomorihi ana a kà a ka ọ vaa vẹ ẹhẹ nị.”

²⁸ Ịjị Ịmata vavọọ sị kà, di o si hu aa na nị. Di o were na hị́ Imeri ọhụva anị, dị ọ kà a yọ ka, “Ọga ộ vẹ, aa hị́ wụ.”

²⁹ Ímeri mẹ̀ vavọọ yị wụ́ kẹnẹ, dị ọ wụsẹ kwẹẹtẹ, di o ne tù Ijeesu nị.

³⁰ Ịjọnọọ Ijeesu ọọ̀ yị va ngụ ịnị ẹkụra; ịzị Ịmata na gẹrị ọọ, ọ yị yà nị.

³¹ Ịjị Aniju nịnị ene hi ini eehi aa sị ayị Imeri nẹtẹ, vavọọ re ka Imeri ọ wụsẹ kwẹẹtẹ jịnẹ nọ ẹhẹ, dị ẹnị raa dụ ọọ na nị. Dị ẹnịnị ka vị aa naa jị òrèrè ini ikuta nị.

³² Ịjị Imeri tù ịzị Ijeesu yà, di o re e, dị ọ và ku ẹtẹ ágada anị nị, dị ọ ka, “Ananyị yị, wàa yaanị yà ịzẹnị, ẹnẹbẹnị amị ọ yị yaanị sú, ọ.”

³³ Ijeesu ô re, Ímeri màa jị òrèrè, dị Aniju ana saasa a vẹ ẹnị raa jị òrèrè bẹẹ. Ịrẹyị ọnọọ ộ kanyị Ijeesu ẹnẹmẹhị, dị ọ zị ọọ ẹngụ ẹtẹẹtẹrẹ nị.

³⁴ Ijeesu ộ họ̀ wa ka, “Ịzị u ne e tụ́ nịnị?” Dị ẹ kà a yọ ka, “Ọga, ve re e!”

³⁵ Ẹgọ ộ jị Ijeesu ụvọ.

³⁶ Dị Aniju nịnị ka, “Wée re, ộ da sì ịrẹyị anị kẹnẹ!”

³⁷ Dị aza ẹnyị ẹnịnị ẹnị ka, “Ọnọrụ ọnọnị ana há ogweyi ọnọọ eyi, aanịka ọnị ọ yị daka zụ mẹ ka asị ọnọrụ ọnọọ yaanị sú?”

Ijeesu ô ha Ịrasarụsị hụụnị isu

³⁸ Ịrẹyị ọnọnị ọ rẹ kanyị Ijeesu ayị ẹnẹmẹhị, dị ọ nọ ini ikuta ọnọọ nị. Ụsị ana a chị tụ́ ịnị ịrẹta ịzọọ vị nị, dị a sị ịrẹta gu ọọ irenu nị.

³⁹ Dị Ijeesu ka, “Sị ịrẹta ọnọọ kwooze nịnị!” Dị Ịmata, ọyịnyara ọza ene sú aanị ka, “Ho! Ananyị yị, aa dà agụ booro aanị, ọ! Ọ sị mẹ ẹkụhị ẹẹna ene e hụrẹ ne e!”

⁴⁰ Dị Ijeesu kà a yọ ka, “Aanịka mẹ yị vịdị sị ọọ kà a wụ ka u vee re igirima Ohomorihi, wàa sị ayị tụra mị?”

⁴¹ Dị ẹ sị ịrẹta ọnọọ kwooze nị. Dị Ijeesu sị eyi anị tụ́ ẹba, dị ọ ka, “Ọga, mâ kụ́ wụ avọ, agụvị ka wâ sị ụtọ tụ́ ịnị ịrẹyị amị.

⁴² Ma rẹ yẹ ka ụụ̄ sị ụtọọ tụ́ ịnị ịrẹyị amị pooro nị Ọsọnị vị ọnị maa kà, agụvị aza ana jẹẹ ịzẹnị aanị, dị ẹ̀ zụ dọ wụ́ ka ẹwa tụ́ mị vẹ ẹhẹ nị.”

⁴³ Ịjị ọ vavọọ sị kà, di o nowu tụ́ ẹba nị, dị ọ ka, “Ịrasarụsị! jịnẹ vẹ!”

⁴⁴ Dị ọza ọnọọ ene vịdị wusu jịnẹ vẹ, a mẹ̀ yị sị ịta sụ́ ọ ahụ ọnịrị ụvọ nị. Eyi anị vị ana a rẹ sị ịta para. Dị Ijeesu ka, “Ngwa a nịnị, dị ọ̀ọ na!”

⁴⁵ Aniju ọrụrụ-ọrụrụ ana vẹ ịdị Imeri, di e re ịsa oni Ijeesu mẹ, ệ sị ayị tụra a.

 gẹ eyi Ijeesu

⁴⁶ Dị aza ẹnyị ẹnịnị ẹnị si hu aa nọ ịdị Anihwarisi nịnị, dị ẹ na kà a yị wa ịsa oni Ijeesu mẹ nị.

⁴⁷ Dị ohirẹsụ ẹbanyị irehi Ohomorihi ọnịrị Anihwarisi nịnị kụ́ gụ, dị ẹ ka, “Sị a vọrọ ka ya mẹ? Ọnọrụ ọnọnị aa mẹ̀ ụkọrọ apọtẹrẹwa ọrụrụ-ọrụrụ aanị nị.

⁴⁸ Yàa maanị yị na a vọ, vị avaba aza aa dọ ọ wụ́ nị. Dị Aniroomi nịnị vẹ, dị ẹ va chaka irehi Ohomorihi ayị, dị ẹ wụ̀ avaba ayị và ha.”

⁴⁹ Â nyị ọza ịnya ẹnịnị ana aā hị́ Ikayahwasi, ọnị ọ vị ohirẹsụ ọbanyị irehi Ohomorihi ịrayị ọnọọ nị. Dị ọ kà a yị wa ka, “Ẹ yị nyị ịsị ụ yẹ nịnị vụrụ-vụrụ.

⁵⁰ Wáá yẹ nịnị ka â vọrọ ka ọza ịnyara òsú yị avaba aza. Ọnọọ ọ dahi hu ka à wụ̀ avaba anẹkụra nị.”

⁵¹ Ẹ yị vị ọnịrị eyi anị ọ kà ịrẹyị ọnọnị. Ọnị ọ vị ohirẹsụ ọbanyị irehi Ohomorihi ịrayị ọnọọ nị; agụvị avọọ aa kà ịsẹ ka Ijeesu vee súu yị avaba anẹkụra nị.

⁵² Ẹ yị rẹ vị ịrẹyị ẹnịnya kẹnẹ, ama ka ọ rẹ vaa kụ́ avaba aza Ohomorihi ana gara hi avaba aha gụ tụ́ aha ọnya.

⁵³ Hụrẹ ịhị ọnọọ dị ọdọvịdị Aniju nịnị aa gẹ eyi ka ẹnị ẹ̀ wụ Ijeesu nị.

⁵⁴ Agụvị avọọ Ijeesu ọ yị kụkụ zị ụsẹ chapaa ịnị akakana Aniju nịnị. Dị ọ hụụ ịzọọ, dị ọ nọ ẹkụra ọnya aanị ana gụrị ịnị avị, ana aā hị́ Ehwireemi nị. Dị ọnịrị ezirẹma anị na yà ịzọọ nị.

⁵⁵ Eche Aniju ana aā hị́ Eche Ọyịparahu ee vee tù. Dị aza ọrụrụ-ọrụrụ hụrẹ ẹkụra ẹnịnị, dị ẹ hịrẹ nọ Ijerusarẹmị ka ẹnị ẹ̀ na mẹ̀ ido ọyị mẹ ẹngụ ẹnịnị nị (anka ọda mẹ̀ kà a), di eche ò ve tù.

⁵⁶ Aza ee sì Ijeesu. E mè hi ini irehi Ohomorihi, dị ẹyaa kà a yị ẹngụ ka, “Si u ro nịnị? Wéé ro ka ọ vaa vẹ ini eche nịnị?”

⁵⁷ Ohirẹsụ ẹbanyị irehi Ohomorihi ọnịrị Anihwarisi nịnị ệ vịdị sị ọda mẹ ka àa nyị ọza ana yẹ ịzị Ijeesu yà, ọ̀ va kà a, agụvị dị ẹnị ẹ̀ zụ na za a.