Ịjọọnụ 10 - IWE ỌNỊNỊ

Ụhịrẹyị oseratẹmẹ

¹ Ijeesu ka, “Ịzẹyịza m maa kà a wụ nị, ọza ẹnẹ ẹ̀ yị zị oze obooro ngụ irehi ịzị aā kụ́ atẹmẹ hi, dị ọ na zị oze ọsa hịrẹ ngụ eehi nị, oyi obooro ọ́za ọnọọ vị nị.

² Ọza ana àa zị oze obooro ngụ irehi atẹmẹ, ọza ọnọọ ọ vị ọza ana aa tẹsị atẹmẹ obooro nị.

³ Ẹngụ ọza ọnọọ, ọza ene ee sere oze vaa na oze yọ. Atẹmẹ nịnị vaa wụ́ ọngwẹ anị, ọ màa hị́ wa ịrẹha, dị aa kụ́ waa nọ ẹhẹ.

⁴ Ọ̀ọ raà kụ́ wa hi ẹhẹ, dị ọ tụ́ ọvịdị ẹnịnị, dị atẹmẹ anị aa dụ ọọ ịrẹma, agụvị ka ệ yẹ ọngwẹ anị.

⁵ Àa vị ọzọgaa yọ, atẹmẹ anị ẹ yị vaa zẹẹ ka ẹnị ẹ̀ saasa a na, ama vi eyee zwee yọ nị, agụvị ka ẹnịnị ẹ yị yẹ ọngwẹ ọzọga.”

⁶ Ijeesu ô che ụhịrẹyị ọnọọ yị aza, ama ẹ yị yẹ ịsị aa sịị kà a yị ẹnị.

Iruvo ụhịrẹyị ọnọọ

⁷ Dị Ijeesu va kà a yị wa ka, “Ịzẹyịza m maa kà a wụ nị, ẹmị ọnọnị ọ vị oze irehi atẹmẹ nị.

⁸ Avaba aza ana vọ ana dọ ọvịdị amị vẹ, vị oyi obooro. Ama atẹmẹ nịnị ẹ yị sị ụtọ pe ịrẹyị ẹnịnị.

⁹ Ẹmị ọnọnị ọ vị oze obooro nị. Ọza ana àa zị oze obooro ọnọọ ngụ eehi, ọ vaa há. Ọ vaa ngụ eehi, dị aa jịnẹ, di ee re ịsa ana vaa sị ẹngụ anịị hunẹnẹ.

¹⁰ Oyi vị anaā vẹ kẹnẹ ka oni ò ve yi ịsa, dị ọnị ọ̀ wụ̀ ọza, di oni ò re du ịsa ha. Àa vị ẹmịị yọ, ẹmị vị ana vẹ ẹhẹ ka ma sị ẹhẹ obooro-obooro yị aza, ana ahịka ọza o yi zụ sị irenu juwe anị.

¹¹ “Ẹmị ọnọnị ọ vị ọza anaā tẹsị atẹmẹ ẹtẹẹtẹrẹ nị. Ọza anaā tẹsị atẹmẹ anị ẹtẹẹtẹrẹ vị anaā sịị ụhwẹ anịị tịtẹẹ yị atẹmẹ anị.

¹² Àa vị ọza ana a dọ ka òo sere atẹmẹ kẹnẹ yọ nị, ẹ yị vị ọza anaā tẹsị atẹmẹ ọ vị, ẹ yị rẹ vị ọnị ụvọta ọ nyị atẹmẹ ẹnẹẹ. Agụvị avọọ òo re ka akatapooro aa vẹ, dị ọ navọ atẹmẹ hi ẹtẹ, di o si zwe. Dị akatapooro ọnị kụkụ za atẹmẹ ẹnyị, dị ọ gara ana vọ và ha.

¹³ Ọza ana a vavọọ dọ ka òo sere atẹmẹ vị eneē zwe, agụvị ka vị a dọ ọ ụkọrọ kẹnẹ nị; ẹ yị nyị ịzị ịrẹyị atẹmẹ ẹnẹẹ gẹ ẹ.

¹⁴ Ama ẹmị ụvọta ọ vị ọza anaā tẹsị atẹmẹ ẹtẹẹtẹrẹ nị. Mâ yẹ aza amị, dị aza amị ẹnị rẹ yẹ ẹmị nị,

¹⁵ anka Áda amị mẹ̀ yẹ mị, dị ẹmị rẹ yẹ Ada amị. Mị vaa sị ụhwẹ amịị tịtẹẹ yị atẹmẹ amị.

¹⁶ Ma rẹ nyị atẹmẹ ọsa, ana ahịka e yi hi ini irehi atẹmẹ ọnọnị. Â nyị ka ma kụ́ wa vẹ, ẹnị rẹ vaa wụ́ ọngwẹ amị. Ọnya avaba ẹnịnị kụkụ vaa vị nị, ọza ịnya ọ vaa tẹsị ẹnịnị nị.

¹⁷ Ada amị ô sì ịrẹyị amị, agụvị ka ẹmị ụvọta ọ navọ ụhwẹ amị tịtẹ nị, ka ma rẹ varẹma sị ọọ.

¹⁸ Ẹ yị vị ọza aa dọ mị ụhwẹ, ẹmị ụvọta ọ hụrẹ ẹ ụvọ nị. Mâ nyị ụkata ọyịnavọ ụhwẹ amị tịtẹ, ma rẹ nyị ụkata ọyị sị ọọ varẹma. Ọda ana Ada amị mẹ mị ọ vị ọnọọ nị.”

¹⁹ Aniju nịnị ẹ rẹ kụ́ gà hi agụvị ịrẹyị ẹnẹẹ.

²⁰ Aza ọrụrụ-ọrụrụ ẹnịnị aa kà a ka, “Ộ nyị ụhwẹ echu, vi ee che uvu nị! Sị ẹ vẹ di u wee batọ ịrẹyị anị nịnị?”

²¹ Dị aza ẹnyị ẹnị raa kà a ka, “Wáá yẹ ka ẹ yị vị ịrẹyị ọza ana nyị ụhwẹ echu aa kà aanị! Echu ọ́ọ́ zụ há ogweyi eyi anị?”

Ọdọvịdị Aniju nịnị ê yi Ijeesu

²² Ụmẹ o si tù ẹnẹ ẹ sịị̄ tamayị ụmẹ ene e sị sị irehi Ohomorihi tụ́ irenyi yọ. Ijerusarẹmị ẹ yàā rị eche ọnọọ nị. Ụmẹ ọnọọ vị ụmẹ ọgụ.

²³ Dị Ijeesu aa zị ụsẹ ini irehi Ohomorihi ájẹhẹ Isoromọnị nị.

²⁴ Dị Aniju nịnị wara gụ kara a, dị ẹ ka, “Ịzị u vị ene ee sì ka yaa jẹẹ ne tù? Àa vị ẹwa vị Ikirisiti ọnọọ nị, wẹ rẹ̀ kụkụ kà a yị gedebee!”

²⁵ Dị Ijeesu tụ́ ohi, dị ọ ka, “Mâ vịdị sị ọọ kà a wụ nịnị, ama we yi sì ka wa dọ wụ́ nịnị. Ụkọrọ ẹbanyị-ẹbanyị ọnị mị hyakụ aa sị ịrẹha Ada amịị mẹ, vị onivenu ịrẹyị amị.

²⁶ Ama wẹ yị zẹẹ ka wa dọ wụ́ nịnị, agụvị ka wẹ yị vị atẹmẹ amị nịnị, anka m mẹ̀ vịdị kà a wụ nịnị.

²⁷ Atẹmẹ amị vị anaā wụ́ ọngwẹ amị, mâ yẹ wa, ẹnịnịị̄ dụ mị ịrẹma.

²⁸ Maa mẹ ka ẹnịnị ẹ̀ yàra pooro zịna-zịna; e mē vene vu ẹtẹ paa, ẹ yị nyị ọza ana rẹ nyẹngụ dọ wa hụrẹ mị ụvọ.

²⁹ Ada amị ana kụ́ wa chire mi ụvọ, o huna avaba ọza nị; ẹ yị nyị ọza ana zụ dọ wa hụrẹ Ada amị ụvọ.

³⁰ Ẹmịrị Ada amị vị ọnya.”

³¹ Dị Aniju nịnị rẹ raà kụ́ ụvọ kụ́ ịrẹta ka eni è ne e hi ọọ nị.

³² Dị Ijeesu ka, “Ma raà mẹ̀ ụkọrọ ozoza-ozoza éyi awụ nịnị ana Ada amị sị ụkata mị ka ma mẹ. Ye re ana a vọrọ ka we si ne mi ịrẹta ịnị ụkọrọ ẹnẹẹ nịnị?”

³³ Dị Aniju nịnị tụ́ ọọ ohi, dị ẹ ka, “Yẹ yị hụ agụvị ụkọrọ ozoza ọnyọọnyị ne wu ịrẹta. Ama yee sì ka ye ne wu ịrẹta, agụvị ka waa kà ịrẹyị odivii hi Ohomorihi. Ọza rị ẹyị ị́rẹsụ kẹnẹ ụ vị nị, ama wee sì ka wa sị ẹngụ awụ vara Ohomorihi.”

³⁴ Dị Ijeesu ka, “Â chẹrẹ tụ́ ịnị ọda awụ nịnị ka Ohomorihi ka: ‘Ẹwụ nịnị vị ene véné Ohomorihi.’

³⁵ Yâ yẹ ka ọza ọ yị zụ vara ịrẹyị ini Iwe Ohomorihi pooro. Aza oni Ohomorihi kà ịrẹyị Ohomorihii yị, Ohomorihi ộ kà a ka ê véné Ohomorihi.

³⁶ Àa vị ẹmịị yọ, Ada amị ọ nyị mị, dị ọ tụ́ mị vẹ ẹhẹ nị. Màa va kà a ka Ozi Ohomorihi mị vị nị, dị ụ ka m maa kà ịrẹyị odivii hi Ohomorihi nịnị nịị?

³⁷ Mẹ̀ yị mẹ̀ ụkọrọ ana Ada amị ka ma mẹ, asị ụ dọ mị wụ́ nịnị!

³⁸ Ama àa vị ụkọrọ Ada amị m maa mẹ̀ nị, wàa daka ka wẹ yị yaanị dọ mị wụ́ nịnị, â vọrọ ka wa dọ mị wụ́ nịnị agụvị ụkọrọ ẹbanyị-ẹbanyị ọnị maa mẹ̀. Ọnị ọ vaa mẹ ka wa yẹ pooro nịnị ka ẹmịrị Ada amị vị ọnya, ẹmịrị Ada amị ọ rẹ vabẹ.”

³⁹ Di e re yee sì ka ẹnị ẹ̀ za Ijeesu nị, ama dị ọ sị tụ̀ wa ụvọ nị.

⁴⁰ Dị Ijeesu rẹ varẹma nọ akẹnẹ Okuha Ịjọdanị, ịzị Ịjọọnụ vịdị yà aa mẹ ọyịhwenyii yị aza, dị ọ na yà ịzọọ nị.

⁴¹ Dị aza ọrụrụ-ọrụrụ rẹ ká a nọ ịzọọ nị. Dị ẹ ka, “Ịjọọnụ ọ yị mẹ̀ ụkọrọ apọtẹrẹwa, ama avaba ịrẹyị ọnị ọnọrụ ọnọnị kà vị ịzẹyịza.”

⁴² Dị aza ọrụrụ-ọrụrụ sị ayị tụra a ịzọọ nị.