Ịjọọnụ 1 - IWE ỌNỊNỊ

Ikirisiti ọ vị Ịrẹyị Ohomorihi nị

¹ Hụrẹ ụmọrụmọ, dị a va yẹ ka aa mẹ ẹhẹ, Ịrẹyị Ohomorihi hụrẹ yà ịzọọ nị. Ịrẹyị ọnọọ vị ana yà ịdị Ohomorihi, Ịrẹyị ọnọọ gẹdẹ-gẹdẹ vị Ohomorihi.

² Hụrẹ ụmọrụmọ ọnọọ, Ị́rẹyị ọnọọ hụrẹ yà ịdị Ohomorihi nị.

³ Ini oze Ịrẹyị ọnọọ Óhomorihi zị mẹ avaba ịsa nị. Ịnị avaba ịsa oni Ohomorihi tụ́ saka-saka ẹ yị nyị ikonya ẹnẹ ẹ̀ yị vị ini oze Ịrẹyị ọnọọ ọ yà tụ́ ọọ.

⁴ Ịrẹyị ọnọọ ọ mẹ ka ịsavị-ịsavị ẹ̀ yàra nị. Ọyịyàra ọnọọ aa sị ẹtohweyi zụ̀ aza nị.

⁵ Etohweyi ọnọọ aa zẹtẹ ịnị ịrahụ, ama ịrahụ o yi huna a.

⁶ Â nyị ọnọrụ ọnya aanị, oni Ohomorihi tụ́ vẹ. Ịrẹha anị ọ rị Ịjọọnụ nị.

⁷ Ịjọọnụ ộ vẹ ka ọnị ọ̀ dọ ivenu yị aza ini oze Etohweyi ọnọọ. Ọ va kà a, agụvị dị avaba aza ẹ̀ zụ zị oze ịnị ụvọ anị dọ ọ wụ́.

⁸ Ẹ yị vị Ịjọọnụ ọ vị Etohweyi ọnọọ, ama vị a tụ́ ọ ka ọ̀ dọ ivenu ịrẹyị Etohweyi ọnọọ yị aza nị.

⁹ Etohweyi obooro ana aa sị ẹtohweyi zụ̀ aza, aa vẹ ịnị ẹhẹ,

¹⁰ Ọza ana vị Etohweyi obooro ọnọọ ọ vavẹ ịnị ẹhẹ; ini oze anị Óhomorihi hyakụ yà mẹ ẹhẹ nị, ama anẹhẹ ẹ yị va yẹ ẹ.

¹¹ Ộ vẹ ịnị ẹkụra anị, ama aza anị ẹ yị va dọ ọ.

¹² Ama ọza tụra ọza ana àa dọ ọ, dị ẹ sị ayị tụra a nị, ẹnị ọọ̄ sị ọdaa yị ka ẹ̀ vara ezi Ohomorihi nị.

¹³ Ka aza ẹnẹẹ ẹ sị vị ezi Ohomorihi o yi véné, aza mẹ̀ẹ̄ ma ezi ana ahịka ọnọrụ ọnịrị ọnẹẹ ẹ tụra ụsụ anị nị. Ama Ohomorihi ọnị ụvọta ọ ma wa nị.

¹⁴ Ịrẹyị ọnọọ ộ vara ọzarẹyịrẹsụ, dị ọ ra ịnị akakana ayị yị ụmẹ chee nị. Yê re igirima anị ana vị igirima ana vọrọ tụra ọza ana vị ozi ikonya Ada anị kẹnẹ. Ộ nyị ayamva ẹnẹmẹhị, dị ọ rẹ vị ọnịzẹyịza nị.

¹⁵ Ịjọọnụ ộ vịdị kà ịrẹyị anị yị aza. Aa nọọ ka, “Ọza ọnị mị vịdị aa kà ịrẹyị anị yị, ka aa vẹ ị́rẹma amị, ama ọnị o huna mị nị, agụvị ka o si kù ọnị ọnị hụrẹ yà ịzọọ, dị a va yẹ ka aa ma mị.”

¹⁶ Agụvị ka ô sì ịrẹyị ẹnẹmẹhị, ộ mẹ̀ ọyịza yị avaba ayị; dị aa mẹ ẹyị ẹyịza irenyi-irenyi nị.

¹⁷ Ohomorihi ộ sị ọda zị oze ịnị ụvọ Imosiisi yị aza; ama ayamva ọnịrị ịzẹyịza vị oni Ohomorihi zị oze ịnị ụvọ Ijeesu Ikirisiti sị yị aza.

¹⁸ Ẹẹ̀ yị nyị ọza ene re Ohomorihi tụ́ eyi da. Ozi ikonya gene-gene ọnị ọnịrị Ohomorihi vị ọnya, dị ọ gụrị Ada anị ẹtẹẹtẹrẹ ọ kà a zụ̀ yị, Áda anị mẹmẹ yà nị.

Ịjọọnụ ọhwọzenyi ka ẹ yị vị ọnị ọ vị Ikirisiti

¹⁹ Aniju nịnị ene hi Ijerusarẹmị ệ tụ́ ohirẹsụ irehi Ohomorihi ẹnyị ọnịrị Anireevi nịnị ne tù Ịjọọnụ. Ẹ ka ẹ̀ họ̀ Ịjọọnụ ka ẹnẹ ọ vị ana vị da.

²⁰ Ịjọọnụ ọ yị kà a ka ọnị ọ yị tụ́ ohi ịrẹyị, ộ dọ irenu gedebee, dị ọ ka ẹ yị vị ọnị ọ vị Ikirisiti!

²¹ Dị ẹ yaa yịị họ̀ ọ ka, “Ẹnị ụ va vị? Ẹ wáá vị Erija nị?” Dị Ịjọọnụ re tụ́ ohi ka, “Mẹ yị vị Erija!” Dị aza ẹnẹẹ rẹ họ̀ ọ ka, “Ẹ wáá vị Ọnịsẹ ọnọọ nị?” Dị Ịjọọnụ kà: “Eyiye” nị.

²² Dị ẹ rẹ yaa yịị họ̀ ọ nị ka, “Ẹnị ụ va vị? Kà ẹ yị, dị ya yẹ ohi ana a vọrọ ka ya sị na yị aza ana tụ́ yị vẹ. Sị ụ zụ kà ini oze ẹngụ awụ?”

²³ Dị Ịjọọnụ tụ́ wa ohi ka ọnị ọ vị ọza ana Ayịsaya ọnịsẹ vịdị kà ịrẹyị anị ka, “Â nyị ọza ịnya aanị ana vaa yà ịnị ụnọmị ana aa nọọ ka: ‘Tenyi oze Ananyị yị tịtẹ yọ nịnị, tenyi oze anị, dị ọ̀ vọrọ ẹtẹẹtẹrẹ!’ ”

²⁴ Anihwarisi nịnị ẹ maanị tụ́ aza ne tù Ịjọọnụ nị.

²⁵ Dị ẹnịnị va họ̀ Ịjọọnụ kà: “Wàa ka ẹ yị vị ẹwa vị Ikirisiti, dị ụ wẹ̀ yị rẹ vị Erija, dị ẹ̀ yị rẹ vị ẹwa vị Ọnịsẹ ọnọọ nị, sị ẹ vavẹ dị ụ wa hụ́ aza enyi ẹdọwụ?”

²⁶ Dị Ịjọọnụ tụ́ wa ohi, dị ọ ka, “Ẹmị aa sị enyi mẹ ọyịhwenyii yị wụ nịnị; ama â nyị ọza ana yà ịnị akakana awụ nịnị, ọnị ụ wẹ̀ yị yẹ nịnị.

²⁷ Ọza ọnọọ mị ka aa vẹ ị́rẹma amị nị; mẹ yị hyakụ yà ọza ana a vọrọ ka ọ̀ ngwa adava hụụnị ahụ anị.”

²⁸ Avaba ịsa ẹnẹnị vị ana mẹ ẹkụra Ịbẹtanị, ana yà akẹnẹ Okuha Ịjọdanị ịzị Ịjọọnụ yà aa mẹ ọyịhwenyii yị aza.

Ịjọọnụ ọhwọzenyi ka Ikirisiti ọ vị Ozi Ohomorihi nị

²⁹ Eyinẹhẹ anị, Ịjọọnụ ô re Ijeesu, ọ màa vẹ ịdị anị. Dị ịjọọnụ ka, “Wee re Ozi Atẹmẹ Ohomorihi ana a vaa sị mẹ̀ ịsọvọ dị ọ̀ kụ̀ ịvị anẹhẹ kwooze!

³⁰ Ọza ọnị mị vịdị aa kà ịrẹyị anị yị ka: ‘Â nyị ọza ana aa vẹ ị́rẹma amị; ama oni o huna mị nị, agụvị ka o si kù ọnị ọ hụrẹ yà ịzọọ dị a va yẹ ka aa ma mị.’

³¹ Ẹmị nyẹmba ẹ yị vịdị yẹ ẹ; ama ma va sị enyi mẹ̀ ọyịhwọzenyi yị aza, agụvị dị à zụ sị ọọ zụ̀ ẹwụ nịnị Anisirẹrị.”

³² Ịjọọnụ ộ dọ ivenu tụ́ ọọ ka, “Mê re ka Ụhwẹ Ọnịnị ee chíi hụrẹ ẹbẹẹba vẹ anka arivadi avọọ, dị ọ va yà a ịrẹsụ nị.

³³ Mẹ yị vịdị yẹ ẹ, ama Ohomorihi ana tụ́ mị ka maa sị enyi mẹ ọyịhwenyii yị aza, ộ vịdị kà a mị ka, ‘Ọza oni u wèe re ka Ụhwẹ Ọnịnị ô chí vẹ, dị ọ va yà ịrẹsụ anị nị, ọza ọnọọ gẹdẹ-gẹdẹ ọ vaa sị Ụhwẹ Ọnịnị hụ̀ aza mẹ enyi nị.’

³⁴ Ma si oo re, mâ dọ ivenu tụ́ ọọ ka ọnị ọ vị Ozi Ohomorihi nị.”

Ezirẹma ịpaapa Ijeesu

³⁵ Eyinẹhẹ anị, dị Ịjọọnụ ọnịrị ezirẹma anị ẹẹva rẹ jẹẹ ịzọọ nị.

³⁶ Ị́jọọnụ mè re ka Ijeesu aa parahu, dị ọ rẹ ka, “Wee re Ozi Atẹmẹ Ohomorihi!”

³⁷ Ezirẹma ẹyịva Ịjọọnụ ana jẹẹ ịzọọ ệ wụ́, Ị́jọọnụ mẹ̀ vavọọ kà, dị ẹ saasa Ijeesu aa na nị.

³⁸ Dị Ijeesu kana eyi, di o re ka ẹyaa dụ ọnịị vẹ nị. Ộ họ̀ wa ka, “Si u wee sì nịnị?” Dị ẹnịnị ka, “Iraabi, ịzị ụ ra?” (Iruvo “Iraabi” ọ vị “Iticha”.)

³⁹ Dị Ijeesu kà a yị wa ka, “Ve re e nịnị!” Dị ẹ na, di e ne re ịzị Ijeesu ra nị, dị ẹnị rị ọ dudu yà ịzọọ ịhị ọnọọ nị. Ụmẹ ọnọọ vị ẹhụụ ụmẹ agogo ẹẹna oruva.

⁴⁰ Ọnyara ịnị aza ẹyịva ẹnẹẹ ana wụ́ ịrẹyị Ịjọọnụ dị ẹ saasa Ijeesu, vị Andụrụ, ọyịnyara Ịsayịmọnị Ipita.

⁴¹ Andụrụ ộ vịdị ne sì Ịsayịmọnị ọyịnyara anị. Dị ọ kà a yọ ka, “Ya sị Imesaya ọnọọ re, ọ!” Iruvo Imesaya ọ vị Ikirisiti nị.

⁴² Dị Andụrụ sị Ipita vẹ ịdị Ijeesu nị. Ịjị Ijeesu re e, dị ọ kà a yọ ka, “Ẹ wa vị Ịsayịmọnị ozi Ịjọọnụ nị. Ẹwa kụkụ rẹ vaa rị Ikehwasi nị.” (Iruvo “Ikehwasi” ọ vị “ịrẹta” nị.)

Ijeesu ọ́ hị́ Ihwiripi ọnịrị Inatanẹrị

⁴³ Eyinẹhẹ anị, dị Ijeesu ka ọnị aa nọ Igariri nị. Ô re ọza ịnya aanị ana aā hị́ Ihwiripi. Dị Ijeesu kà a yọ ka, “Waa dụ mị ịrẹma!”

⁴⁴ Ihwiripi vị Anịbẹtịsayịda, ẹkụra Andụrụ ọnịrị Ipita.

⁴⁵ Ihwiripi oni o re re ọza ịnya aanị ana aā hị́ Inatanẹrị. Dị Ihwiripi kà a yọ ka, “Ọza oni Imosiisi chẹrẹ ịrẹyị anị tụ́ ini iwe ọda, dị ọnịsẹ nịnị ẹnị rẹ chẹrẹ ịrẹyị anị, ye si o re. Ọnị ọ vị Ijeesu Anịnazarẹtị, ana vị ozi Ijosẹẹhụ nị.”

⁴⁶ Dị Inatanẹrị ka, “Aanịka â nyị ịsa ozoza ana zụ hụrẹ ẹkụra Ịnazarẹtị vẹ?” Di Ihwiripi kà a yọ ka, “Vẹ, di u we ve re e!”

⁴⁷ Ịjị Ijeesu re ka Inatanẹrị aa vẹ ịda anị, di Ijeesu kà ịrẹyị ini oze anị ka, “Anisirẹrị obooro yọ! Ọnịzẹyịza obooro ọ vị̀ nị.”

⁴⁸ Dị Inatanẹrị họ̀ ọ ka, “Ho! Ịzị ụ yà yẹ mị?” Dị Ijeesu tụ́ ohi, dị ọ ka, “Mê re wu, ụ mẹ̀ yaayịtẹ íruvo ọchị ihwigi, di Ihwiripi va hị́ wụ.”

⁴⁹ Dị Inatanẹrị tụ́ ohi, dị ọ ka, “Ọga, ẹwa vị Ozi Ohomorihi nị. Ẹ wa rẹ vị Ohinọyị Anisirẹrị nịnị nị.”

⁵⁰ Dị Ijeesu tụ́ ọọ ohi, dị ọ ka, “A vị agụvị ka mâ kà a ka mê re wu íruvo ọchị ihwigi, ọ va mẹ ka wa dọ wụ́? U vee re ịsa ana banyị huna ẹsẹnị.”

⁵¹ Dị Ijeesu rẹ kà a yọ ka, “Ịzẹyịza m maa kà a wụ nị: U vee re ka ẹbẹẹba ộ na hi ẹtẹ, dị anggẹẹrị Ohomorihi aa vaa hịrẹẹ vaachi ịrẹsụ ẹmị Ozi ọza onigirima.”