Ijeremaya 9 - IWE ỌNỊNỊ

¹ Ijeremaya ka, aa yẹ, ẹyị anị oo và enyi anka enyi anaa tụ̀ hụụnị eteesu avọọ. Dị ọnị oo jị òrèrè pooro kẹnẹ ọọdụ ọnịrị ịrahụ, agụvị aza anị ana a wụ̀ ha aanị.

² Ọ kà aayẹ ọnị ọ̀ nyị aha tụ ịnị ụnọmị ịzị anusoze nịnịị chí. Ọnị sị para aza anị hu dị ọnị ọọ nọ ịzọọ. Avaba ẹnịnị vị ọsẹrẹka. Ọkọnị anarịmamẹ ịzẹyịza ẹ vị nị.

³ Ẹnịnị venee ne ịrarẹ ẹ nịnị tịtẹ ò yị cheeche Irikichi ẹ yaa mẹẹ ngụ ẹkụra ẹnịnịị zị nị; ẹnịnị ẹ ma ka ịzẹyịza. Ẹnẹyịmavara kà, aza anị vanaa hụrị ụvọ ebira odivi ẹnyị dị ẹ yaa sị ọsa. Ẹnịnị ẹ yị yẹ ọnị.

⁴ Ọzọza ọ sị ụvọ za ẹngụ anị ịnị ụvọ ọta anị o; dị asị a nyị ọza ana sị ayị tụra ọza ka ọnịrị ọ ọọ vị ẹyịnyara. Ka ẹyịnyara vene kuku e vene ẹngụ anka Ijekọvụ avọọ. Dị ọzọza kuku e du ọnọhụva anịị zị nị.

⁵ Ọta-ọta venee vene ẹngụ; ẹ yị nyị ọza anaa kà ịzẹyịza. Ireche oyi che vị ẹnẹ kọsẹ anị. Ẹnịnị ẹ ma và hụụnị ebira odivi ọyị mẹ.

⁶ Ẹnẹyịmavara kà ẹvaya vị ọnị ẹ yaa mẹẹ yị ẹngụ tụra ẹngụ tụra ẹngụ, dị ẹ vavọọ ree vene ẹngụ nị. Ẹnịnị ee yi ka ẹnị ẹ yị yẹ ọnị.

⁷ Avọọ, Ẹnẹyịmavara Ochẹtẹẹngụ ka, re, ọnị vee tenyi aza anị ka ẹ zoza hu avọọ anka a mẹẹ tenyi enyusẹ avọọ, dị ọnị ọ̀ zama wa re. Ọ kà, aza anị ẹ sị odivi mẹ, ọnị mẹ vaa mẹ wa.

⁸ Ịrẹyị irenu ẹnịnị vị ana sị mẹẹ anka ọpa anaā wụ̀ ọza. Ẹngwọọrọ-ẹngwọọrọ ọzọza e sii pe ọnọhụva anị kà ịrẹyị nị, ama ịrẹyị odivi vị ẹnẹ sị tụ ịnị ịnẹ ee be e.

⁹ Ọ kà, aanị ka ẹ yị vọrọ ka ọnị ọ hụvị ẹsẹnị sị ụya rị wa? Aanị ka ẹ yị vọrọ ka ọnị ọ̀ họ̀ oponu ịrẹyị ẹngụ anị ịrẹsụ ẹngụ anẹkụra ẹnẹnị?

¹⁰ Ẹnẹyịmavara kà ọnị vaa hụvị ataba nịnị ọnịrị ịzị ịsụpa nịnị naa rịị jị òrèrè, agụvị ka ẹ sị wụ. Ọza ẹ yị kụkụ zị avọọ para hu. Ọza ẹ yị kụkụ wụ̀ ịsụpa nịnị owu; inomi nịnị ẹnịrị uye ịnị avị ẹ kụ zwe si hu.

¹¹ Ọ kà, Ijerusarẹmị vị ọnị ọnị vaa jị eburu dị ahịka irezi ịnị avị ẹ kụkụ aa ngụ ịnị anịị zị ụmẹ tụra ụmẹ nị. Ọnị vaa tụ ẹkụra ene hi Ijuda osusu, dị ẹ yị nyị ọza ana kụkụ ra ịnị anị.

¹² Ijeremaya ka ọnị ộ họ̀ Ẹnẹyịmavara use ka, sị ẹ vẹ dị ọ maanị vu ẹkụra ọnọnị ẹtẹ dị ọ kụkụ tịtẹ ụnọmị avọọ? Sị ẹ vẹ dị ẹ yị kụkụ nyị ọza anaa zị oze ịnị anịị parahu? Áá nyị ọza ana yẹ ịrẹyị ana yẹ ọsọnị? Áá nyị ọza ọnị Ẹnẹyịmavara kà a zụ ka ọ vaa kà a yị aza ana vọ kẹ?

¹³ Dị Ẹnẹyịmavara tụ́ ohi ka, ịsị ẹ kụ avaba ọsọnị vẹ ọ vị ka, aza anị ệ hụrẹ ịrẹyị anị ụvọ tịtẹ nị. Ẹnịnị ẹ yị wụ́ chire ọnị. Ẹnịnị ẹ yị saasa ịrẹyị anị.

¹⁴ Ama ẹnịnị ệ me ayị ọkatẹngụ, dị ayị ẹnịnị kẹnẹ ẹ yaa saasa nị. Ẹnịnị ẹ naa saasa ori ana aā hị́ Ịbaarị anka ada ẹnịnị mẹ kọ ọ yị wa.

¹⁵ Avọọ, sị ụtọ pe ẹtẹ dị wa wụ ịsị ọnị, Ẹnẹyịmavara Ochẹtẹẹngụ, Ohomorihi Anisirẹrị nịnị vaa mẹ; ọnị vaa sị ịsa ọnyịrẹyị yị aza anịị rị, dị ọnị sị enyi ana nyị ẹchịpa yị wa ka è hú ọ.

¹⁶ Ọ kà ọnị vaa gara wa hi ịnị akakana aza ọnị ẹnịrị ohiku ẹnịnị ẹ yị vịdị yẹ. Ọnị vaa kụ ịrẹkụ tu wa, dị ọnị dụ wa nee tu ịjị ọnị ọọ sị wa vú ẹtẹ saka-saka.

¹⁷ Ẹnẹyịmavara Ochẹtẹẹngụ ka rò ịrẹyị avaba ịsị anaa mẹ nịnị aanị. Na dọ anyẹnẹẹ ana yara sụ́ ùnè ẹtẹẹtẹrẹ vẹ nịnị, dị ẹ̀ va jị òrèrè yị aza ẹnẹnị.

¹⁸ Kàa ka ụsẹ ọ̀ hụ wa ịra vẹ, dị ẹnịnị ẹ vaa jị òrèrè yị ẹnị, naa ngụ ịjị eyi ẹnịnị ọọ ta hí yị ẹgọ dị ọ kụkụ è sì ẹnị ẹẹ ma jị òrèrè nị.

¹⁹ Ẹ ka waa wụ a maa jị òrèrè. Ẹnị e si vu o! Asị ụhị mẹ nyị ẹnị saka-saka. O si tu ka ẹnị ẹ̀ hụrẹ ẹkụra ẹnịnị, agụvị ka a sị irehi ẹnịnị wú va hi ẹtẹ.

²⁰ Ijeremaya ka, dị ọnị ka, ẹwụ nịnị anyẹnẹẹ ẹ wụ́ ịrẹyị ọnị Ẹnẹyịmavara aa kà: Na kọ ọ yị ezi anẹẹ awụ nịnị a mẹmẹẹ jị òrèrè, dị waa rẹ kọ ọ yị ẹngụ nịnị a mẹmẹẹ jị ahẹ izoku nịnị.

²¹ Iswọọza ọ ra ngụ tu yị zị oze ịnị ozokete, ọ sị ngụ ịnị eehi ohinọyị nịnị. Ọ sị ezweyi wụ̀ ha utoze, ọ sị ezwọọmụha nịnị wụ̀ ha ịnị orere.

²² Ọ kà Ẹnẹyịmavara kà ọnị ọ̀ ka a ka: aza vị ene vee su vaa gwẹtẹ anka ịhyẹrẹ ịsụpa ana a na va hi ịnị aarẹ avọọ. Vị e vee hi ẹtẹ anka akụ ana jị aza anaa mẹ ịsị ịnị aarẹ ụvọ, ọnị ọza ee re ọza kụ gụ avọọ nị.

²³ Ẹnẹyịmavara kà, asị ọyẹrẹyị nịnị sị ịrẹyọyẹ ẹnịnị wo oto. Asị aza ana nyị ụkata sị ụkata ẹnịnị wo oto. Dị a sị opisa nịnị sị ogu ẹnịnị wo oto.

²⁴ Ama àa nyị ọza enee wo oto, oo wo oto ka ọnị ọọ yẹ ọnị Ohomorihi, ka vị ọnịị̄ sì ịrẹyị ọza pooro nị. Ịzẹyịza ọnịrị ana vọrọ ọnịị mẹ nị. Ịsa ẹnẹnị oo hine ọnị nị.

²⁵ Ẹnẹyịmavara kà, ụmẹ aa vẹ ọnị ọnị vaa sị ụyaa rị aza ana a jị ụvẹvẹnẹ ama dị ẹnịnị ẹ yị mẹ̀ ebira aza ana jị ụvẹvẹnẹ.

²⁶ Anijipiti nịnị, Anijuda nịnị, Anedomi nịnị, Anaamọnị nịnị, Animowabi nịnị ẹnịrị avaba aza ana ra hi ịnị ụnọmị rọnyị-rọnyị. Ka avaba aza ẹnẹnị ẹ yị jị ụvẹvẹnẹ, dị avaba Anisirẹrị nịnị ẹnị ẹ̀ yị rẹ mẹ̀ ebira aza ana a jị ụvẹvẹnẹ nị.