Ijeremaya 7 - IWE ỌNỊNỊ

Ijeremaya ộ kà ịrẹyị Ohomorihi ini irehi Ohomorihi

¹ Ẹnẹyịmavara ọ maanị tụ Ijeremaya ụtụ nị.

² Ọ kà, ọ̀ na jẹẹ oze ọnị Anijuda nịnịị zị ngụ ịnị irehi Ẹnẹyịmavara vaa hẹkẹ ẹ, dị ọ̀ kà a yị wa ka,

³ Ẹ̀ wụ́ ụtụ ọnị Ẹnẹyịmavara Ochẹtẹẹngụ Ohomorihi Anisirẹrị nịnị tụ; ọ ka, vara ebira awụ nịnị dị wa hụụnị ịsa ọnị waa mẹ nịnị aanị, ọnị vaa navọ ka wa ra ịnị ẹtẹ ọnọnị nịnị.

⁴ Hụụnị ịrẹyị evene ọnị aza aa kà a wụ nịnị ọ̀yị dọ wụ. Ẹ ka, agụvị ka Irehi Ẹnẹyịmavara yịị ịda awụ nịnị, wa sị ha nịnị.

⁵ Wàa vara ebira awụ nịnị dị ụ hụụnị ịsa ọnị waa mẹ nịnị nị, waa mẹ ịzẹyịza hi ẹngụ nịnị;

⁶ Wẹ yị kụkụ mẹ ẹvaya yị azọga nịnị, ezi-oku nịnị avị osoku nịnị, dị wẹ̀ yị kụkụ wụ̀ ọza ẹnị ẹ yị nyị ịsị ọ mẹ ịzẹnị nịnị nị; wẹ yị kụkụ na hẹkẹ ori nịnị ene vee vu u nịnị ẹtẹ.

⁷ Ịjọnọọ ọnị vaa navọ ka wa ra nịnị ịnị ẹtẹ ọnọnị ọnị ọnị sị yị ohiku awụ nịnị pooro zịna-zịna.

⁸ Ẹnẹyịmavara kà, wee re, wa raa dọ ịrẹyị evene wụ nịnị tụ ịnị osusu.

⁹ Ọ kà, á vị wee ne sị oyi yi nịnị di ụ sị ọza wụ̀ nịnị nị, waa na raa sẹ̀ ịrẹka nịnị di ụ sị eku ireche hị́ nịnị nị, waa na raa mẹ̀ ịsọvọ yị ori anaā hị́ Ịbaarị nịnị dị ụ na raa hẹkẹ ori ọnị wẹ yị vịdị yẹ nịnị nị,

¹⁰ dị ụ varẹma va jẹẹ ọvịdị anị nịnị ịnị irehi ọnọnị ana a yaa hị́ ịrẹha anị dị ụ ka: Wa sị ha nịnị? Wa sị ha nịnị ka wa naa mẹ̀ ịsa anaa nyị ọnị ịhyẹrẹ aanị waa yọ?

¹¹ Ẹnẹyịmavara kà, vị irehi anị ọnọnị waa sị vara aha ọyị tẹ̀ yị anako nịnị nị? Ọnị ee re avaba ịsị waa mẹ nịnị o.

¹² Ọ kà, nọ ẹtẹ Isiiro nịnị booro aanị, ịzị a vịdị yaa hẹkẹ ọnị ịpaapa dị we re nịnị ịsị ọnị sị ọ mẹ agụvị ebira odivi Anisirẹrị nịnị.

¹³ Ẹnẹyịmavara kà, ụ mẹ maanị aa yịị mẹ̀ ebira odivi ọnọnị nịnị, ọnị ộ ka ịrẹyị wụ nịnị pooro, ama ụka wẹ yị wụ nịnị, ọnị ộ hị́ ụ nịnị ama we yị tụ́ ohi nịnị.

¹⁴ Avọọ, ịsị ọnị mẹ Isiiro avọọ, vaa mẹ irehi anị ọnọnị ọnị ụ vavọọ sị ayị tụra nịnị nị. Ọ kà, ọnị ọ vịdị sị ịzọọ yị ẹwụrị ohiku awụ nịnị nị.

¹⁵ Ọ kà vị ọnị vaa dụ wụ nịnị hụrị ẹngụ anka ọnị mẹ mẹ ẹyịnyara awụ nịnị, Anehwireemi nịnị avọọ nị.

Anijuda ệ yịị hụụnị ori ọyị hẹkẹ

¹⁶ Ọ kà, agụvị avọọ, asị ọnị Ijeremaya hụvị aza ẹnẹnị mẹ̀ aduwa. Asị ọnị hụvị ẹnịnị da ịpẹ yị ọnị agụvị ka ọnị ẹ yị vaa wụ̀.

¹⁷ Ọ kà, aanị ka ọnị e yi re ịsị aza ẹnẹnị aa mẹ avaba ẹkụra ene hi Ijuda ọnịrị avaba oze ene hi Ijerusarẹmị?

¹⁸ Ezweyi ẹẹ na tọ ọkụ gụ, dị ada ẹnịnị sị ka ịra, dị anyẹnẹẹ ẹnịnị po ayị dị ẹ sị jị akara yị ịsị ẹ ka ọọ vị ohinọyị anyẹnẹẹ ana ya ẹbẹẹba. Ẹnịnị ẹẹ rẹ sị ehe dị ẹ sị mẹ̀ ịsọvọ yị ori nịnị ọyị mẹ ayị kụ ọnị.

¹⁹ Ẹnẹyịmavara kà, ọnị ẹnịnị waa vana ka ẹnị aa mẹ ayị kụ nị? Ọ kà, ẹngụ ẹnịnị ẹ yaa zama nị. Ẹngụ ẹnịnị ẹ yaa mẹ̀ ụhị nyị nị.

²⁰ Avọọ, Ẹnẹyịmavara Ochẹtẹẹngụ ka, ọnị vaa sị ọyịkụ anị zụ aza ana vẹ ịnị irehi anị ọnọnị ẹtẹẹtẹrẹ ọ ka, aza ẹnịrị uye nịnị, ọchị ịnị avị nịnị ọnịrị ịsa ịnị aarẹ vị ọnị ọnị vaa mẹ ọyịkụụ yị anka ịra anaa zá dị ọza e yi zụ mi ọ avọọ.

²¹ Ẹnẹyịmavara Ochẹtẹẹngụ, Ohomorihi Anisirẹrị nịnị ka, ẹwụ nịnị aza anị ọ sị ịsa ịsọvọ ọnị ụ rị ịra nịnị vaka ịsọvọ awụ nịnị ana vọ, dị wa naa rị avaba anị nịnị.

²² Ka ọnị mẹ kụ ohiku awụ nịnị hụrị ẹtẹ Ijipiti aa vẹ, ọnị kà ịrẹyị yị wa. Ẹ yị vị ịsọvọ ọyị mẹ dị aa rị ẹnyịị ịra kẹnẹ ọnị mẹ ọda anị yị wa.

²³ Ọ kà, ama ọnị ộ mẹ̀ ọda yị wa ka: ẹnịị ẹẹ wụ́ chire ọnị, ka ọnị vaa vị Ohomorihi ẹnịnị, dị ẹnịnị vị aza anị, ọnị ộ ka ẹ yị wa ka, ẹnịnị ẹẹ mẹ ẹhẹ ẹnịnị ọnị mẹ mẹ̀ ẹ ọda yị wa, ka ọ va rọ wa ẹngụ nị.

²⁴ Ama ẹnịnị ẹ yị wụ́ chire ọnị, ẹnịị ẹ yị wụ́ ịrẹyị anị. Ẹnịnị ệ mẹ ayị ọkatẹngụ, dị ahịka ịsị ayị odivi ẹnịnị ộ kà yị wa kẹnẹ ẹ yaa mẹ nị. Ana vọrọ ka ẹ̀ sịị kà a tụ ọvịdị dị ahịka vee divi yị wa hu avọọ nị.

²⁵ Ẹnẹyịmavara kà, hụrị ụmẹ ọnị ohiku awụ nịnị sị hụrẹ Ijipiti pooro va ngụ ajịnị, eyinị-eyinị ọnị aa tụ ọnụtụ anị nịnị ana vị ọnịsẹ hi ụ nịnị nị.

²⁶ Ama ẹ yị nyị ọza ana wụ́ ịrẹyị anị. Ayị awụ nịnị ộ katẹngụ, dị ahịka udivi ọnị waa mẹ nịnị o huna ohiku awụ nịnị nị.

²⁷ Ẹnẹyịmavara ộ kà a yị ọnị Ijeremaya ka ọnị ọọ maanị na kà avaba ịrẹyị ẹnẹnị yị aza anị, ẹnịnị ẹ yị vaa wụ̀; ọnị ọ̀ọ hị́ wa, ẹnịnị e yi vee tụ́ ohi.

²⁸ Avọọ, ọnị ọ̀ kà a yị wa ka ẹnịnị vị anẹkụra ẹnị ẹ̀ yị ma wụ́ ịrẹyị Ohomorihi ẹnịnị Ẹnẹyịmavara. Ẹnịnị ma kọ ịrẹyọyẹ aa daka sị ụya rị wa. Ịzẹyịza ộ ta, aza ẹ yị kụkụ ka ịzẹyịza.

Ebira edivi ana aā mẹ̀ ịnị inoze Ihinọmị

²⁹ Ọ kà, ẹwụ nịnị Anijerusarẹmị ọ̀ kụ ịrẹsụ awụ nịnị. Na yà ịnị ataba dị wa jị òrèrè nịnị agụvị ka Ẹnẹyịmavara aa kụ ayị hi anụmọgọnị. Ọ sị wa yi hụụnị aza anị.

³⁰ Ẹnẹyịmavara kà Anijuda nịnị ệ sị ịsị odivi mẹ. Ẹnịnị ẹ raa sị ori ẹnịnị anaa nyị ọnị ịhyẹrẹ va tụ ịnị irehi anị. Ẹ sị irehi anị du ẹngụ.

³¹ Ẹnịnị ệ nọ ịnị akakana ataba ẹẹva ịzị aā hị́ Ihinọmị, dị e nee hì ụta ịsọvọ ịzị ẹ vaa sị ezi ẹnịnị mẹ̀ ịsọvọ dị ẹ rị ọ ịra tụ ịzọọ nị. Ụta ọnọọ ẹ yaa hị́ Itohwẹtị nị. Ọ kà, ọnị ẹ yị kà a yị wa ka ẹ̀ vavọọ mẹ, ẹngụ ịsa ẹnẹẹ ẹ ị hyakụ vẹ ịnị ayị anị bẹẹ.

³² Avọọ, ụmẹ aa vẹ ọnị ọza ẹ yị ma vana hị́ ọ Itohwẹtị à vị akakana ataba ẹẹva Ihinọmị, ama dị a hi ka ịnị akakana ataba ẹẹva ana aā wụ̀ aza aa hị́ ọ nị. Ka ẹnịnị vee ne oku ịzọọ pooro nee tu ka asị e kụkụ re aha ne oku tụ.

³³ Ọ kà, inomi nịnị ẹnịrị uye ịnị avị nịnị ẹ vanaa rị oku ẹnịnị nị. Ẹ yị vaa nyị ọza ana aa dụ wa kwooze.

³⁴ Aza vaa hụ́ hụụnị ẹkụra. Ẹnẹyịmavara kà, ọnị vaa mẹ ka asị a kụkụ wụ aahẹ ka aza aa mẹ ayohine ọnịrị ịrajẹ. Dị ọnị mẹ ka asị aza kụkụ zụ jẹ ka vị ẹnị aa nyị ẹngụ nị.