Ijeremaya 6 - IWE ỌNỊNỊ

Ọnịvị nịnị ẹ raà ta kara Ijerusarẹmị

¹ Ẹwụ nịnị Anịbẹnjamịnị, ọzọza o zwe na tẹ̀ o! Zwe hụrẹ Ijerusarẹmị nịnị. Hú ịkakanchị nịnị ẹtẹ Itekowa dị wa nọ̀ọ nịnị ẹtẹ Ịbẹtị Ihakeremi. Kà ẹ yị wa ka, ịsa odivi ene vee du ịsaa ha ẹtẹẹtẹrẹ vaa hụrẹ eyi ẹbẹẹba vẹ.

² Ẹnẹyịmavara kà ẹkụra oo zoza ẹtẹẹtẹrẹ ama vị ọnị vee vu ọ ẹtẹ nị.

³ Ohinọyị nịnị beri isoja ẹnịnị vaa vẹ vaa jị udii tụ ịzọọ. Ẹnịnị vaa jị ajẹngụ ẹnịnị kara a, dị ọzọza kụ udi tụ ịzị èe zee e eyi.

⁴ Ẹnịnị vaa kà a ka, è tenyi ẹngụ dị ẹnị ẹ kụ ịrẹkụ ne tu Ijerusarẹmị ọọdụ. Ama dị ẹ ka ụmẹ ọ sị para hu, ẹtẹ ọ sị nyima ee hozi.

⁵ Avọọ, à kwẹẹtẹ ịrahụ dị ẹnị ẹ̀ kụ ịrẹkụ na, dị ẹnị è ne vu avaba irehi ọnị isoja Anijerusarẹmị nịnị hi ee sere ẹtẹ.

⁶ Ẹnẹyịmavara Ochẹtẹẹngụ ka, ohinọyị ẹnẹnị ẹ̀ má ọchị ene hi Ijerusarẹmị, dị ẹnịnị ẹ̀ sị mẹ ẹnya ịrẹkụ. Ẹnịnị ẹ̀ kụ ezi gụ, dị ẹ̀ sị mẹ oze na hịrẹ ọvọ Ijerusarẹmị. Ọ kà, aa nyị ka ọnị ọ̀ sị ụya rị Anijerusarẹmị nịnị agụvị ka ẹvaya kẹnẹ ẹ yaa mẹẹ yị ẹngụ ịzọọ nị.

⁷ Enyi meē hi ẹtẹ ịnị ịkangga avọọ, avọọ ebira odivi-odivi mẹ gwẹtẹ Ijerusarẹmị nị. Ebira ụkata-ụkata ọ̀yị sị mẹ ịrẹyị ọnịrị ịsa oyi du ha aa wụ́ ịzọọ nị. Ụkụ ọnịrị ụnava kẹnẹ ọnị ee re ịzọọ nị.

⁸ Ọ kà, ẹwụ nịnị Anijerusarẹmị ọ̀ jẹẹ, dị ẹngụkata ẹnẹnị ọ̀ kà wụ nịnị ọ̀nọ̀, ka ẹyị vị avọọ ọnị va hụrẹ ẹwụ nịnị ụvọ. Ọnị vaa jị ẹkụra awụ nịnị eburu dị ẹ yị kụkụ nyị aza vụrụ-vụrụ.

⁹ Ijeremaya ka, Ẹnẹyịmavara Ochẹtẹẹngụ ô kà a yị ọnị ka, ọnịvị ẹnịnị vaa hụ́ azaa hụrị Ijerusarẹmị saka-saka anka ụbazị ana a tọ̀ọ́ avaba ẹtụtụ ọchị anị avọọ. Ọ kà ẹ̀ varẹma và tụra a anka aza anaa tọ̀ ọ ẹtụtụ ọchị avọọ.

¹⁰ Dị ọnị tụ́ ohi ka, ọnị ọ̀ọ kà ịrẹyị yị wa, è naa wụ? Ayị ẹnịnị ọọ katẹngụ, ẹnịnị ee yi ka ẹnị ẹ yị wụ ụtụ ọnị ụ tụ. Ịrẹyị awụ vị ọnị ọnị ọ̀ọ sị ka, dị eyee sịị nyinyi.

¹¹ Ọnị ka, ọnịrị ọyịkụ Ẹnẹyịmavara ọ vị booro aanị nị. Ọnị ẹ yị kụkụ zụ zaa. Dị Ẹnẹyịmavara va ka ẹ yị ọnị ka, ọnị ọ̀ và a ku ezweyi-ezweyi ene hi ịnị orere ọnịrị ezwọọmụha nịnị ịzị ẹẹ kụ ẹngụ gụ hi. Ọ kà, ẹvarose vị ana vaa za, azọkụ ene si bo nyẹmba ẹ yị vaa ha.

¹² Ẹnẹyịmavara kà ọnị vaa sị ụyaa rị Anijerusarẹmị nịnị. Ọnị vaa sị irehi ẹnịnị ọnịrị aarẹ ẹnịnị beri ose ẹnịnịị yị ọza ẹnẹsa.

¹³ Ọ kà, hụụnị ozweyi ẹnịnị na ngụ azọkụ ẹnịnị vị anaa sị asuvuu sị ẹkẹhị. Ọnịsẹ ẹnịnị ọnịrị ohirẹsụ irehi Ohomorihi ẹnịnị vị anaa mẹ ọzaa rị.

¹⁴ Ụvọ ẹnẹ yaa sị za aza anị ịnị ụnava ẹnị ẹ tụ̀ vị ana sị mẹ anka ọza oo rere họ̀rọ ẹngụ avọọ. Ịrẹyị yị tịtẹ ama dị ẹ yaa kà a yị aza ka ẹ yị nyị ịrẹyị.

¹⁵ Ẹnẹyịmavara kà, ụhị waa vanaa nyị wa ka ẹnị ệ mẹ ụnọ da? Ịzị ọ na vị, ụhị ọ ma nyị wa vụrụ-vụrụ ụhị ọ ma nyị wa dị è sị eyi tẹ ka aza ee re nị. Avọọ ụmẹ ọnị ọnị ọọ vaa sị ụyaa rị Anijerusarẹmị nịnị, ẹnị nyẹmba vị ana vaa sẹ ẹdụ anka aza ana vọ. Ịsị ẹ vaa za ẹhẹ ẹnịnị ịrẹsụ ọ vị ọnọọ nị.

Anisirẹrị nịnị ê yi oze Ohomorihi tịtẹ

¹⁶ Ẹnẹyịmavara ộ kà a yị aza anị ka, jẹẹ ịzị oze va gẹ nịnị dị we re. Họ̀ use oze ịyẹẹyẹ nịnị, ka ịzị oze ọyịza ọnọọ ya, dị wa và tụraa nịnị, ka ọ va rọ wụ nịnị ẹngụ. Ama ẹnịnị ka heyiye, ẹnị ẹ yị zị avọọ.

¹⁷ Ẹnẹyịmavara ọ va nyị aza ka ò sị eyi pe wa, dị ọ ka, ẹnịnị ẹ̀ sị ụtọ pe e ịjị oo hú ịkakanchị ọ yị ka wa ọnọ nị. Ama ẹnịnị ka ẹnị ẹ yị vaa wụ́.

¹⁸ Avọọ, ẹwụ nịnị anẹkụra ọ̀ wụ o, dị ẹwụ ịragụ ọ̀ yẹ ịsị ẹ vaa mẹẹ tu wa o.

¹⁹ Ẹwụ nịnị anẹhẹ ọ wụ o; re, ọnị aa kụ ẹngụkata vee tu aza ẹnẹnị dị ẹ̀ rị ọgụ ụkọrọ ụvọ ẹnịnị ka, ẹnịnị ê yi ka ẹnị ẹ yị wụ́ ịrẹyị anị. Ẹnịnị ka ẹnị ẹ yị saasa ọda nị.

²⁰ Ẹnẹyịmavara kà, sị ẹ vẹ dị ẹ yaa kụ eturare hụrị ẹtẹ Ịsẹba va yị ọnị? Sị ẹ vẹ dị ẹ yaa ku ịsị ohine hụrị aha onoze vẹ va yị ọnị. Ọ kà ọnị ẹ yị vaa dọ ịsị ịsọvọ ẹnịnị, ịsọvọ ẹnị ẹ yaa mẹ e yị hine ọnị.

²¹ Ọ kà, agụvị avọọ, ọnị vee zina ịrẹta jị wa ọvịdị ọnị ẹ vaa tụ ahụ ịnị anị dị ẹ sẹ ẹdụ. Ada rị ozi nịnị vee su, avọọ ọta-ọta nịnị ọnịrị aza ana ra gụrị ẹngụ ẹnị me re vee su nị.

²² Ẹnẹyịmavara kà, re, aza ẹ raa hụrị ẹkụra ọnya eyi ẹbẹẹba aa vẹ; Anẹkụra ana dẹngụ hụrị aha ẹnẹẹnẹ ee tenyi ẹngụ ịrẹkụ.

²³ Ẹnịnị ẹ raa kụ ọpa ọnịrị ọha; aza edivi ẹ vị nị, ẹnịnị ẹ ma vayị ọza. Ẹẹ tụra umaata aa vẹ dị ụ aa wụ́ ịrẹyị anka enyi ịnị oku anaa da vụụvụ avọọ. Ẹnịnị ẹ sị ẹngụ tenyi ọ yị ve pe Ijerusarẹmị kụ̀ ịrẹkụ.

²⁴ Dị Anijerusarẹmị nịnị ka, ẹnị ệ vavọọ wụ ọ, dị ẹngụ ẹnịnị wusu nị. Ayịhụrịnẹ ọ sị ẹnị za va hi ẹtẹ, dị ẹnị ee rimanya anka ọnẹẹ ọnị ịrẹẹ aa zị avọọ nị.

²⁵ Ẹnị ẹ yị kụkụ nyayịnẹ nọ ịnị aarẹ, ẹnị ẹ yị nyayịnẹ vatụra oze, agụvị ka ọnịvị ẹnịnị ẹ kụ ụhwọ tụ̀, dị ọ kụkụ vị ẹnịrị angwahi eyi ụvọnị-ụvọnị nị.

²⁶ Ẹnẹyịmavara ọọ kà a yị aza anị ka, ẹ̀ kụ ịta suku-suku hi ẹngụ, di è ku ẹngụ ẹnịnị atịtọ. Ọ kà, ẹnịnị ẹẹ jị òrèrè ọngwọọngụ anka ozi ikonya ọnị ọza ma oo sú avọọ, agụvị ka evu-ẹtẹ vị ana vaa sụ̀ wa avaavo.

²⁷ Ộ hị́ Ijeremaya ka, ọ̀ zama aza anị re anka a mẹẹ zama enyusẹ re avọọ, dị ọ̀ yẹ ẹngụ aza ẹnẹ vị.

²⁸ Avaba ẹnịnị vị ana nyị ayị ọkatẹngụ; vị ẹẹ kụụ hịrẹ ọza nị. Ẹnịnị ẹẹ katẹngụ huni enyusẹ. Ẹ kụ vụ, vị ẹnịnị kụ ọza ịrẹkaa zị nị.

²⁹ Ịra aa zá ịnị arasị giri-giri, ama akịka enyusẹ ẹ yị hụ̀ va ha. Ụkọrọ ọọhẹ ọza aa mẹ ka è vara ebira ẹnịnị nị, agụvị ka ọza ẹ yị kụ aza edivi kwooze.

³⁰ Ẹnẹyịmavara kà, enyusẹ ene si du ha a vanaa hị́ wa nị, agụvị ka ọnị ọ sị yi hụụnị aza anị.