Ijeremaya 52 - IWE ỌNỊNỊ

Ijerusarẹmị mẹmẹ sẹ ẹdụ.

¹ Ịzẹdẹkaya vị ịrayị ohurọnya dị ọ́ rị ohinọyị Ijuda; dị ọ́ yà Ijerusarẹmị mẹ̀ ohinọyị ịrayị ẹwụrọnya nị. Ịrẹha ọnyị anị ọ rị Ihamutari nị. Ihamutari ọnọnị vị ozi ọnọrụ ọnya ana aā hị́ Ijeremaya ana ra Iribina.

² Ohinọyị Ịzẹdẹkaya ộ mẹ̀ ebira odivi hi Ẹnẹyịmavara anka ohinọyị ana aā hị́ Ijehoyakimi mẹ mẹ.

³ Dị ayị kụ Ẹnẹyịmavara tu Anijerusarẹmị nịnị ọnịrị Anijuda nịnị, dị ọ hụ́ wa hụrị ẹngụ anị eyi nị. Ịzẹdẹkaya ộ kụ̀ hịrẹ Inebukadineza ohinọyị Ịbabịrọnị.

⁴ Ịnị ẹkụhị ẹẹwụ, ịnị ụhwẹ ẹẹwụ, ịnị ịrayị ọhụhịịna ọnị Ịzẹdẹkaya rị ohinọyị, dị Inebukadineza ọnịrị avaba isoja anị kụ́ ịrẹkụ va ngụ Ijerusarẹmị nị. Ẹnịnị ệ jị udi tụ ẹhẹẹhẹ Ijerusarẹmị. Dị ẹnịnị họ̀ kara a eyi ụvọnị, dị ẹ gù Anijerusarẹmị nịnị hi tụ́ ịnị ẹkụra nị.

⁵ Avọọ isoja Anibabironi nịnị mẹ họ̀ kara Ijerusarẹmị pooro naa ngụ ana tụ ọ ịrayị ẹwụrọnya ọnị Ịzẹdẹkaya rị ohinọyị nị.

⁶ Ịnị ẹkụhị ịhịịna ịnị ụhwẹ ọhụna ịnị ịrayị ọnọọ gẹdẹ-gẹdẹ, Anijerusarẹmị nịnị é yi kuku re ịsa rị, dị ụngwẹ nyayịnẹ aa kụ̀ wa ẹtẹẹtẹrẹ nị.

⁷ Ẹnịnị ệ zị oze eyi ọnya dị ẹ chaka ọvọ ana a kara Ijerusarẹmị, dị avaba isoja ẹnịnị zị avọọ zwe tụ ẹhẹ ịrahụ nị. Isoja Anibabironi nịnị vị ana yị họ̀ kara Ijerusarẹmị ụmẹ ọnọọ. Isoja Anijerusarẹmị ệ zi oze ịnị ụbazị ohinọyị, dị ẹ zị oze ịnị oze ọbanyị ana yà ịnị akakana ọvọ ẹẹva jịnẹ tụ ẹhẹ nị. Ẹnịnị ee zwè, dị ẹ sị ịrẹsụ ka oze inozi Ijodani aa na nị.

⁸ Ama ọkụrẹkụ Anibabironi nịnị ệ kụ́ chire ohinọyị Ịzẹdẹkaya, dị ẹ́ na zá a ịnị orere Ijeriko nị. Avaba isoja anị ẹ́ kụ zwe hụrẹ ịrẹma ụmẹ ọnọọ.

⁹ Ịjị ẹ sị Ịzẹdẹkaya zá, dị ẹ sị ọ ne tu ohinọyị Inebukadineza nị. Ọnị vị ana yà ẹkụra ana aā hị́ Iribira ịnị Ihamati ịjị ọnọọ. Dị Inebukadineza mẹ̀ ọkarẹyị yị Ịzẹdẹkaya ịzọọ nị.

¹⁰ Iribira ịzọọ a yà wụ̀ avaba ezi Ịzẹdẹkaya ọnịrị ẹnị ọdọvịdị Aniju nịnị eyi Ịzẹdẹkaya goro-goro nị.

¹¹ Ịjị a sị wa ụ, dị Inebukadineza ka à tụ̀ Ịzẹdẹkaya eyi nị. A sị Ịzẹdẹkaya tụ eyi, dị Inebukadineza ka à kụ́ ẹba hi ọ ụvọ, dị à sị ọ aa nọ Ịbabịrọnị nị. Ê tu ịzọọ, dị ẹ sị ọ tụ ịnị ẹngwa pooro dị ẹkụhị isu anị tù nị.

A mẹmẹ dụ irehi Ohomorihi ha

¹² Ịnị ẹkụhị ẹẹwụ, ụhwẹ ọhụhị ịnị ana tụ ọ ịrayị ẹwụrịhịịna ọnị Inebukadineza rị ohinọyị Ịbabịrọnị, Inebuzaradani anaā sịị ajuwe yị ohinọyị, dị ọ́ rẹ vị ọdọvịdị isoja ene e sere ohinọyị, ộ ngụ Ijerusarẹmị.

¹³ Dị ọ rị irehi Ohomorihi ịra nị. Ộ rẹ rị irehi ohinọyị ọnịrị irehi aza ọkọọka ene hi Ijerusarẹmị ịra.

¹⁴ Dị isoja ọnị ọ́ kụ́ na wú ọvọ ana jị kara Ijerusarẹmị và ha nị.

¹⁵ Dị Inebuzaradani za aza ana vọ hi Ijerusarẹmị ọrịhị ne hi Ịbabịrọnị nị; aza ana yara mẹ̀ ụkọrọ ụvọ ẹnịrị avaba aza ene zwe vàka ohinọyị Ịbabịrọnị na ọ́ vavọọ kụ nị.

¹⁶ Ama, ộ navọ ẹnyị ịnị ẹnị onuruwa ene hu kere-kere hi Ijerusarẹmị ka ee tenyii hi ọchị ịvayịnị ene hi ịzọọ, dị ẹnịnị ẹ̀ rẹẹ dà aarẹ.

¹⁷ Anibabironi nịnị ệ chaka ọhẹ ọnịrị ụkẹkẹ ne beri uruku ọbanyị ana a sị enyusẹ ọkatarihi mẹ hi ịnị irehi Ohomorihi ha rugurugu. Dị ẹnịnị kụ́ avaba enyusẹ ọkatarihi ẹnẹẹ ne hi Ịbabịrọnị nị.

¹⁸ Ẹnịnị ệ rẹ kụ ịchọvịrị ọnịrị ẹnya ana aa kụ atịtọọ hi aa maanị ee hi ụta ịsị ịsọvọ. Ệ kụ ẹnya ene e sii mi ozotupa, ịchacha ana aā và a hi aa maanị aa wụ ịsị ịsọvọ, ẹnya ana a sịị̄ rị eturare ịra ọnịrị avaba ẹnya ana vọ ana a sị mẹ̀ ụkọrọ ịnị irehi Ohomorihi, ana a sị enyusẹ ọkatarihi mẹ.

¹⁹ Avaba ẹnya ana a sị igooru ọnịrị isiriva mẹ vị ọnị ẹnịnị kụ́; ẹnya oweyi-oweyi, ẹnya ana a sịị̄ nyị akịna, ịchacha ana aā và a hi aa mẹ̀ ịsọvọ, ẹnya ana aā kụ atịtọọ hi, ọchị ana aā sị ozotupaa gẹ, ẹnya ana aā sị eturare tụ́ ọnịrị ẹnya ana á sịị̄ ka eche naa vàa hi ẹtẹ àaa mẹ̀ ịsọvọ vị ẹnị ẹ kụ bemi-bemi.

²⁰ Avaba ịsa ẹnẹnị vị ọnị ohinọyị Isoromọnị sị enyusẹ ọkatarihi mẹ tụ ịnị Irehi Ohomorihi: Ọhẹ ẹẹva, ụkẹkẹ ana a sịị̄ kụ ẹnya nịnị, uruku ọbanyị ọnịrị ụnọ ẹwụrẹva ana a sị uruku ọnọọ hi. Ẹnịnị ẹẹ rata pooro, ọza ẹ́ yị zụ ngọ ọ.

²¹ Ọhẹ ẹyịva ẹnẹnị vị ọnyọọnya. Ikonyikonya ẹẹ nẹba ẹ̀ hụ́ ahụ ohurịhịmba avọọ, dị ụgana anị vị ẹ̀ hụ́ ahụ ẹwụrịhịnta avọọ nị. Ẹnịnị ẹẹ nyị uhwohwo tụ ịnị ịnẹ. Enyusẹ ana a sị mẹ wa ẹẹ bụrụ ẹ̀ hụ́ ahụ-ụkọnkọnọ ẹtarẹwụ tụra ẹẹhị avọọ (75 mm).

²² Â nyị ịsị a sị enyusẹ ọkatarihi ọnọnị mẹ ana a sị vu ọhẹ ikonyi ikonya ịrẹsụ. Ịsị ẹnẹnị ẹẹ nẹba ẹ̀ hụ́ imita ẹẹva avọọ. Â nyị enyusẹ irenyi-irenyi jesi kara a. Dị a sị enyusẹ ọkatarihi ọnọnị mẹ ẹngụ ẹtụtụ ọchị ana aā hị́ ipomagiranati dị asị mẹ̀ ẹ ọvị nị.

²³ Ipomegiraneti ana sị enyusẹ ọkatarihi mẹ aanị vị ẹchẹhị-ẹchẹhị ana a sị mẹ ọhẹ ikonyi ikonya ọvị. Ọza ọ̀ọ jẹ ịnị eteesu vị ee re ẹnarẹwụ tụra ịhịnọnyị ịnị ipomagiranati ẹnẹnị nị.

 za Anijuda nọ Ịbabịrọnị

²⁴ Inebuzaradani, ana vị ọdọvịdị isoja ene ee sere ohinọyị aanị ộ zá ohirẹsụ ịrẹsụ ọbanyị irehi Ohomorihi ana aā hị́ Iseraya. Dị ọ́ rẹ za ohirẹsụ irehi Ohomorihi ana va tụra a, ana aā hị́ Ịzẹhwanaya beri ọdọvịdị irehi Ohomorihi ọkọọka ọsa ẹẹta nị.

²⁵ Ộ nọ Ijerusarẹmị, dị ọ́ zá ọdọvịdị isoja anaa kụ azaa nọ ịrẹkụ, dị ọ́ rẹ zá aza ẹnị ịhịmba ịnị aza anaā sịị ajuwe yi ohinọyị nị. Ẹnị ana vọ tụ Ijerusarẹmị ọ vị ọnọọ nị. Inebuzaradani ộ rẹ zá ọza anaā chẹrẹ ịsaa yị ọdọvịdị isoja Anijerusarẹmị ọnịrị aza ọkọọka ẹbẹẹta.

²⁶ Dị Inebuzaradani kụ wa ne tu ohinọyị Ịbabịrọnị ịzị ọ yà Iribira ịnị ẹtẹ Ihamati nị.

²⁷ Dị ohinọyị Ịbabịrọnị ka è tụ́ wa, dị à wụ̀ wa ịzọọ nị. Avọọ a mẹ za Anijuda nịnị ọrịhị hụrị ẹkụra ẹnịnị ne hi aha ọsa nị.

²⁸ Ọpa aza ọnị Inebukadineza za ọrịhị hụrị Ijuda yị: Ịnị ịrayị ọhụhịmba ọnị ọ rị ohinọyị, ộ za aza ẹnị akahị-akahị oze ẹẹta tụra ohurẹẹta (3,023).

²⁹ Ịnị ana tụ ọ ịrayị ẹwụrịhịnta ọnị o rị ohinọyị, dị ọ́ za aza ẹnị ẹchẹhị-ẹchẹhị oze ịhịnta (akawụ ịhịnta) tụra ohurẹẹwụ tụra ẹẹta (832) hụrị Ijerusarẹmị nị.

³⁰ Ịnị ịrayị ohurẹẹta ọnị Inebukadineza rị ohinọyị, dị Inebuzaradani ọnị za aza ẹnị ẹchẹhị-ẹchẹhị oze ịhịmba (akawụ ịhịmba) tụra ẹbẹẹva tụra ẹẹhị nị (745). Dị avaba Anijuda ọnị ẹ za ọrịhị hụrị Ijuda ọnịrị Ijerusarẹmị vị aza akahị-akahị oze ẹẹna tụra ẹchẹhị-ẹchẹhị oze ịhịnọnyị nị (4,600).

³¹ Ịnị ana tụ ọ ịrayị ohurẹwụrịhịmba ana za ohinọyị Ijuda ana aā hị́ Ijehoyakimi ọrịhị, na tu ịnị ẹngwa Ịbabịrọnị, ịnị ẹkụhị ẹwụrẹva ịnị ụhwẹ ẹwụrẹva ịrayị ọnọọ, dị a sị ọnọrụ ọnya aanị ana aā hị́ Evirimerodaki rị ohinọyị Ịbabịrọnị nị. Ịnị ịrayị ọnị ọ rị ohinọyị, dị ọ vayị Ijehoyakimi, dị ọ sị ọ hụụnị ẹngwa nị.

³² Evirimerodaki ộ mẹ̀ ọyịza hi Ijehoyakini, dị ọ sị ọ tụ udi ana nyị ụbanyị huna avaba ohinọyị ana vọ ana a za ọrịhị ve hi Ịbabịrọnị nị.

³³ Ijehoyakimi ộ ngwa awuru anịnẹngwa anị hị́ ẹtẹ, dị ọ kụ ẹnya ọsa hi ẹngụ nị. Dị ahịka ọnịrị ohinọyị Evirimerodaki ọ vanaa kụkụ aa rị ịsa pooro nị.

³⁴ Eyinị-eyinị pooro dị ọ su, vị anaa vanaa sị ẹkẹhịị yọ ka ịsị ee sì kẹnẹ, ọ̀ sịị mẹ̀ ẹ.