Ijeremaya 51 - IWE ỌNỊNỊ

Ịbabịrọnị vee vu ẹtẹ

¹ Ẹnẹyịmavara kà, ọnị vaa tụ́ ahị odivi ka ò vee vú ẹtẹ Ịbabịrọnị ọnịrị aza ene hi ịzọọ ẹtẹ.

² Ọnị vaa tụ́ anẹkụra ọsa ka è ve vu Ịbabịrọnị ẹtẹ anka ahị mẹẹ kụ ẹchịchị avọọ. Ịhị ẹkụhị ẹngụkata ẹnịnị oo tu, ẹ vaa kwẹẹtẹ tù waa zị oze ụvọnị-ụvọnị, dị ẹ tụ́ ọ ahwaahụ.

³ Ọ kà, asị a zẹẹ ka isoja ẹnịnị è ne ọpa vụrụ-vụrụ, asị a hyakụ zẹẹ ka ẹnịnị ẹ̀ kụ ẹnya ịrẹkụ ẹnịnị. Asị ẹ vayị ezwọọmụha ẹnịnị vụrụ. E wụ̀ avaba ọkụrẹkụ ẹnịnị và ha.

⁴ Ẹnịnị vị ana a vaa tọ̀ ụnava, dị e sú va hi ẹtẹ oze ene hi ẹkụra ẹnịnị.

⁵ Ẹnẹyịmavara kà, ọnị Ohomorihi Ochẹtẹẹngụ, ẹ́ yị hụrẹ Anisirẹrị ọnịrị Anijuda nịnịị ụvọ, ọọ́ daka vị ka ẹnịnị ệ mẹ̀ ebira odivi hi ọnị.

⁶ Ọ kà ọzọza ò zwè hụrị ẹtẹ Ịbabịrọnị, ọzọza ọ sị ụvọ ku ịrẹsụ oo zwè. Asị ụ zẹ ka a wụ agụvị ebira odivi ẹnịnị. Ụmẹ o si tu ka ọnị Ẹnẹyịmavara ọ̀ họ̀ oponu, ọnị vaa sị ụyaa rị wa á mẹ vọrọ.

⁷ Ẹnẹyịmavara kà, Anibabironi nịnị vị ana sị mẹẹ anka ako ana a sị igooru mẹ̀ ọnị ọnị sị rị ụvọ, dị ẹnịnị kà avaba anẹhẹ eche nị. Ẹkụra-ẹkụra ê hú eche anị, ẹnịnị ẹ̀ yị kụkụ yẹ ịsị ẹyaa mẹ.

⁸ Ụvọ ô ku Ịbabịrọnị, asị o vú ẹtẹ. Waa jị òrèrè anị nịnị. Ne sì ahọ̀nọ va tụ ịnị ụnava anị yọ nịnị ka ẹyịyara ọ vaa vị.

⁹ Anẹkụra ọsa ene hi ịzọọ ka, ẹnị ệ sị vụrị ka ẹnị ẹ̀ gụ Ịbabịrọnị ụvọ, ama, ụmẹ ọ sị parahu. Ẹ ka à vẹ vị ẹnị para a hu dị ẹnị ẹẹ nọ eehi ẹnịnị; ka Ohomorihi ọ raa sị ụmẹzụ-ụmẹzụ sị ụya rị Anibabironi nịnị, ọ sị wa vú ẹtẹ saka-saka.

¹⁰ Anisirẹrị nịnị kụkụ aa kà a ka, Ẹnẹyịmavara ọ raa sị zụ ka ẹnị ẹ yị rị ịvị. À vẹ, dị ẹnị ẹ̀ na kà a Ịzayọnị, ịsị ọnị Ẹnẹyịmavara, Ohomorihi ẹnịnị sị mẹ.

¹¹ Ẹnẹyịmavara ọ na raa hị́ ẹnị ohinọyị Animediya nịnị, agụvị ka ee si ka ọnị ò vu Ịbabịrọnị ẹtẹ. Avọọ Ẹnẹyịmavara mẹmẹ vaa mẹẹ họ̀ oponu irehi anị ọnị ẹnịnị du ha nị. Ọdọvịdị isoja anaa vẹ wa ịrẹkụ ka, ọzọza ọ sị ọpa anị dị ò nee. Ọzọza ọ̀ sị ogonto anị rị ụvọ o.

¹² Hú ọpanyị ka à kụ ịrẹkụ jịnẹ ọvọ Ịbabịrọnị. Nyị aza na vaka isoja awụ nịnị, dị wa nyị aza ka ee sere ẹtẹ. Kàa ka aza ẹnyị ẹ̀ tẹ̀ ịnị avị Ẹnẹyịmavara ọ́ raa mẹ ịsị ọ ka ọnị vaa mẹ Anibabironi nịnị.

¹³ Irehu ene hi Ịbabịrọnị ẹẹ rụrụ, dị ẹtẹ ọnọọ rẹ nyị ogu ẹtẹẹtẹrẹ nị. Ama eyi anị ọ sị nị, a sị avaba ịsị ọ sị eyi tụra gara ha.

¹⁴ Ẹnẹyịmavara Ochẹtẹẹngụ, ọ raa sị ẹngụ anị hị́ eku ka, ọnị vaa mẹ aza ẹ̀ kọmị, anka ọkọnị akụvarịva avọọ, dị ẹ̀ kụ́ ịrẹkụ ve tu Ịbabịrọnị. Ẹnịnị vaa nyị ẹbẹẹba anị, dị eyee nowu.

Ahẹ ana jị gono Ohomorihi

¹⁵ Ẹnẹyịmavara ọ sị ụkata anị mẹ ẹhẹ ọnọnị nị. Ịrẹyọyẹ anị ọ sị mẹ avaba ịsị e hi ẹhẹ, dị ọ́ gana ẹbẹẹba nị.

¹⁶ Ọnị ọọ̄ kà ịrẹyị, dị orihi aa kà irutu nị. Ọọ̄ kụ́ eguhi gụ hụrị avaba aha ịnị ẹhẹ. Ọọ̄ mẹ ka ịnyanya ọọ rị orihi aa zụ, dị ọ mẹ ka ahị ọọ tụụ hụrị ịzị ọ zaa ku tụ nị.

¹⁷ Ọsọnị aza eē re kẹnẹ, dị ẹ si vara ọnụra ẹnẹ ẹ̀ yị yẹ ịrẹyị vụrụ-vụrụ nị. Aza ana mẹ ori vị ẹnẹ ẹ̀ yị yẹ ịsị ẹyaa mẹ, agụvị ka ori ẹnẹ ẹ mẹ vị apẹ osusu; ẹnịnị ẹ́ yị nyị ụhwẹ.

¹⁸ Ẹnịnị ẹ́ yị wụra sị ụbanyị yị agụvị ka ịsa kẹnẹ-kẹnẹ ẹ́ vị nị. Ịjị ụmẹ oo tu ka Ẹnẹyịmavara ọ̀ sị ụya rị wa, o vee vu wa ẹtẹ.

¹⁹ Ohomorihi Anisirẹrị nịnị ọnịrị wa ẹ́ yị vị ọnyọọnya, ka ọnị ọ mẹ avaba ịsa nị. Ọnị ọ nyị Anisirẹrị nịnị ka ẹnịnị ẹ̀ vị aza obooro-obooro nị. Ịrẹha anị ọ rị Ẹnẹyịmavara Ochẹtẹẹngụ nị.

Ẹnya ịrẹkụ Ẹnẹyịmavara.

²⁰ Ẹnẹyịmavara kà, ẹwụ nịnị Anibabironi, ẹwụ nịnị ọ vị ana sị mẹ ịhama (ọkụkụ) ọnịrị ẹnya ọnị sịị kụ ịrẹkụ avọọ. Ẹwụ nịnị ọnị sị gara ẹkụra-ẹkụra ọnịrị ohinọyị nịnị ha rugu-rugu nị.

²¹ Ẹwụ nịnị ọnị sị gara umaata nịnị ẹnịrị aza ana tụra wa ha rugu-rugu nị. Ẹwụ nịnị ọnị sị gara ụkẹkẹ ịrẹkụ ọnịrị aza anaa sị waa zị ha nị.

²² Ẹwụ nịnị ọnị tụ na wụ̀ aza irenyi-irenyi va ha nị. Ọnọrụ ọnịrị anẹẹ nịnị, ọzọkụ ọnịrị ozweyi nịnị, beri ezwọọmụha ọnịrị ezwoorihi nịnị nị.

²³ Ẹwụ nịnị, ọnị tụ na wụ̀ oseratẹmẹ nịnị ẹnịrị ịsụpa ẹnịnị, dị ụ wụ ọkụrẹkụ nịnị ẹnịrị aza ẹnẹ ẹyaa kụụ mẹ̀ ụkọrọ nị. Waa wụ̀ Ịgọvọnọ nịnị ẹnịrị ẹnị ọdọvịdị nịnị.

Ụya ana Anibabironi nịnị vaa rị.

²⁴ Ẹnẹyịmavara kà, ọnị vee sí Ịbabịrọnị ọnịrị aza ene hi ịzọọ atọ avaba ịsị odivi ẹnẹ ẹ́ mẹ hi Anijerusarẹmị nịnị, dị u re e.

²⁵ Ọ kà, ẹwụ nịnị Anibabironi, vị ụ sị mẹẹ nịnị anka ataba enee du avaba ẹhẹẹ ha avọọ nị. Ama ọnị, Ẹnẹyịmavara ọ́ sị eyi ịrazị và ka wụ. Ọ kà, ọnị vaa za wụ, dị ọnị và wụ nịnị nẹtẹ saka-saka na za eteesu, dị ọnị navọ wụ nịnị tụ ịnị edudu.

²⁶ Ẹ yị nyị ịrẹta ikonyara ana a vaa sị hụụnị ịsị ẹẹ vọ ịnị awụ nịnị na tụra irehi. Vị́ ụ vanaa sịị mẹẹ anka ụnọmị ẹnẹ ẹ̀ yị nyị ọza pooro nị. Ọnị, Ẹnẹyịmavara ọ ka avọọ nị.

²⁷ Mẹ ịsị a vaa sịị yẹ ịrẹkụ o si tu. Hú ọpanyị ịrẹkụ dị ẹkụra-ẹkụra ẹ̀ wụ ọ. Kà a ka ẹkụra-ẹkụra o tenyi ẹngụ ịrẹkụ tu Ịbabịrọnị. Hị́ ohinọyị ẹtẹ Ararati, Imini ọnịrị Asikenazi nịnị ka, ẹnịnị ẹ̀ kwẹẹtẹ tụ ọ. Nyị ọdọvịdị ana vaa kụ wa nọ ịrẹkụ ọnọọ. Ẹnẹyịmavara kà, à kụ vaa kụ wa nọ ịrẹkụ ọnọọ. Ẹnẹyịmavara kà, à kụ umaata gigirigi anka ọkọnị akụvarịvaa avọọ.

²⁸ Ọ kà à kà a ka ẹkụra-ẹkụra è tenyi ẹngụ ịrẹkụ tu Ịbabịrọnị. À tụ́ na hi ohinọyị Animidiya nịnị, beri ẹnị Ịgọvọnọ ẹnịrị ọdọvịdị nịnị, dị à hị́ isoja avaba ẹtẹ ọnị ẹyaa mẹ ọda tụra ịrẹsụ.

²⁹ Avaba ẹhẹ aa dọ ẹgahị, dị ee henyi nị, agụvị ka Ẹnẹyịmavara ó si nyima aa tụ́ ẹtẹ Ịbabịrọnị osusu anka ọ́ mẹ ka ọnị vaa mẹẹ. Ọza ẹ́ yị ma vanaa ra ịzọọ.

³⁰ Isoja Anibabironi ẹ yị kụkụ kụ ịrẹkụ. E ne sì hi ịnị irehi ọnị isoja nịnị yaa sere ẹtẹ. Ẹnịnị ẹ yị kụkụ nyị ọtụtụrụma, vị ẹ kụkụ sị mẹẹ anka anyẹnẹẹ avọọ nị. A sị oze ọbanyị ana aā zị vaa ngụ ịnị ẹkụra gara ha, irehi ẹnịnị aa rị ịra.

³¹ Ọnụtụ irenyi-irenyi ê zwè na kà a yị ohinọyị ka á raa zị oze eyi ẹnyị-eyi ọsa kụ ịrẹkụ ngụ ịnị ẹkụra nị ọ.

³² Ẹ ka ọnịvị ẹnịnị jẹẹ ịzị a zịị̄ jịnẹ irehu. Ẹ sị irehi ọbanyị ịzị isoja ẹnịnịị tẹẹ sere ẹtẹ rị ịra. Ivoovo ọ sị isoja ẹnịnị za.

³³ Ẹnẹyịmavara Ochẹtẹẹngụ, Ohomorihi Anisirẹrị nịnị ka, ezii Anisirẹrị nịnị vị ana sị mẹẹ anka ịzị eē tụ́ akụ avọọ. A vaa sẹ́ waa vàa hi ẹtẹ ịsọnị-ịsọnị, dị aa kụ ahụ pịrị wa.

³⁴ Inebukadineza, ohinọyị Ịbabịrọnị ọ sị ẹnị gara ha, ọ sị ẹnị tu avọ osusu anka a mẹẹ tụ ụnọkọ osusu avọọ. Ẹ ka, ọ sị ẹnị za mụnẹ anka ẹwụ mẹẹ mụnẹ ịsa avọọ. Dị ọ kụ avaba ịsa ohine-ohine ẹnẹ ẹnị nyị hi ịrẹka nị. Ọ rẹ sị ẹnị tọmọ và hi ẹtẹ o.

³⁵ Jẹẹ avaba Anịzayọnị ẹẹ kà a ka, Ohomorihi ọ̀ họ̀ oponu avaba ụya ana sị rị ẹnị Ịbabịrọnị, jẹẹ avaba Anijerusarẹmị nịnị ẹẹ kà a ka, Ohomorihi ò họ̀ oponu avaba aza ẹnịnị ana a wụ Ịbabịrọnị.

Ẹnẹyịmavara vaa gụ Isirẹrị ụvọ

³⁶ Agụvị avọọ, Ẹnẹyịmavara ộ kà a yị Anijerusarẹmị nịnị ka, ọnị vaa dọ ịrazị awụ nịnịị zị, dị ọnị họ̀ oponu ịrẹyị awụ nịnị. Ọnị vaa mẹ ka avaba oswe ene hi Ịbabịrọnị ọnịrị irehu ẹnịnị ẹ̀ wụ.

³⁷ Ẹtẹ Ịbabịrọnị vaa jị eburu dị ahịka uye ịnị avị ẹ kụkụ ra ịzọọ nị. Ịrẹyị anị vaa mẹ ayịị hụrị aza ịnẹ, ẹtẹẹtẹrẹ èe re e, dị ọ kụkụ aa nyị ọza ịhyẹrẹ. Ọza ẹ́ yị ma vana ra ịzọọ.

³⁸ Avaba Anibabironi nịnị vee nowu anka idu nịnị avọọ, dị ẹyaa kụ́ ịrẹkaa hi ịnị ọbẹ anka ezi idu nịnị avọọ.

³⁹ Ẹnẹyịmavara kà, ịjị aa raa hị́ wa ịrẹkụ kẹnẹ, ọnị vaa mẹ ịsọyịrị yị wa, dị ọnị kà wa eche, di ẹyaa jẹ. Ẹnịnị vanaa sụ̀ dị ẹ yị ma vana ha.

⁴⁰ Ọ kà ọnị vaa sị wa ka à na wụ̀ wa anka ozi atẹmẹ nịnị avọọ, dị a wụ̀ wa anka ẹvụ ọnịrị ịdẹba nịnị avọọ.

⁴¹ Ẹnẹyịmavara kà, tee! Ịbabịrọnị ana avaba anẹhẹ maanị aa gā á maanị zá aanị nịị? Ịrẹyị anị kụkụ ee chire anẹkụra ana vọ nịnị angwa ẹnịnị mee re e.

⁴² Ẹngụkata oo tu Ịbabịrọnị anka enyi ịnị oku ọ̀ọ rere aa jị ayị dị ọ dà ve ku ọ avọọ.

⁴³ Ẹkụra-ẹkụra ene hi Ịbabịrọnị kuku e chire ọza angwa. Ẹ́ kụkụ sị mẹẹ anka ẹtẹ aarẹ-aarẹ ẹnẹ ẹ yị nyị enyi vụrụ-vụrụ avọọ. Ẹ́ yị nyị ọza ana ra ịzọọ, ẹ́ yị hyakụ nyị ọza anaa zị avọọ paraahu.

⁴⁴ Ẹnẹyịmavara kà, ọnị vaa sị ụyaa rị ori Anibabironi nịnị ana aā hị́ Ịbẹẹrị, dị ọnị mẹ ka ọ̀ hẹ̀rẹ avaba ịsa ọnị o yi. Anẹkụra-ẹkụra nịnị ẹ́ yị ma vana va mẹ̀ ẹ. Ọvọ Ịbabịrọnị o si wu o.

⁴⁵ Ẹnẹyịmavara kà, ẹwụ nịnị aza anị, Anisirẹrị ò zwè hụrị Ịbabịrọnị. Ọzọza ò zwè agụvị ẹhẹ anị, agụvị ka ọyịkụ anị aa vẹ ịrịịra.

⁴⁶ Ọ kà, sị tụ ọtụtụrụma nịnị, asị u hí angwa, agụvị ịrẹyị ọnị ụ wụ nịnị ẹtẹ Ịbabịrọnị. Ịrayị-ịrayị a sị ka enube irenyi-irenyi ka, aa nyị ezigi ịnị ẹkụra ọnịrị ka ohinọyị ọnya ọnịrị ọsa aa zyaazị nị.

⁴⁷ Avọọ, ẹkụhị aa vẹ ọnị ọnị vaa sị ụyaa rị ori ene hi Ịbabịrọnị. Ọnị vaa mẹ̀ ụhị ẹkụra ọnọọ, dị a wụ̀ aza ene hi ịnị anị.

⁴⁸ Ẹnẹyịmavara kà, aa nyị aza ana hụrị eyi ẹbẹẹba vẹ. Eyee vee du ẹtẹ Ịbabịrọnị ha. Ịjị ụvọ ẹnịnị òo ku Ịbabịrọnị, avaba ịsị ene hi ẹhẹ ọnọnị ọnịrị ẹbẹẹba vee hine ayị, dị ẹyaa jị ahẹ.

⁴⁹ Ọ kà, aa nyị Anibabironi nịnị ẹ̀ rị ụya agụvị avaba Anisirẹrị nịnị ẹnẹ ẹ́ wụ. Anibabironi nịnị ệ mẹ ka aza ọrụrụ-ọrụrụ è sú avaba ịrẹsụ ẹtẹ.

⁵⁰ Ẹnẹyịmavara ộ kà a yị aza anị ene hi Ịbabịrọnị ka. Wa sị ha hụrị ụvọ isu nịnị, waa na nịnị booro aanị. Asị ụ jẹẹ nịnị o. Ọ kà, dị ụ da ka ị noze rịrị eehi nịnị aanị, waa tamayị ọnị, Ẹnẹyịmavara nịnị, dị asị u hi ayị Ijerusarẹmị nịnị.

⁵¹ Ọ kà ẹwụ nịnị aza anị aa kà a ka, asị ụhị mẹ nyị wụ nịnị. Ụ ka wé yị re ọza gụ wụ nịnị ụvọ vụrụ-vụrụ agụvị ka anẹkụra ọsa ẹ́ raa ngụ ịzị ẹ́ vị aha Óhomorihi ọnị nya ịnị irehi anị.

⁵² Avọọ, Ẹnẹyịmavara raa ka, re, ụmẹ aa vẹ ọnị ọnị vaa sị ụyaa rị ori ene hi Ịbabịrọnị, dị aza ana a tọ ụnava kụkụ è nowu ọngwọọngụ.

⁵³ Ọ kà Anibabironi nịnị ẹ̀ẹ daka hịrẹ nọ ẹbẹẹba ịnị eguhi, dị ẹ́ na dà irehi tụ ịzọọ yị ẹngụ ẹnịnị ka asị á nyị ịsị ẹ mẹ̀ ẹnị nị, ọnị vị anaa ịị tụ aza dị e ne vu wa ẹtẹ.

⁵⁴ Ẹnẹyịmavara kà, wụ́ aza maa jị òrèrè Ịbabịrọnị, Eyee sụ ùnè agụvị ka ee du ẹkụra ẹnịnịị ha ẹtẹẹtẹrẹ.

⁵⁵ Ọ kà, ọnị ee du Ibabironii ha, dị asị a kụkụ wụ ahịhị ịrẹyị ịzọọ. Ọkụrẹkụ nịnị vị ene vee wuva ngụ tu Anibabironi nini ịzọọ anka enyi anaa jị ayị avọọ, di owu a sụ waa ụvọ mee ku wa.

⁵⁶ Ẹnẹyịmavara kà ẹnịnị ệ vẹ ka ẹnị è ve vu Ịbabịrọnị ẹtẹ. Ẹ sị isoja Anibabironi nịnị za dị ọkịta ẹnịnị ku che nị. Ọ kà, ọnị ọ̀ vị Ohomorihi anaā sịị ụyaa rị aza anaa mẹ ịsị edivi nị. Ọnị ee sí Anibabironi nịnị atọ.

⁵⁷ Ọnị vaa kà ọdọvịdị ẹnịnị ọnịrị aza ana yẹ ịrẹyị hị́ ịzọọ eche. Ọnị vaa kà Ịgọvọnọ ẹnịị ọnịrị isoja ẹnịnị eche. Ẹnịnị vanaa sụ̀ dị ẹ́ yị ma vanaa ha kwẹẹtẹ. Ọnị ohinọyị ọ kà avọọ nị. Ịrẹha anị ọ rị Ẹnẹyịmavara Ochẹtẹẹngụ nị.

⁵⁸ Ẹnẹyịmavara Ochẹtẹẹngụ ka, ọvọ Ịbabịrọnị bamị-bamị ọnọnị vị ana vaa kwọrọọ zẹtẹ, dị aa rị oze ana aā zịị ngụ ọ ana jẹ gogorogo aanị ịra. Ụkọrọ ọọhẹ kẹnẹ aza va mẹ nị, avaba ịsị ẹkụra-ẹkụra maanị rị ụya anị, aa rị ịra aanị nị.

 sị ịrẹyị ọnị Ijeremaya ka nọ Ịbabịrọnị.

⁵⁹ Â nyị ọza ịnyara aanị ana aā hị́ Iseraya. Ada anị aā hị́ Ineraya nị. Dị ọ vị aazị Imaseya nị. Iseraya ọnọnị ọ vị ọza anaa gụ ohinọyị Ịzẹdẹkaya ụvọ nị. Ịnị ịrayị ọhụna ọnị Ịzẹdẹkaya rị ohinọyị Ijuda, dị Iseraya saasa a aa nọ Ịbabịrọnị nị. Ijeremaya ka, ẹ maa na, dị ọnị maanị tụ Iseraya ụtụ nị.

⁶⁰ Ijeremaya ka ọnị ộ chẹrẹ avaba ụya ọnị Anibabironiya nịnị vaa rị beri ịrẹyị ana vọ ịnị ịpa Ịbabịrọnị tụ ịnị iwe.

⁶¹ Dị ọnị kà a yị Iseraya ka, ịjị oo tụ Ịbabịrọnị, ò re ka ọnị ọ́ọ kà avaba ịsị ana a chẹrẹ tụ ịnị iwe ọnọnị aanị boro-boro dị aza ẹ̀ wụ ọ o.

⁶² Ọ̀ọ sị ọ ka, dị ọ̀ mẹ̀ aduwa ka, Ẹnẹyịmavara, waa sị ọ ka ka, u vee vu ịzẹnị ẹtẹ, dị ẹ́ yị ma vana nyị ịsị aa tụ ụhwẹ ana ra ịnị anị ọ̀ọ vị ọza, ọ̀ọ vị ịsụpa. Ụ ka vị́ ọ vanaa sịị mẹẹ anka ịzị ọza ẹ yị ma raa avọọ pooro nị.

⁶³ Ọnị ka, iwe ọnọnị ọ̀ọ maanị ta Iseraya ka yị aza, ọ̀ sụ́ ọ za ịrẹta ọnyara, dị ò ne e ngụ ịnị irehu Iyuhwuretisi.

⁶⁴ Dị ọ̀ kà aka, aanị ọ́ mẹ vaa yàa yị Ịbabịrọnị nị. O vee chì dị ẹ yị ma vana kwẹẹtẹ hịrẹ vẹ, agụvị ka Ẹnẹyịmavara ee vee vu ọ ẹtẹ. Ẹhwị ịrẹyị ọnị Ijeremaya ka yị o.