Ijeremaya 48 - IWE ỌNỊNỊ

Ịrẹyị ọnị Ẹnẹyịmavara kà Imowabi

¹ Ijeremaya kà, ịrẹyị ọnị Ẹnẹyịmavara Ochẹtẹẹngụ tụ ọnị hi aza ene hi Imowabi yị. Ịrẹyị o tu ẹwụ nịnị ene hi Inebo ẹngụ. Ẹkụra awụ nịnị ee vee vú ẹtẹ. Ẹtẹ Ikiriyatayimi vị ana a vaa mẹ̀ ụhị nyị, dị aa za a. Aha ụkata ẹnịnị vị ana a vaa gara a ha.

² Avaba ụbanyị ọnị Imowabi vịdị nyị vaa ta. Ọnịvị ọza ọ sị ẹtẹ Ịhẹsịbọnị za. Ẹyaa gẹ eyi ẹ́ mẹmẹ vee vú ẹtẹ Imowabi ẹtẹ. Ọkụrẹkụ nịnị vaa kwẹẹtẹ tu ẹkụra Ịmadịmẹnị, dị ẹ mẹ̀ ẹ sisisi.

³ Wụ́ anẹkụra Ihoronayimi mee nowu ka Ezigi ọọ vẹ! Vị ẹnị ee vú ẹtẹ anị nọ!

⁴ Asị Imowabi vú ẹtẹ. Waa wụ ezweyi maa jị òrèrè.

⁵ Wụ́ aza mee sụ ùnèe vaa tụra oze ịzị aā hi Iruhiti, ẹyaa jị òrèrè vaa tụra oze Ihoronayimi agụvị ẹngụkata ene tu wa.

⁶ Ẹ ka, ọzọza oo zwe o! Ọzọza oo zwe anka ịkẹrịkẹtẹ ana yà ịnị ụnọmị avọọ.

⁷ Ẹ ka, agụvị ka waa sị ayị tụra aha ụkata awụ nịnị ọnịrị ogu awụ nịnị, ẹwụ nịnị nyẹmba vị ana a rẹ vaa za. Ori awụ nịnị ana aā hị́ Ikemosi vị ana za ọrịhịị nọ aha ọsa. A vaa za wa beri ohirẹsụ irehi ori ẹnịnị ọnịrị ọdọvịdị ẹnịnị.

⁸ Ẹnẹyịmavara kà, ọnịvị ọza vaa kwẹẹtẹ tu ẹkụra ikonyi ikonya, ẹ́ yị ẹkụra ana vaa ha. Inozi ọnịrị ụnọmị vị ene vee vú ẹtẹ.

⁹ Ọgụvọ anaa zụ mẹ yị Imowabi, à mẹ̀ ẹ yị ọ, agụvị ka ka a vaa jị ọ eburu. Ẹkụra-ẹkụra ene hi ịnị anị vaa tụ osusu, dị ẹ́ yị nyị ọza ana kụkụ ra ịnị ẹnịnị.

¹⁰ Ọza ọnị ẹ̀ yị kụ ẹngụ hi ụkọrọ Ẹnẹyịmavara mẹ, o du ọọ ku. Ọza enee yi ka ọnị tọ̀ ọza ụnava dị ọnị ọ̀ wụ̀ aza, o du waa ku huuu.

¹¹ Ẹnẹyịmavara kà, Animowabi nịnị vị anaa mẹ ẹhẹ ẹnịnị ẹngwọọrọ-ẹngwọọrọ, ọza ẹ́ yị za wa ọrịhị nọ ẹkụra ọsa da. Ẹnịnị vị ana sị mẹ anka eche ana nẹtẹ di ọza è yi zizi ọ avọọ; ọza ẹ́ yị và a hụụnị apori ẹnyị hi ịnị ọsa da. Ẹ́ yị nyị ịsị ẹ kanyị uhine anị, vị́ ọ nyayịnẹ yị hine ẹtẹẹtẹrẹ nị.

¹² Ẹnẹyịmavara kà, ụmẹ aa vẹ ọnị ọnị vaa tụ aza dị ẹ va dụ Animowabi va hi ẹhẹ anka a mee và echee ha avọọ. A vaa tụ ẹkụra ẹnịnị osusu, dị aa jị ọ eburu anka a mẹẹ và eche hụụnị okoko, di a chaka okoko ọnọọ avọọ.

¹³ Ịjọnọọ dị ụhị ori Animowabi nịnị ana aā hị́ Ikẹmọọsị aa nyị wa. Avọọ ụhị mẹ nyị Anisirẹrị nịnị ẹ́ mẹ sị ayị tụra Ịbẹtẹrị nị.

¹⁴ Ẹwụ nịnị Animowabi, sị ẹ vẹ di wee rò o nịnị ka waa da yara kụ ịrẹkụ nịnị da?

¹⁵ Ohinọyị ana aā hị́ Ẹnẹyịmavara Ochẹtẹẹngụ ka, ẹtẹ Imowabi ọnịrị avaba ẹkụra ene hi ịnị anị vị enee vee vú ẹtẹ. Ezwọọmụha ọyịza-ọyịza ene hi ịzọọ vị ana vaa wụ̀ ha.

¹⁶ Ẹngụkata ene vee tu Imowabi ọ sị gụrị ẹtẹ, Ụya ọnị ẹ́ vaa rị aa vẹ eyiha-eyiha.

¹⁷ Avaba ẹwụ nịnị ana rá kara ẹtẹ Imowabi, dị ụ yẹ́ ọ́ mẹmẹ vịdị ngụrẹyị nịnị ọọ́ zị ẹngụ yị ọ nịnị. Waa kà a nịnị ka te! ohinọyị ọnị ọ maanị aa sị ụkata-ụkata mẹ ọ sị gara o. Avaba ụbanyị anị ọnịrị ụkata anị ộ ta ee!

¹⁸ Ẹwụ nịnị ana rá hi ẹtẹ Idiboni, chí hi ẹtẹ hụụ ịzị ụ na yaatụ ọnị wa sịị mẹ ụbanyị nịnị avọọ, dị wa va yaatụ ịnị eteesu nịnị. Ọnịvị Imowabi ộ vẹ, ọ́ sị avaba ẹkụra anị jị eburu.

¹⁹ Ẹwụ nịnị ana ra ịzị aā hị́ Aroyeri ẹ̀ va jẹẹ utoze di wee zí nịnị. Họ̀ aza enee zwee na ka sị ẹ mẹ kẹ?

²⁰ Ẹnịnị vaa kà a wụ nịnị ka, asị ụhị mẹ nyị Imowabi, asị ọ gara ha. Agụvị avọọ waa jị oreree yị ọ nịnị. Và tụra oze ana a zịị nọ ịnị irehu ana aā hi Arinọnị, dị wa nọ̀ọ nịnị ka, asị ụhị mẹ nyị Imowabi nịnị o.

²¹ Ẹnẹyịmavara kà, ó si tu ka à mẹ̀ ọkarẹyị yị ẹkụra ene hi aha ana nẹba hu aha ana vọ. A vaa mẹ̀ ọkarẹyị yị Ihoroni, Ijahiza, ọnịrị Imehwaati.

²² A vaa mẹ̀ ọkarẹyị yị Anidiboni, Aninebo, Ịbẹtị Idibiratayimi.

²³ A vaa mẹ̀ ọkarẹyị yị Anikiriyatayimi, Anịbẹtị-Igamuri ẹnịrị Anịbẹtị-Imewoni nịnị.

²⁴ A vaa mẹ̀ ọkarẹyị yị Anikeriyoti ọnịrị Anibozira nịnị, beri ẹkụra-ẹkụra ene hi ẹtẹ Imowabi, ẹ̀ẹ yà aha ẹnẹẹnẹ, ẹ̀ẹ va gụrị ẹtẹ.

²⁵ Ẹnẹyịmavara kà a sị ụkata Imowabi gara ha o.

²⁶ Ọ kà à Animowabi nịnị eche, agụvị ka ẹnịnị ẹ́ raà kụ̀ hịrẹ ọnị. Ẹnẹyịmavara Animowabi nịnị vee muna ahẹrẹ ẹnịnị, dị aza ee nyị wa unyi.

²⁷ Ẹwụ nịnị Animowabi, wáá tamayị nịnị ụ́ mẹmẹ mẹ Anisirẹrị nịnị isiya? Dị waa mẹ wa nịnị èee rere za ẹnịrị oyi nịnị avọọ.

²⁸ Ẹwụ nịnị ana ra hi ẹtẹ Imowabi, zwe hụrẹ ẹkụra awụ nịnị dị wa na tẹ̀ hi ịnị akakana ịrẹta nịnị. Sị́ mẹmẹ nịnị anka arivadi ana na mẹ ịrẹngwẹ anị tu irenu ụtẹha avọọ.

²⁹ Ẹnẹyịmavara kà Animowabi nịnị aa sị ẹngụ ẹnịnịị tụ ẹba baaba. Ọnị ộ wụ́ ẹnịnị mẹmẹ aa sị ẹngụ ẹnịnịị tụ ẹba, di eyee wùu zị. Ọnị ộ wụ́ eyi ene eyee sii ré ẹngụ ẹnịnị.

³⁰ Ọ kà ọnị ộ yẹ Animowabi nịnị meme ee wùu zị tụ ịnị osusu. Avaba oto ene eyee wo vị ọọhẹ. Apẹ kẹnẹ ẹyaa mẹ nị.

³¹ Avọọ ọnị aa jị òrèrè boro-boro agụvị avaba Animowabi nịnị, agụvị anị ịzị aā hị́ Ịkị-Ịhẹrẹsị.

³² Ọ kà ọnị vaa jị òrèrè agụvị aza ene hi ịzị aā hị́ Isibima. Ẹnịnị ọnị vaa jị oreree yị huni Anijaza nịnị nị. Ẹkụra Isibima, vị ụ sị mẹẹ anka ọchị ịvayịnị ọnị avọ anị dà jịnẹ oku, dị ọ́ tana huu na ngụ Ijaza nị. Ama booro aanị, ọnịvị awụ nịnị ẹ́ sị ẹtụtụ awụ nịnị du ha saka-saka.

³³ Ẹ́ yị kụkụ nyị ayohine vụrụ-vụrụ ẹtẹ Imowabi anaa maanị mẹ̀ ịsa ẹtẹẹtẹrẹ. Ẹnẹyịmavara kà ọnị ọ́ raa mẹ ka asị a kụkụ mẹ eche ịzị aā yaa kwọrọ ẹtụtụ ana a sị mẹ eche. Ẹ́ yị kụkụ nyị ọza ana vọrọ ka ọọ mẹ eche, dị ọ jị ahẹ ayị anị oo mee hine.

³⁴ Aza ana ra hi ẹtẹ Ịhẹsịbọnị ọnịrị Eriyare aa jị òrèrè booro-booro, dị aza ene hi ẹtẹ Ijahazi aa wụ́ ọngwẹ ẹnịnị ẹ́ maa jị òrèrè nị. Aza ene hi ẹtẹ Izowa ệ wụ́ orere ẹnịnị, dị á wụ́ ọ huu na ngụ Ihoronayimi ọnịrị ịzị aā hị́ Egirati Isirisiya nị. Okuha ana yà ẹtẹ Inimirimi vị ana hyakụ wụ.

³⁵ Ẹnẹyịmavara kà ọnị ẹ́ yị ma vana zẹẹ ka Animowabi nịnị ẹ̀ mẹ̀ ịsọvọ yị ori ẹnịnị ịzị ẹyaa mẹ ori.

³⁶ Ọ kà, agụvị avọọ, ọnị aa zị ẹngụ yị Animowabi ọnịrị anẹkụra ana aā hị́ Ịkị-Ịhẹrẹsị nịnị. Ọnị aa zị ẹngụ ụ yị wa anka ọza enee hú okokoro izoku avọọ, agụvị ka avaba ịsị ẹnịnị nyị ộ ta.

³⁷ Avaba ẹnịnị ẹ́ sị ịrẹsụ ẹnịnị ọnịrị ịrẹwa ẹnịnị kụ́ hụyẹ-hụyẹ. Avaba ụvọ ẹnịnị vị ẹnẹ tọ̀ ụnava chọ̀vọ-chọ̀vọ, dị ọzọza kụkụ vụ ịta suku-suku nị.

³⁸ Ẹnẹyịmavara kà, wèe tu avaba enoze irehi Imowabi ọnịrị ịnị orere ẹnịnị, wé yi re ịsị ọsa huni ka ọzọza aa zị ẹngụ. Ẹyaa zị ẹngụ agụvị ka ọnị ọ sị Imowabi gara ha anka ụnọkọ ọnị ọzọza ka ẹ́ yị nyị ịsị ọnị aa sịị mẹ avọọ.

³⁹ Ọ kà, asị Imowabi gara ha o! Waa jị òrèrè boro-boro nịnị ka, asị ụhị mẹ nyị Imowabi nịnị o!

⁴⁰ Ẹnẹyịmavara ộ kà a ka ẹkụra ọnya vaa kụ́ ịrẹkụ vee tu Imowabi obonobono anka ukokoro me vee che ịsa avọọ. O vee hi wa eyi.

⁴¹ Ẹkụra-ẹkụra ene hi Imowabi ọnịrị irehi ọbanyị ọnị isoja ẹnịnịị yaa sere ẹtẹ vị ọnị ẹkụra ọnọọ vaa za. Ịhị angwa vị ene vee hi isoja Animowabi nịnị anka ọnyẹnẹẹ anaa barẹẹ avọọ.

⁴² Ẹnẹyịmavara kà, e vee vu avaba Imowabi ẹtẹ agụvị ka ẹnịnị ẹ́ yị sị ụbanyị ọnị. (Ẹnịnị ẹ́ yi saasa ịrẹyị anị.)

⁴³ Ọ kà, ẹwụ nịnị Animowabi, ịsị e chire ọza angwa ee zi wu nịnị. Ụsị chị́ tịtẹ ee zi wu nịnị. Á rẹ sị ịrẹpa và tịtẹ ee zi wu nịnị o.

⁴⁴ Ọza enee zwè yị ịsị ee chire ọza angwa aanị, vee horo ngụ ụsị, ọza anaa jịnẹ hụụnị ụsị ọnọọ tụ ẹhẹ dị ịrẹpa za a, agụvị ka ụmẹ ọnị ọnị Ẹnẹyịmavara jị ka ọnị ee sii vu Animowabi nịnị ẹtẹ ọ vị ọnọọ nị.

⁴⁵ Aza ene zwè ka ẹnị ẹ̀ na tẹ̀ ẹkụra ana aā hị́ Ịhẹsịbọnị jẹẹ, é yị re aza mẹ ọgụvọ yị wa, agụvị ka ẹkụra ọnọọ aa rị ịra. Ẹkụra Isihoni ana vị ohinọyị aa rị ịra; ịra ọ sị da hụụ ịzọọ va ngụ ẹtẹ Imowabi. Ọ sị ọvịdị-ọvịdị ẹkụra ẹnịnị ọnịrị ataba ẹnịnị rị ịra.

⁴⁶ Ẹwụ nịnị Animowabi ẹ̀ nyarị iruwa. Asị aza anaa mẹ ori ana aā hị́ Ikemosi vú ẹtẹ o. Asị ezi anọrụ ẹnịrị ezi anẹẹ awụ nịnị za ọrịhị ne hi aha ọsa ọ.

⁴⁷ Ama, Ẹnẹyịmavara kà, ụmẹ rẹ vanaa vẹ, dị ọnị mẹ ka bo zee yị Imowabi, dị ọọ yara. Avaba ịsa ọnị Ẹnẹyịmavara kà ọnị vaa mẹ Imowabi yi o.