Ijeremaya 46 - IWE ỌNỊNỊ

Ịrẹyị ọnị Ẹnẹyịmavara kà ịnị ịpa Ijipiti

¹ Ẹkụhị ọnya, Ijeremaya ka Ẹnẹyịmavara ộ ka ịrẹyị yị ọnị ịnị ịpa ẹkụra ọrụrụ-ọrụrụ.

² Ịrẹsụ Ijipiti o nyima hụrẹ nị. Ịsị ọ ka yị ọnị ịnị ịpa ọkụrẹkụ ohinọyị Ijipiti ana aā hị́ Ineko yị. Inebukadineza, ohinọyị Ịbabịrọnị ộ nyị ẹbẹẹba ohinọyị Ineko ọnọnị ịzị aā hị́ Ikakemisi, ọ̀ sị gụrị irehu Éhwirate. Ịrayị ọhụna ọnị Ijehoyakimi sị rị ohinọyị Ijuda, ọ́ vavọọ nyị ẹbẹẹba Ineko nị.

³ Ẹnẹyịmavara kà, ọdọvịdị ọkụrẹkụ Anijipiti nịnị ê nowu ka, ọzọza ọ̀ sị ogonto anị, dị aa nọ ịrẹkụ o!

⁴ Ẹ ka, ọzọza ò tenyi umaata anị ẹngụ, dị ẹ̀ tụra a. Ẹnịnị è tò, dị ọzọza ò kú amu enyusẹ-enyusẹ anị. Ọzọza ọ̀ sị ọha anị dị ò ne e, dị ẹ kụ ẹnya ịrẹkụ ẹnịnị hi ẹngụ.

⁵ Ama Ẹnẹyịmavara ộ họ̀ ka, sị ọnị ee ré anị kẹ? Isoja Anijipiti nịnị aa hụrẹ ayịnẹ, Ẹnịnị ee zwèe vaa nọ ịrẹma.

⁶ Aza enee zwe echi hu kere-kere, ẹ́ yị zụ na, isoja ẹnịnị ẹ́ yị ha. Ẹnịnị ệ vangga, dị ẹ́ sẹ ẹdụ va hi ẹtẹ eyi ẹbẹẹba, ọ̀ sị gụrị irehu Iyuhwuretisi nị.

⁷ Ẹnẹyịmavara kà, ẹnẹ maanị aa jị ayị anka irehu ana aā hị́ Ịnayịrị avọọ aanị? Dị aa jị ayị anka irehu anaa ka jịnẹ ụtụụtọ anị avọọ?

⁸ Anijipiti nịnị ẹ maanị aa jị ayị anka Ịnayịrị avọọ, dị ẹ yaa jị ayị anka irehu anaa ka jịnẹ ụtụụtọ anị avọọ nị. Anijipiti nịnị ka, ẹnị vaa kwẹẹtẹ, dị ẹnị gara hị́ avaba ẹhẹ. Ẹ ka ẹnị vee vú ẹkụra ọrụrụ-ọrụrụ ọnịrị aza ana ra hi ịzọọ ẹtẹ.

⁹ Kà a ka à kụ umaata ọnịrị ụkẹkẹ ịrẹkụ hi ẹhẹ. Kụ isoja nịnị hi ẹhẹ, kụ́ Anẹkụra ana aā hị́ Isudanị ọnịrị Aniribiya ana yara kụ ịrẹkụ hi ẹhẹ. Na kụ Anẹkụra ana aā hị́ Iridiya ana yara ne ọpa ẹtẹẹtẹrẹ hi ẹhẹ nịnị.

¹⁰ Ajịnị vị ẹkụhị Ẹnẹyịmavara Ochẹtẹẹngụ, Ananyị avaba ọda. Ajịnị aa họ̀ oponu nị. Ajịnị aa sị ụya rị ọnịvị anị nịnị nị. Aza vị ọnị ọ́ vaa wụ̀ pooro ne tu ịjị oo si du ọ eyi, dị ọ mẹ ka eteesu ò hú ẹnịnị pooro ne tu ka asị ó kuku zụ hu. Ajịnị Ochẹtẹẹngụ aa sị azaa mẹ̀ ịsọvọ eyi ẹbẹẹba ọ̀ sị gụrị Iyuhwuretisi nị.

¹¹ Ẹnẹyịmavara kà, ẹwụ nịnị Anijipiti, ẹ̀ nọ ẹtẹ Anigiriyadi dị we ne si ahọ̀nọ nịnị. Ẹ́ yị rẹ va nyị ịsị ahọ̀nọ awụ nịnị zụ mẹ. Ẹ́ yị nyị ịsị ẹ zụ mẹ wụ nịnị ụkụ o.

¹² Anẹkụra ana vọ ẹ raa wụ ka, á raa mẹ̀ ụhị nyị wụ nịnị. Avaba aza ệ wụ́ ụ mee nowu nịnị. Isoja awụ nịnị ọnya ộ vangga jịnẹ ọsa, dị ẹnị ẹyịva dudu sẹ ẹdụ va hi ẹtẹ nị.

Inebukadineza mẹmẹ vaa vẹ

¹³ Ijeremaya ka, ụmẹ ọnị Inebukadineza, ohinọyị Ịbabịrọnị sị kụ́ ịrẹkụ ve tu Anijipiti, Ẹnẹyịmavara ộ kà ịrẹyị yị ọnị, ọ ka

¹⁴ Ọnị ọ̀ na kà ịrẹyị ọnọọ ẹkụra ana aā hị́ Imigidọrị, Imemihwisi, ọnịrị Itapanihesi ịnị ẹtẹ Ijipiti. Ọ kà ọnị ọ̀ kà a ka: Ọzọza o tenyi ẹngụ, dị ọ̀ vụ̀ ịrẹvụ ka asị a nyị ịsị ẹ mẹ̀ ọnị; agụvị ka a vaa kụ ịrẹkụ vee du avaba ịsị ụ nyịị ha nịnị.

¹⁵ Sị ẹ gụ ori awụ nịnị ana aā hi Apisi sẹ ẹdụ? Ẹnẹyịmavara ọ tụ ụvọ nyẹtẹ nị.

¹⁶ Isoja awụ nịnị ẹ́ kụ vangga, dị ẹ́ sẹ ẹdụ và hí ẹtẹ nị. Ẹyaa kà a yị ẹngụ ka, ọzọza ọ kwẹẹtẹ dị ẹnị ẹẹ ka anda ẹnịnịị na eehi; à vẹ dị ẹnị è zwe hụrị eyirẹkụ ọnị ọnịvị ẹnịnị kụ vẹ aanị o.

¹⁷ Ẹnịnị vaa kà a ịzọọ ka, irenu kẹnẹ, ohinọyị Ijipiti aa nyị zị nị. Ịsị a vọrọ ka ọ̀ vị aha yị ọ, ọ sị jị ọ nyee da.

¹⁸ Ẹnẹyịmavara Ochẹtẹẹngụ ka, ọnị ọ vị ohinọyị nị. Ọ kà ọza ana kụ ịrẹkụ ee vee tu wu nịnị vị ana vaa nyị ụkataa hu wu nịnị anka ataba Ịtaabọ mẹ nẹba huni ataba ana vọ. É vee huna wụ nịnị anka ataba Ịkamẹrị mẹ dà jịnẹ oku avọọ nị.

¹⁹ Ọ kà ẹwụ nịnị Anijipiti ò tenyi ka aa vaa za awụ nịnị ọrịhị. E vee vú Imemihwisi ẹtẹ. A vaa jị ọ eburu dị ẹ yị nyị ọza ana kụkụ ra ịzọọ.

²⁰ Ẹtẹ Ijipiti vị ana sị mẹ ụnọ ene zoza ẹtẹẹtẹrẹ avọọ. Ama dị ịsị enee che ọza kụ ịrẹkụ hụrị Ịbabịrọnị ve tu ọ nị.

²¹ Isoja ẹnẹ ẹ na hị́ ka ẹ̀ vaa gụ ẹnị ụvọ vị ana tụ ọkụmị jẹẹ anka ozi ụnọ avọọ. Ẹnịnị ẹ́ yị va zụ jẹẹ kụ ịrẹkụ. Ẹnịnị vị ene zwe varẹma. Ẹkụhị ụyọrị ene e ve sii vu Ijipiti ẹtẹ o tù aanị nị ọ.

²² Anijipiti nịnị ee zwe dị eyee nọ ohi anka ẹ́wụ́ avọọ nị. Ọnịvị ẹnịnị vị ana kụ ịraga rị ụvọ ve tu wa anka aza ana aa má ọchị avọọ.

²³ Uruku rimi-rimi vị ene e vú ẹtẹ. Ẹnịnị ệ rụrụ pooro, ọza ẹ́ yị zá wa ịrịka. Isoja ẹnịnị ẹ rụrụ huni akụvarịva nịnị.

²⁴ Ẹnẹyịmavara kà ọnị ọ sị ọ ka: A raa mẹ̀ ụhị nyị Anijipiti nịnị da. Anibabironi ẹ̀ sị wa huna.

²⁵ Ẹnẹyịmavara Ochẹtẹẹngụ, Ohomorihi Anisirẹrị ka, ọnị vaa sị ụyaa rị ori Anitebesi ana aā hi Amọnị. Ọnị vaa sị ụyaa rị Ijipiti ori anị nịnị beri ohinọyị ẹnịnị ọnịrị avaba aza ana sị ayị tụra ohinọyị ọnọọ.

²⁶ Ọ kà, ọnị vaa sị wa chire Inebukadineza, ohinọyị Ịbabịrọnị ọnịrị isoja anị enee sì wa isu ụvọ. Ama, ọ̀ọ da ku chee, aza rẹ vanaa ra Ijipiti anka ịyẹẹyẹ.

Ẹnẹyịmavara vanaa dọ aza anịị ha.

²⁷ Ẹnẹyịmavara kà, ẹwụ nịnị aza anị, Anisirẹrị, asị ụ hí angwa nịnị. Asị ayị hụrẹ wụ nịnị ịnẹ. Ọnị vaa dọ wụ nịnị ha hụrị aha ẹnẹẹnẹ, ịzị a za wụ nịnị ọrịhị ne hi avọọ. Ụ vanaa và a vẹ eehi awụ nịnị, dị waa mẹ ẹhẹ awụ nịnị ẹngwọọrọ-ẹngwọọrọ. Ọ kà, ọnị vee sere wu nịnị, dị ọza é yi me vene chire wu nịnị angwa.

²⁸ Ọ kà ọnị vaa vẹ dị ọnị vaa dọ wụ nịnị tụ. Avaba ẹkụra ọnị ọnị dụ wụ nịnị ne hi vị ọnị ọnị vee vú ẹtẹ. Ama ọnị é yị vee vu wu nịnị ẹtẹ. Ọ kà ọnị ẹ́ yị vaa navọ ka asị ụ rị ụya nịnị, ama ịhị ọnị aa sị ụyaa rị wụ nịnị, ọnị vaa vayị awụ nịnị.