Ijeremaya 44 - IWE ỌNỊNỊ

Ụtụ ọnị Ẹnẹyịmavara tụ hi Anisirẹrị ịnị ẹtẹ Ijipiti.

¹ Ijeremaya ka, Ẹnẹyịmavara ộ kà ịrẹyị yị ọnị ịnị ịpa avaba Anisirẹrị ene hi Ijipiti. Ẹnịnị vị ene hi ẹtẹ Imigidori, Itehahwinehesi, Imemihwisi ọnịrị eyi ụvẹtẹ Ijipiti.

² Ẹnẹyịmavara Ochẹtẹẹngụ, Ohomorihi Anisirẹrị ka, ẹwụ nịnị ụvọta ô ré ọnị mẹmẹ vú Ijerusarẹmị ọnịrị ẹkụra ana vọ hi Ijuda ẹtẹ, ọ ka, vá ngụ ọyaanị ẹnịnị vị ana yị jị eburu va hi ẹtẹ, dị ẹ̀ yị nyị ọza ana ra ịzọọ.

³ Ka Anị ịzọọ ệ mẹ̀ ebira odivi, ọnịrị ka ẹnịnị ệ mẹ ayị kụ ọnị, ọnị vavọọ mẹ wa nị. Ẹnịnị ẹ naa mẹ̀ ịsọvọ hi ori, dị ẹyaa hẹkẹ ori ọnị ẹwụrị wa ne beri ohiku awụ nịnị ẹ̀ yị vịdị yẹ́ da nị.

⁴ Ẹnẹyịmavara kà, ọnị ộ tụ́ ezi ahụ anị ọnịsẹ nịnị hi wụ nịnị pooro, ka wa hụụnị ịsị edivi ẹnẹnị ọ̀yị mẹ agụvị ka ọnị ẹ́ yi sì ịrẹyị anị.

⁵ Ama wẹ yị wụ nịnị. Wé yị dọ ka wa hụụnị ịsị odivi ọnị waa mẹ, dị waa mẹ̀ ịsọvọ hi ori nịnị.

⁶ Ọ kà agụvị avọọ ọnị vavọọ kụ ayị hi ẹkụra ene hi Ijuda ọnịrị avaba oze ene hi Ijerusarẹmị dị ọnị jị ịra da wa nị.

⁷ Ẹnẹyịmavara Ochẹtẹẹngụ, Ohomorihi Anisirẹrị ka, ọnị aa họ̀ wụ nịnị ka, sị ẹ vẹ dị waa mẹ ẹngụ ịsa edivi ẹnẹnị hi ẹngụ awụ nịnị aanị? Vị́ wee si ka we vú ẹngụ awụ nịnị ẹtẹ, dị asị a nyị ọza ana kụkụ vọ nị?

⁸ Ọ kà, sị ẹ vẹ dị waa mẹ ayị kụ ọnị nịnị? Waa va ra Ijipiti nịnị, dị waa mẹ ori nịnị, dị waa mẹ̀ ịsọvọ hi wa nịnị nị. Vị́ waa maanị aa mẹ ka we si vu ẹngụ awụ nịnị ẹtẹ, dị avaba anẹhẹ ẹ̀ kụkụụ si eyi wụ wụ nịnị, dị ẹẹ sị ịrẹha awụ nịnịị chìi hi aza nị?

⁹ Ọ kà, vị́ ayị wee hí wu nịnị ịsa odivi ọnị ohiku awụ nịnị mẹ ẹkụra ene hi Ijuda ọnịrị oze ene hi Ijerusarẹmị nị? Vị́ ayị wee hí wu nịnị ịsa edivi ọnị ẹwụrị ohinọyị Ijuda nịnị beri ese wu nịnị mẹ ịzọọ nị.

¹⁰ Ama wẹ yị va ka ẹngụ awụ nịnị chi pooro va ngụ ajịnị. Wẹ́ yị sị ụbanyị yị ọnị Ẹnẹyịmavara nịnị. Wẹ́ yị saasa ọda ọnị ọnị mẹ yị ẹwụrị ohiku awụ nịnị.

¹¹ Avọọ, ọnị, Ẹnẹyịmavara Ochẹtẹẹngụ, Ohomorihi Anisirẹrị vaa kwẹẹtẹ tu wu nịnị, dị ọnị vú avaba Ijuda ẹtẹ.

¹² Avaba Anijuda ana vọ, dị ẹ ka vị ẹnị aa naa ra Ijipiti nị, ọnị vaa mẹ ka è vú avaba ẹnịnị ẹtẹ. Avaba ẹnịnị vị ene vee su vaa hi Ijipiti, ẹ̀ẹ vị ọzọkụ, ẹ̀ẹ vị ozweyi. Enee su ịnị ịrẹkụ, dị ụngwẹ wụ̀ wa. Angwa vị ene vee hi aza enee re wa. Vị a vanaa si eyii wụ̀ wa, dị aza aa sị ịrẹha ẹnịnịị chi hi aza nị.

¹³ Ẹnẹyịmavara kà ọnị vaa kụ ịrẹkụ, ụngwẹ ọnịrị ụkụụ tu Anijuda ana ra hi Ijipiti, dị ọnị sị sị ụya rị wa.

¹⁴ Ọ kà ẹ́ yị nyị Anijuda ana vọ, ana va ra Ijipiti ana vaa ha. Ẹ́ yị nyị ọza ịnị ẹnịnị ana vaa vàa nọ Ijuda naa ra, ẹ̀ẹ daka ee si ka ẹnị ẹ̀ na ra ịzọọ, ẹ̀ẹ yị vị aza chee ọnị ịrẹkụ dụ hụrẹ Ijuda.

¹⁵ Ijeremaya ka, dị avaba aza ana yẹ́ ka ose ẹnịnị ệ mẹ̀ ịsọvọ hi ori, avaba anyẹnẹẹ ana jẹẹ ịzọọ beri Anisirẹrị nịnị ana ra hi eyi ụvẹtẹ Ijipiti, ẹnịnị aa gigirigi aanị, dị ẹ tu ọnị ohi ka:

¹⁶ Ẹnị ẹ́ yị dọ ịrẹyị ọnị ọnị ka Ẹnẹyịmavara ộ tụ ọnị ka ọnị ọ̀ va ka aanị nị.

¹⁷ Ẹ ka, avaba ịsị ẹnị ka ẹnị aa mẹ, ẹnị vaa mẹ nị. Ịsọvọ vị ọnị ẹnị vaa mẹẹ hị́ ori ẹnịnị ana vị ọnyẹnẹẹ. Ọnị ọ vị ohinọyị anyẹnẹẹ tụ ẹbẹẹba nị. Ẹnị vaa sị ẹnịrị ohiku ẹnịnị, beri ohinọyị ẹnịnị ọnịrị ọdọvịdị ẹnịnị mẹẹ mẹ̀ ẹ ẹkụra ene hi Ijuda ọnịrị oze ene hi Ijerusarẹmị nị. Avọọ ẹnị mẹẹ mẹ̀ ẹ dị ẹnị nyị ịsọyịrị gwẹtẹ, dị o zee yị ẹnị, dị ẹnị ẹ̀ yị nyị ẹngụkata ọnyọọnyị nị.

¹⁸ Ama ẹnị mẹ hụrẹ hụụnị ịsọvọ ọ̀ yị mẹ hi ohinọyị anyẹnẹẹ ana yà ẹbẹẹba, dị ẹnị ẹ̀ yị kụkụ và eche hi ẹtẹ yị ọ, ẹ̀ yị kụkụ vana nyị ịsị ẹnị nyị, dị ịrẹkụ ọnịrị ụngwẹ va wụ ẹnị va ha nị.

¹⁹ Dị anyẹnẹẹ ẹnịnị ẹnị rẹ ka, ụmẹ ọnị ẹnịị mẹ ịbụrẹdị nee vene ohinọyị anyẹnẹẹ ana yà ẹbẹẹba, dị ẹnị mẹ̀ ịsọvọ hị́ ọ nị; ẹnị và eche hi ẹtẹ yị ọ, ayị ọva ẹnịnị vị enee hine tụ ọ.

²⁰ Ijeremaya ka, dị ọnị kà a yị avaba ẹnịnị ana maanị tu ọnị ohi ka,

²¹ Vú wee ro nịnị ka, vị ayị hi Ẹnẹyịmavara kà, ẹwụrị ohiku awụ nịnị ộ vavọọ mẹ̀ ịsọvọ nịnị ẹkụra ene hi Ijuda ọnịrị oze ene hi Ijerusarẹmị nị? Vú wee ro ka Ẹnẹyịmavara ẹ yị kụkụ tamayị ka ohinọyị awụ nịnị, ọdọvịdị awụ nịnị ọnịrị aza ene hi ẹkụra awụ nịnị ệ vavọọ mẹ̀ ịsọvọ ịzọọ nị?

²² Agụvị avọọ, á jị ẹkụra awụ nịnị eburu, dị ẹ̀ yị nyị ọza ana kụkụ ra ịzọọ ajịnị anị nị. Aza enee kuku re e vị enee hí angwa, dị aza kụkụ aa sị ịrẹha anịị chii hi aza anị. Ẹnẹyịmavara kà ọnị ẹ yị kụkụ zụ sị ẹngụ dọ ịsa odivi-odivi ọnị waa mẹ nịnị.

²³ Ka wẹ́ yị saasa avaba ọda Ẹnẹyịmavara nịnị, wâ mẹ̀ ebira odivi, dị ụ naa mẹ̀ ịsọvọ hi ori nịnị, ọ mẹ ka ẹngụkata ọnọnị ò tu wu nịnị ọyaanị nị.

²⁴ Ijeremaya ka, ọnị ộ kà a yị avaba anyẹnẹẹ ọnịrị avaba Anijuda ana ra Ijuda ka, ẹ̀ wụ́ ịrẹyị ọnị Ẹnẹyịmavara kà,

²⁵ Ẹnẹyịmavara Ochẹtẹẹngụ, Ohomorihi Anisirẹrị nịnị ka, ẹwụrị ose ewu nịnị ọ sị eku hị́ ka, ụ vaa mẹ ịsọvọọ hị́ ori ọnị ụ ka ộ vị ohinọyị anyẹnẹẹ tụ ẹbẹẹba nịnị. Ịzẹyịza dị waa mẹ̀ ẹ nịnị nị. Oo zoza kẹ, ka tụ ọvịdị wa naa mẹ ịsị ọnị ụ hị́ eku ka ụ vaa mẹ̀ nịnị o.

²⁶ Ama booro anị, sị ụtọ pe ẹtẹ, dị wa wụ eku ọnị ọnị Ẹnẹyịmavara sị ịrẹha anị hị́ agụvị ẹwụ nịnị Anisirẹrị ene hi Ijipiti: Ọnị ẹ́ yị ma vana zẹẹ ka wa sị ịrẹha anị hị́ eku nịnị, di waa kà a ka: Waa sị Ẹnẹyịmavara ana hwọ hị́, dị ọ yàra hị́ eku nịnị.

²⁷ Ọ kà, ọnị ẹ́ yị ma vana zẹẹ ka ò zé wụ nịnị, ama ọnịvị awụ nịnị vị ene vee vu wu nịnị ẹtẹ. Avaba awụ nịnị vị ene vee su, dị ẹ yị nyị ọza ana vẹtẹ. Ọza ọnị ịrẹkụ ẹ̀ yị wụ, dị ụkụ wụ ọ.

²⁸ Ama aza chee ịnị awụ nịnị vaa ha, dị ẹnịnị é yi su. Ẹnịnị vaa và hụrị Ijipiti nọ Ijuda. Aza ana vọ avọọ vaa yẹ ọza ọnị ịrẹyị anị va sẹ, àa vị ịrẹyị ọnị Ẹnẹyịmavara yọ nị à vị ẹ́nịnị.

²⁹ Ẹnẹyịmavara kà ọnị vaa sị zụ̀ wụ nịnị ka ọnị vaa sị ụyaa rị wụ nịnị ịzị ẹnị; ọnịrị ka, ọnị mẹ kà a ka ọnị vee vu wu nịnị ẹtẹ avọọ, avọọ ọ́ mẹ vaa vị ịzẹyịza nị.

³⁰ Ọ kà, ọnị vaa sị Ihohwira, ohinọyị Ijipiti chire ọnịvị anị enee si ọ usu ụvọ, anka ọnị mẹ sị Ịzẹdẹkaya, ohinọyị Ijuda chire Inebukadineza, ohinọyị Ịbabịrọnị ụvọ. Ọnịvị anị ọ̀ vị, dị ee si ọ usu nị.